Paaʼinwajiraainjana waya süpüla woʼttaainjanain

1, 2. ¿Kasa kamalainka nümüin Maleiwa wapüleerua, jaʼitairü nnojoluin wanaawain wouyase jee wakuwaʼipa?

PIALE wanee jimaʼaia aküjüikai pütchi, kojutüshi maʼin pia nümüin Jeʼwaa jee namüin na wawalayuukana. Watta naalii jimaʼalii jee majayünnüü woutiisakana juyawai suluʼu mmakat süpüshuaʼa. Anakatche maʼin tü naainjakat süka naapüin naaʼin sünain aʼyatawaa nümüin Jeʼwaa.

² Watüjaa aaʼulu kamalain pümüin kottirawaa namaa wayuu jimaʼaliijiraakana wanaa pümaa. Shiimainya anain waaʼin kottiraale waya namaa wayuu wanaawakana ouyase wamaa. Kamalainsiaʼaya maʼin nümüin Jeʼwaa paaʼinwainjanain waya namaa na wawalayuukana sünain aʼwaajaa nia, jaʼitairü nnojoluin wanaawain wouyase jee wakuwaʼipa. Akaataajaʼa chi aluwataaushikai Pablo nüküjüin «keeʼireein maʼi naaʼin [Maleiwa] suʼtteʼennüinjatüin wayuu süpüshua sümaa sütüjaainjatüin saaʼu tü shiimüinkat» (1 Tim. 2:​3, 4). Napüshuaʼa na wayuu aʼwaajakana Maleiwa, saʼakajeejana naya tü shiʼirukukat tü wayuukalüirua süpüshuaʼa, sainküinjee mmakat süpüshuaʼa (Alat. Map. 7:9).

3, 4. (1) ¿Kasa jaʼyaka saaʼu nakuwaʼipa na jimaʼaliikana maaʼutpünaa yaa? (2) ¿Kasa atüjaaneetka aaʼu müleka waainjüle tü sümakat Éfeso 4:25?

³ Anashaatasü nakuwaʼipa na jimaʼalii anoujakana nünain Jeʼwaa noulia na jimaʼalii manoujüinkana. Jamüshiijaʼa na jimaʼalii manoujüinkana nünain Jeʼwaa, shia kapülaka naaʼin nakuwaʼipa namüiwaʼa. Naashin na ekirajaakana sünain nakuwaʼipa na wayuukana, kapüraleeitpa naaʼin na jimaʼaliikana nakuwaʼipa neʼe namüiwaʼa. Jaʼyasü naaʼu mojutüin wayuu namüin süka airuʼuluin nanüiki namüin jee müsia waneejatüitpain nasheʼinpala.

⁴ Shiimain sünain sumojujaain maʼin nakuwaʼipa na jimaʼaliikana suluʼupünaa mmaka süpüshuaʼa. Müsüjeseʼe nnojoluin anain keejiale shia namüin na jimaʼalii anoujüshiikana süpüla naainjüin tü nüchekakat Jeʼwaa. Nüküjüin Pablo namüin na anoujüshii chejeʼewaliikana Éfeso, nnojoluinjatüin keejiain namüin tü kasa mojusü naaʼinrakat na wayuu manoujüinsaliikana ( paashajeʼera Éfeso 2:​1-3). Talatüshii maʼin waya namaa na jimaʼalii ayaawatakana saaʼu sünain mojuin nashatüle tia akuwaʼipaakat jee müsia talatüshii waya süka paaʼinwain jia sünain aʼyatawaa namaa na anoujüshiikana. Saaʼujee anain tü jukuwaʼipakat, atüjaana aaʼulu jiajiraain neʼe sünain tü anoujaakat naashin Pablo (Éf. 4:​25). Acheküshii paaʼinwainjanain waya namaa na wawalayuukana süka peje peje sümüin tü nükaliakat Maleiwa. Anashii wekirajaale süchiki tü naainjakat waneeinnua wayuu namaiwajannuu süpüla washatüinjatüin nakuwaʼipa.

PAAʼINWAJIRAASHII NAYA

5, 6. ¿Kasa shikirajaka anain waya tü naainjakat Lot sümaa tü piamasükat nüchonnii?

⁵ Naaʼinmajüin Jeʼwaa na wayuu aʼyataapuʼukana nümüin süka nakaaliinjiraain waneʼewaire nakua suʼunnaa kasachiki. Jee müshiʼiya wayakana wapüshuaʼa, wainma tü kasa watüjeetkat nanainjee naya wayuukana. Jooʼu wekirajaai palajana süchiki tü alatakat nümüin Lot.

⁶ Kepiapuʼushi Lot chaa Sodoma. Shiasaʼa tü wayuu kepiakalüirua chayaa, mojulaajüsü maʼin shiairua, makalaka najaʼttirüin shiairua Maleiwa. Akatsaʼa süpülapünaa tia, aapinnüshi Lot natuma wanee aapiee nümaʼanajeejana Maleiwa süpüla nuʼunüinjachin saaʼumüin tü uuchikalüirua. «Juwataa jumaala suulia ouktaa», müshii naya nümüin Lot otta sümüin tü nüchonniikalüirua (Gén. 19:12-​22). Oʼunüshijeseʼe Lot sümaa tü piamasükat nüchonnii suluʼujee tia pueulokot. Chajachiaajeʼe paala Lot aapirüin na wayuu kasaalüinjanakana sümaa tü nüchonniikalüirua. Emeeʼerajaayaashi Lot namaa naaʼinruʼu. Ouktakalaka naya wayuukana wanaa sümaa sajaʼlajeʼennüin Sodoma (Gén. 19:14). Niaʼala neʼe Lot sümaa tü piamasükat nüchonnii isaka suulia ouktaa.

7. ¿Kasa naainjaka Jeʼwaa napüleerua na israeliitakana sutuma kottüin naya?

⁷ Anuu wanee kasa naainjaka na israeliitakana. Wanaa sümaa nojuʼitüin Egiptojee, kottüshii naya sünain oʼunaa. Jamüshijaʼa Moisés wanaa sümaa niyalerüin tü wunuʼu najapuluʼujutkat, akumajaasü wanee wopu nutuma Maleiwa pasanainpünaa sünain tü palaakat otta kottüshii napüshuaʼa sünain alataa waneemüin saʼata tü palaakat. Oʼttaashiijeseʼe na israeliitakana süka naaʼinmajüin naya Jeʼwaa (Éx. 14:​21, 22, 29, 30). Kottüshii napüshuaʼa na israeliitakana namaa na nnojoliikana israeliitain oʼunakana namaa Egiptojee (Éx. 12:38). Nnojoishii naya walakatüin jee müshiʼiya na jimaʼaliikana nnojoishii oʼunüin naya suluʼupünaa wanee wopu naatajatü. Naainjüle tia, nnojoishiijeʼe naaʼinmajüin naya Jeʼwaa (1 Cor. 10:1).

8. ¿Jamüsü watüjaaka saaʼu kottüin tü nupueulosekat Jeʼwaa wanaa sümaa nuluwataain Jehosafat?

⁸ Wanaa sümaa nuluwataapuʼuin Jehosafat saaʼu tü nupueulosekat Maleiwa, ashutünüinjania aaʼu natuma na neʼipolokona. Arülataayaai neʼe na surulaat ashuteekana saaʼu nupueulose Maleiwa, watta naaliin (2 Crón. 20:​1, 2). ¿Kasaka naainjüin na aʼyataashiikana nümüin Maleiwa? Achuntüshii kaaliinwaa nümüin Jeʼwaa otta nnojoishii ojuʼijaain neʼe neʼipomüin na naʼünüükana ( paashajeʼera 2 Crónicas 20:​3, 4). Aashajaajiraashii naya napüshuaʼa süpüla natüjaainjatüin saaʼu tü naainjüinjatkat. Saashin tü Wiwüliakat, shaʼwashawatshii napüshuaʼa na wayuu chejeʼewaliikana Judá nümülatuʼu Jeʼwaa sünain achuntaa kaaliinwaa nümüin, yalajatü namaa naʼwayuuse otta nachonnii (2 Crón. 20:13). Kottüshii naya napüshuaʼa otta oonooshii naya sümaa tü nümakat Jeʼwaa. Suluʼujee tia, naaʼinmajüin naya Jeʼwaa noulia na neʼipolokona (2 Crón. 20:20-​27). Anakatche maʼin süpüla washatüinjatüin tü naainjakat naya wayuukana suʼunnaa sülatüin kasa mojusü wamüin.

9. ¿Kasa shikirajaka anain waya tü nakuwaʼipakat na nikirajüinkana Jesuu?

⁹ Jaʼitakajeʼe na nikirajüinkana Jesuu, paaʼinwashii naya sünain tü anoujaakat. Wanaa sümaa nekerotüin sünain anoujaa na nnojoliikana judíoin namaa na judíokana, «ayatshii naya waneepia sünain nooʼulaküin tü akuaippaa neʼikakat anain naya na Aluwataaushikana. Ayatshii naya sünain tü aleewajirawaakat. [...] Ayatshii naya sünain tü okolochojowaakat süpüla jutkataa sünain ekawaa» (Aluw. 2:​42). Paaʼinwaleeshiʼiya maʼin naya sünain akaaliinjirawaa wanaa sümaa müliain naya atumawaa (Aluw. 4:​23, 24). ¿Kasa shikirajaka anain waya tia? Choʼujaasü paaʼinwainjanain waya süpüla eejiraain waya sümaa tü alatakat wamüin.

PAAʼINWAINJANA WAYA SÜKA SÜLÜʼÜLAAIN NÜKALIA JEʼWAA

10. ¿Jarat tü kaʼi paaʼinwainjanakalü oʼu waya?

¹⁰ Alüʼülaasü maʼin tü kaʼi müliainjatkalü oʼu wayuu süpüshuaʼa. Keemashaateerü maʼin tia kaʼikat naashin Joel, wanee nünüikimaajachi Maleiwa (Joel 2:​1, 2; Sof. 1:​14). Suʼunnaa tia kaʼikat, paaʼinwainjana maʼin waya namaa na wawalayuukana. Soto waaʼin tü nümakat Jesuu: «Müleka sütkaajiraale wane wayuuirua, ajaʼlajaajiraweena naya» (Mat. 12:25).

11. ¿Kasa shikirajaka anain waya tü sümakat Salmo 122:​3, 4? (Piirakaa sümüin tü ayaakua suluʼukat süpana 18.)

¹¹ Paaʼinwainjana maʼin waya namaa na wawalayuukana suʼunnaa tü kaʼi keemakat maʼin. Süpüla watüjaain saaʼu kasainjatüin waainjüin, jülüjeesü waaʼin jamapuʼuin sukumajia tü piichi chajatkalüirua Jerusalén. Tü piichiirua akumajünapuʼukat chayaa, pejeewasüirua. Müsüjeseʼe nüküjüin David anain sukumajia tü piichiirua chajatkalüirua suluʼu tü pueulokot Jerusalén süka pejeewachoin shiairua. Sutuma müin sukumajia tü piichikalüirua, akaaliinjiraashii na wayuukana otta aaʼinmajiraashii naya. Süka nnojoluin wattaawain nepia na wayuukana, sotojaasü naaʼin David wanaa sümaa niʼrüin talatüin naaʼin na wayuu israelkana saʼakajee tü eʼirukuukat süpüshuaʼa sünain aʼwaajaa Jeʼwaa ( paashajeʼera Salmo 122:​3, 4). Süka sumojujaain shiʼipaʼaya tü mmapaʼakat, choʼujaashii paaʼinwainjanain waya süpüla eejiraainjanain waya sümaa tü kasa mojusükat.

12. ¿Kasa waainjüinjatka süpüla woʼttaainjanain nushutapa «Gog chi chejeʼewaikai Magog» saaʼu tü nupueulosekat Maleiwa?

¹² ¿Jamüshii paaʼinwainjanaka waya suʼunnaa tü müliaa miyoʼusükat? Suluʼu Ezequiel kapiitulo 38, aküjünüsü sünain nushutajachin «Gog chi chejeʼewaikai Magog» saaʼu tü nupueulosekat Maleiwa. Suʼunnaa tia nnojoishii waya akatalaainjanain noulia na wawalayuukana jee nnojoishii waya anoujüinjanain sünain nükaaliinjeenain waya na sülaülashiikana mma. Acheküshii wachecheraainjanain nanain na wawalayuukana. Süpüla woʼttaainjanain suulia tü kasa mojusükat, weeʼiyatüinjatü waneʼewaire wakua weʼitaain maʼin waaʼin nünain Jeʼwaa otta oonooinjana waya nümaa. Waainjüle tia, oʼttaajeena waya nutuma Jeʼwaa otta Jesuu (Joel 2:​32; Mat. 28:20). ¿Jama na anoujüshii akaaʼinjaakana nuulia Maleiwa? ¿Oʼttaajeenache naya? (Miq. 2:​12.)

13. ¿Kasa shikirajaka anain na jimaʼaliikana tü wekirajaaitpakalü anain?

¹³ Piakai jimaʼaikai, ¿aashin nnojoluin anain pükatalaale noulia na puwalayuukana? Paaʼinwainjana waya wapüshuaʼa süpüla woʼttaainjanain suʼunnaa tü müliaa miyoʼusükat. Anasü wachajaale sukuwaʼipa süpüla paaʼinwainjanain waya sünain aʼyatawaa nümüin Maleiwa maaʼutpünaa. Waainjüle tia, shiimain oʼttaajeenain waya suʼunnaa tia kaʼikat.

«SÜKA JIAJIRAAINYA NEʼE SÜNAIN TÜ ANOUJAAKAT»

14, 15. (1) ¿Jamüshii nikirajaka waya Jeʼwaa maaʼutpünaa yaa? (2) ¿Kasa waaʼinrüinjatka saashin tü Wiwüliakat süpüla wakaaliinjiraain namaa na wawalayuukana?

¹⁴ Nükaaliinjüin waya Jeʼwaa süpüla paaʼinwainjanain waya sünain aʼyatawaa nümüin (Sof. 3:​8, 9). Nikirajüin waya maaʼutpünaa süpüla tü kasa eejeetkat mapeena nutuma, nükotchajeʼerapa «kasakat süpüshua tü chasükat iipünaa otta yaasükat saaʼu mmakat, süpüla niainjachin Cristo chi Nüneekajalakai aluwataain saaʼu» ( paashajeʼera Éfeso 1:​9, 10). Niʼreein maʼin Jeʼwaa kottüin tü kasakat süpüshuaʼa sünain aʼwaajaa nia, tü kasa chakat iipünaa otta tü yaasükat saaʼu mmakat. Ayateeria müin sukuwaʼipa nutuma Maleiwa. Piakai jimaʼaikai, ¿piyaawatüitpa aaʼu jamüin anaka paaʼinwale pia namaa na puwalayuukana?

¹⁵ Niʼreein maʼin waya Jeʼwaa sünain paaʼinwainjanain waya süpüla kaʼikat süpüshuaʼa, müshiijeseʼe nükaaliinjüin waya maaʼutpünaa yaa süpüla müinjatüin wakuwaʼipa. Müsüjeseʼe süküjüin wamüin tü Wiwüliakat sünain wakaaliinjiraainjanain waneʼewaire wakua, anuu sünüiki: «Anakaja müleka aijiraale jia jüpüla, süka pawalaawainapain jia», «anakaja jooluʼu jütütülaajiraale süka tü pütchi taküjaitpakat jümüin» jee müsia «anakaja müleka ayatüle jütütüjüin na juwalayuukana sünain anoujaa» (1 Cor. 12:25; Roma 12:10; 1 Tes. 4:​18; 5:​11). «Anakaja müleka motüle jaaʼin naainjala wane juwala», müshi Jeʼwaa wamüin süka nütüjaain saaʼu nnojoluin lotuin wakuwaʼipa (Éf. 4:​32).

16, 17. (1) ¿Jamüshii woʼunüinjanaka sünain tü outkajawaakat? (2) ¿Kasa shikirajaka anain na jimaʼaliikana tü nukuwaʼipakat Jesuu?

¹⁶ Süpüla paaʼinwainjanain waya naashin Jeʼwaa, acheküshii woʼunüin sünain tü outkajawaakat. Waainjüle tia, akaaliinjiraajeena waya wapüshuaʼa sünain kamaneejiraain jee sünain waaʼinrüin tü anasükat. Keeʼireesü naaʼin Jeʼwaa woʼunüinjanain sünain tü outkajawaakat süpüla watütüleʼerajiraainjatüin waaʼin waneʼewaire wakua sümaʼinruʼu waʼatapajüin tü nükaliakat (Heb. 10:​24, 25).

¹⁷ Kojutüinjatü wamüin tü outkajawaakat maʼaka kojutüin nümüin Jesuu oʼunaa suluʼumüin tü aʼwaajüleekat Maleiwa. Wanaa sümaa 12 nuuyase Jesuu, oʼunüshi nia namaa na wayuu kachonkana nia Jerusalénmüin suluʼu tü aʼwaajüleekat Maleiwa. Shiasaʼa nüleʼejapa nüchikuaʼa José sümaa María nepialuʼumüin, nasukajaain Jesuu wopuluʼu. Nüleʼejaakalaka José sümaa María Jerusalénmüin sünain achajawaa nüchiki Jesuu. Chajaittaalaka nia napüla suluʼu tü aʼwaajüleekat Maleiwa. Joyotojottaalashi nia napüla naʼaka na ekirajüliikana sünain aapajaa nanüiki jee sünain asakiijaa naya (Luc. 2:​45-​47).

18. ¿Jamüshii paaʼinwaajeenaka waya müleka woʼuraajüle napüleerua na wawalayuukana?

¹⁸ Süpüla paaʼinwainjanain maʼin waya, alinjatü wapüla tü wayuukalüirua otta oʼunüinjana waya sünain tü outkajawaakat. Anashii woʼuraajüle napüleerua na wawalayuukana. Wachuntüle kaaliinwaa nümüin Maleiwa napüleerua na wawalayuukana shiimain sünain kapülain waaʼin naya. Eesü süpüla waainjüin wapüshuaʼa tia. Jimaʼaire pia, anashi puʼuraajüle napüleerua na puwalayuukana süpüla paaʼinwainjachin pia namaa. Paainjüle tia, pejeechi pia nanain na wayuu suluʼukana nupueulose Maleiwa otta nnojoleechi pia nanainpünaain na wayuu nuluwataakana aaʼu Satanaa.

WEEʼIYATA SÜNAIN WAYAJIRAAIN NEʼE SÜNAIN TÜ ANOUJAAKAT

19-21. (1) ¿Kasa neeʼiyataka akajee na anoujüshiikana nayajiraain neʼe sünain tü anoujaakat? Püküja süchiki tü alatakat namüin na wawalayuukana. (2) ¿Kasa shikirajaka anain waya tü naainjakat na wawalayuukana suʼunnaa kasa mojusü?

¹⁹ Wayakana aʼyataashiikana nümüin Jeʼwaa, weeʼiyatüin wayajiraain neʼe sünain tü anoujaakat maʼaka süküjüin Roma 12:​5. Weeʼiyatüin tia, wakaaliinjapa na anoujüshii alatakana amüin kasa mojusü sutuma sukutkujaain mma, eein wawai otta süsetüin wüin. Jamüsüjaʼa soʼu juyaka 2011, eejatü wanee juya wawaimaajatü chaa Mindanao, Filipinas. Sutuma miyoʼushaatain tü juyakat, alatüsü suulia 40 miit piichiirua ajaʼlajaaka sutuma. Wainma na wawalayuu ajaʼlajaakana epia sutuma. Anuu nanüiki na wawalayuu aʼyataakana suluʼu Weteet chaa Filipinas: «Süpülapünaa waneeküin jaraliinjanain waluwataain sünain akaaliinjaa naya wawalayuukana, antatüjülia suluʼumüin Weteet tü kasa naluwataakat na wawalayuu kepiakana wattapünaa. Aluwateʼetshii naya eküülü, kuluulu, wüin jee waneeirua kasa».

²⁰ Soʼu sukutkajaain mma chaa Japón jee süsetüin tü palaakat, watta naalii wawalayuu nnojoliikana kasain apütaain namaʼana. Eesü wanee wawala Yoshiko sünülia, ajaʼlajaʼaleesia tü shipiakat. Müsü shia süchiki tia: «Waneemüin kaʼi süchikijee sukutkajaain mmaka, ainküsü neʼe waaʼin süka weʼrüin chi wawala alapalaakai waaʼu nümaa wanee wawalayaa, antüshii naya sünain asaajaa waya. Talatüshii maʼin waya sutuma nakaaliinjüin waya na wawalayuukana. Antitshii wamüin kuluulu, sapaata jee waneeirua kasa». Müshi wanee wawala akaaliinjaka na wawalayuukana: «Paaʼinwashii na wawalayuukana sünain akaaliinjirawaa mayaainjeʼe wattajeʼewaliin naya. Eejanaʼaya na wawalayuu sejenakana Estados Unidos sünain akaaliinjaa. Wasakirüin naya jamüin nantaka yaamüin sünain akaaliinjaa. Shiasaʼa namaka wamüin: ‹Aisü wamüin tü alatakat namüin na wawalayuu yaakana Japón. Jamataʼaleeshiijaʼa süpüla nnojoliinjanain wakaaliinjüin naya› ». Talatüsü maʼin waaʼin süka naʼakain waya wayuu aipüralii. Talatakajasaʼa maʼin naaʼin Jeʼwaa süka niʼrüin paaʼinwain waya wapüshuaʼa.

²¹ Paaʼinwajiraale waya maaʼutpünaa yaa, eejiraajeena waya sümaa tü kasa mojusü alatajatkat mapeena. Müle wakuwaʼipa, akaaliinjiraajeena waya suʼunnaa tü müliaa miyoʼusükat, jaʼitairü nnojoluin watüjaain aaʼu nakuwaʼipa na wawalayuu wattajeʼewaliikana. Eesü wanee wawala Fumiko sünülia, chejeʼewat Japón. «Pejesü maʼin nükalia Maleiwa. Ayatüinjanaʼaya wakaaliinjüin na wawalayuukana waneʼereʼeya najaʼttirapa Maleiwa tia kasa mojusükat», müsü shia süchiki tü wawai eejatkat.

22. ¿Kaseerü naainjaka Maleiwa wapüleerua paaʼinwajiraale waya namaa na wawalayuukana?

²² Paaʼinwale maʼin waya namaa na wawalayuukana, oʼttaajeena waya sajaʼttinnapa tü kasa mojusükat, jaʼitainna jimaʼaliin jee ataralüinnain waya. Nuʼtteʼereena waya Maleiwa maʼaka nuʼtteʼerüin na israeliita namaiwajanakana (Is. 52:​9, 10). Shiimain nuʼtteʼereenain waya Jeʼwaa müleka paaʼinwale waya namaa na wayuu suluʼukana nupueulose. Wanee kasa akaaliinjeenaka waya süpüla wountüin tia, shia kojutüle maʼin wamüin tü kasa aapünakat wamüin nutuma Maleiwa. Ekirajaaneerü anain tia sünain tü wanee ekirajaayakat.