Oʼutuupüroʼu

¿Eeiria jülüjain paaʼin iseerüin püchiki paaʼinrüin wanee kasa achuntunaka pümüin? Alatüsia tia nümüin David. Anuu nünüiki nuchuntapa nümüin Maleiwa: «Pükaalinja taya süpüla suchuntaain taaʼin taaʼinrüin tü pümakat» (Sal. 51:12). Mayaainjeʼe alin Jehová nüpüla David, eesü kaʼi kapüleeka oʼu nümüin noonooin sümaa tü aluwataakalü anain nia. Alatawaisü tia wamüin. ¿Jamüsüche makaʼa wakuwaʼipa? Wanee kasa shia sutuma waleʼeruʼuin süchiki kaainjalaa jee müsia tü wane shia sutuma nüchajaain maʼin sukuwaʼipa Satanás süpüla weʼrüliijaain wayumüin nümüin Jehová (2 Cor. 11:3). Otta waneʼeya shia sutuma kepiain waya naʼaka «na wayuu nnojoliikana jaa müin» (Éf. 2:2). Sutuma tia, kapüleesü wamüin oonowaa. Eejüinjatü waaʼin suulia weʼrüliijaain wayumüin, suulia tü nuuʼulakakalü aka waaʼin Satanás otta suulia wanaawain waaʼin namaa na nuluwataakana aaʼu. Müsüjeseʼe wachajaainjatüin sukuwaʼipa süpüla woonooin sümaa nünüiki Jehová otta sümaa nanüiki na naapakana amüin laülawaa. w23.10 6 püt. 1

¿Kasa watüjaka sünainjee tia kasa pülasü naainjakat Jesús? Shia nnojoluinjatüin yaletüin waaʼin. Nnojoishi aʼwaataain Jesús suluʼu nukuwaʼipa sünainjee wiinojaain nutuma tü wüinkat. Nnojoishi aaʼinrüin Jesús kasa shiiʼiree nuʼwaataain suluʼu nukuwaʼipa, nnojotsü yaletüin naaʼin jee nüküjain nuuntuin kasa süpüshuaʼa süka nükaalinjain nia chi Nüshikai (Juan 5:19, 30; 8:28). Washatüle nukuwaʼipa Jesús, nnojoleerü yaletüin waaʼin jee nnojoleena aʼwaataain waya sünainjee tü kasa wountakat. Nnojo waʼwaataain suluʼu wakuwaʼipa, shia anaka aluʼu waküjale wountuin kasa süpüshuaʼa süka nükaalinjain waya chi Maleiwa waʼyataakai amüin (Jer. 9:23, 24). Niainjachi kojutuka watuma Jehová sünainjee tü kasa waaʼinrakat. Nnojoliirejeʼe nükaalinjain waya, nnojotsüje kasain wountuin (1 Cor. 1:26-31). Chi wayuu eekai nnojoluin yaletüin naaʼin, nnojotsü choʼujaain nümüin nuʼwaajünüinjachin sünainjee tü kasa anasü naaʼinrakat napüleerua na waneinnua. Talatüshi nia süka nütüjaain saaʼu niʼrüin Jehová tü naaʼinrakat jee kojutuin shia nümüin (anasü paashajeʼerüle Mateo 6:2-4, TNM; Heb. 13:16). Talatüshi maʼin Jehová niʼrapa waya nnojoluin yaleteein waaʼin maʼaka nnojoluin yaletüin naaʼin Jesús (1 Ped. 5:6). w23.04 4 püt. 9; 5 püt. 11, 12

Nüküjain chi aluwataaushikai Pablo namüin na anoujashiikana kapülainjatüin naaʼin nakuwaʼipa na waneinnua, tia shia wanee pütchi nüshajakat Pablo nutuma Maleiwa. ¿Kasa waaʼinrajatka süpüla waaʼinrüin tü nümakat Pablo woutkajaapa namaa na wawalayuukana? Shia sotuinjatüin waaʼin nasouteein wanaa wamaa na wawalayuukana sünain tü outkajawaakat. Süpüla wayaawatüin saaʼu tia, jülüja waaʼin wanee sukuwaʼipa. Paashajaainjachire namaa na paʼaleewainyuukana, nnojoishi pia asoutuin pejeewa namüin, puuʼulaain naashajaain napüshuaʼa. Müsia neʼe tü waaʼinrajatkat woutkajaapa namaa na wawalayuukana, wacheküin maʼin nasoutuin wainma wawalayuu sünain tü outkajawaakat. Wanee kasa waaʼinrajatka süpüla watütüleʼerajiraain waaʼin namaa na wawalayuukana shia wooʼulaale nasoutuin sünain tü outkajawaakat (1 Cor. 10:24, TNM). Anasü paliʼirüle wanüiki wasoutapa sünain tü outkajawaakat. Waaʼinrüle tia, wainmeena na wawalayuu asoutakana sünain. Paliʼirüinjatü tü wanüikikat wasoutapa, nnojotsü wainmainjatüin tü pütchi waashajaakalü achiki. Püküjale süpüshuaʼa tü aküjünakalü achiki suluʼu wanee pütchi, nnojoleerü eein sooʼomüin pütchi süpüla nasoutuin na waneinnua. w23.04 22 püt. 11-13

Anasü ayatüle waaʼinmaain wakaalinjain na waneinnua sükajee waküjain pütchi namüin. Anashii nnojoliire ichein waya süchiirua tü wamakat waküjapa pütchi. Naata nakuwaʼipa na wayuu waashajaakana amaa otta tü nanoujakalü anain. ¿Jamüsü anaka washatüle tü naaʼinrakat chi aluwataaushikai Pablo? Nnojoishi ichein nia süchiirua tü nümakat otta aküjashi nia pütchi namüin na wayuukana wanaapünaa sümaa nakuwaʼipa. Nüjütüin nia Jesús süpüla nüküjain pütchi sümüin wayuu süpüshuaʼa (Roma 11:13, TNM). Süpüla nikeraajüin Pablo tü niʼyataainkat, aküjashi nia pütchi namüin na judíokana, namüin na griegokana, namüin na karaloʼutamaajakana, namüin na aʼyataaliikana suluʼu pünajüt, namüin na aapünakana amüin laülawaa otta namüin na sülaülashiikana mma. Nuuʼulaküin Pablo kasa süpüshuaʼa shiiʼiree nükaalinjain «wayuu maʼleekalia» (1 Cor. 9:19-22, TNM). Süpüla nüküjain pütchi namüin, jülüjasü naaʼin tü nakuwaʼipakat otta tü nanoujakalü anain. ¿Kasa watüjaka nünainjee? Aneerü sukuwaʼipa watuma süküjia tü pütchikat nnojoliire ichein waya süchiirua tü wamakat otta waküjale shia wanaapünaa sümaa nakuwaʼipa na wayuukana. w23.07 23 püt. 11, 12

Nnojoishiaaje malain wanee wayuu eekai anamiain, nüchecherüin neʼe naaʼin suulia naashichijaain süpüleeruaanüle naaʼin. Anamieechi wanee wayuu sutuma tü nüpülainkat Maleiwa (Gal. 5:22, 23, TNM). Sümaiwa paala, eesüjaʼa suchuntunule tü pütchikat «anamia» süpüla süküjünüin nüchiki wanee ama eekai nulumajuushin süchikijee kaaʼin nia paala sümaa jashichin nia. Mayaainjeʼe anamiain nia sutuma nulumajuushin, ayatüshia katchin nia. ¿Kasa waaʼinrajatka süpüla anamiain waya sümaa wachecherüin waaʼin suulia jashiee? Nnojotsü wountuin tia wamüiwaʼa, acheküsü wachuntuin nümüin Maleiwa tü nüpülainkat süpüla müinjatüin wakuwaʼipa. Wainma na ountakana tia, wainma wawalayuu kamaneekana namüin na wayuu asakirakana naya süchiirua tü nanoujakalü anain shiiʼiree natkaweein namaa. Sutuma müin nakuwaʼipa na wawalayuukana, anasü sünüiki wayuu nachiki na Aküjaliikana pütchi (2 Tim. 2:24, 25, TNM). w23.09 14 püt. 3

Chi aluwataaushikai Juan, niʼrüin chaa iipünaa 24 laülaashii sünain aʼwaajaa Jehová sümaa naküjain niainjachin aʼwaajünüin nümüiwaʼa (Alat. Map. 4:9-11). Wainma kasa naʼwaajaka aaʼujee Jehová na aapieekana. Süka chain naya nümaa, neʼraajüin maʼin nukuwaʼipa. Sünainjee neʼrüin tü kasa naaʼinrakat Jehová, naʼwaajeein nia (Job 38:4-7). Müshiʼiya wayakana, waʼwaajeein Jehová wanaa sümaa woʼuraajüin nümüin. Waaʼinrüin tia wanaa sümaa waküjain nümüin jamüin aika nia wapüla otta jamüin kojutukai nia wamüin. Waashajeʼerapa tü Bibliakat, jülüja waaʼin wanee kasa naaʼinraka Jehová kamalainka wamüin, tü weʼraajeetkalü anainjee nukuwaʼipa (Job 37:23; Roma 11:33). Waaʼinrapa tia, waküja nümüin Jehová tü jülüjakat waaʼin süchiki nukuwaʼipa. Eeshi süpüla waʼwaajüin Jehová saaʼujee nükaalinjain waya jee saaʼujee nükaalinjain na wawalayuukana (1 Sam. 2:1, 2). w23.05 3 püt. 6, 7

Soʼu 1919 Babilonia tü Miyoʼukat, tü shikiisükat tü iküleesia ekirajakat sünain alawaa, nnojoluitpa aluwataain shia naaʼu na aʼyataakana nümüin Jehová. Soʼu juyakat tia, eeichipa «chi achepchiee oonookai jee kekiikai maʼin». Anasü maʼin tia süka eeinnapain süpüla suluʼuin «tü Wopu Wulekat» na wayuu anamiakana (Mat. 24:45-47, TNM, Is. 35:8). Saaʼujee tü naaʼinrakat na wayuu yapakana atuma «tü Wopu Wulekat», atüjashii maʼin na wayuu suluʼupünaakana süchiki nukuwaʼipa Jehová jee süchiki tü naaʼinrüinjatkat (Prov. 4:18). Neeʼiratüinña nakuwaʼipa süpüla talatüin naaʼin Jehová namaa. Nütüjaapejeʼe saaʼu Jehová nnojoleerüin neeʼiratamaatüin nakuwaʼipa, müshiijeseʼe nikirajüin naya süpüla wuleinjatüin nakuwaʼipa shiʼipaʼaya. Talateena waya süka talateechin Jehová wamaa, meerü naaʼin süka nnojoleerüin waaʼinrüin wanee kasa mojusü paʼaraiisüpa tü Mmakat. Süpüla anainjatüin wanee wopu anoutunawalüinjatü shia. Soʼujee 1919 müsü sunoutunawaikai aaʼin «tü Wopu Wulekat» süpüla nojuʼitüin nooʼomüin na wayuu sulujunakana Babilonia tü Miyoʼukat. w23.05 17 püt. 15, 16

Na Laülaashii Jülüjakana Aaʼin na Aküjaliikana pütchi, nekirajüin na wawalayuu neʼipajanakana. Anasü maʼin natuma tü aʼyatawaa aapünakat namüin. Yapashii maʼin naya süpüla noʼunirüin nakuwaʼipa na anoujashiikana. Kottapa napüshuaʼa na aneekuushikana chaa iipünaa sülüʼütpa süpüla suʼttuin Armagedón, na anoujashii yaainjanakana saaʼu tü Mmakat ayateenaʼaya waneepiain sünain aʼwaajaa Jehová. Nounteerü tia süka niain Jesucristo chi Nekiipüʼükai. Soʼujee kaʼikat tia, ashutuneena aaʼu naya natuma waneinnua sülaülashii mma eʼnnaajünakana suluʼu tü Bibliakat süka tü anülieekat Gog chi chejeʼewaikai Magog (Ezeq. 38:18-20). Motsoʼojeerü neʼe sümaʼa tia otta akanajuujeena naya. Iseerü nachiki nooʼuleʼerüin na aʼyataashiikana nümüin Jehová naʼwaajüin nia, nuʼtteʼereena naya Jehová. Müshi Juan: «Teʼrakalaka watta naalii wayuu, isasü süchiki wayuu shiyaawajüin naya. [...] Wayuukana naainnua naya oʼttaakana süchikijee neʼrüin maʼin müliaa». Watüjaaitpa aaʼu noʼttaajeenain na aʼyataashiikana nümüin Jehová (Apoc. 7:9, 14). w24.02 6 püt. 13, 14

¿Kasa waaʼinrajatka süpüla naapüin wamüin Jehová tü nüpülainkat? Wachuntajatü shia nümüin, ekirajaainjana waya sünain tü Nünüikikat jee paaʼinwainjana waya namaa na wawalayuukana (Gal. 5:22, 23, TNM). Süpüla naapüin wamüin Jehová tü nüpülainkat, wuleinjatü wakuwaʼipa otta wuleinjatü tü jülüjakat waaʼin. Wooʼulaale sukumajaain kasa mojusü suluʼu waaʼin jee waaʼinrüle tü suchuntaakat waaʼin, nnojoleerü naapüin wamüin Jehová tü nüpülainkat (1 Tes. 4:7, 8, TNM). ¿Kasa amaa waaʼinrajatka suulia wataʼülüin sukuwaʼipa tü nüpülainkat Maleiwa? Müshi Pablo: «Nnojo mojutuin jümüin tü kasa alatajatkat naashin Maleiwa» (1 Tes. 5:20, TNM). «Tü kasa alatajatkat» shia tü pütchi nüküjakat Maleiwa sükajee tü nüpülainkat. Saʼakajee tü pütchi nüküjakat Maleiwa eesü tü kasa alatajatkat soʼunnaa tü nükaliakat otta tü alatajatkat nnojoluiwaʼaya süntüin. Nnojotsü jülüjain waaʼin wattayülüin tü nükaliakat Jehová jee nnojoleerüin weʼrüin Armagedón. Suulialeʼeya jülüjain waaʼin tia, eejüsü maʼin waaʼin süpüla tü nükaliakat Jehová. Müsüjeseʼe kachiiruain waaʼin wulein wakuwaʼipa otta waaʼinrüin kasa ayaawatünaka akajee waʼwaajüin chi Maleiwakai (2 Ped. 3:11, 12, TNM). w23.06 12 püt. 13, 14

¿Kasa naaʼinrajatka wanee anoujashi sujuʼinajaale shiyaakua wayuu masheʼinsat suluʼu serulaat, computador jee telewisoot? Chajaainjatü noʼu suulia. Süpüla wountuin tia, kojutuinjatü maʼin wamüin tü wakuwaʼipakat nümaa Jehová. Eesü video jee ayaakuaa eere nnojoluin maʼin jaʼyain sütapaʼa wayuu, eepejeʼe süpüla suchuntaain waaʼin kasa mojusü sutuma. Jalia waya suulia wanajaʼalüin tia suulia suchuntaain waaʼin ainkawaa (Mat. 5:28, 29, TNM). Müshi wanee laülaashi kanüliakai David, chejeʼewai nia Tailandia: «‹¿Anasüche nümüin Jehová tanajüle tüü mayaainjeʼe nnojoluin sünainpünaain shiyaakua wayuu masheʼinsat?›, maʼwaishi taya suluʼu taaʼin süpüla tayaawatüin saaʼu tü taaʼinrajatkat». Mmorüle waya saaʼu waaʼinrüin wanee kasa mojuka nümüin Jehová, waneekeerü kasa anasü. «Süpüla kekiinjachin wanee wayuu, kojutuinjachi nümüin Jehová». w23.06 23 püt. 12, 13

«Tü kuatta suluʼukat jipia» münakana amüin, eeshiijaʼa nayale na wawalayuu woutkajaakana amaa. Paaʼinwajiraale waya namaa na wawalayuukana soʼunnaa tia kaʼikat, naaʼinmajeena waya Jehová maʼaka nüküjatüjülin shia. Nnojotsü neʼe waaʼinmaainjatüin tü kasa anakat natuma na wawalayuukana, alinjanaʼaya maʼin naya wapüla. Nnojorüle waaʼinrüin tia, eeshii süpüla nnojoliin woʼttaain. Tü nükaliakat Jehová keemeerü maʼin sümüin wayuu süpüshuaʼa (Sof. 1:14, 15). Eejeeria tü kasa kapüleejeetkat wamüin wayakana aʼyataashiikana nümüin Jehová. Eejüle maʼin waaʼin müinmaʼa yaa, jimateerü waaʼin otta eeshii süpüla wakaalinjain na waneinnua soʼunnaa tia kaʼikat. Wachecherüle waaʼin, alateena waya süchikumüin tü müliaa weʼreetkat. Wamüliajiraale, aaʼinreena waya kasa anasü napüleerua na wawalayuukana süpüla wakaalinjain naya sünain tü kasa choʼujaajeetkat namüin. Aijiraale maʼin waya namaa na wawalayuukana, ayateena paaʼinwajiraain waya namaa. Müinjatü wakuwaʼipa süpüla naapüinjatüin wamüin Jehová tü kataakalü oʼuu süpüla kaʼikat süpüshuaʼa. Nnojoleetkalaka weʼrüin piantua tü kasa müliakalü atuma waaʼin (Is. 65:17). w23.07 7 püt. 16, 17

Eesü saashajaʼawaire tü Bibliakat süchiki katsüin maʼin naaʼin na aʼyataashiikana nümüin Maleiwa sümaiwa paala, eepejeʼe kaʼi matsüinka oʼu naaʼin. «Katsüinshi taya putuma maʼaka saaʼin wanee uuchi», müshi David wanaa sümaa yalayalain naaʼin. Eepejeʼe kaʼi mmotka oʼu nia (Sal. 30:7). Katsüinshi maʼin Sansón eepa naaʼu tü nüpülainkat Maleiwa. Niyaawatapejeʼe saaʼu wanaawain nütsüin sümaa wayuu nnojotpa shia naaʼu (Juec. 14:5, 6; 16:17). Naya wayuukana, katsüinsü naaʼin nutuma Jehová. Nütüjaa aaʼulia chi aluwataaushikai Pablo choʼujaain sükatchinnüin naaʼin nutuma Jehová (2 Cor. 12:9, 10). Eeshi ayuuire Pablo (Gal. 4:13, 14). Akaʼaya joo nia, nüchajaainjatü sukuwaʼipa süpüla suchuntaain naaʼin naaʼinrüin kasa anasü (Roma 7:18, 19). Eeshi mmorüle nia sutuma tü alateetkat nümüin (2 Cor. 1:8, 9). Wanaa sümaa iseematüin nüchiki Pablo wanee kasa, katchinreesia maʼin naaʼin sutuma nükatsüinrüin naaʼin Jehová. w23.10 12 püt. 1, 2

Süntajaʼawaire wekiiruʼu nnojoliin kasain anain apüla waya jülüja waaʼin nürütkeʼerüin waya Jehová nünainmüin (Juan 6:44). Jülüjasü naaʼin Jehová tü suluʼukat waaʼin jee tü kasa anasü waaʼinrakat, tü nnojotkat weʼrüin (2 Crón. 6:30). Eekalaka süpüla wanoujain sünain nünüiki Jehová nüküjapa wamüin kojutuin waya nümüin (1 Juan 3:19, 20). Eesüjaʼa mojuwaire waaʼin saaʼujee tü kasa mojusü waaʼinrakat nnojoluiwaʼaya waʼyataain nümüin Jehová (1 Ped. 4:3). Eeshii waneinnua wawalayuu kakaliainnakana aʼyataain nümüin Jehová achecherüinjanakana naaʼin suulia naaʼinrüin tü kasa mojusü suchuntaakat naaʼin. ¿Jama piakai? ¿Jülüjasüche paaʼin nnojoluin motuin naaʼin Jehová tü kasa mojusü paaʼinrapuʼukat? Mülejeʼeya paaʼin, nnojo mojuin paaʼin, nnojoishi piain neʼe alatüin amüin tia, alatüsia tia namüin waneinnua wayuu aʼyataapuʼukana nümüin Maleiwa. Jamüshijaʼa chi aluwataaushikai Pablo mojushaatasü naaʼin saalinjee tü kasa mojusü naaʼinrapuʼukat (Roma 7:24). Ayaawajaashi nia suulia naainjala jee woutiisashi nia. Mayaainjeʼe nuuntuin tia nüküjain niain maawain maʼin naʼakajee na aluwataaushikana otta niain chi kaainjaraireekai maʼin (1 Cor. 15:9; 1 Tim. 1:15). w24.03 27 püt. 5, 6

Wanee kasa watüjaka sünainjee tü kasa mojusü nüneekakat Jehoás, chi aluwataaikai shia anain waʼaleewajaale namaa na wayuu akaalinjeenakana waya süpüla anain wakuwaʼipa, maʼaka naaʼin na aikana apüla Jehová otta na talatakana atuma nia. Anashi nnojoire paʼaleewajaain neʼe namaa na wayuu wanaawakana ouyase pümaa. Soto paaʼin muloʼuin Jehoiadá nuulia Jehoás. Püneeküinjanale na paʼaleewajaainjanakana amaa, anasü püsakirüle paaʼin sünain tüü: «¿Nakaalinjainche taya süpüla katsüin maʼin tanoula nünain Jehová? ¿Natütüleʼerüinche taaʼin süpüla toonooin sümaa nünüiki Maleiwa? ¿Kamalainsüche namüin naashajaain nüchiki Jehová otta süchiki tü sümakat tü Bibliakat? ¿Kojutusüche namüin tü nuluwataakalü anain Maleiwa? ¿Nachiaainche taya neʼrapa taaʼinrüin kasa mojusü? ¿Anayaataapa neʼe nanüiki tamüin suulia jashichin taya namüin?» (Prov. 27:5, 6, 17). Nnojoliire alin Jehová napüla na paʼaleewainkana, anashii pükayalaale noulia. Eekajasaʼa aire Jehová napüla, anashii aleewale pia namaa, jama aneerüin pukuwaʼipa nanainjee (Prov. 13:20). w23.09 9 püt. 6, 7

Alfa shia tü palajatkat letra suluʼuka tü alfabeto griego münakat otta omega shia tü chiiruaajatkat letra. ¿Jamaluʼulu nünüiki Jehová wanaa sümaa nümüin «Taya chi Shikiishikai wanee kasa (Alfa noota) otta taya Sajaʼttakai akajee wanee kasa (Omega noota)»? Shia nüküjeeka achiki najaʼttiraleeinña wanee kasa nuʼttirüle shia. Anuu nünüiki Jehová nukumajaiwaʼaya Adán sümaa Eva: «Anakaja kachonniire jia, joulüiwa na juuʼuliwoʼukana sainküin mmakat süpüshua süpüla laülaainjanain jia saaʼu» (Gén. 1:28). Wanaa maʼin sümaa nüküjain tia Jehová, «taya chi Shikiishikai wanee kasa (Alfa noota)» müshi nümakai aaʼin. Shiasaʼa joo jooutpa na nüikeyuukana Adán sümaa Eva sainküinpünaa tü mmakat, na oonookana waneepia nümaa Maleiwa otta paʼaraiisüpa natuma tü Mmakat, «taya Sajaʼttakai akajee wanee kasa (Omega noota)», meechi nümakai aaʼin Jehová. Süchikijee kettaain nutuma Jehová nukumajüin tü sirumatuʼukat, tü Mmakat jee süpüshuaʼa tü saaʼupünaakat, eesü wanee kasa naaʼinraka wayaawataka akajee shiimain nikeraajeerüin tü keeʼireekat naaʼin, nükatalüin Maleiwa tü akaratshikat kaʼi süpüla kojutuinjatüin shia atumawaa (Gén. 2:1-3). Tü wayaawatakat sükajee tia shia kettaajeerüin nutuma Jehová tü keeʼireekat naaʼin süpüleerua wayuu otta süpüleerua tü Mmakat kettaapa tü akaratshikat kaʼi. w23.11 5 püt. 13, 14

Tü wopu chejeejatkat Babilonia chainjatka Israelmüin, nnojotsü anain maʼin. Eesü maʼaka pienchi kashi süpüla nantajanain na judíokana chamüin. Nüküjapejeʼe Jehová namüin nunouteʼerüinjatüin tü wopukot napüleerua. Kapüleesiaʼaya namüin na judío oonookana nümaa Maleiwa napütüin tü kasa eekat namaʼana chaa Babilonia. Naaʼinrapejeʼe tia süka natüjaain saaʼu aneerüin nakuwaʼipa nutuma Jehová chaa Israel. Wanee kasa anashaatasü neʼreetka chayaa shia jutateerüin nakuwaʼipa süpüla naʼwaajüin Jehová. Nnojotsü eejatüin aʼwaajülee eeinjachire nuʼwaajünüin Jehová chaa Babilonia. Süka nnojoluin eejatüin aʼajülee mürüt nümüin Jehová chayaa jee nnojoliin eein sacerdote, nnojoishii aapüin na israelitakana mürüt süpüla suʼutunuin aaʼin maʼaka süküjain tü Pütchi Aapünakat nümüin Moisés. Wainmaleʼeya maʼin na wayuu aʼwaajakana maleiwayaasü noulialeʼeya na aʼwaajakana Jehová. Müshiijeseʼe naleʼejeein na judío oonookana nümaa Jehová noumainpaʼamüin süpüla naʼwaajüin Jehová sümaa jutatüin nakuwaʼipa. w23.05 14 püt. 3, 4

Süpüla ayatüin müin waya «maʼaka nakuwaʼipa na wayuu waraitakana soʼu luusa», eeinjatü waaʼu tü nüpülainkat Maleiwa. Choʼujaasü wamüin tü nüpülainkat Maleiwa süpüla wulein wakuwaʼipa, jama yarüttüin maʼin sukuwaʼipa wayuu maaʼutpünaa (1 Tes. 4:3-5, 7, 8). Wayouteerü tü shikiiruʼujeejatkat wayuu, tü mojukat noʼuluʼu Jehová, eere waaʼu tü nüpülainkat Maleiwa jee müsia «loteerü sukuwaʼipa tü kasa waaʼinrakat jee loteeriaʼaya wakuwaʼipa sutuma» (Éf. 5:9). Naashin Jesús naapeerü Jehová tü nüpülainkat namüin na wayuu achuntakana shia nümüin (Luc. 11:13). Süpüla eeinjatüin tü nüpülainkat Maleiwa waaʼu wachuntuinjatü shia nümüin woʼuraajapa otta waʼwaajüinjachi Jehová namaa na wawalayuukana sünain tü outkajawaakat (Éf. 5:19, 20). Eere waaʼu tü nüpülainkat Maleiwa aneerü wakuwaʼipa nümaa jee talateechi nia wamaa. w24.03 23 püt. 13-15

Wachunta kaalinwaa nümüin Jehová, nnojoleena kashapajaaraliin waya eere waaʼu tü nüpülainkat Maleiwa (Gal. 5:22, 23, TNM). Eesüjaʼa süpüla sülatüin wamüin wanee kasa eeka süpüla süshapalaain atuma waaʼin. Soʼunnaa tia, ayataʼaya wachuntuin nümüin Maleiwa tü nüpülainkat (Luc. 11:13). Wachunta nümüin Jehová wanaawai tü jülüjakat waaʼin sümaa tü jülüjakat naaʼin süchiki wanee kasa. Ayatüle wachuntuin kaalinwaa nümüin Jehová otta wachajaale sukuwaʼipa süpüla nnojoliinjanain kashapajaaraliin waya, wounteerü tia. Jülüja waaʼin nakuwaʼipa na wayuu namaiwajanakana. Aashajaasü tü Bibliakat nachiki wayuu nnojoliikana kashapajaaraliin. Jülüjale waaʼin tü nakuwaʼipakat, washateerü tia nachiirua. w23.08 22 püt. 10, 11

Nüküjain Jesús nümüin chi aluwataaushikai Pedro naaʼinmajeechin nia Jehová waneepia. Süsoʼiraapa naaʼin Jesús naaʼinrüin wanee kasa pülasü nüpüleerua Pedro otta napüleerua na wane aluwataaushikana, watta maʼin saalii jime nasitkat soʼu tia (Juan 21:4-6). Niyaawatakalaka aaʼu Pedro naapeerüin Jehová süpüshuaʼa tü kasa choʼujaakat nümüin. Eesüjaʼa sotule naaʼin Pedro tü nüküjakat Jesús süchiki naapeerüin Jehová süpüshuaʼa tü kasa choʼujaakat nümüin chi wayuu aaʼinmaakai niʼyataain nümüin (Mat. 6:33, TNM). Müsüjeseʼe naaʼinmaain Pedro tü niʼyataainkat nümüin Maleiwa suulialeʼeya tü niʼyataainkat sünain olojoo jime. Meimmoluinsai Pedro sünain aküjaa tü pütchi anakat maʼin soʼu tü Pentecostés eejatkat soʼu tü juyakat 33. Watta saalii wayuu aapaakana sümaa tia pütchikat (Aluw. 2:14, 37-41, TNM). Mapa maʼin, watta naalii na wayuu chejeʼewaliikana Samaria otta na wayuu nnojoliikana judíoin nükaalinjaka Pedro süpüla noushikajaain süchiirua nukuwaʼipa Cristo (Aluw. 8:14-17, TNM; 10:44-48, TNM). Anashaatasü maʼin tü naaʼinrakat Jehová nükajee Pedro süpüla nüntirüinjatüin wayuu maʼleekalia nünainmüin. w23.09 20 püt. 1; 23 püt. 11

Piama juya süchikijee nakanajüin na babiloniokana tü pueulokot Jerusalén, aʼlapüjaashi Nabucodonosor chi laülaashikai saaʼu Babilonia. Niʼrüin nüʼlapüinruʼu wanee ayaakuaa miyoʼu maʼin, shapaasü naaʼin saaʼujee tia. Nuchuntaka Nabucodonosor namüin na ooʼulaküliikana nümaʼaleeya Daniel naküjaiwa nümüin tü nüʼlapüjaakalü amaa sümaa jamaluʼuluin shia. Nnojorüle naküjain tia nümüin, noʼuteena aaʼin napüshuaʼa (Dan. 2:3-5). Müsüjeseʼe nuchuntuin Daniel kaʼi nümüin süpüla nütüjaain saaʼu kasain tü nüʼlapüjaakalü amaa (Dan. 2:16). Naaʼinrüin tia süka meimmoluin nia jee kanoulain nia, jama nnojoyülüin nüküjain jamaluʼuluin wanee lapü. Nüküjain Daniel nümüin Sadrac, Mesac otta Abednego anain nachuntule nümüin chi Maleiwa sirumatuʼujeʼewaikai nüküjaiwa nümüin jamaluʼuluin tü lapükat (Dan. 2:18). Nusoutaka Jehová shiʼipajee tü nachuntakat nümüin. Nüküjaka Daniel jamaluʼuluin tü nüʼlapüinkat Nabucodonosor. Isajaka Daniel namaa na naʼaleewainyuukana suulia tü outaakat. w23.08 2 püt. 4

Jülüja waaʼin tü kasa anasü weʼreetkat nnojoliire kashapajaaraliin waya. Müle wakuwaʼipa, talateerü waaʼin, nnojoleena aashichijaamaatüin waya, nnojoleena ayuulin waya jee nnojoleerü shapaakuʼu müin waaʼin. Aneerü wakuwaʼipa namaa na waneinnua jee paaʼinweena waya namaa na wawalayuukana. Wachecherüle waaʼin suulia waashichijaain nümüin chi wayuu aainjakai kasa mojusü wamüin, nnojoleena peʼipaain waya nümaa (Sal. 37:8, noota; Prov. 14:29). Tü anaʼleekat maʼin sünainjee nnojoliin kashapajaaraliin waya, shia washateerüin nukuwaʼipa chi Washi iipünaajachikai otta aleeweenain maʼin waya nümaa. Wekirajaaitpa anain anain maʼin nnojoliire kashapajaaraliin waya otta eʼreenain waya kasa anasü sünainjee. Eejeerü kaʼi kapüleejeetka oʼu wamüin nnojoliin kashapajaaraliin waya. Nükaalinjeenapejeʼe waya Jehová süpüla nnojoluin müin wakuwaʼipa. Sümaʼainruʼu waʼatapajüin paʼaraiisüinjatüin tü Mmakat, watüjaa aaʼu alin nüpüla Jehová na kojutukana amüin nia, na aʼatapajakana tü naaʼinrüinjatkat napüleerua (Sal. 33:18). Anakalaka maʼin wachajaale sukuwaʼipa süpüla nnojoliinjanain kashapajaaraliin waya. w23.08 21 püt. 7; 25 püt. 16, 17

Naashin Santiago, amülasü neʼe tü naaʼinrakat wanee anoujashi kamaneere nia namüin na washinnuukana sümaa maalin nüpüla na maʼletsesaliikana. Sünainjee tü naaʼinrakat, atüjaaneerü aaʼu manoulain nia (Sant. 2:1-5, 9). Tü wane kasa naaʼinrajatka wanee anoujashi naashin Santiago shia nükaalinjainjanain na eʼrakana choʼujawaa. Naashin Santiago, nnojoire nükaalinjain wanee anoujashi wane eekai choʼujaain nüsheʼin nümüin jee palitchon eküülü nümaʼana, jaʼyeerü naaʼu manoulain nia sünainjee tü naaʼinrakat (Sant. 2:14-17). Aashajaashi Santiago süchiki sukuwaʼipa Rahab süpüla sütüjaanüin saaʼu tü naaʼinrajatkat wanee wayuu shiimainre kanoulain nia (Sant. 2:25, 26). Jamüsüjaʼa Rahab saapa achikit nukuwaʼipa Jehová otta sütüjaa aaʼu tü naaʼinrakat süpüla nükaalinjain na israelitakana (Jos. 2:9-11). ¿Kasa saaʼinraka süpüla sütüjaanüin saaʼu kanoulain shia nünain Jehová? Suunjula achikichii piamashii israelita ajayajülii suulia noʼutünüin aaʼin. Suluʼujee tia, lotusü sukuwaʼipa noʼuluʼu Maleiwa maʼaka naaʼin Abrahán, mayaainjeʼe süleʼeruʼuin süchiki kaainjalaa jee nnojoluin israelitain shia. Tü watüjakat sünainjee Rahab shia sütüjaaneerüin aaʼu kanoulain waya sünainjee tü waaʼinrakat. w23.12 5 püt. 12, 13

Nnojotsü talatüinjatüin neʼe waaʼin sümaa tü kasa sütüjaainjatkalü aaʼu wayuu palajana nüchiki Maleiwa. Nükaalinjain waya Maleiwa sükajee tü nüpülainkat süpüla wayaawatüin saaʼu tü jülüjakat naaʼin (1 Cor. 2:9, 10). Anasü pikirajaale maʼin süchiirua waneirua pütchi aleeweechika maʼin atuma pia nümaa Jehová, maʼaka saaʼin tü naaʼinrakat Jehová napüleerua na anoujashii namaiwajanakana saaʼujee alin naya nüpüla otta tü naaʼinrakat maaʼulu püpüleerua süka alin pia nüpüla. Eesü süpüla pikirajaain süchiki tü nuchuntakat Jehová namüin na israelitakana süpüla naʼwaajüin nia sümaa tü nuchuntakat wamüin maaʼulu süpüla waʼwaajüin nia. Otta eesü süpüla pikirajaain süchiirua tü pütchi ekeraajakat nünain Jesús yaaiwaʼaya nia mmapaʼa. Kamalainjeerü pümüin ekirajawaa sünain tia pütchikat pikirajaale sükajee Índice de las publicaciones Watch Tower jee shiale sükajee Nachajaayainjatü pütchi na aküjaliikana pütchi nüchiki Jehová. Pikirajaale süchiirua tü sümakat tü Bibliakat, katchinjeerü punoula jee pütüjaajeerü aaʼu tü jülüjakat naaʼin Maleiwa (Prov. 2:4, 5). w23.10 19 püt. 3-5

Wekirajaa süchiki tü nümakat chi aluwataaushikai Pedro. Suʼttianainjee wetsiikulo 8 nüküjain Pedro shiain alanaʼaleeinjatüin maʼin wamüin aijiraain waya. Tü pütchikat «shia alanaʼaleeinjatka maʼin jümüin» nümaka amüin Pedro, «ayurulaa» maluʼulu shia. Nüküjain Pedro sajaʼttiamüin wetsiikulo 8 walatirüinjatüin sooʼopünaa waaʼin tü kasa mojusü naainjakat wamüin na wawalayuukana. Waaʼinrüle tia, jaʼyeerü waaʼu alin maʼin naya wapüla. Anuu wanee sukuwaʼipa süpüla wayaawatüin saaʼu tia: jamüsüjaʼa eere wanee meesa eekai rayaain maʼin, wachajaain süchiki wanee kuluulu süpüla weʼitaain shia sooʼopünaa. Wayuruluin tia kuluutkat sooʼopünaa tü meesakat süpüla nnojoluin jaʼyain tü mojukat sünain. Müsia neʼe tü waaʼinrajatkat shiimainre alin wapüla na wawalayuukana, müsü weʼitaainjatkai saaʼin wanee kuluulu sooʼopünaa tü kasa mojukat natuma. Walatireerü sooʼopünaa waaʼin naainjala na wawalayuukana shiimainre alin naya wapüla. Waainjeerü tia jaʼitairü kapüleein maʼin wamüin motuin waaʼin naainjala (Col. 3:13). Motule waaʼin naainjala na waneinnua, jaʼyeerü waaʼu aijiraain maʼin waya otta talateechi Jehová watuma. w23.11 10 püt. 13-15

Miyoʼupa Josías nunouteʼerüin tü aʼwaajüleekat Maleiwa. Sümaʼainruʼu nunouteʼerüin tia, ousütünaa anainrü tü Pütchi Aapünakat nümüin Moisés. Saashajeʼennapa tia nuʼupala, nüchajaamaatüin sukuwaʼipa süpüla naaʼinrüin tü ashajünakat suluʼu (2 Crón. 34:14, 19-21). ¿Keeʼireesüche paaʼin paashajeʼerüin tü Bibliakat soʼukaiwai? Paaʼinrüitpale tia, ¿kamalainsüche pümüin? ¿Püshajüinche suluʼu wanee karaloʼuta tü wetsiikulo anainjatkalü atuma pukuwaʼipa? Eepa maʼaka 39 nuuyase, eesü wanee kasa mojuka nutuma jee outushi nia suluʼujee tia. Niʼitaain naaʼin nünainjiraa suulialeʼeya nüsakirüin Jehová süchiirua tü naaʼinrajatkat (2 Crón. 35:20-25). Anuu tü watüjakat sünainjee tia: jaʼitairü jeʼtsüirüin wouyase jee kakaliainnale waya sünain ekirajawaa sünain tü Bibliakat, ayatüinjachi wasakirüin Jehová süchiirua tü waaʼinrajatkat. Waaʼinrüin tia wanaa sümaa woʼuraajüin, wekirajaain sünain tü Bibliakat otta waapaale sümaa tü namakat wamüin na wawalayuu laülaakana aaʼin sünain anoujaa. Müle shia watuma, eejeerü waaʼin suulia wojutuuin saʼaka kaainjalaa otta talateena maʼin waya (Sant. 1:25). w23.09 12 püt. 15, 16

Aashajaasü tü Bibliakat nachiki waneinnua jieyuu aipuʼukana apüla Jehová jee aʼyataapuʼukana nümüin. Wayuu keisalashii naya sümüin nakuwaʼipa jee jaʼyasü saaʼu nakuwaʼipa waneepiain naya nümaa Maleiwa (1 Tim. 3:11, TNM). Akaʼaya na wawalayuu majayünnüükana, eesü süpüla nashatüin nakuwaʼipa na wawalayuu jieyuu noutkajaakana amaa, wainmeerü tü kasa natüjakat nanainjee. Piale wanee wawala majayülü, jülüja paaʼin na wawalayuu jieyuu laülaakana aaʼin jee na anakana süpüla püshatüin akuwaʼipa. Piyaawata saaʼu jamüin anaka nakuwaʼipa süpüla püshatüin tia nachiirua. Süpüla laülaainjatüin saaʼin wanee wawala nnojoluinjatüin yaletüin saaʼin. Müle sukuwaʼipa, aleeweerü maʼin shia nümaa Jehová jee namaa na waneinnua. Jamüsüjaʼa tü wawala nnojotkat yaletüin saaʼin jee aika apüla Jehová, jüüjüweerü shia namüin na wayuu nüneekakana Jehová süpüla nuʼunirüin wakuwaʼipa (1 Cor. 11:3). Jüüjüweerü shia namüin na wawalayuu laülaakana wapüleerua suluʼu tü outkajaaleekat jee namüin na laülaakana saaʼu süpüshi. w23.12 19 püt. 3-5

Nuchuntuin Jehová nümüin chi wayuukai alinjatüin nüpüla nuʼwayuuse, naapüinjatüin tü kasa choʼujaakat sümüin, aleewainjachin nia sümaa otta nükaalinjainjatüin shia süpüla katchin sunoula. Kekiinjachi wanee anoujashi süpüla kojutuinjanain nümüin na jieyuukana jee tütüinjachi nia. Naaʼinrüle tia, aneerü nukuwaʼipa kaʼwayuusepa nia. Kasaatpa pia, eeshijaʼa süpüla kachooin pia. Wainma kasa eeka süpüla pütüjain nüchiki Jehová süpüla anain pukuwaʼipa kachonpa pia (Éf. 6:4). «Chi tachon aishikai tapüla, talatüshi taya nümaa», müshi Jehová nümüin Jesús (Mat. 3:17). Kachonpa pia, püküjawai namüin püchonnii alin naya püpüla. «Anasü maʼin putuma uuton», püma namüin anale natuma wanee kasa. Na wawalayuu ashatakana nukuwaʼipa Jehová, nakaalinjain nachonnii süpüla laülaain naaʼin sünain anoujaa. Aneerü pukuwaʼipa kachonpa pia aire püpüla na püpüshikana, na wawalayuukana jee paaʼinmajüle naya. Püküjawai namüin alin naya püpüla jee kojutuin naya pümüin (Juan 15:9). w23.12 28 püt. 17, 18

Tü müliaa shiʼrakat wayuu süpüshuaʼa shia tü müliaa weʼrakat wayakana aʼyataashiikana nümüin Jehová. Eeshii süpüla ayuulin waya otta sülatüin kasa mojusü wamüin. Eepejeʼe sooʼomüin tü müliaa weʼrakat sutuma waʼyataain nümüin Jehová, maʼaka saaʼin süpüleeruaanüin waaʼin saaʼujee wanoujain. Nnojotsü süpüla nüsünneʼerüin woulia Jehová tü kasa alatakat wamüin. Nüküjapejeʼe wamüin nükaalinjeenain waya soʼunnaa tia (Is. 41:10). Sutuma eein nia wamaa soʼunnaa müliaa, eesü süpüla talatüin waaʼin, anain tü waneekakat otta waneepiain waya nümaa. Nüküjain wamüin Jehová jimateerüin waaʼin nutuma (Filip. 4:6, 7). Nnojoishi eein wanee wayuu ayaawatakai saaʼu tia jimata aaʼin naapaka Maleiwa. Naya aapünakana amüin tia jimataakalü aaʼin na aleewakana maʼin nümaa Jehová. ¿Eeiria piʼrüin jutatüin paaʼin suulia shapawaa aaʼin süchikijee puchuntuin maʼin nümüin Jehová? Piʼrüin tia sutuma tü jimataa aaʼin naapakat Maleiwa pümüin. w24.01 20 püt. 2; 21 püt. 4

Na aikana apüla Jehová, naʼwaajüin nia süka süpüshuaʼa naaʼin. Nütüjaa aaʼu David nuʼwaajüin Jehová wanaa sümaa niʼraajirüin nünülia. Weʼraajirapa nünülia Jehová, waküjain namüin na waneinnua anain maʼin nukuwaʼipa, anain maʼin tü naaʼinrakat jee tü nukumalakat. Nuʼwaajeein nia David süka süpüshuaʼa naaʼin. Müsia tü naaʼinrakat na levitakana, naʼwaajüin Jehová süka süpüshuaʼa naaʼin. Nayaawata aaʼu isain nachiki naküjain süpüshuaʼa tü naaʼinrakat Jehová aʼwaajünüinjachika anainjee nia (Nehemías 9:5). Talatakajasaʼa naaʼin Jehová niʼrapa tü naaʼinrakat süpüla naʼwaajüin nia. w24.02 9 püt. 6

Nnojotsü jülüjain naaʼin Jehová mojuin pukuwaʼipa sutuma nnojoluin puuntuin wanee kasa saaʼujee isain püchiki paaʼinrüin (2 Cor. 8:12, TNM). Pütüja sünainjee tü kasa kapüleesü alatakat pümüin. Jülüja paaʼin tü puuntuitpakat. Süküjain tü Bibliakat lotuin nukuwaʼipa Maleiwa otta nnojoluin motuin naaʼin tü kasa waaʼinrakat (Heb. 6:10, TNM). Makalaka anain nnojorüle motuin paaʼin tü kasa anasü paaʼinrakaʼaya, maʼaka saaʼin aleewain maʼin pia nümaa Jehová, pujuʼitüin sünain aküjaa pütchi jee woutiisain pia. Maʼaka puuntuin waneirua kasa piʼyataweeka anain nümüin Maleiwa, eesiaʼaya süpüla puuntuin mapeena tü piʼyataweekalü anain nümüin. Sükajee nükaalinjain pia Jehová puunteerü tü piʼyataweekalü anain nümüin. Eesü süpüla talatüin paaʼin sümaʼainruʼu puuntuin tü piʼyataweekalü anain nümüin Jehová. Meerü pukuwaʼipa jülüjale paaʼin nükaalinjain pia Jehová (2 Cor. 4:7). Ayatüle piʼyataain süchiirua tü piʼyataweekalü anain nümüin Jehová, wainmeerü kasa anasü piʼraka (Gal. 6:9). w23.05 31 püt. 16-18

Nücheka achikit Jehová nayaawatüin saaʼu na wayuu aikana apüla nia talatüin nia namaa. Süküjain tü Bibliakat piantuain nüküjain Jehová nümüin Jesús alin nia nüpüla jee talatüin nia nümaa (Mat. 3:17; 17:5). ¿Keeʼireesüche paaʼin nüküjain pümüin Jehová talatüin nia pümaa? Nnojoishi asoutuin wamüin Jehová iipünaajee, asoutushi nia wamüin sükajee tü Bibliakat. Jamüsüjaʼa waashajeʼerapa suluʼujee tü Bibliakat wanaa sümaa nüküjain Jesús namüin na nikirajüinkana alin naya nüpüla chi Nüshikai, müshi niakai aaʼin Jehová aküjain wamüin tia. Mayaainjeʼe nnojoluin lotuin maʼin nakuwaʼipa na nikirajüinkana Jesús, ayatüsia nachajaain sukuwaʼipa süpüla naaʼinrüin tü nüchekakat Maleiwa. Nüküjainjeseʼe Jesús namüin talatüin nia namaa. Müsia neʼe nukuwaʼipa Jehová wamaa, müsü nüküjakai aaʼin wamüin talatüin nia wamaa (Juan 15:9, 15). Weʼrapa müliaa nnojotsü anain jülüjale waaʼin nnojolin talatüin Jehová wamaa, shia anaka aluʼu wachecherüle waaʼin soʼunnaa tia süpüla sütüjaanüin aaʼu alin wapüla Jehová otta weʼitaain waaʼin sünain nükaalinjeenain waya (Sant. 1:12). w24.03 28 püt. 10, 11