Piyaawateerü aaʼu tü sümakat tü Wiwüliakat

Puʼunajaale suluʼumüin wanee mma wattapünaa, wainmeerü kasa poneetka paaʼin chayaa. Maʼaka saaʼin sukuwaʼipa wayuu, tü eküülü shikaajakat jee tü nneetkat. Eesü shapaajeerüle paaʼin sutuma tia.

Akaataajaʼa neʼe paashajeʼerüle tü Wiwüliakat, eesüjaʼa nnojoleerüle piyaawatüin saaʼu süpüshuaʼa tü kasa paashajeʼereetkat. Piʼraajeerü wainma sukuwaʼipa wayuu maʼaka tü nakuwaʼipakat na filisteokana, pütüjaajeerü aaʼu jamüin süchatajaapuʼuka wayuu tü süsheʼinkat sümaiwa paala. Pütüjaajeerü aaʼu kasain wayuu tü maná münakat otta wanee nneerü dracma münüsü (Éxodo 16:31; Josué 13:2; 2 Samuel 3:31; Lucas 15:8, 9). Eesü nnojoleerüle müin piyaawatakai saaʼin tia. Chapa pia suluʼu wanee mma nnojotka piʼraajüin, jimateerü paaʼin müleka pümaale wanee wayuu eʼraajakai tia mmakat. Akaʼaya paashajeʼerapa tü Wiwüliakat, eejeerü tü nnojoleetkat piyaawatüin aaʼu. ¿Keeʼireesü paaʼin nikirajüin pia wanee wayuu atüjakai süpüleerua tü Wiwüliakat?

EKIRAJÜNÜSHII SÜMAIWA PAALA

Ashajünüsü tü Wiwüliakat soʼujee tü juyakat 1.600 süpülapünaa wakalia, soʼujeʼereʼeya tia, ekirajünüshii na wayuukana sünain jamaluʼuluin tü pütchi ashajünakat. Jamüshijaʼa Moisés, nikirajüin na wayuukana sünain jamaluʼuluin tü pütchi nüshajakat (Deuteronomio 1:5).

Kakalia mapa süchikijee tia, ayatüshii eein wayuu ekirajaka sünain tü Wiwüliakat. Soʼu tü juyakat 455 süpülapünaa wakalia, outkajaashii na judíokana suluʼu wanee pülaasa chaa Jerusalén sünain aapajaa nünüiki Maleiwa; eejana tepichicheein namaa soʼu tia. Na ekirajüliikana sünain tü Wiwüliakat, naashajeʼerüin tü nünüikikat Maleiwa. Na wayuu eejanakana soʼu kaʼikat tia, nayaawata aaʼu jamaluʼuluin tü pütchi aashajeʼennakat süka süküjünüin namüin jamaluʼuluin shia (Nehemías 8:1-8).

Maʼaka 500 juya mapa, nikirajüin Jesukürisüto tü wayuukalüirua sünain tü nünüikikat Maleiwa. «Ekirajüikalee» münüshi nia sutuma wayuu (Juan 13:13). Eeshi nikirajüle watta saalii wayuu, eeshii palitchonle nayaʼaya. Jamüshijaʼa Jesuu, oʼunüshi nia saaʼu wanee namüna, nuʼttaka sünain ekirajaa watta saalii wayuu, kettaapa nünüiki Jesuu, ponoshootosü saaʼin wayuu nünüiki (Mateo 5:1, 2; 7:28). Soʼu juyakat 33, yootushi Jesuu namaa piamashii nikirajüin, chaʼwalii naya suluʼumüin wanee mma kanüliasü Emaús. Jee nakuoʼu sünain waraittüin naya, nikirajüin naya Jesuu sünain tü pütchi nüchikimaajatkat Maleiwa (Lucas 24:13-15, 27, 32).

Ekirajapuʼushii sünain tü Wiwüliakat na nikirajüinkana Jesuu. Eejachinka wanee wayuu aashajeʼerakai tü Wiwüliakat, chejeʼewai Etiopía, nürütkaakalaka Felipe nünainmüin sünain maa nümüin: «Eesüya piyaawata aaʼu türa paashajeʼetkat». Jee chi wayuukai nusouktakalaka niʼipajee: «¿Jamakuaippalüinjatü süpüla tayaawatüin saaʼu, nnojolire eein wane wayuu aküjainjachikai tamüin sünain jamaluʼulüin?». Nikirajüinjaʼa nia Felipe sünain jamaluʼuluin tia pütchikat (Aluwataaushikana 8:27-35).

EKIRAJÜNÜSHII MAAʼULU YAA

Na aküjüliikana pütchi nüchiki Jeʼwaa, nekirajüin na wayuukana sünain tü Wiwüliakat maaʼulu yaa, ekirajüshii naya suluʼu 239 mma (Mateo 28:19, 20). Nekirajüin na wayuukana sünain tü Wiwüliakat semaanawai, alatüsü suulia 9 miyoone wayuu nekirajaka. Noʼutku na wayuu nekirajakana, suluʼujeejana mma eere nnojoluin sunoujain wayuu nünain Kürisüto. Nnojoleena naya achekajüin nneerü saaʼu nekirajüin pia, nekirajeechi pia pipialuʼu jee shiale eere anain shia pümüin. Eeshi süpüla nayamaajüin pia süpüla nekirajüin pia, eeshi süpüla nekirajüin pia suluʼu Internet.

Pikirajaweere, paashajaa nümaa wanee aküjüi pütchi nüchiki Jeʼwaa. Piʼreerü sünain mapüleechoin tü Wiwüliakat. Watta saalii pütchi anasü suluʼu; na oonookana sümaa, «achiajaaneena naya sütüma suulia kaainjalaa, anouktüneena akuaippa sütüma, je akaaliijüneena naya sütüma sünain aaʼinraa tü kasa anasükat. Nounteetkalaka naaʼinrüin süpüshua tü kasa anasü talatakat atüma naaʼin Maleiwa» (2 Timoteo 3:16, 17).