¿Eeshiche wane aapiee aaʼinmajakai pia waneepia?

Anuu nünüiki Jesuu: «Jalia jia suulia pülajüin jaaʼin noulia na anoujashiikana tanain, na makana saaʼin tepichi. Tamüshii paala jia: Na aapiee eʼitaaushikana süpüla aaʼinmajaa naya, jutatüsü napüla ekerolaa nünainmüin chi Tashikai Maleiwa chaa iipünaa» (Mateo 18:10). Nnojotsü shiain nüküjain Jesuu eein aapiee aaʼinmajaka waya waneʼewai wakua. Shia nüküjaka jülüjashaatain na anoujashiikana naaʼin na aapieekana. Nnojoliipejeʼe achajaain eewawaa na anoujashii shiimainshiikana sutuma natüjain saaʼu naaʼinmajünüin natuma na aapieekana.

¿Nnojoliika nakaaliinjain waya na aapieekana suulia eewawaa? Nnojotsü shiain tia (Salmo 91:11). Naashin waneinnua wayuu, naaʼinmajüinna naya Maleiwa nakajee na aapieekana sümaa nuʼunirüin nakuwaʼipa. Wanee wayuu makai anüiki nia Kenneth, chi wachuntayüikai anülia sünain tü palajatkat pütchi. Mayaapejeʼe nnojoliinjanain wachecheraain süchiirua wanee kasa wamaka, eesüjaʼa süpüla shiimain tü nümakat Kenneth. Natüjaa aaʼu na aküjaliikana pütchi nüchiki Jeʼwaa jülüjain naaʼin na aapieekana tü naʼyataainkat sünain aküjaa pütchi. Nnojotpejeʼe watüjaain saaʼu joujawalin nuluwataain Maleiwa na aapieekana sünain akaaliinjaa wayuu, jama meʼrujuin naya. Jee müsia, nnojotsü mojuin waapüle analuʼut nümüin Maleiwa weʼrüle müin nuluwataakai wanee aapiee sünain akaaliinjaa waya (Colosas 3:15; Santiago 1:17, 18).