«Püntira tü Puluwataayakat» ¿Joujeerü tia?

1, 2. (1) ¿Jamüsü motowaika waaʼin wanee kasa? (2) ¿Kasa watüjaaka aaʼu süchiki Nuluwataaya Maleiwa?

EESÜ nnojorüle sotuin naaʼin na wayuukana süpüshuaʼa tü kasa alatakat noʼupala. Müshia wanee wayuu eekai niʼrajeʼerüin nümaʼana wanee tottoot, nnojotsü sotuin naaʼin süpüshuaʼa tü nüküjakat chi tottootkai nümüin. Eeshii na wayuu motokana aaʼin jalain neʼitaain nayaawein jee noʼuse sümaa yalain neʼe shia naʼütpaʼa. ¿Jamüsü sülataka tia? Naashin na atüjüshiikana maʼin, alatüsü tia sutuma nnojoluin wayaawatawalin saaʼu wanee kasa, nnojoluin jülüjüin waaʼin wanee kasa otta motowalin waaʼin shia. Jaʼitairü mainmain tü kasa alatakat waʼütpünaa, waneesia neʼe tü jülüjakat waaʼin sutuma tü wekiisholoinkat.

² Mainma wayuu nnojotka ayaawatüin saaʼu tü kasa alatakat saaʼu tü mmakat. Eesüjaʼa süpüla nayaawatüin saaʼu suʼwanajaain maʼin sukuwaʼipa tü mmapaʼakat soʼujeʼereʼeya juyaka 1914. Nnojotpejeʼe nayaawatüin saaʼu jamüin sülataka. Akanasaʼa wayakana, wayaawata aaʼu tia süka wekirajaain sünain tü Wiwüliakat. Watüjaa aaʼu süntüin Nuluwataaya Maleiwa soʼu juyaka 1914 wanaa sümaa nuʼttüin Jesuu sünain Aluwatawaa chaa iipünaa. Otta watüja aaʼu nnojoluin nusouktaleein Maleiwa shiʼipajee süpüshuaʼa tü wachuntakat nümüin, tü makat: «Püntira tü puluwataayakat. Saainjünaiwa tü keeʼireekat paaʼin yaa saaʼu tü Mmakat maʼaka saainjünüin chaa iipünaa» (Mat. 6:​10, NM). Süpüla saainjünüinjatüin tü keeʼireekat naaʼin Maleiwa yaa saaʼu tü Mmakat maʼaka saainjünüin chaa iipünaa, ajaʼttinnajatü palajana tü kasa mojusükat.

3. ¿Kasa watüjaaka aaʼu sutuma wekirajaain weinshi sünain tü Wiwüliakat?

³ Sükajee wekirajaain waneepia sünain tü Wiwüliakat, wayaawata aaʼu sünain shikeraajüin maaʼulu yaa waneeirua pütchi aküjünaka paala. Akanasaʼa na wayuukana nnojotsü nayaawatüin saaʼu tia süka shiain neʼe jülüjüin naaʼin tü nakuwaʼipakat namüiwaʼa otta tü keeʼireekat naaʼin. Makalaka nnojoluin nayaawatüin saaʼu nuʼttüin Jesuu sünain aluwatawaa soʼu juyaka 1914 otta sülüʼülüin sükalia süpüla najaʼttirüinjatüin tü kasa mojusükat. Kakaliaichire pia sünain aʼyatawaa nümüin Maleiwa, jülüjeesü paaʼin pütchikat tüü: «Sutuma teʼrüin tü kasa alatakat maaʼulu, ¿ayatayüiche taya anoujüin sünain sülüʼülüin süpüla sajaʼttüinjatüin tü kasa mojusükat?». Jekechire pia sünain aʼyatawaa nümüin Maleiwa, jülüjaa paaʼin pütchikat tüü: «¿Kasache jülüjaka neʼe taaʼin?». Wekirajaa sünain apünüinsü kasa wayaawataka anainjee sülüʼülüin süpüla saainjünüin tü keeʼireekat naaʼin Maleiwa saaʼu tü Mmakat.

EEʼIYALAASHII APÜNÜINSHII WAYUU AMAAJUNA

4, 5. (1) ¿Kasa naainjaka Jesuu soʼujee juyaka 1914? (Piirakaa sümüin tü ayaakuaa suluʼukat süpana 27.) (2) ¿Kasa kayaawaseka na apünüinshii wayuu amaajuna awateʼerakana nüchiirua Jesuu? (3) ¿Jamüsü shikeraajia tia?

⁴ Soʼu juyaka 1914, aapünüsü najapuluʼu Jesuu laülaainjachin nia suluʼu Nuluwataaya Maleiwa. Saashin Alateetkat Mapeena kapiitulo aipirua, müshi Jesuu maʼaka naaʼin wanee wayuu amaajuchi. Kasuutai chi neʼejenakai, noʼoyolojeʼerüin Jesuu neʼejena süpüla najaʼlajeʼerüinjatüin tü kasa nuluwataakalü aaʼu Satanaa (paashajeʼera Alateetkat Mapeena 6:​1, 2). Sünain tia pütchikat, aküjünüsü nachiki apünüinshii wayuu amaajuna awateʼeraka nüchiirua Jesuu. ¿Kasa kayaawasekat tia? Shia sumojujaainjatüin maʼin sukuwaʼipa tü mmapaʼakat. Jouluinjatüin kasachiki, alinjatüin jamü, jouluinjatüin ayuulii otta waneeirua kasa ouktaka atuma wayuu (Alat. Map. 6:3-8).

⁵ Aküjünatüjülia nnojoluinjatüin eein jimataa aaʼin saaʼu tü mmakat sutuma jouluin tü kasachikikat. Eetaayaai kasain anain apüla tü naainjakat na sülaülakana mma otta na poliitikokana. Jamüsüjaʼa tü kanüliakat Primera Guerra Mundial, shia shikiisükajaʼa maʼin tü kasachiki nnojotkat jimatüin atuma saaʼin wayuu saaʼu tü mmakat. Mayaainjeʼe jouluin tü nneetkat otta mainmain tü kasa naainjakat na atüjüshiikana maʼin soʼujee juyaka 1914, ayatüsia ouktüin wayuu sutuma jamü, ayuulii, sukutkujaain tü Mmakat otta waneeirua kasa. Waneepiasü maʼin alatüin tia otta mainma wayuu ouktaka sutuma. ¿Pütüjaa aaʼu jamüin sülatakat tia?

6. (1) ¿Jaralii na ayaawatakana saaʼu shikeraajüin tü süküjakat paala tü Wiwüliakat? (2) ¿Kasa naainjaka sutuma nayaawatüin saaʼu shikeraajüin tü süküjaka paala tü Wiwüliakat?

⁶ Mainma wayuu jülüjaka aaʼin tü kasachiki kanüliakat Primera Guerra Mundial otta tü shunui kanüliakat gripe española. Akanasaʼa na anoujüshii chainjanakana iipünaa, naʼatapajüin nooʼulaainjanain suulia aluwatawaa na gentiilekana soʼu juyaka 1914 (Luc. 21:24). Nnojotsü nayaawatüin saaʼu süpüshuaʼa tü alatajatkat soʼu juyaka 1914. Akatsaʼa shiain nayaawatüin aaʼu sünainpünaain Nuluwataaya Maleiwa tü alatajatkat soʼu juyakat tia. Wanaa sümaa nayaawatüin saaʼu shikeraajüin tü süküjaka paala tü Wiwüliakat, naküjüin namüin na wayuukana nuʼttüin Jesuu sünain Aluwatawaa. Naainjüin tia sümaa meimmoluin naaʼin. Sutuma naküjüin tia pütchikat, müliashii maʼin naya atumawaa. Sutuma sülatüin tia suluʼu mainma mma, shiiʼiyatüin shikeraajüin tü süküjakat paala tü Wiwüliakat. Kakalia juya süchikijee tia, müliashii maʼin na anoujüshiikana natuma na nüʼünüükana Maleiwa. Napülajüin noulia naʼyataain nümüin Maleiwa, naʼyaajüin naya, püreesashii natuma, naülain naya, neʼitüin naya süka katkousü otta noʼoyotooin nekii (Sal. 94:20; Alat. Map. 12:15).

7. ¿Jamüsü nnojotka nayaawatüin saaʼu noʼutku na wayuukana tü kasa eekat sutuma Nuluwataaya Maleiwa?

⁷ Mainma tü kasa eeʼiyataka nuʼttüin Jesuu sünain Aluwatawaa chaa iipünaa. ¿Jamakaʼa nnojotka nayaawatüin saaʼu noʼutku na wayuukana? ¿Jamüsü nnojotka nayaawatüin saaʼu tü kasa ekeraajakat suluʼujee tü Wiwüliakat? ¿Shiache neʼe jülüjaka naaʼin tü kasa neʼrakat? (2 Cor. 5:​7, NM.) ¿Shiache jülüjaka naaʼin tü nakuwaʼipakat namüiwaʼa? (Mat. 24:37-39.) ¿Shiache jülüjaka naaʼin tü namakat na manoujüinsaliikana otta tü kasa keeʼireekat naaʼin? (2 Cor. 4:​3, 4.) Süpüla wayaawatüinjatüin saaʼu tü kasa eekat sutuma Nuluwataaya Maleiwa, choʼujaasü kanoulainjanain waya otta wanoujüinjanain sünain tü kasa nnojotkat süpüla weʼrüin. Talatüshii maʼin waya süka wayaawatüin saaʼu tü kasa eekat sutuma Nuluwataaya Maleiwa.

AKOOʼOMÜINRAASÜ MAʼIN WAYUU KAAINJARANNUU

8-10. (1) Püküja süchiki tü kasa ekeraajakat suluʼujee 2 Timoteo 3:1-5. (2) ¿Jamüsü sumojujaaka maʼin sukuwaʼipa tü mmapaʼakat maaʼulu?

⁸ Tü piamakat kasa wayaawataka anainjee sülüʼülüin süpüla nüntirüin Maleiwa tü Nuluwataayakat, shia süka nakooʼomüinraain maʼin na wayuu kaainjarannuukana. Eetaairü maʼaka sien juya sünain weʼrüin shikeraajüin tü aküjünakat suluʼu 2 Timoteo 3:1-5 otta sainküinsü shia mmaka süpüshuaʼa. ¿Piyaawata aaʼu shikeraajüin tia? Wekirajaa sünain süpüshi tia kasakalüirua (paashajeʼera 2 Timoteo 3:​1, 13).

⁹ Jamüsüjaʼa tü kasa kashüülapuʼukat namüin na wayuukana sümaiwa nakalioʼu na watuushinuukana, anaitpa shia maaʼulu namüin na wayuukana. Maʼaka saaʼin tü kasa naainjakat naʼyataaleruʼu, tü kasa nanajakat, tü kasa nashaittakat otta tü nasheʼinpalakat. Süpaʼasü mmaka süpüshuaʼa tü atkawaakat otta tü akuwaʼipaa yarüttüsükat. Eeshii eekai nashatüin nakuwaʼipa na jashichikana maʼin, na kashüülakana maʼin jee na mojulaakana maʼin. Tü kasa mojupuʼukat süpüla neʼrajüin na wayuukana namaiwa suluʼu telewisoot, anaitpa shia maaʼulu namüin na wayuukana. Nnojotsü mochoin soʼu wayuu nojuʼitüin maʼin suluʼu telewisoot na jaleetshiikana, neeʼiyatüin maʼin nasheʼinpala otta tü nakuwaʼipakat. Watüjaapajaʼa aaʼu mojuin maʼin tia nümüin Maleiwa (paashajeʼera Judas 14, 15).

¹⁰ Jamüsüjaʼa sümaiwa nakalioʼu na watuushinuukana, mojupuʼusü maʼin namüin na wayuukana nakaijüin, nasaain otta masiwatüin nachonnii sünain ayonnajaa. Maaʼulu yaa, nnojoluitpa jaralüin mojuin amüin tia. Aküjünüsü maʼin suluʼu periódico ooʼulaka telewisoot tü kasa mojusü naainjakat maʼin na tepichikana. Eeshi wanee jimaʼai poloo jaʼralimüin nuuyase, nuʼuta aaʼinchii piamashii nükonpainyeetse suluʼu koleejia otta mayeinshii nutuma poloo apünüinmüin. Eeshii waneeinnua jimaʼalii epeʼruaashii, noʼuta aaʼinrü wanee jintut mekietsat suuyase otta naʼyaajüin chi süshikai nümaʼaleʼeya wanee suwalaichi. Suluʼu wanee mma chayaa Asia, aküjünüsü nayain kaainjaraliin maʼin na jimaʼaliikana soʼujee tü poloo juya alatüitpakat. Amojujaasü maʼin sukuwaʼipa tü mmapaʼakat maaʼulu.

11. ¿Jamüsü nnojotka nayaawatüin aaʼu na wayuukana sumojujaain maʼin sukuwaʼipa wayuu?

¹¹ Pansaasü maʼin nünüiki chi aluwataaushikai Pedro wanaa sümaa nümüin: «Soʼuweena wane kaʼi pejepa süpüla niitaainjachin Cristo, wainmeerü wayuu eekai kaleʼeruʼuin süchiki kaainjalaa. Nemeʼerainpaleena jia saaliijee tü jünoulakat sünain maa jümüin: ‹¿Pansaayaasükalajeʼe tü namakat na nünüikimaajanakana Maleiwa sünain niitaainjachin Cristo? ¿Jalakaʼa nia? Nnojotsü kasain eeʼiranajaayaain süchikijee ouktüin na watuushinuukana. Müsü wanaawakai saaʼin wamüin kasa süpüshua maa aka paala sümaiwa sükumajaiwaʼaya tü mmakat› » (2 Ped. 3:​3, 4). ¿Jamüsü makaʼa nanüiki naya wayuukana? Weʼrüle waneepia wanee kasa, nnojotsü ponuin maʼin waaʼin shia. Jamüsüjaʼa weʼrüle suʼwanajaʼalaa sümüin uatuwoʼushi nukuwaʼipa wanee wayuu eekai weʼraajüin, ponusü maʼin waaʼin tia. Akatsaʼa nnojoluin ponuin maʼin waaʼin yarüttüin maʼin sukuwaʼipa wayuu. Süka jamüin, nnojotsü yarüttalaa müin uatuwoʼushi. Jülüjeesü waaʼin wakuwaʼipa suulia süka mojuin maʼin shia.

12, 13. (1) ¿Jamüshii nnojoliinjanaka mmoluin waya sutuma tü kasa alatakat sainküin maka süpüshuaʼa? (2) ¿Kasa shiiʼiyataka wamüin yarüttüin maʼin sukuwaʼipa wayuu?

¹² Nüküjatüjülia chi aluwataaushikai Pablo müliainjatüin maʼin wayuu sülüʼütpa süpüla sajaʼttüinjatüin tü kasa mojusükat (2 Tim. 3:1). Nnojotpejeʼe nüküjüin iseerüin wachiki wojuʼitüin süchikijee tia, makalaka nnojoliinjanain wamalajaain suulia anoujaa otta weimmolojooin. Nükaaliinjeena waya Jeʼwaa nükajee chi naaʼinkai otta nakajee na wawalayuukana süpüla waneepiainjanain waya nümaa. Naapeerü wamüin tü yalayalaakalü aaʼin (2 Cor. 4:7-11).

¹³ Wanaa sümaa naashajaain Pablo süchiki sajaʼttüinjatüin tü kasa mojusükat, müshi nia: «Anakaja piyaawatüle saaʼu jamüinjatüin tü kaʼikat mapeena». Pütchikat tüü, shiiʼiyatüin shikeraajüinjatüin tü pütchi nüshajakat Pablo. Ayateerü mojulaain maʼin tü wayuu kaainjarannuukalüirua waneʼereʼeya najaʼttinnapa nutuma Maleiwa. Naashin na ashajakana süchiki kasa alatüirü, ajaʼlajaasü wayuu suluʼu kojuyasü pueulo sutuma yarüttüin maʼin sukuwaʼipa. Yarüttaleesia maʼin sukuwaʼipa wayuu maaʼulu yaa. Mainma wayuu nnojotka kasajatüin amüin tü kasa mojusü naaʼinrakat na wayuukana. Süka yarüttüin maʼin sukuwaʼipa wayuu soʼujee juyaka 1914, shiiʼiyatüin wamüin sülüʼülüin süpüla sajaʼttüinjatüin tü kasa mojusükat sutuma Nuluwataaya Maleiwa.

«ALATEERÜ TÜÜ SÜPÜLAPÜNAA SHIʼRÜIN OUKTAA TÜ WAYUU EEKAT MAAʼULU YAA»

14-16. ¿Jarat tü apünüinkat kasa wayaawataka anainjee sülüʼülüin süpüla süntüin Nuluwataaya Maleiwa?

¹⁴ Tü apünüinkat kasa wayaawataka anainjee sülüʼülüin süpüla nüntirüin Maleiwa tü Nuluwataayakat, shia tü kasa saaʼinrakat tü nupueulosekat. Süpülapünaa nuʼttüin Jesuu sünain Aluwatawaa chaa iipünaa, aʼyataashii maʼin nümüin Maleiwa na wawalayuu chainjanakana aluwataain iipünaa. ¿Kasakaʼa naainjüin sutuma nnojoluin shikeraajüin tü naʼatapajakat soʼu juyaka 1914? Mainma na ayatakana aʼyataain nümüin Jeʼwaa. Mayaapejeʼe sülatüin kasa mojusü namüin otta süpüleeruaanüin naaʼin, ayatüshii naya aʼyataain waneepia nümüin Maleiwa ouktaleepa naya.

¹⁵ Wanaa sümaa naashajaain Jesuu süchiki sajaʼttüinjatüin tü kasa mojusükat, müshi nia: «Alateerü tüü süpülapünaa shiʼrüin ouktaa tü wayuu eekat maaʼulu yaa» (paashajeʼera Mateo 24:33-35). Tü pütchi nüküjakat Jesuu, tü makat mayaa: «Tü wayuu eekat maaʼulu yaa», wayaawata aaʼu shiain naashajaain achiki Jesuu piamain neʼipapaʼa na anoujüshii chainjanakana iipünaa. Tü palajatkat neʼipapaʼa, eejana soʼu juyaka 1914 otta nayaawata aaʼu nuʼttüin Jesuu sünain aluwatawaa soʼujee tia juyakat. Süpülapünaa jee suʼunna tü juyakat 1914, aneekünatüjüliʼiya naya nutuma Maleiwa nükajee chi naaʼinkai (Roma 8:14-17).

¹⁶ Tü piamakat neʼipapaʼa wawalayuu chainjanaka iipünaa, aneekünüshii nutuma Maleiwa nükajee chi naaʼinkai kataiwaʼaya noʼu noʼutku na palajanakana neʼipapaʼa. Tü naashajaakalü achiki Jesuu wanaa sümaa nümüin: «Tü wayuu eekat maaʼulu yaa», nnojoishii nayain napüshuaʼa na anoujüshii chainjanaka iipünaa eekana maaʼulu. Tü piamakat neʼipapaʼa na wawalayuu chainjanakana iipünaa, laülaayuuinnapa maaʼulu yaa. Tü pütchi nüküjakat Jesuu suluʼu Mateo 24:​34, shiiʼiyatüin wamüin sünteerüin tü müliaa miyoʼushaatakat «süpülapünaa shiʼrüin ouktaa tü wayuu eekat maaʼulu yaa». Süntapa tia kaʼikat, eejeena yaa saaʼu Mmaka noʼutku na chainjanakana iipünaa. Tüü, shiiʼiyatüin wamüin isain neʼe palitchon kaʼi süpüla najaʼttirüinjatüin Jesuu tü mojulaasükalüirua otta süpüla kepiainjanain yaa saaʼu Mmaka na lotushiikana akuwaʼipa (2 Ped. 3:​13, NM).

ALÜʼÜTSÜ SÜPÜLA NAJAʼTTIRÜIN JESUU NA MOJULAASHIIKANA

17. ¿Kasa watüjaaitpaka aaʼu sünainjee tü pütchi wekirajaaitpakalü anain?

¹⁷ ¿Kasa shikirajaka anain waya tü apünüinsükat pütchi wekirajaaitpakat anain? Naashin Jesuu, nnojoluinjatü watüjaain saaʼu tü kaʼi otta tü oora sajaʼttajatkalü oʼu tü kasa mojusükat. Nnojotsia shia watüjaain saaʼu (Mat. 24:36; 25:13). Shiajaʼa watüjaaka aaʼu tü nümakat Pablo sünain sülüʼülüin maʼin tü sükaliakat (paashajeʼera Roma 13:​11). Kepiashii waya suʼunnaa tia kaʼikat. Shikirajaanüle maʼin anain tü pütchi aküjünakat paala suluʼu tü Wiwüliakat otta tü naainjakat Jeʼwaa nümaa Jesuu, wayaawateerü aaʼu sünain sülüʼülüin maʼin süpüla najaʼttinnüin na mojulaashiikana.

18. ¿Kaseerü alatakat namüin na wayuu ayouktakana Nuluwataaya Jesuu?

¹⁸ Na wayuu ayouktakana Nuluwataaya Jesuu, chi joyotokoi naaʼu wanee ama kasuutai, nayaawateerü aaʼu mojuin tü naainjakat nümüin Jesuu otta nnojoleena isain naya nuulia. Süntapa tia kaʼikat, mainmeena na makana anüiki sümaa shiyoʼujaain naaʼin: «¿Jaraleechi wayuu oʼttaaka süchikijee tüü?» (Alat. Map. 6:15-17). Suluʼu Alateetkat Mapeena kapiitulo akaratshi, aküjünüsü tü asouktünakat shiʼipajee tia pütchikat. Na wawalayuu chainjanakana iipünaa, na katakana oʼu soʼu tia otta na wawalayuu wattakana maʼin naalii, nayeena anaka noʼuluʼu Maleiwa. Shiasaʼa süchikijee tü müliaa miyoʼushaatakat, oʼttaajeena na wawalayuu wattakana maʼin naalii, tü wanee anneerüirua nümakat amüin Jesuu. Kepieena naya suluʼu tü jeketüinjatkat mma (Alat. Map. 7:​9, 13-15).

19. ¿Kasa naʼatapaka maʼin na wayuu ayaawatakana saaʼu sülüʼülüin süpüla sajaʼttajatüin tü kasa mojusükat?

¹⁹ Shiale jülüjüin waaʼin tü pütchi ekeraajakat maaʼulu suluʼujee tü Wiwüliakat, nnojoleerü jülüjüin waaʼin tü kasa niʼitaakat Satanaa wapüleerua otta nnojoleerü moʼuyaain wekii suulia tü kasa alatakat sainküin mmaka süpüshuaʼa. Alüʼütsü süpüla najaʼttirüin Jesuu soʼu Armagedón na wayuu mojulaashiikana (Alat. Map. 19:​11, 19-21). ¡Anakatche maʼin tü alatajatkat! (Alat. Map. 20:1-3, 6, NM; 21:​3, 4.)