¿Eeshiiche aapiee eekai mojulaain?

Jamüsaʼa shia. ¿Jamakuwaʼipaliika süpüla mojulaain naya? Nukumajüin Maleiwa na aapieekana süpüla naneeküinjatüin süka naaʼin namüiwaʼa tü keeʼireekat naaʼin. Süchikijee nukumajünüin Adán sümaa Eva nutuma Maleiwa, eejachi wanee aapiee aaʼinrakai tü kasa mojusükat süpüla shiʼrüinjatüin wayumüin wayuu nümüin Maleiwa. Müshijeseʼe niʼrüin wayumüin Adán sümaa Eva (Génesis 3:1-7; Alateetkat Mapeena [Apocalipsis] 12:9). Nnojotsü süküjain tü Wiwüliakat kasaichin nünülia chia aapieekai süpülapünaa niʼrüijaain wayumüin otta nnojotsü süküjain kasain niʼyataain anain paala nümüin chi Maleiwakai. Sutuma müin naainjala, Satanaa münüshi nia sutuma tü Wiwüliakat süka «nüʼünüüin» nia Maleiwa otta Yolujaa münüshi niayaa süka «nüküjain alawaa» (Mateo 4:8-11).

Nnojoliipejeʼe nayain neʼe eʼrüin wayumüin nümüin Maleiwa. Jamüsüjaʼa nükalioʼu Noé watta naalii na aapiee ayoutakana aʼyatawaa nümüin Maleiwa chaa iipünaa, müshiijeseʼe nashakatüin yaa Mmapaʼamüin sümaa wayuujaain naya süpüla naainjiraain nakuwaʼipa sümaa jieyuu. Nayoutuin tü eʼitaanakalü apüla naya paala nutuma chi Kakumalakai naya (Judas 6; Génesis 6:1-4; 1 Pedro 3:19, 20, TNM).

¿Jamaka nakuwaʼipa mapa naya aapiee mojulaashiikana? Wanaa sümaa najaʼlajeʼerüin Maleiwa na wayuu mojulaashiikana süka wanee juya miyoʼu maʼin, meʼrujusalii nachikuaʼa na aapiee mojulaashiikana sümaa naleʼejüin sirumatuʼumüin. Sutuma müin naainjala, nnojoliinnapa naya nüchoin Maleiwa, müshii saʼakakai naaʼin piyuushi süka nnojoluin nayaawatüin saaʼu tü naaʼinrajatkat Maleiwa, «Tártaro» sünülia tia sutuma tü Wiwüliakat (Judas 6; 2 Pedro 2:4, TNM). Shiaitpa joo tü yolujaairua nuluwataakalü aaʼu Satanaa, «chi sülaülashikai tü yolujaakalüirua süpüshua», chi ooʼulakakai «nakuaippa na aapiee chajeʼewaliikana eejee Maleiwa» (Mateo 12:24; 2 Corinto 11:14).

Saashin tü Wiwüliakat, nüikaleʼerüin Maleiwa sukuwaʼipa Nuluwataaya chi Mesíaskai chaa sirumatuʼu soʼu juyaka 1914.a Soʼujee tia, ajünajaanüshi Satanaa sümaa tü yolujaakalüirua sirumatuʼujee yaa Mmapaʼamüin. Müsüjeseʼe eein maaʼulu yaa tü mojulawaakat otta tü aainjirawaakat akuwaʼipa, jama jashichin maʼin tü yolujaakalüirua (Alateetkat Mapeena 12:9-12).

Makaʼa wainmain maʼin tü mojulawaakat shia süka sülüʼülüin süpüla sajaʼttajatüin tü kasa mojusükat. Soʼu palit kaʼi, püreeseerü tü yolujaakalüirua sutuma Nuluwataaya Maleiwa soʼu miit juya. Paʼaraiiseerü tü Mmakat suʼunnaa tia. Sülatapa tü miitkat juya, ajütüneerü motsomüin tü yolujaakalüirua süpüla nooʼulaküin naaʼin na wayuukana. Jee süchikijee ajaʼttinneerü shiairua (Mateo 25:41; Alateetkat Mapeena 20:1-3, 7-10).