WAKUWAʼIPA SÜNAIN ANOUJAA

Tü jeketüinjatkat sünain Wakuwaʼipa otta Waʼyataain nümüin Maleiwa

Soʼujee eneeroʼu 2018 ekirajaainjana waya sünain tü videokalüirua otta tü pütchi suluʼujeejatkat tü Wiwüliakat New World Translation of the Holy Scriptures (nwtsty), ojuʼitaka jekenainka. Ekirajaaneerü anain tia jaʼitairü nnojoluin sujuʼitüin tü Wiwülia jeketkat suluʼu wanüiki. Atüjeena waya wekirajaapa sünain tü outkajawaakat otta arütkaajeena maʼin waya nünain Jeʼwaa, chi Washi aikai apüla waya.

PÜTCHI SULUʼUJEEJATÜ TÜ WIWÜLIAKAT

Suluʼu tia pütchikat, eeʼiyatünüsü sukuwaʼipa wayuu sümaiwajatü, sukuwaʼipa mma otta sünüiki wayuu saashajaaka achiki tü Wiwüliakat.

Mateo 12: 20, TNM

Wanee mechuuria chuwatüsü: Shia wanee ranpara aainjuushi süka pootshi kaluʼuka süseitain oliva. Chuwatüsü tü ranparakat sutuma tü mechuuria aainjuushikat süka lino. Tü pütchikat «mechuuria chuwatüsü» suluʼu griego shia saashajaaka achiki sümüsain wanee ranpara eekai shiyokojoweein. Süküjatüjülia Isaías 42:3 nümüliajülinjachin Jesuu otta naʼatapajüinjatü na wayuukana anain naya nutuma maʼaka ayatüin chuwatüin wanee mechuuria.

Mateo 26:13, TNM

Shiimain tü tamakat: Tü pütchikat «shiimain tü tamakat», shiaʼaya neʼe sülatiria süka griego otta hebreo tü pütchikat amén. Niweetirawalin Jesuu tia pütchikat süpüla kanoulainjatüin maʼin wayuu sünain shiimainshaatain tü pütchi nüküjakat. Eeshi «shiimain tü tamakat» otta «amén» nümüle Jesuu, süka shiimain tia süküjakat tü Wiwüliakat. Eesü piantuajaale suchuntia nutuma Jesuu tü pütchikat amén, maʼaka suluʼu tü karaloʼutakat Juan, «shiimain tü tamakat», maluʼulu tia (Jn 1:51).

VIDEOKALÜIRUA

Eesü ayaakua, video meeʼirasat otta video süchiki watta saalii kasa aküjünaka achiki suluʼu tü Wiwüliakat.

Betfagué, tü wutai kanüliakat Olivos otta Jerusalén.

Suluʼu videokot tüü, weʼrüin tü pueulokot et-Tur, wüinpejeeruʼu sünain Jerusalén, eesü shiale tü mma Betfagué münakat suluʼu tü Wiwüliakat. Yaletüshiisü maʼin tia mmakat saaʼu tü wutai kanüliakat Olivos. Wüinpejeeruʼu saaʼu Betfagué, ichaa tü mmakat Betania, saaʼusü wanee patajatshii eeka tü wutai kanüliakat Olivos. Chale Jesuu namaa na nikirajüinkana Jerusalén, atunkaashii naya Betania, «El ʽEizariya» sünülia tia mmakat maaʼulu, «eejachire Lázaro» maluʼulu tia pütchikat süka Árabe. Shiimain makatapuʼuin Jesuu shipialuʼu Marta, Mariia otta Lázaro (Mt 21:17; Mr 11:11; Lu 21:37; Jn 11:1). Eesü shiale eeʼiyatünüin suluʼu tü videokot tü wopu nuʼunawaikalü aluʼu Jesuu namaa na nikirajüinkana nepialuʼujee chamüin Jerusalén. Soʼu juyaka 33 So.W., 9 sükalia kashika Nisán, wanaa sümaa nikerotuin Jesuu Jerusalénmüin naaʼu wanee püliiküchon, eeshijaʼa süpüla nujuʼituin chejee Betfagué suluʼupünaa tü wopu chaʼwatkat Jerusalénmüin.

Tü wopu chaʼwatkat Betania Betfaguéjee
Betfagué
Tü wutai kanüliakat Olivos
Tü patajatshiikat Cedrón
Tü uuchi kaaʼujatkat tü aʼwaajüleekat

Wanee külaawa sünain shiinee suuʼui wayuu

Suluʼu tü ayaakuaakat eeʼiyatünüsü wanee shiinee suuʼui wayuu eekai süchituushin anain wanee külaawa aainjuushi süka kachueera eekai 11,5 cm sajaʼapüin. Tia ayaakuakalü ayuʼluushi sünainjee wanee jiipü ousütünaka soʼu tü juyakat 1968 wanaa sümaa supotunüin tü mmakat süchiirua kasa chaa Jerusalén, tia külaawakat eejatü soʼu nakalia na romaanokana. Shiiʼiyaatüin wamüin tia, akachennawaishii na wayuukana sünain wanee wunuʼu. Tü külaawakat eesüjaʼa süpüla müin aka saaʼin tü achitünakalü aka Jesuu natuma na surulaat romajeʼewaliikana. Ousütünüsü shia suluʼu wanee osario aainjuushi süka ipa, niipüse wanee wayuu outushi tia makat. Makalaka eein süpüla nojoitünnüin wanee wayuu eekai achituushin saaʼu wanee wunuʼu (Mt 27:35).