Asakinnaka Anain
◼ ¿Kasa waaʼinrajatka süpüla wakaaliinjüin na pürekutsootkana?
Soʼu juyaka 2009, eeshii maʼaka 800.000 wawalayuu sainküin mmaka pürekutsootka rekulaat otta esüpesiaat. Wawalayuukana naainnua nakatalüin kaʼi, naapüin natchin otta tü kasa anasü namaʼanakat süpüla naküjüin tü pütchi anasükat süchiki Nuluwataaya Maleiwa (Pro. 3:9). ¡Talatakajasaʼa maʼin Jeowa sutuma tü kasa naaʼinrakat! ¿Jama wayakana? ¿Müshiʼiya waya maʼaka naaʼin? ¿Kasa eeka süpüla wakaaliinjüin anain na aʼyataakana waneepia nümüin Maleiwa süpüla talatüin otta eejiraain naya sümaa wanee kasa?
Palajana, eesü süpüla watütüleʼerüin naaʼin sükajee pütchi anasü süpüla ayatüin pürekutsoolüin naya (Pro. 25:11). Otta müsia, eeshii süpüla wayuʼlüin kaʼi semaanawai süpüla waʼyataain nümüin Maleiwa namaa. Wanaa sümaa namaain waya, eesü süpüla woʼunüin namaa suluʼu weʼejena suulialeʼeya tü neʼejenakat jee shiale waapüin namüin nasapia. Jee woʼunajaale namaa suluʼu neʼejena, eesü süpüla wawalaajiraain namaa tü kasa süchuntakat tü neʼejenakat (1 Cor. 13:5; Fili. 2:4). Otta müsia weeʼiyatüin alin naya wapüla otta wakaaliinjüin naya wanaa sümaa wounejaain naya wepialuʼumüin sünain ekawaa wamaa (1 Ped. 4:8, 9).
Saashin tü Wiwüliakat, naapeerü Jeowa tü kasa choʼujaakat namüin na palajanakana atuma tü Nuluwataayakat (Sal. 37:25; Mat. 6:33, NM). Wanee sukuwaʼipa nutuma shia nakajee na wawalayuukana (1 Juan 3:16-18). Akanasaʼa na pürekutsootkana, nnojotsü naʼatapajüin nayainjanain na waneeinnua aapaka namüin tü nneerü choʼujaakat namüin otta eesü nnojorüle naküjüin müliain naya sutuma tü choʼujawaakat amüin kasa. Makalaka eejüinjatüin waaʼin otta jülüjüinjanain waaʼin naya süka eein süpüla wakaaliinjüin naya süpüla ‹nnojoluinjatüin kasain choʼujaain namüin› (2 Cor. 8:14, 15).
Wanaa sümaa suʼunüin Febe Romamüin, wanee aʼyataat nümüin Maleiwa waneepia chayaa Cencreas, müshi Pablo namüin na anoujüshii chajanakana Roma: «Anakaja kamaneere jia sümüin, süka jiajiraain sümaa sünain jünoujain nünain chi Senyotkai. Jükaaliija shia sünain tü jaʼijaakat sümüin» (Roma 16:1, 2). Müshiʼiya wayakana maaʼulu yaa, eesü süpüla weeʼiyatüin alin wapüla na wawalayuu aküjakana pütchi waneepia maʼaka pürekutsoolüin rekulaat naya otta esüpesiaalüin naya (Aluw. 5:42, NM).