Aaʼuriiroʼu

Jaʼyasü naaʼu Jesuu alin maʼin waya nüpüla süka naapajiraain nikii waaʼu (Juan 15:13). Isasü wachiki wawalaajüin süpüshuaʼa tü naainjakat wapüleerua, eepejeʼe süpüla jaʼyain waaʼu kojutuin wamüin tia sükajee wakuwaʼipa (Col. 3:15). Kojutusü namüin na chainjanakana iipünaamüin naapajiraain nikii Jesuu naaʼu süka eein süpüla naapüin Maleiwa tü naʼatapajakat (Mat. 20:28). Süka neʼitaain maʼin naaʼin sünain naapajiraain nikii Jesuu naaʼu, wulesü nakuwaʼipa noʼuluʼu Jeʼwaa otta nüchoinniishii naya (Roma 5:1; 8:15-17, 23). Otta kojutusü namüin na yaainjanakana mmapaʼa naapajiraain nikii Jesuu naaʼu süka eein süpüla wulein nakuwaʼipa noʼuluʼu Maleiwa otta noʼttaain süchikumüin tü müliaa miyoʼusükat (Alat. Map. 7:13-15). Noutkajaapa juyawai na chainjanakana iipünaa otta na yaainjanakana mmapaʼa sünain tü Outkajawaakat eere Sotuin Waaʼin Outuin Jesuu, jaʼyasü naaʼu kojutuin namüin naapajiraain nikii Jesuu naaʼu. w22.01 23 püt. 14, 15

Tü aikat maʼin nümüin Jesuu shia tü kasa aküjünakat nüchiki. Mojutusai Maleiwa nümüin naashin na oʼutakana naaʼin (Mat. 26:64-66). Shapaasü maʼin naaʼin Jesuu sutuma tia, naʼatapajüinjeseʼe nükaaliinjünüin nutuma chi Nüshikai süpüla nülatüin süchikumüin tia (Mat. 26:38, 39, 42). Akachennüshi Jesuu sünain wanee wunuʼu süpüla taashin nutuma na judíokana suulia süsalajüin naya naainjala (Gal. 3:10). Süsalainjana naainjala na judíokana sükajee nnojoluin nekeraajüin nanüiki nümüin Maleiwa sünain naainjüinjatüin süpüshuaʼa tü nuluwataakalü anain naya. Otta müsia outajana naya sünainjee naainjala Adán (Roma 5:12). Saashin tü Pütchi naapakat Maleiwa namüin na israeliitakana, outajachi wanee wayuu kaainjarale nia. Shiasaʼa outapa nia, eeshi nükachennüle sünain wanee wunuʼu (Deut. 21:22, 23; 27:26). Shiasaʼa sutuma nükachennüin Jesuu sünain wanee wunuʼu, anainjatü nakuwaʼipa na judío ayoutakana nia paala. w21.04 16 püt. 5, 6

Jülüjataa waaʼin tü alatakat nümüin Jesuu süpülapünaa nuʼutunuin aaʼin. Aʼyaajünüshi nia natuma na surulaat romaanokana (Mat. 26:52-54; Juan 18:3; 19:1). Aʼyaajünüshi nia jee eʼikaajüsü maʼin nütapaʼa. Süchikijee tia, alüʼüjinnüshi nia wanee wunuʼu jawatüsü sümaa miyoʼuin maʼin. Eʼikaajüsü jee kashasü nüsapü Jesuu sutuma tia wunuʼukot. Najaralijain Jesuu tia wunuʼukot chamüin eemüinjachire nuʼutunuin aaʼin. Nayasaʼa na surulaatkana nataʼülaka wanee wayuu süpüla nülüʼüjainjatüin tia wunuʼukot (Mat. 27:32). Shiasaʼa nüntapa Jesuu chaa eeinjachire nuʼutunuin aaʼin, achitünüsü najapü jee nuuʼui sünain tia wunuʼukot. Sutuma tü naawainkat, eerulaasü tü najapükat sutuma tü külaawakat. Yalajanajaʼa na naʼaleewainkana otta tü niikat, aʼyalajüshii naya sutuma mojuin maʼin naaʼin. Otta na sülaülakana judío, nemeeʼerainpalashi nia (Luc. 23:32-38, Luc. 23:35, TNM; Juan 19:25). Kamaʼa müliain maʼin naaʼin Jesuu. Ajaʼlajüsü naaʼin Jesuu jee motsotüsü naaʼin. Süka nütüjaain saaʼu waneepiain nia nümaa Jeʼwaa, achuntushi nia nümüin süpülapünaachon outuin. Süchikijee tia, nejepülaaka jee outakalaka nia (Mar. 15:37; Luc. 23:46; Juan 10:17, 18; 19:30). Müliakaiche maʼin Jesuu soʼu nuʼutunüin aaʼin. w21.04 16 püt. 4

Piamasü pütchi nüpansaajaka Jesuu namaa na polookana waneemüin aluwataaushi: tü pütchi jeketkat eʼitaanüin nutuma Maleiwa münüsü wanee otta tü wane tü pütchi nüpansaajakat Jesuu namaa na aluwataainjanakana nümaa (Luc. 22:20, 28-30). Sünainjee tia piamasükat pütchi apansaajünakat, eeinapa süpüla naluwataain jee sacerdotein chaa iipünaa na aluwataaushikana otta müshia waneinnua anoujashii (Alat. Map. 5:10; 14:1). Na anoujashii chainjanakana chaa iipünaamüin katayüliikana oʼu, nanainpünaasü tia piamasükat pütchi apansaajünakat, nayainjana neʼe ekaka tü pankat jee asaka tü wiinokot sünain tü Outkajawaakat eere Sotuin Waaʼin Outuin Jesuu. Anuu tü naʼatapajakat nutuma Jeʼwaa: nnojoliinjana outuin naya piantua sümaa wuleinjatüin nakuwaʼipa, aluwataainjana naya nümaa Jesuu otta napüsheena naya na 144.000 anoujashii cheenakana nümülatuʼu Jeʼwaa (1 Cor. 15:51-53; 1 Juan 3:2). Natüjaa aaʼu naya anoujashiikana naneekünüin nutuma Jeʼwaa süpüla tia waneepiale naya nümaa Jeʼwaa jaʼitashii jamajüin naya atumawaa (2 Tim. 4:7, 8). w22.01 20 püt. 4, 5

Eejana piamashii kaʼruwarannuu akachennakana naʼatoʼu Jesuu (Luc. 23:40, 41). Shiasaʼa mapa, niyaawanajaaka wanee sünain nnojoluin kaainjalain Jesuu. Nümaka nümüin: «Jesúsuu, motojoyoo taya paaʼin puʼttapa sünain aluwatawaa» (Luc. 23:42). Nüküjain Jesuu tü pütchi süpülajatkat soʼukai nümüin chi kaʼruwaraikai süpülapünaa outuin nia süka nütüjaain saaʼu amüliajülin wayuu chi Nüshikai (Sal. 103:8; Heb. 1:3). Müleka wayaawajaale suulia tü kasa mojusü waainjapuʼukat otta kanourale waya sünain naapajiraain nikii Jesuu, moteerü naaʼin Jeʼwaa waainjala otta amülialaajeerü naaʼin waalin (1 Juan 1:7). Müleka nnojorüle müin motokoi naaʼin Jeʼwaa tü kasa mojusü waaʼinrapuʼukat, jülüja waaʼin tüü: süpülapünaa outuin Jesuu, amülialaasü naaʼin naalin chi kaʼruwarai eiwaikai kanoulain nünain, shialeekajaʼa nnojoleematüin nümülialaain aaʼin waalin Jeʼwaa, jama waʼyataain nümüin (Sal. 51:1; 1 Juan 2:1, 2). w21.04 9 püt. 5, 6

Eesü apünüinsü kasa eeka sünainjee noonooin waneepia Jesuu nümaa Jeʼwaa. Palajana, atüjaana aaʼuchi alaain Satanaa. Saaʼujee tü naaʼinrakat Jesuu atüjaana aaʼu eein süpüla noonooin waneepia wanee wayuu nümaa Jeʼwaa jaʼitasü niʼrüin müliaa. Piama, sünainjee naapüin Jesuu nikii saaʼu waainjala, eeshii süpüla aleewain waya nümaa Jeʼwaa otta eein süpüla katüin woʼu waneepia. Apünüin, sünainjee tü naaʼinrakat Jesuu kojutusü nünülia Maleiwa atumawaa otta atüjaana aaʼuchi niain Jeʼwaa anakai süpüla aluwatawaa. Oonooinjana waya waneepia nümaa Jeʼwaa sünain kasa süpüshuaʼa. Müleka woonoole waneepia nümaa Jeʼwaa jaʼitainna outuin waya, atüjaaneechi aaʼu alaain Satanaa, kojuteerü nünülia Maleiwa atumawaa otta atüjaaneerü aaʼu niain Jeʼwaa anakai süpüla aluwatawaa. w21.04 12 püt. 13, 14

Süchikijee süküjünüin alawaa nüchiki Jesuu, müliashi nia natuma na nüʼünüükana sümaa nnojoluin kaainjalayaain nia, meeʼerapalashi, aʼyaajünüshi jee akachennüshi sünain wanee wunuʼu. Motsotüsü naaʼin sutuma saalin tü nuuʼui otta tü najapü achitünakat. Mayaapejeʼe kapüleein nümüin yooto, ayatapejeʼe nüküjain süchiki waneirua kasa. Wainma kasa watüjaka sünainjee tü nümakat Jesuu süpülapünaa outuin nia. Watüjaaitpa saaʼu motuinjatüin waaʼin tü kasa mojusü aainjünakat wamüin otta weʼitaainjatüin waaʼin sünain nülatireerüin sooʼopünaa naaʼin Jeʼwaa tü waainjalakat. Talatüshii waya süka paaʼinwain waya namaa na wawalayuukana. Otta nnojo japülin waya sünain achuntaa kaalinwaa namüin müleka choʼujaale shia wamüin. Watüjaa aaʼu nükatchireerüin waaʼin Jeʼwaa jaʼitairü kasain alatüin wamüin. Wayaawata aaʼu jamüin choʼujaaka maʼin woonooin waneepia nümaa Jeʼwaa. Jaʼitainna outuin waya, weʼitaainya waaʼin nünain Jeʼwaa sünain kateerüin woʼu wachikuaʼa nutuma. w21.04 8 püt. 1; 13 püt. 17

Woushikajaale süchiirua nukuwaʼipa Jesuu, kateerü woʼu waneepia. Asakinnüshi Jesuu nutuma wanee jimaʼai washit süchiki tü naaʼinrüinjatkat süpüla katüinjatüin noʼu waneepia, anuu nünüiki Jesuu nümüin: «Aleʼejeechi pia püchikua tanainmüin süpüla tamaain pia» (Mat. 19:16-21). Anuu nünüiki Jesuu namüin waneinnua judío nnojoliikana anoujain sünain niain Kürisütoin: «Otta na taʼanneetsekana, [...] oʼunüshii tamaa süka neʼraajüin tanüiki. Eeʼiranajaaitpa naaʼin tatüma süpüla eeinjanain naya nümaa Maleiwa waneepia» (Juan 10:24-29). Kanoulashii waya nünain Jesuu wanaa sümaa waaʼinrüin tü nikirajakalü anain waya. Waaʼinrüle tia, nnojoleena waya ojuʼitüin suluʼujee tü wopu katüinjatkalü atuma woʼu (Mat. 7:13, 14). Süpüla washatüinjatüin nukuwaʼipa Jesuu, weʼraajüinjachi nia. Ekirajaainjana waya waneepia süchiki nukuwaʼipa Jesuu süpüla weʼraajüinjachin nia. Weʼraajüinjatü süchiki tü nukuwaʼipakat, süchiki tü jülüjakat naaʼin otta süchiki tü nuluwataakalü anain. Jaʼitainna kakaliain waya sünain anoujaa, wachajaainjatü sukuwaʼipa süpüla weʼraajüinjachin Jeʼwaa nümaa chi Nüchonkai. w21.04 4 püt. 9, 10

Eesia mojuwaire naaʼin chi aluwataaushikai Pablo sutuma tü kasa naaʼinrapuʼukat nnojoluiwaʼaya nunoujain. Naashin niakai, alanaʼaleepuʼushi nia sünain kaainjaralin suulia wayuu süpüshuaʼa (1 Tim. 1:15). Jamüshijaʼa nia müliapuʼushii nutuma na anoujashiikana, oʼunapuʼushi suluʼupünaa pueulo sünain achajawaa nachiki na anoujashiikana, nüpüreesajirüin naya jee naapüin nünüiki süpüla noʼutunüinjanain aaʼin noʼutku na anoujashiikana (Aluw. 26:10, 11). ¿Jamüsüche naaʼin Pablo niʼraajüle wanee nüchon wanee anoujashi eekai naapüin nünüiki süpüla nuʼutunüinjachin aaʼin? Mojusiaʼaya naaʼin Pablo sutuma tü naaʼinrapuʼukat, nnojotpejeʼe süpüla nunouteʼerüin tü naaʼinrapuʼukat. Niyaawata aaʼu Pablo outuin Kürisüto saaʼu naainjala, müshijeseʼe nümüin: «Aneekünüshi taya nütüma chi Maleiwakai süka anamiain neʼe nia tamüin» (1 Cor. 15:3, 10). ¿Kasa watüjaka nünainjee Pablo? Shia wayaawatüinjatüin saaʼu outuin Kürisüto saaʼu waainjala waneʼewai wakua otta eein süpüla aleewain waya nümaa Jeʼwaa (Aluw. 3:19). Tü jülüjakat naaʼin Maleiwa shia tü waaʼinrakat maaʼulu nüpüleerua jee tü waaʼinreetkat mapeena. Nnojoluitpa jülüjain naaʼin Maleiwa tü kasa mojusü waaʼinrapuʼukat (Is. 1:18). w21.04 23 püt. 11

Wainma judío eejanakana nükalioʼu Jesuu nnojoliikana anoujain sünain outuinjachin chi Mesíaskai. Anuupejeʼe tü aküjünatüjütkalia nüchiki Jesuu: «Sünainjee kaainjalain na wayuukana niashi aapaka nikii süpüla outa naaʼujee, kaainjarai nia saaʼin namüin na wayuukana, nia motuinjatka akajee naaʼin saainjala wayuu wainma, nuʼtteʼerüin tü wayuukoluirua» (Is. 53:12). Mayaainjeʼe süküjünatüjülüin outajachin chi Mesíaskai sümaa wayuu kaainjarannuu, ayatüshiʼiya nnojoliin anoujain nünain na judíokana. Süpüla nnojoluin wooʼulaain suulia anoujaa watüjaainjatü saaʼu shiimainre tü münakat wamüin. Wanaa sümaa nikirajüin Jesuu saaʼu wanee namüna nüküjain eejeenain wayuu aküjakana alawaa nachiki na nikirajüinkana (Mat. 5:11). Süpüshuaʼa tia alawaakat nia kanainjeejachikai Satanaa. Nootuin na waʼünüükana süpüla nüküjain alawaa wachiki (Alat. Map. 12:9, 10). Nnojoluinjatü woonooin amaa tia alawaakat suulia sümalajaain wanoula sutuma. w21.05 12 püt. 14, 16

Wakaalinja chi wekirajüinkai süpüla niʼitaain naaʼin nünain Jeʼwaa. Nüküjain Jesuu namüin na nikirajüinkana alin naya nüpüla Jeʼwaa jee nükaalinjeenain naya (Mat. 10:19, 20, 29, 30). Waküja nümüin chi wekirajüinkai eejeechin Jeʼwaa waneepia nümaa. Eesü süpüla waküjain nümüin nuʼuraajaiwa nümüin Jeʼwaa süchiki tü kasa nüsaʼwateekat sünain aʼyatawaa nümüin. Anuu nünüiki Franciszek, kepiakai chaa Polonia: «Wanaa sümaa nuʼuraajüin chi ekirajakai taya nüküjain nümüin Jeʼwaa süchiki tü tasaʼwateekalü amüin sünain aʼyatawaa nümüin. Süka teʼrüin nusoutuin Jeʼwaa sümüin tü nuchuntakat tapüleerua, oʼuraajüshiaʼaya taya. Tayaawataka saaʼu nükaalinjain taya Jeʼwaa wanaa sümaa tachuntuin kaʼi taʼyataaleruʼu süpüla toʼunuinjachin sünain tü outkajawaakat jee sünain tü outkajawaakat miyoʼu». Müleka nnojoliire wekirajüin wanee wayuu sünain tü Bibliakat, eeshii süpüla wakaalinjain na nekirajüinkana na wawalayuukana süpüla woutiisain naya. ¿Kasa waaʼinrajatka süpüla wountuin tia? Woʼuna namaa naya wawalayuukana nekirajapa wayuu. Watüjaa aaʼu kojutuin nümüin Jeʼwaa na wekirajüinkana, kojutusia nümüin tü waaʼinrakat süpüla wakaalinjain naya sünain arütkawaa nünainmüin otta aishiyaʼaya waya nüpüla sünainjee tia (Is. 52:7). w21.06 7 püt. 17, 18

Kojutusü wamüin tü Nünüikikat Maleiwa waashajeʼerüle shia waneepia. Nnojotsü anain waashajeʼerüle shia eepa kaʼi wapüla. Katsüinjeerü wanoula müleka waashajeʼerüle jee wekirajaale sünain tü Bibliakat waneepia. Nnojotsü wanaawain wakuwaʼipa namaa wayuu eekai naʼwaataain suluʼu natüjain maʼin naashin, süka jamüin, wanoujain sünain tü Nünüikikat Maleiwa (Mat. 11:25, 26). Sutuma wekirajaain sünain tü Bibliakat, wayaawata aaʼu jamüin mojuka sukuwaʼipa tü mmapaʼakat otta tü naaʼinrajatkat Jeʼwaa süpüla nunouteʼerüin shia. Ayataʼaya wakatchinrüin wanoula jee wakaalinja wayuu süpüla kanoulainjatüin nünain chi Kakumalakai kasa süpüshuaʼa (1 Tim. 2:3, 4). Waʼatapajüin maʼin tü kaʼikat eeinjatüle sümüin wayuu süpüshuaʼa tü sümakat Alateetkat Mapeena 4:11: «Alanaʼaleeshia maʼi pia [Maleiwakalee] sünain anain je sünain pülashin, süka piainjaʼa kakumalain kasakat süpüshua». w21.08 19 püt. 18-20

Na laülaashiikana müshii aka saaʼin arüleejülii. Sutuma tia, nachiaainjachi wanee wawala choʼujaale shia nümüin. Nachajaain sukuwaʼipa süpüla nütüjaainjatüin saaʼu wanee wawala tü naaʼinrajatkat süpüla talatüin naaʼin sükajee wanee pütchi namaka nümüin (Prov. 27:9). Aishii na wawalayuukana napüla na laülaashiikana. Jaʼyasü naaʼu tia wanaa sümaa nachiaain wanee wawala suulia naaʼinrajüin kasa mojusü (Gal. 6:1). Süpüla nüchiaainjachin wanee laülaashi jülüjainjatü naaʼin tü nümakat chi aluwataaushikai Pablo, müshi nia: «Müleka shiimüinre sünain alin tapüla wayuu, nnojoleerü akulajaain taaʼin sünain kamanewaa namüin [...], ayateechia taaʼinmajüin je tanoujeerü waneepia tü nüküjakat tamüin. Jaʼitashi kaainjalain nia, nnojoleechi taleejüin» (1 Cor. 13:4, 7). Jülüjale naaʼin tia wanee laülaashi, nüchiaweechi wanee wawala süka alin nia nüpüla otta naaʼinreerü shia süka anakalü akuwaʼipa. Eesüjaʼa süpüla naapaain sümaa wanee wawala tü achiaanakalü oulia nia niyaawatüle saaʼu alin nia apülawaa. w22.02 14 püt. 3; 15 püt. 5

Nukumajüin Jeʼwaa na aapieekana jee na wayuukana suluʼu lotuin nakuwaʼipa. Eʼrüijaapejeʼe wayumüin wanee aapiee «Satanaa», münüshi nia süka nüʼünüüin nia Maleiwa. Eʼrüijaashi wayumüin Adán sümaa Eva nümüin Maleiwa nutuma Satanaa. Akaʼaya waneinnua aapiee jee waneinnua wayuu eʼrüliijaashii naya wayumüin nümüin Maleiwa (Jud. 6). Mojusü naaʼin Jeʼwaa jee jashichishi nia sutuma tü naaʼinrakat na israeliitakana. Ayatapejeʼe nüchecherüin naaʼin sümaʼinruʼu naʼatapajüin tü kaʼi najaʼttireenakalü oʼu na wayuu eʼrüliikana wayumüin. Naaʼinrapa tia Jeʼwaa aneena na aʼyataakana nümüin, na achechetkana aaʼin wanaa nümaa soʼunnaa tü kasa mojusükat. Naashin Satanaa aʼyataashi Job nümüin Maleiwa süka anain nukuwaʼipa nutuma (Job 1:8-11; 2:3-5). Ayatüsia nüküjain tia chi Yolujaakai nachiki na aʼyataashiikana nümüin Maleiwa maaʼulu (Alat. Map. 12:10). Atüjaaneerü aaʼu alin wapüla Jeʼwaa jee alawaain tü nüküjakat Satanaa wachiki müleka wachecherüle waaʼin soʼunnaa müliaa jee waneepiale waya nümaa Jeʼwaa. w21.07 9 püt. 7, 8

Süpüla wayaawatüin saaʼu choʼujaain wanouteʼerüin wakuwaʼipa nüküjain chi aluwataaushikai Pablo müin woʼutuinjatkai saaʼin tü wakuwaʼipapuʼukat paala (Roma 6:6, TNM). Nuuʼulaain Jesús nükachennüin sünain tü wunuʼukat süpüla talatüinjachin Jehová nutuma. Müshiʼiya wayakana, talateere watuma Maleiwa wooʼulaainjatü suulia tü akuwaʼipaa nnojotkalü anain. Waaʼinrüle tia, wuleerü waaʼin otta waʼatapajeerü katüinjatüin woʼu waneepia (Juan 17:3, TNM; 1 Ped. 3:21, TNM). Nnojoleerü nuʼwanajaain Jehová tü nümakat süpüla talatüinjanain waya nutuma. Wayainjana anouteʼeraka wakuwaʼipa süpüla waaʼinrüinjatüin tü nümakat (Is. 1:17, 18; 55:9). Woutiisapa pia, ayatüinjatü püchecherüin paaʼin suulia paaʼinrüin tü kasa mojusü suchuntaakat paaʼin. Choʼujaashi pükaalinjünüin, puchunta kaalinwaa nümüin Jehová otta puuʼulaa nükaalinjai pia sükajee tü nüpülainkat (Gal. 5:22; Filip. 4:6). Kapüleesü ooʼulawaa suulia tü kasa mojusü keejiapuʼukat paala wamüin, acheküsü waaʼinrüinjatüin waneirua kasa. w22.03 6 püt. 15-17

Nüküjain wamüin Jeʼwaa naapeerüin tü kasa choʼujaakat wamüin waaʼinmaale tü waʼyataainkat nümüin jee waaʼinrüle tü nümakat (Mat. 6:33, TNM). Sutuma tia, nnojoleerü jülüjain waaʼin shiain tü washirüükat talatüinjatka atuma naaʼin wanee wayuu jee anainjatka atuma nukuwaʼipa. Watüjaa aaʼu shiain talateerüin atuma waaʼin waaʼinrüle tü nüchekakat Jeʼwaa (Filip. 4:6, 7). Müleka eere wamaʼana nneerü süpüla wayaʼlajüin wanee kasa, anasü jülüjale waaʼin palajana jalouijeerüle shia wamüin jee süsetaajeerüle kaʼi wapüla süpüla waaʼinmajüin shia. Anasü wasakirüle waaʼin sünain tüü: «¿Shiache waaʼinmaaka kamaʼanaa kasa?». Jülüjainjatü waaʼin naapüin wamüin Maleiwa wanee aʼyatawaa suluʼu nupueulose süpüla waaʼinmaainjatüin shia. Müsüjeseʼe nnojoluinjatüin waaʼinmaain wanee kasa naata suulia. Nnojotkalaka washateein nukuwaʼipa chi washitkai ayoutaka niʼyataain nümüin Jeʼwaa jee ayoutaka nüchooin nia saaʼujee kachiiruain naaʼin washirüü (Mar. 10:17-22). w21.08 6 püt. 17

Pikirajaale sünain tü Bibliakat piʼraajeerü tü nukuwaʼipa Maleiwa jaʼyakat maʼin sünain tü kasa nukumalakat. Piyaawateerü maʼin saaʼu shiimain eein nia (Éx. 34:6, 7; Sal. 145:8, 9). Pikirajaale nüchiki Jeʼwaa kanouleechi maʼin pia shiʼipaʼaya, aijeechi maʼin nia püpüla jee aleeweechi maʼin pia nümaa. Pikiraja wayuu nüchiki Maleiwa. ¿Jameerü pünüiki nümüin wanee wayuu asakirakai pia shiimainre eein chi Maleiwakai? Nnojorüle pütüjaain maʼin saaʼu tü pünüikinjatkat nümüin, pikirajaa sünain tü karaloʼuta wamaʼanakat aashajaaka süchiki tia jee pikiraja chia wayuukai süka tia. Eesü süpüla puchuntuin kaalinwaa nümüin wanee wawala kakaliaichikai anoujain. Jaʼitairü nnojoluin naapaain chia wayuukai sümaa tia pütchikat, ayateeria akatchinraain punoula süka pikirajaain sünain tia. w21.08 18 püt. 14, 15

Nnojotsü choʼujaain wooʼulaainjatüin süpüshuaʼa tü kasa wamaʼanakat süpüla talatüin Jeʼwaa wamaa (Ecl. 5:19, 20). Nnojorüle wakooʼomüinreein waʼyataain nümüin Jeʼwaa shiiʼiree nnojoluin wooʼulaain waneirua kasa, meena waya maʼaka naaʼin chi wayuu washit anaajaakai nüpünajüin, chi naashajaakai achiki Jesuu (Luc. 12:16-21). Sülatüle wamüin wanee kasa, achuntushii waya kaalinwaa nümüin Jeʼwaa jee wachajaain sukuwaʼipa süpüla walatüin süchikumüin tia (Prov. 3:21). Wainma kasa anasü naapaka wamüin Jeʼwaa. Jaʼyeerü waaʼu kojutuin wamüin tü naaʼinrakat waʼwaajüle nia (Heb. 13:15). Waaʼinrüin tia wanaa sümaa wachajaain sukuwaʼipa süpüla wakooʼomüinrüin waʼyataain nümüin Jeʼwaa. Weʼreetkalaka anain wakuwaʼipa nutuma. Wachajaa maʼin sukuwaʼipa süpüla wayaawatüin saaʼu süka waaʼin wamüiwaʼa anamiain Jeʼwaa (Sal. 34:8). Waaʼinrüle tia, meerü wanüiki maʼaka naaʼin Jesuu soʼu nümüin: «Maa aka wane wayuu eekai talatüin naaʼin emirapa, akaajaa tayakai talateerü maʼi taaʼin müleka taaʼinrüle tü ajütünakat apüla taya nütüma Maleiwa, süka keeʼireein maʼi taaʼin tekeraajeein tü nüchekakat tapüleerua» (Juan 4:34). w21.08 30 püt. 16-19

Keeʼireesü naaʼin Satanaa yaletüinjatüin waaʼin süpüla washatüinjatüin nukuwaʼipa otta süpüla nnojoluinjatüin katüin woʼu waneepia. Müleka yaletüle naaʼin wane wayuu naashin Pablo, kasalajaneerü tia nümüin maʼaka kasalajanain nukuwaʼipa chi Yolujaakai (1 Tim. 3:6, 7). Eesü süpüla sülatüin tia wamüin, jaʼitainna jekenain jee kakaliainnale waya sünain aʼyatawaa nümüin Jeʼwaa. Chi wayuu eekai yaletüin naaʼin shia jülüjaka naaʼin nukuwaʼipa neʼe nümüiwaʼa. Wanaa sümaa sülatüin kasa mojusü wamüin, keeʼireesü naaʼin Satanaa jülüjainjatüin waaʼin wakuwaʼipa neʼe wamüiwaʼa suulia jülüjain waaʼin Jeʼwaa. ¿Eeiria eʼitaanüin paaʼu wanee kasa nnojotka paaʼinrüin? ¿Eeiria aainjünüin pümüin wanee kasa mojusü? Talateechi maʼin Satanaa weʼitaale naaʼu Jeʼwaa niain kasirüin tü alatakat wamüin jee nayale na wawalayuukana. Otta keeʼireesü naaʼin jülüjainjatüin waaʼin nnojoluin choʼujaain tü sümakat tü Bibliakat süpüla wanouteʼerüin wanee kasa (Ecl. 7:16, 20). w21.06 15 püt. 4, 5

Aluwataanüshi Ageo sünain wanee aʼyatawaa anaka maʼin nutuma Jeʼwaa. Eeshijaʼa niale Ageo noʼutku na wayuu ojuʼitakana Babiloniajee soʼu juyakat 537 süpülapünaa wakalia süpüla noʼunuinjanain Jerusalénmüin. Maʼaka jeʼra kaʼi süchikijee nantapaatüin chamüin na waneepiakana nümaa Maleiwa, oʼttamaatüshii naya sünain akumajaa süikalaaya tü piichi aʼwaajüleekat Maleiwa (Esd. 3:8, 10). Nayasaʼa na kepiakana pejepünaa nanain, nooʼuleʼerüin naya suulia akumajaa tü piichi aʼwaajüleekat Maleiwa, amalajaasü naaʼin jee ooʼulaashii naya suulia aʼyatawaa sünainjee tia (Esd. 4:4; Ageo 1:1, 2). Nuluwataainjeseʼe Jeʼwaa Ageo soʼu juyakat 520 süpüla nütütüleʼerüin naaʼin na judíokana jee süpüla nojuteʼerüinjatüin tü piichi aʼwaajüleekat Maleiwa (Esd. 6:14, 15). Tü pütchi nüküjainjatkat Ageo, süpülajatü sükatchinrüin nanoula na judíokana nünain Jeʼwaa. Atütülaasü naaʼin na judíokana süküjünapa namüin niain Jeʼwaa chi wainmakai asurulaatse. Süpüla anainjatüin tü naaʼinrakat na judíokana, neʼitaainjatü naaʼin nünain Jeʼwaa chi wattakai maʼin aalii aapiee nümaʼana. w21.09 15 püt. 4, 5

Maaʼulu yaa na aküjaliikana pütchi nüchiki Jeʼwaa, aijiraashii naya jee paaʼinwajiraashii naya suluʼu mmakat süpüshuaʼa. Naata maʼin wakuwaʼipa noulia na wayuu suluʼukana tü wane iküleesiakalüirua, süka jamüin, pawalaawajiraain waya mayaainjeʼe naatain woumain jee wakuwaʼipa. Jaʼyasü waaʼu aijiraain waya kottiraapa waya sünain tü outkajawaakat otta sünain tü outkajawaakat miyoʼu. Suluʼujee tia, wayaawata aaʼu wayain neʼe aʼwaajüin Jeʼwaa maʼaka nücheküin shia (Juan 13:34). Saashin tü Bibliakat, aijiraainjana maʼin waya (1 Ped. 4:8). Jaʼyasü waaʼu aijiraain waya wanaa sümaa motuin waaʼin naainjala na waneinnua jee wanaa sümaa waaʼinrüin tü anasükat shiʼipajee eekai shiʼrülüin wayumüin wamüin otta wanaa sümaa wachajaain sukuwaʼipa süpüla kamaneein waya namüin napüshuaʼa na wawalayuukana, jaʼitaichi chi eekai naainjain kasa mojusü wamüin (Col. 3:12-14). Süka aijiraain maʼin waya, ayaawatünüsü saaʼu wayain na anoujashii shiimainshiikana. w21.10 22 püt. 13, 14

¿Eesüche süpüla nunouteʼerüin nukuwaʼipa wanee wayuu macheʼekai süchiirua kaainjalaa nujuʼitinnüle naʼakajee na wawalayuukana? Jamüsüsaʼa. Wainmainna na wawalayuu ayaawatakana aaʼu anain maʼin nojuʼitinnüin naʼakajee na wawalayuukana natuma na laülaashiikana, süka jamüin, nayaawatüin saaʼu nanouteʼerüinjatüin nakuwaʼipa otta naleʼejüinjanain nachikuaʼa nünainmüin Jeʼwaa (Heb. 12:5, 6). Jülüjataa waaʼin tüü: niʼrüle wanee wayuu ayuulin wanee naʼanneetse, nükatalüinjatü shia suulia tü wane anneetkalüirua. Matüjainsat akatajirawaa tü anneetkalüirua, kottusü shia waneepia. Sükatannüle waneesia iralakuʼu müsü shia süchiirua tü waneirua. ¿Maalinsüche nüpüla chi arüleejüikai nükatarüle tia anneetkat? Nnojottaa. Nütüjaa aaʼu ayuuijeerüin süpüshuaʼa tü wane anneetkalüirua nuuʼulaale shia saʼaka. Nükatalüinjatsüjeseʼe shia süpüla anainjatüin tü waneirua. w21.10 10 püt. 9, 10

Kojutusü wamüin naʼakain waya na nüpüshikana Jeʼwaa. Eeshii wawalayuu suluʼujeejanakana mmakat süpüshuaʼa otta aijiraashii waya wapüshuaʼa. Keeʼireesü waaʼin wainmain na wayuu aʼwaajakana Jeʼwaa wanaa wamaa. Wayoutuinjeseʼe waaʼinrüin kasa mojusü mojeetka atuma pütchi nüchiki chi Washi iipünaajachikai otta süchiki nupueulose. Wachajaainjatü sukuwaʼipa süpüla anainjatüin wakuwaʼipa suʼupala wayuu süpüla kapülain naaʼin tü pütchi anasükat. Eesü süpüla süʼürülaain wayuu wanain jee süpüleeruain waaʼin sutuma jüüjüüin waya nümüin chi Washi iipünaajachikai. ¿Kasa waaʼinrajatka mmorüle waya sünain aküjaa süchiki tü wanoujakalü anain namüin na waneinnua? Soto waaʼin, nükaalinjeenain waya Jeʼwaa otta chi Nüchonkai. Nüküjain Jesuu namüin na nikirajüinkana nnojoluinjatüin shapaain maʼin naaʼin sünain tü nanüikinjatkat sümüin wayuu. Anuu nünüiki: «Aapüneerü jümüin soʼu maʼi kaʼikat tia tü pütchi jümüinjatkat namüin. Otta tü pütchi jüsouktüinjatkat aka, nnojoleerü jüleʼeruʼujeejatüin, aapüneerü shia jümüin nütüma chi Naaʼinkai chi Jüshikai Maleiwa» (Mat. 10:19, 20). w21.09 24 püt. 17, 18

Meematsü aka saaʼin tü nüküjakat Moisés (Sal. 90:1, noota). Anuu nünüiki maʼaka jeʼra kaʼi süpülapünaa outuin nia: «Kakaliaichi Maleiwa müin aka saaʼin miichi miyoʼu, müsü yaakai saaʼin nütüna puupunaajee» (Deut. 33:27). ¿Kasa watüjaka nüchiki Jeʼwaa sünainjee tü pütchikat «müsü yaakai saaʼin nütüna puupunaajee»? Anasü waaʼin wanaa sümaa weʼitaain waaʼin nünain Jeʼwaa. Eejeetpejeʼe kaʼi mojeetka oʼu waaʼin jee amalajaweetka oʼu shia. ¿Kasa naaʼinreetka Jeʼwaa wapüleerua sülatapa tia wamüin? (Sal. 136:23). Meerü niʼitaajeetkai saaʼin nütüna woupünaajee süpüla müin nütameʼerakai waaʼin (Sal. 28:9; 94:18). Süka watüjaain saaʼu nükaalinjeenain waya Maleiwa, eesü piamasü kasa weʼraka sünainjee tia. Palajana, ayatüshii naaʼinmajüin waya jaʼitashii jalain kepiain waya. Piama, jülüjashii waya naaʼin waneepia chi Washi iipünaajachikai. w21.11 6 püt. 15, 16

Nütüjaa aaʼu Jesuu neʼitaainjatüin naaʼin nünain Jeʼwaa na nikirajüinkana saainjünüle kasa mojusü namüin. Süpüla nachecherüin naaʼin nüküjain Jesuu namüin süchiki wanee wayuu outaa aʼwayuuse achuntaka kaalinwaa nümüin wanee pütchipüʼü manoujainsai, aküjünüsü tia suluʼu tü karaloʼutakat Lucas. Masütaajusü shia sünain achuntaa kaalinwaa nümüin chi pütchipüʼükai. Ayatüle saaʼinrüin tia, sütüjaa aaʼu sükaalinjüneerüin nutuma. Nükaalinjakalaka shia chi pütchipüʼükai. ¿Kasa watüjaka sünainjee tia? Anuu nünüiki Jesuu süchiki lotuin maʼin nukuwaʼipa Jeʼwaa: «Otta müshia chi Maleiwakai, ¿nnojoleena nükaaliijüin waya aneekuushikana achuntakana nümüin waneepia soʼukaʼi, saʼwai?» (Luc. 18:1-8). Anuu sooʼomüin nünüiki Jesuu: «Müleka ayatüle jia sünain jaaʼinrüin tü nuluwataakat anain, katsüinjeerü jaaʼin sünain anoujaa soʼuweena tü kaʼi taleʼejeechikat oʼu». Atüjaaneerü aaʼu katchinre wanoula, wachecherüle waaʼin jee masütaajule waya sünain achuntaa kaalinwaa nümüin Maleiwa saainjünapa kasa mojusü wamüin, shiaʼaya saaʼinraka tia tü wayuu outakalü aʼwayuuse. Sutuma tü wanoulakat, watüjaajeerü aaʼu nükaalinjeenain waya Jeʼwaa otta müsia wayaawatüinjatü saaʼu choʼujaain maʼin woʼuraajüin. w21.11 23 püt. 12; 24 püt. 14

Piakai jimaʼaikai, piakat majayütkat, ¿shiimainche müin kapükai saaʼin pukuwaʼipa sutuma tü nümakat Jeʼwaa? Shiaʼaya keeʼireeka naaʼin Satanaa jülüjain paaʼin. Jülüjeesü paaʼin nutuma müin talatakai maʼin naaʼin na wayuu oʼunakana suluʼu tü wopu jerutsükat sutuma tü naaʼinrakat. Jülüjeesü paaʼin nutuma nnojoluin talatüin paaʼin maʼaka talatüin naaʼin na koleejiajiraakana pümaa, na wayuu piʼrakana suluʼu Internet otta müin kapükai saaʼin pukuwaʼipa sutuma tü nümakat Jeʼwaa. Sotuinjatpejeʼe paaʼin nnojoluin kasajatüin nümüin Satanaa tü alatajatkat namüin na wayuu suluʼukana tü wopu jerutsükat (Mat. 7:13, 14). Eekajasaʼa Jeʼwaa nüküjain pümüin tü kasa anasü eejeetkat namüin na wayuu suluʼukana tü wopu mouisükat (Sal. 37:29; Is. 35:5, 6; 65:21-23). w21.12 23 püt. 6, 7

Watüjaa aaʼu anain maʼin motule waaʼin saainjala wayuu. Eepejeʼe süpüla kapüleein waaʼinrüin tia. Eesüjaʼa sülatüle tia nümüin chi aluwataaushikai Pedro (Mat. 18:21, 22). ¿Kasa waaʼinrajatka kapüleere wamüin motuin waaʼin saainjala wayuu? Palajana, jülüjainjatü waaʼin motowalin naaʼin Jeʼwaa waainjala (Mat. 18:32, 33). Mayaainjeʼe waaʼinrüin kasa mojusü waneepia, ayatüsia motuin naaʼin Jeʼwaa waainjala (Sal. 103:8-10). Nuchuntuin wamüin Jeʼwaa aijiraainjanain waya, müsüjeseʼe motuinjatüin waaʼin naainjala na wawalayuukana (1 Juan 4:11). Piama, jülüjainjatü waaʼin tü kasa anasü eekat sünainjee motuin waaʼin saainjala wayuu. Wanaa sümaa motuin waaʼin naainjala wanee wawala anasü waaʼin, anasü naaʼin chi wawalakai, paaʼinwashii waya namaa na wawalayuukana, anasü wakuwaʼipa noʼuluʼu Jeʼwaa otta nnojotsü shapaain waaʼin (2 Cor. 2:7; Col. 3:14). Apünüin, wachuntajatü nümüin Jeʼwaa nükaalinjaiwa waya süpüla motuinjatüin waaʼin saainjala wayuu, jama nuchuntuin tia wamüin. Jalia waya suulia nnojoliin paaʼinwajiraain waya nutuma Satanaa (Éf. 4:26, 27). Choʼujaashii nükaalinjain waya Jeʼwaa süpüla nnojoluin nimeejüin waya Satanaa. w21.06 22 püt. 11; 23 püt. 14

Aʼluwataashi David wattamüin suulia nuʼutunüin aaʼin nutuma Saúl chi aluwataakai saaʼu Israel. Süka nnojoluin kasain niküinjatüin, antüshi suluʼu tü pueulokot Nob süpüla nujulijüin jaʼraisü pan (1 Sam. 21:1, 3). Süchikijee tia, nuʼunaka namaa na nümaajanakana süpüla nounjulaain suluʼu wanee koʼushii (1 Sam. 22:1). ¿Jamüshi nuʼutuneeka aaʼin David? Achunjüsü naaʼin Saúl sünainjee niʼnnaajünüin maʼin David nuulia otta wainmain atkawaa nükanajaka. Nütüjaa aaʼu Saúl niyoutuichipain nia Jehová süpüla nuluwataainjachin saaʼu Israel sutuma nnojoluin noonooin sümaa nünüiki otta niaichipain David nüneeküin süpüla aluwatawaa saaʼu Israel (1 Sam. 23:16, 17). Süka niayüiyain Saúl aluwataain saaʼu Israel soʼu tia, wainma surulaat nümaajatü otta wainma na wayuu nümaajanakana. Müshijeseʼe nuʼluwataain David suulia nuʼutunüin aaʼin. ¿Nümalajeʼerüinjatche naaʼinruʼu Saúl tü nümakat Jeʼwaa sünain niainjachin aluwataain David nutuma? (Is. 55:11). Nnojotsü süküjain tia tü Bibliakat, watüjaapejeʼe saaʼu sünainjee tü naaʼinrakat Saúl nüchajaain outaa nooʼomüin. Na atkaakana nümaa Maleiwa akanajuushii naya noʼupala. w22.01 2 püt. 1, 2

Aʼyataashi maʼin Jesuu sünain aküjaa pütchi. Naaʼinrüin tia süka alin wayuu nüpüla (Luc. 19:47, 48). Otta müsia süka sümülialaain naaʼin naalin. Eesü kaʼi wattaka maʼin saalii wayuu aapajeekana nünüiki Jesuu namaa na nikirajüinjana, eeshii meküinre naya sünainjee tia (Mar. 3:20). Nüntapa wanee wayuu aipaʼa eemüin Jesuu, nnojotsü mojushiin tia nümüin, yootushi nia nümaa chia wayuukai. Wainma na wayuu nnojoliikana oushikajaain süchiirua nukuwaʼipa Jesuu mayaainjeʼe nüküjain Jesuu namüin tü pütchi süchikikat nukuwaʼipa Maleiwa sünain aluwatawaa. Maaʼulu waküjeein sümüin wayuu süpüshuaʼa tü pütchi anasükat (Aluw. 10:42). Süpüla wountuin waaʼinrüin tia anashii waküjale pütchi soʼu tü oora eekalü oʼu wainma wayuu suulia waneeküin tü oora anakat saaʼin wamüin neʼe. Talateerü maʼin naaʼin Jeʼwaa waaʼinrüle tia. w22.01 17 püt. 13, 14

Wainma wayuu maaʼulu nnojoliikana eʼitaain naaʼin nanain na wayuu aapünakana amüin laülawaa. Alatüsü tia süka nüikaleʼerüin pütchi na sülaülashiikana mma anaka atuma nakuwaʼipa na washinnuukana noulia na maʼletsekana. Eeshii na nnojoliikana eʼitaain naaʼin nünain Maleiwa sünainjee nakuwaʼipa na shikiipüʼükana tü iküleesiakat. Müshiijeseʼe wakaalinjainjanain na ekirajaashiikana sünain tü Bibliakat süpüla neʼitaainjatüin naaʼin nünain Maleiwa jee nanain na eʼitaanakana nutuma süpüla nuʼunirüin wakuwaʼipa yaa mmapaʼa. Nnojoishii nayainjanain neʼe namüiwaʼa na ekirajaakana sünain tü Bibliakat eʼitaainjanakana naaʼin nünain Jehová otta sünain nupueulose. Jaʼitainna kakaliainnale waya sünain anoujaa, ayatüinjatü weʼitaain waaʼin sünain lotuin süpüshuaʼa tü kasa naaʼinrakat Jehová suulia sümalajaain wanoula. w22.02 2 püt. 1, 2