Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
JUULIOʼU 6-12
KOROLO KOJUTUSÜ SULUʼUKA TÜ WIWÜLIAKAT | ÉXODO 6, 7
«Piʼreerü tü taaʼinrüinjatkat nümüin Faraón»
(Éxodo 6:1) Nümaka joo Jeʼwaa nümüin Moisés: «Piʼreerü tü taaʼinrüinjatkat nümüin Faraón. Sutuma tü kasa pülasü taainjainjatkat nümüin, nüjüteena jia. Nüjüteena jia suluʼujee tü nuumainkat».
(Éxodo 6:6, 7) Müinjatü pünüiki namüin na nüchonniikana Israel: ‹Tayaʼaya chi Jeʼwaakai, taya ayuʼluinjachika tapueulose namaʼanajee na egipciokana, toʼtteʼereena naya suulia achepchieein naya. Neʼreerü noʼukajatü na egipciokana tatuma otta süsaleena naya tatuma saaʼujee tü naainjalakat otta tantireerü namüin kasa mojusü. 7 Tamaajeena jia süpüla tapueulosein jia, Jümaleiwaseechi taya. Jütüjaajeerü aaʼu tayain Jeʼwaa, chi Jümaleiwasekai, chi ayuʼluinjachikai jia suulia müliaa chejee Egiptojee.
it-2-S 415 püt. 1
Moisés
Aʼwanajaasü nakuwaʼipa na wayuu kepiakana chaa Israel. Anapuʼusü namüin niain Moisés nekiipüʼüin. Shiasaʼa soʼu shiʼitaanüin maʼin aʼyatawaa namüin nutuma faraón, mojusü nanüiki nümüin Moisés. Mojukalaka maʼin naaʼin Moisés sutuma tia jee nuchuntaka kaalinwaa nümüin Jeʼwaa (Éx 4:29-31; 5:19-23). Atütülaasü naaʼin Moisés sutuma tü nümakat Jeʼwaa nümüin. Sünain nikeraajüinjatüin tü nümakat paala nümüin Abraham, Isaac otta Jacob, niyaawatüinjatüin saaʼu jamaluʼuluin maʼin tü nünüliakat soʼu taashin na israeliitakana nutuma otta wainmainjanain maʼin naya suluʼu tü Mma Anasükat (Éx 6:1-8). Nnojoishii jaa müin na israeliitakana sümüin tü nümakat Moisés. Shiasaʼa süchikijee tü mekietsatkat kasa mojusü antaka nanainmüin na egipciokana, naaʼinrüin na israeliitakana tü nümakat Moisés otta aʼyataajiraashii maʼin naya. Süchikijee tü poloosükat kasa mojusü, kottushii naya nutuma Moisés süpüla nojuʼitüin suluʼujee tü mmakat Egipto (Éx 13:18).
(Éxodo 7:4, 5) Nnojoleechi jaa müin pümüin Faraón. Tayuruleerü tatüna nanainmüin na egipciokana jee tantireerü namüin wainma kasa mojusü, tayuʼleena na israeliitakana, tü tapueulosekat. 5 Natüjaweetkalaka saaʼu na egipciokana tayain chi Jeʼwaakai, chi ayurulakai nütüna nooʼomüin na egipciokana, chi ojuʼitirakai na israeliitakana.
it-2-S 414 püt. 5, 6
Moisés
Nuʼupala faraón chaa Egipto. Moisés otta Aarón naya na wayuu nüneekakana Jeʼwaa süpüla neʼikajaain tü nünüikikat nümüin faraón. Nüneeküin faraón Janes otta Jambres süpüla naainjain kasa pülasü niʼipomüin Jeʼwaa (2Ti 3:8). Sutumajee tü palajatkat kasa naainjaka Aarón nuʼupala faraón, atüjaana aaʼu pülaleein maʼin Maleiwa noulia na maleiwayaashii chakana Egipto. Ayatapejeʼe ichein faraón saaʼu tü nümakat (Éx 7:8-13). Süntapa nanainmüin na egipciokana tü apünüinsükat kasa mojusü, müsü nanüiki na sacerdootekana: «¡Niaʼaya Maleiwa kasitka tü makat!» Müliashii maʼin naya wanaa sümaa yoolin tü natakat. Sutumajee tia, nnojoishii oʼunuin nümaʼanamüin faraón süpüla nayoutuin tü nümakat Moisés (Éx 8:16-19; 9:10-12).
Eeshii na aikana apüla Jeʼwaa jee na ayoutakana nia. Nüküjain Moisés otta Aarón waneʼewai sukua tü poloosükat kasa mojusü. Ekeraajüsü tia wanaa sümaa nüküjain süchiki tia kasa mojusükat. Süka müin shia, atüjaana aaʼu nünüikimaajachin Maleiwa Moisés. Eʼraajünüsü maʼin tü nünüliakat Jeʼwaa sainküinpünaa Egipto. Eeshii na aikana apüla Maleiwa maʼaka naaʼin na israeliitakana jee waneinnua egipcio otta eeshii na maalinkana apüla Maleiwa maʼaka naaʼin faraón, na aʼyataakana niʼipajee otta na wanaawakana aaʼin nümaa (Éx 9:16; 11:10; 12:29-39). Natüjaa aaʼu na egipciokana niain Jeʼwaa kasalajanain atuma naainjala na namaleiwaseyaashiikana. Süchikijee shikeraajüin tü mekietsat kasa mojusü, kojutushi maʼin Moisés atumawaa suluʼu tü mmakat Egipto, kojutushi namüin na aʼyataakana nümüin faraón jee kojutushi nia noʼupala na wayuukana (Éx 11:3).
Püchajaa süchiki kaaʼürüi suluʼu tü Wiwüliakat
(Éxodo 6:3) Eeʼiyataapuʼushi taya nümüin Abraham, Isaac otta Jacob, maʼaka naaʼin wanee Maleiwa Pülashaatashi. Akatsaʼa nnojoluin taküjain namüin Jeʼwaain tanülia.
it-2-S 1140 püt. 4, 5
Chi Pülashikai maʼin
«Taya chi Maleiwa Pülashikai maʼi» müshi Jeʼwaa nümüin Abraham wanaa sümaa nüküjain süchiki jemelinjachin Isaac. Niʼitaashaatainjatü naaʼin Abraham nünain Jeʼwaa sünain nikeraajüinjatüin tü nümakat nümüin. Tü pütchikat «chi Maleiwa Pülashikai maʼi» makat, aküjünüsü neʼe wanaa sümaa naapüinjatüin naʼanasia Jeʼwaa nümüin Isaac otta nümüin Jacob (Gé 17:1; 28:3; 35:11; 48:3).
Kakalia mapa, müshi Maleiwa nümüin Moisés: «Eeʼiyataapuʼushi taya nümüin Abraham, Isaac otta Jacob, süka tayain chi Maleiwa Pülashaatakai. Akatsaʼa nnojoluin taküjain namüin Jeʼwaain tanülia» (Éx 6:3). Tü süküjeekat tia pütchikat nnojotsü shiain nnojolin neʼraajüin tü nünüliakat Jeʼwaa, süka jamüin, nachuntapuʼuin shia nayakana otta na natuushinuukana (Gé 4:1, 26; 14:22; 27:27; 28:16). Tü pütchikat «chi Pülashikai maʼin» makat ashajünüsü aipiruatua suluʼu tü karaloʼutakat Génesis, akaajasaʼa nünülia Jeʼwaa ashajünüsü 172 sukua süka hebreo. Nütüjaa aaʼu Abraham, Isaac otta Jacob niain Maleiwa chi Pülashikai maʼin. Nnojotpejeʼe natüjaain maʼin saaʼu jamaluʼuluin maʼin tü nünüliakat otta tü nuuntakat sükajee.
(Éxodo 7:1) Nümaka Jeʼwaa nümüin Moisés: Maleiwashi pia tatuma nümüin Faraón otta nieechi pünüikeʼejachika Aarón, chi puwalakai.
it-2-S 414 püt. 2
Moisés
Ayatüshia aʼyataain Moisés mayaapejeʼe isain shia nüchiki naashin. «Iseerü maʼin tachiki tia», müshi Moisés otta nüküjain kajain nia süpüla aashajawaa. Nnojotpejeʼe mapuʼuin nukuwaʼipa Moisés pienchi shikii juya paala. «Tayeechi oʼuniraka tü pueulokot Israel süpüla taashinjatüin», mapuʼushi. Nuchuntuin maʼin Moisés nümüin Jeʼwaa nnojoluinjatüin niʼitaain nüpüleerua tia aʼyatawaakat otta wainma kasa nüküjaka nümüin. Mayaapejeʼe jashichin Jeʼwaa nümüin, nnojoishi niyüülajüin. Nia nüneekaka chi nuwalakai süpüla nünüikeʼejanainjachin. Sutuma niain Moisés nünüikimaajachin chi Maleiwakai, müshi aka naaʼin chi Maleiwakai nümüin Aarón otta nüküjainjatü Aarón tü nüküjakat Moisés nümüin. Nüküjain Jeʼwaa nümüin Moisés tü nüküjainjatkat Aarón namüin na israeliitakana otta nümüin faraón (Éx 2:23; 4:10-17). «Chi nünüikimaajachikai Moisés», müshi Jeʼwaa nüchiki Aarón. Makaʼa nünüiki Jeʼwaa, shia süka niainjachin Moisés oʼuniraka nukuwaʼipa Aarón otta nüküjain Jeʼwaa nümüin Moisés nnojoluinjachin mmoluin neema chi aluwataakai saaʼu Egipto süka naapeerüin Jeʼwaa nüpülain nümüin otta laülaainjachin nia naaʼu faraón (Éx 7:1, 2).
Wetsiikulo aashajeʼennajatka
(Éxodo 6:1-15) Nümaka joo Jeʼwaa nümüin Moisés: «Piʼreerü tü taaʼinrüinjatkat nümüin Faraón. Sutuma tü kasa pülasü taainjainjatkat nümüin, nüjüteena jia. Nüjüteena jia suluʼujee tü nuumainkat». 2 Nümaka joo Maleiwa nümüin Moisés: «Taya chi Jeʼwaakai. 3 Eeʼiyataapuʼushi taya nümüin Abraham, Isaac otta Jacob, maʼaka naaʼin wanee Maleiwa Pülashaatashi. Akatsaʼa nnojoluin taküjain namüin Jeʼwaain tanülia. 4 Tapansaajüin namaa taapüinjatüin namüin tü mmakat Canaán, eejanale kepiain suluʼu wayuuin naatajanain naya. 5 Taapüin neʼira na nüchonniikana Israel, müliashii maʼin naya natuma na egipciokana otta sotusü taaʼin tü pütchi tapansaajakat namaa. 6 Müinjatü pünüiki namüin na nüchonniikana Israel: ‹Tayaʼaya chi Jeʼwaakai, taya ayuʼluinjachika tapueulose namaʼanajee na egipciokana, toʼtteʼereena naya suulia achepchieein naya. Neʼreerü noʼukajatü na egipciokana tatuma otta süsaleena naya tatuma saaʼujee tü naainjalakat otta tantireerü namüin kasa mojusü. 7 Tamaajeena jia süpüla tapueulosein jia, Jümaleiwaseechi taya. Jütüjaajeerü aaʼu tayain Jeʼwaa, chi Jümaleiwasekai, chi ayuʼluinjachikai jia suulia müliaa chejee Egiptojee. 8 Tantireena jia suluʼumüin wanee mma tapansaajaka nümüin Abraham, Isaac otta Jacob; taapeerü jümüin tia mmakat maʼaka wanee apaalaa. Taya chi Jeʼwaakai›». 9 Nüküjain Moisés tia mapa namüin na israeliitakana, nnojoliipejeʼe naya jaa müin nümüin süka mojuin maʼin naaʼin ooʼulaka müliashii maʼin naya süka achepchieein naya. 10 Anuujeseʼe nünüiki Jeʼwaa nümüin Moisés: 11 «Puʼuna nümaʼanamüin faraón chi aluwataakai Egipto jee püma nümüin nuuʼulaaiwa noʼunuin na israeliitakana». 12 Anuukalaka nünüiki Moisés nümüin Jeʼwaa: «Sutuma matüjain taya aashajawaa, nnojoishii jaa müin na israeliitakana sümüin tanüiki, nialeekajaʼa jaa meematüin faraón tamüin». 13 Mayaapejeʼe müin tia, nüküjain Jeʼwaa süchikuaʼa nümüin Moisés otta nümüin Aarón tü naküjainjatkat namüin na israeliitakana otta tü naküjainjatkat nümüin faraón chi aluwataakai saaʼu Egipto, naainjain tia süpüla noʼunuinjanain na israeliitakana yalejee Egiptojee. 14 Anuu nanülia na nekiipuʼukana na napüshikana, anuu nanülia na nüchonniikana Rubén chi epayaakai: Hanok, Palú, Hezrón otta Carmí. Naya, naya na nüpüshikana Rubén. 15 Anuu nanülia na nüchonniikana Simeón: Jemuel, Jamín, Ohad, Jakín, Zóhar otta Shaúl, chi süchonkai wanee cananea. Naya, naya na nüpüshikana Simeón.
JUULIOʼU 13-19
KOROLO KOJUTUSÜ SULUʼUKA TÜ WIWÜLIAKAT | ÉXODO 8, 9
«Ekeraajüsü tü nümakat Maleiwa nükajee chi faraón yaletakai aaʼin»
(Éxodo 8:15) Niʼrapa faraón sünain nnojoluitpain tia, eʼrüijaashi wayumüin nüchikuaʼa ooʼulaka nnojoishi jaa müin nümüin Moisés otta nümüin Aarón maʼakaajüle nüküjain paala shia Jeʼwaa.
it-2-S 1105
Eʼrüi wayumüin
Waneepieechi Jeʼwaa namaa na wayuu nukumalakana. Nnojoliipejeʼe najaʼttirüin waneinnua wayuu mayaapejeʼe neʼrüliin wayumüin (Gé 15:16; 2Pe 3:9). Sutuma sümülialaain naaʼin Maleiwa naaʼu na wayuukana, eeshii na aapaakana sümaa tü nünüikikat. Eejanapejeʼe waneinnua wayuu ichekana saaʼu nanüiki sünain nnojoluin noonooin sümaa tü nümakat Maleiwa otta sümaa tü nupueulosekat (Jos 2:8-14; 6:22, 23; 9:3-15; Dt 2:30-33; Jos 11:19, 20). Nuuʼulaain Jeʼwaa neʼrüliinjanain wayumüin waneinnua wayuu otta icheinjanain naya saaʼu tü namakat. Najaʼttirapa Jeʼwaa na eʼrüliikana wayumüin, ayaawatüneerü aaʼu pülashaatain maʼin nia otta shiʼraajüneerüin maʼin tü nünüliakat (anasü paashajeʼerüle Éx 4:21; Jn 12:40; Ro 9:14-18).
(Éxodo 8:18, 19) Nooʼulaküinjeseʼe tia na sacerdoote aainjakana kasa yolujaamaajatü süpüla eejaainjatüin shipe natuma. Nnojotpejeʼe nountuin tia. Watta maʼin saalii tü shipekat, ashutusü maʼin saaʼu tü wayuukalüirua jee saaʼu tü mürütkalüirua. 19 Anuujeseʼe wanee pütchi nümüinjatü faraón natuma na sacerdoote aainjakana kasa yolujaamaajatü: ‹Niaʼaya Maleiwa aainjaka tü makat›. Nnojotpejeʼe kasajatüin nümüin Faraón tü namakat ooʼulaka ayatüshia eʼrülin wayuumüin, maʼakaajüle nüküjain paala shia Jeʼwaa.
(Éxodo 9:15-17) Nnojotsüje kamaʼakuʼu müin tatuma taluwataweere pümüin wanee ayuulii outasiroʼu otta müsia taluwataweere shia sümüin tü pupueulosekalia, outatüjüije pia tatuma otta nnojoishije yaakuʼu müin pia saaʼu tü mmakat. 16 Tooʼulaapejeʼe katüin poʼu süpüla shiyaawatünüin aaʼu pülashin maʼin taya jee süpüla shiʼraajünüinjatüin tü tanüliakat sainküin mmaka süpüshuaʼa. 17 ¿Ayatataashi pia yaletüin aaʼin nnojotka puuʼulaain suʼunuin tü tapueulosekat?
it-1-S 1227
Mojulawaa
Nuuʼulaain Jeʼwaa shikeraajüinjatüin tü nümakat nakajee na wayuu eʼrüliikana wayuumüin. Mayaapejeʼe wainmain tü kasa naaʼinrakat na niʼipolokana Jeʼwaa, nüchajaain maʼin sukuwaʼipa Jeʼwaa süpüla naaʼinmajüin tü nupueulosekat otta süpüla sütüjaanüin aaʼu niain neʼe niakai lotuin akuwaʼipa (Ro 3:3-5, 23-26; 8:35-39; Sl 76:10). Aküjünüsü sooʼomüin süchiki tia suluʼu Proverbios 16:4: «Nukumajala Jeʼwaa tü kasakat süpüshuaʼa süpüla shikeraajüin tü keeʼireekat naaʼin, akaʼaya chi mojulaashikai nuuʼulaain nia süpüla tü kaʼi süsalainjachikalü oʼu naainjala».
Aluwataanüshi Moisés otta Aarón nümaʼanamüin faraón süpüla naküjainjanain nümüin faraón taashinjanain na israeliitakana suulia achepchiee. Nnojoipejeʼe nuʼutuin Jeʼwaa naaʼin faraón süpüla shiyaawatünüinjatüin aaʼu mojulaain maʼin nia otta outuinjachin nia saaliijee tia. Tü naainjakalü aaʼujee Jeʼwaa tia, ashajünüsü shia suluʼu Éxodo 9:16: «Tooʼulaainjeseʼe katüin poʼu süpüla shiyaawatünüin aaʼu pülashin maʼin taya jee süpüla shiʼraajünüinjatüin tü tanüliakat sainküin mmakat süpüshuaʼa».
Ayaawatüna aaʼu pülashaatain maʼin Jeʼwaa wanaa sümaa najaʼttirüin faraón namaʼaleʼeya na nusurulaatsekana shiroku tü palaa ishosükat (Éx 7:14–12:30; Sl 78:43-51; 136:15). Na wayuu kepiakana pejepünaa sünain Egipto naapa achikit tü alatakat nümüin faraón jee yootushii maʼin naya süchiki tia. Sutumajee tia, eʼraajünüsü tü nünüliakat Maleiwa sainküinpünaa Mmakat süpüshuaʼa (Jos 2:10, 11; 1Sa 4:8). Nuʼutunatüjürüle naaʼin faraón nutuma Jeʼwaa, nnojotsüje ayaawatünüin aaʼu pülashaatain maʼin Jeʼwaa jee nnojotsüje taashin tü nupueulosekat nutuma.
Püchajaa süchiki kaaʼürüi suluʼu tü Wiwüliakat
(Éxodo 8:21) Müleka nnojorüle puuʼulaain suʼunuin tü tapueulosekat, taluwataajeerü pümüin taapana, taluwataajeerü shia sümüin tü wayuu aʼyataakalüirua pümüin, tü pupueulosekat otta müsia sümüin püpüshi. Watteerü maʼin saalii tü taapanakat suluʼu nepia na egipciokana otta müsia jachitaʼaleerü neʼe süpaʼapünaa tü mmakat.
it-2-S 1077
Taapana
Tü pienchisükat kasa mojusü antakat Egipto, nnojotsü aküjünüin maʼin süchiki jetsüin maʼin tia wüchiikat. Nnojoliipejeʼe müliain na israeliitakana chaa Gosén sutuma (Éx 8:21, 22, 24, 29, 31; Sl 78:45; 105:31). Wainma sukuwaʼipa süshajia tü pütchikat ʽA·róv, maʼaka saaʼin: «taapana» (EMN, 1988; FS; NC; Mod; NM; VP), «jaʼyumülerü» (ATI; Val, 1989), «wüchiichein» (BAS), «sheʼe erü» (LXX), «mei» (Val, 1989, noota [Éx 8:21]), «waneirua jaʼyumülerü» (Scío; anasü paashajeʼerüle BR, TA) jee «waneirua wüchii jashichi» (HM; anasü paashajeʼerüle DK).
Naatayaa müsü sukuwaʼipa tü wüchii «taapanakat», anülia. Jamüsüjaʼa tü taapanakat, eʼikaajashaatasü süta wayuu sutuma jee süta mürüt. Suluʼu waneirua mma chaa África, wainma maʼin tia wüchiicheinkalüirua otta kapüleesü maʼin awarairaawaa sutuma. Müliakajasaʼa naaʼin na egipciokana sutuma tia wüchiicheinkat jee müsia tü namünüinkalüiruaya, eeshii na outakana sutuma.
(Éxodo 8:25-27) Neenajirüinjeseʼe faraón Moisés otta Aarón sümaa nümüin namüin: ‹Juʼuna jümaala juʼutaiwa saaʼin mürüt nümüin chi Jümaleiwasekai suluʼu mmakat tüü›. 26 Anuujeseʼe nünüiki Moisés: ‹Nnojotsü anain waainjale tia. Nalerajüin na egipciokana woʼutuin saaʼin mürüt nümüin Jeʼwaa chi Wamaleiwasekai. Jamüsüjaʼa müleka waainjale tia noʼupala, nainnaʼaleena waya süka ipa outaleepaʼaya waya. 27 Apünüinjeena waya kaʼi wopuluʼu süpüla wantüinjanain chamüin isashiipaʼa. Wantapa chamüin, woʼuteerü saaʼin mürüt nümüin Jeʼwaa chi Wamaleiwasekai, maʼakaajüle nümüin paala wamüin.
w04-S 15/3 25 püt. 9
Pütchi anaka maʼin sünainjee tü karaloʼutakat Éxodo
8:26, 27. «Nalerajüin na egipciokana woʼutuin saaʼin mürüt nümüin Maleiwa», ¿kasa nüküjeeka Moisés sükajee tia? Kojutusü maʼin amüinyüü tü mürütkalüirua chaa Egipto. Müsüjeseʼe nuchuntuin maʼin Moisés najütünüinjanain na israeliitakana süpüla naʼwaajüinjachin Jeʼwaa chaa isashiipaʼa.
Wetsiikulo aashajeʼennajatka
(Éxodo 8:1-15) Anuujeseʼe nünüiki Jeʼwaa nümüin Moisés: «Puʼuna nümaʼanamüin faraón jee püma nümüin tüü: ‹Anuu nünüiki Jeʼwaa: «Puuʼulaa suʼunaiwa tü tapueulosekat süpüla suʼwaajüin taya. 2 Müleka nnojoliire püjütüin naya, watteerü saalii tü eperüʼitkat tatuma chayaa puumainpaʼa. 3 Watteerü saalii tü eperüʼitkat chaa eere tü süchikat Nilo, ojuʼiteerü shia shirokujee tü wüinkat, anteerü shia pipialuʼumüin, eere putunkülee ooʼulaka nepialuʼu na aʼyataakana pümüin, anteerü shia eemüin tü pupueulosekat, ekeroteerü shia suluʼu tü püʼlakajaaleekat, ekeroteerü shia suluʼu tü piitain aainjünawaikalü aluʼu ariina. 4 Watteerü saalii tü eperüʼi antakat pipialuʼumüin, sünainmüin tü pupueulosekat otta müsia eere na aʼyataakana pümüin»›». 5 Shiasaʼa kamaʼa mapa, anuu nünüiki Jeʼwaa nümüin Moisés: «Püma nümüin Aarón mayaa: ‹Piyurut tü pütünakat eemüin tü süchikalüirua, ooʼulaka eere sülatüin tü süchikat Nilo otta eere tü wüinkalüirua, puuʼulaa wattaiwa saalii tü eperüʼitkat suluʼu tü mmakat Egipto›». 6 Niyurulüinjeseʼe Aarón nütüna saaʼu tü wüin chakat Egipto, shiweenuwaakalaka tü eperüʼitkat otta wattakaʼa maʼin saalii suluʼu tia mmakat. 7 Nooʼulaküin tiaʼaya na sacerdoote aainjakana kasa yolujaamaajatü, ojuʼinuwaasü natuma tü eperüʼitkat, wattakalaka saalii süpaʼapünaa tü mmakat Egipto. 8 Mapa maʼin, neenajirüin faraón Moisés otta Aarón sümaa nümüin namüin: «Juchuntashaata nümüin Jeʼwaa nüsünneʼeraiwa toulia tü makat yaa otta suulia tü tapueulosekalia, aluʼu tajüteerüinjaʼa tü nupueulosekat süpüla suʼwaajüinjachin Jeʼwaa». 9 Anuujeseʼe nünüiki Moisés nümüin faraón: «Piajaʼa neʼe piakai aküjainjachika tamüin joujainjatüin tachuntuin nümüin Maleiwa süpüla nüsünneʼerüinjatüin tü eperüʼitkat suulia tü wayuu aʼyataakat pümüin, suulia tü pupueulosekat ooʼulaka suulia süpüshuaʼa tü kasayuukana pünain. Eeinjatpejeʼe tü eperüʼitkat shiroku tü süchikat Nilo». 10 «Shia anaka aluʼu watta», nümakat faraón. Anuujese nünüiki Moisés nümüin: «Aainjüneerüjaʼa tia pümakat süpüla pütüjaainjachin saaʼu nnojolin wanee Maleiwa maʼaka naaʼin Jeʼwaa. 11 Yüüʼülaa meerü tü eperüʼitkat pipialuʼujee ooʼulaka nnojoleerü piʼrüin shia süchikuaʼa, nnojoleerü shia neʼrüin na aʼyataakana pümüin otta tü pupueulosekat. Apütaajeerü neʼe tü eperüʼitkat shiroku tü süchikat Nilo». 12 Oʼunushijeseʼe Moisés nümaa Aarón nümaʼanajee faraón, nuchuntakalaka Moisés nümüin Jeʼwaa süpüla nüsünneʼerüinjatüin tia eperüʼitkat nuulia faraón. 13 Naainjüinjaʼa Jeʼwaa tü nuchuntakat Moisés nümüin. Outayaa müsü tü eperüʼikalüirua suluʼu miichikalüirua, tü paatiakalüirua ooʼulaka süpaʼapünaa tü mmakat. 14 Nakolochojokalaka shia na egipciokana sümaa wattain maʼin saalii. Sükalitkalaka sheejuu süka jawalin maʼin shia. 15 Niʼrapa faraón sünain nnojoluitpain tia, eʼrüijaashi wayumüin nüchikuaʼa ooʼulaka nnojoishi jaa müin nümüin Moisés otta nümüin Aarón maʼakaajüle nüküjain paala shia Jeʼwaa.
JUULIOʼU 20-26
KOROLO KOJUTUSÜ SULUʼUKA TÜ WIWÜLIAKAT | ÉXODO 10, 11
«Meimmoluinsai Moisés nümaa Aarón»
(Éxodo 10:3-6) Oʼunushijeseʼe Moisés nümaa Aarón chaa nümaʼanamüin faraón sümaa namüin nümüin: «Anuu nünüiki Jeʼwaa chi Namaleiwasekai na hebreokana, ‹¿jeʼrainjatkai maʼin kaʼi alataka süpüla jaa müin pia tamüin? Puuʼulaa suʼunaiwa tü tapueulosekat süpüla suʼwaajüinjachin taya. 4 Müleka ayatülejeʼe pia sünain paʼaliijüin tü tapueulosekat, taluwataajeerü kaashapa wattaʼa saaʼu tü puumainkat. 5 Watteerü saalin saaʼu tü mmakat, nnojoleerü jaʼyain tü mmapaʼakat sutuma. Shikeerü süpüshuaʼaleeya tü apütaakat süchikijee tü yeelo ajutuukat chejee iipünaajee, nnojoleerü kasain apütaain, shikeerü süpüshuaʼa tü wunuʼulia eekat süpaʼa mmakat. 6 Watteerü saalin suluʼu pipia jee suluʼu nepia na wayuu aʼyataakana pümüin ooʼulaka suluʼu nepia napüshuaʼa na egipciokana. Ainkeerü naaʼin na kachooinkana pia otta na putuushinuukana süka eʼiwalajatüin neʼrüin wanee kasa eekai müin aka tia yaa mmapaʼa›». Oʼunaatüjülia nümüin süchikijee nüküjain tia nümüin faraón.
w09-S 15/7 20 püt. 6
Püshata nukuwaʼipa Jesuu: meimmoluin paaʼin sünain aküjaa pütchi
6 Meimmoluinsai Moisés wanaa sümaa nuʼunuin Egiptomüin nümaʼanamüin faraón. Kapüleekajasaʼa nümüin Moisés yootuin nia nümaa faraón, süka müin faraón maʼaka naaʼin wanee maleiwa atumawaa. Naashin na egipciokana, nia Ra chi kaʼikai, niasaʼa Ra nüshi faraón. Eeshijaʼa nuʼwaajapuʼule niyaakua faraón maʼaka naaʼinrapuʼuin shia na waneinnua faraonkana. Kojutushi amüinyüü nia, yaleta aaʼinchi jee eʼrüi wayumüin. Sutuma tia, nnojotsü jaralin sünainpünaainjatüin nukuwaʼipa naashin. Süpüshuaʼa tü nümakat chi faraonkai aainjünajatü naashin. Wayuu anamia jee nnojotsü yaletayaain naaʼin Moisés. Kojuyatuapejeʼe nia oʼunuin nümaʼanamüin faraón mayaapejeʼe nnojoluin nuunejaaushin. ¿Jamüsüche nünüiki Moisés nümüin faraón? Nuchuntuin Moisés namüin nuuʼulaainjanain noʼunuin napüshuaʼa na israeliita achepchieekana atumaa chaa Egipto jee nüküjain nümüin nüntirajatüin Maleiwa kasa mojusü müleka nnojoliire nüjütüin naya. Meimmoluinkajasaʼa naaʼin Moisés süpüla nüküjain tia, ¿aashi müin? (Núm. 12:3; Heb. 11:27).
(Éxodo 10:24-26) Neenajirüinjeseʼe faraón Moisés sümaa nümüin nümüin: ‹Juʼuna jümaala juʼwaajai Jeʼwaa. Oʼunajana jümaa na jüchonniikana. Shiainjaʼa nnojoluin oʼunajatüin jümaa tü jaʼanneetsekalüirua otta müsia tü jüpaaʼainsekalüirua, yaainjatü shia yaʼaya. 25 Anuukalaka nünüiki Moisés nümüin: ‹Paapüinjatü wamüin mürüt süpüla woʼutuin saaʼin nümüin Jeʼwaa chi Wamaleiwasekai, waʼajüinjatkalaka shia nümüin. 26 Oʼunajatü wamaa süpüshuaʼa tü wamüʼlüinkalüirua. Nnojoishi apütaainjachin waneeshiaakaijeʼe, süka jamüin, waapüinjatüin soʼutku tia nümüin Jeʼwaa. Wantapa chamüin, watüjaajeerü aaʼu kasainjatüin waneeküinjatüin nümüin Jeʼwaa.
(Éxodo 10:28) Nnojo püleʼejüin püchikuaʼa yaamüin yaa. Teʼrüle pia püchikuaʼa, toʼuteechi aaʼin pia.
(Éxodo 11:4-8) Anuukalaka nünüiki Moisés nümüin faraón: «Anuu nünüiki Jeʼwaa: ‹Alateechi taya suluʼupünaa tü mmakat Egipto süseʼeruʼupünaa aikat. 5 Napüshuaʼa neʼiruma na egipciokana, outajana naya. Outajachi chi niʼirumakai faraón, chi aluwataainjachikai nüchikumüin, outajachi shiʼiruma tü achepchiee asirujutkat. Outajatü shiʼiruma tü mürütkalüirua. 6 Aapüneerü shikiisa wayuu suluʼu tü mmakat Egipto sutuma mojuin maʼin naaʼin, nnojoyülia alatüin wanee kasa eekai müin aka tia otta nnojoleerü shia alatüin süchikuaʼa. 7 Nnojoleechi eein wanee erü ootokoi namüin na israeliitakana otta sümüin tü namünüinkalüirua. Sutumajee tia, jütüjaajeetkalaka saaʼu eein süpüla nükatalüin Jeʼwaa na egipciokana noulia na israeliitakana›. 8 Anteena tamaʼanamüin napüshuaʼa na wayuu aʼyataakana pümüin otta nasapainkeena naya tamüin sümaa namüin mayaa: ‹Puʼuna yaajee suluʼujee mmakat tüü sümaa süpüshuaʼa tü wayuu pümaajatkalüirua›. Süchikijee tia, oʼuneechi taya». Süchikijee nüküjain süpüshuaʼa tia Moisés nümüin faraón, oʼunushi nia sümaa jashichin maʼin nia yalejeechiki.
it-2-S 415 püt. 2
Moisés
Meimmoluinsalii otta kanoulashii naya. Akaalinjünüshi Moisés otta Aarón nutuma chi naaʼinkai Maleiwa süpüla naashajaainjanain nümaa faraón. Jaʼyakajasaʼa naaʼu faraón washirüin maʼin nia jee sülaülain nia wanee mma kojutuka maʼin atumaa sümaiwa. Yaletüshi atumaa faraón süka müin aka nia wanee maleiwa. Wanaa sümaa nuʼunuin Moisés nümaʼanamüin faraón, eejana nümaa faraón na aʼyataakana niʼipajee, na sülaülakana surulaat, na aaʼinmajakana tü kasa eekat nümaʼana, achepchieeirua, nekiipüʼü na anoujayaashiikana otta eejana sacerdoote aainjakana kasa yolujaamaajatü. Wayuukana naainnua, kojutushii naya atumawaa otta paaʼinwashii naya nümaa faraón süpüla nasoutuin nooʼopünaa na maleiwayaashiikana chaa Egipto. Kojuyatua nuʼunuin Moisés otta Aarón nümaʼanamüin faraón. Nnojoishi jaa müin faraón nümüin Moisés süpüla najütüinjanain napüshuaʼa na israeliita achepchieekana. Süchikijee nüküjain Moisés otta Aarón tü mekiisatkat kasa mojusü ajünajaanüshii naya nümaʼanajee faraón. Süchikijee tü mekietsatkat kasa mojusü, achuntunusü namüin nnojoluinjanain naleʼejüin nachikuaʼa nümaʼanamüin faraón. Naleʼejüle nachikuaʼa, oʼutunajana aaʼin (Éx 10:11, 28).
Püchajaa süchiki kaaʼürüi suluʼu tü Wiwüliakat
(Éxodo 10:1, 2) Anuukalaka nünüiki Jeʼwaa nümüin Moisés: «Puʼuna nümaʼanamüin faraón, teʼitaaitpa suluʼu naaʼin nnojoluinjatüin alin namüin sümüliala wayuu, müsia neʼe nakuwaʼipa na wayuu aʼyataakana nümüʼinya. Taainjain tia süpüla neʼrüinjatüin tü kasa eekat süpüla tountüin. 2 Otta tü wanee taainjakalü aaʼujee shia, shia süpüla püküjainjatüin shia namüin na püchonniikana ooʼulaka na püikeyuukana jamüin nakuwaʼipa na egipciokana tatuma otta tü kasa pülasü taainjakat namüin. Taainjain tia süpüla jütüjaainjatüin saaʼu tayain Jeʼwaa».
w95-S 1/9 11 püt. 11
Neʼipolo na aküjaliikana pütchi
11 Wanaa sümaa chajanain na israeliitakana Egipto, aluwataanüshi Moisés nutuma Jeʼwaa nümaʼanamüin faraón jee müshi nia nümüin: «Puʼuna nümaʼanamüin faraón, teʼitaaitpa suluʼu naaʼin nnojoluinjatüin alin namüin sümüliala wayuu, müsia neʼe nakuwaʼipa na wayuu aʼyataakana nümüʼinya. Taainjain tia süpüla neʼrüinjatüin tü kasa eekat süpüla tountüin. Otta tü wanee taainjakalü aaʼujee shia, shia süpüla püküjainjatüin shia namüin na püchonniikana ooʼulaka na püikeyuukana jamüin nakuwaʼipa na egipciokana tatuma otta tü kasa pülasü taainjakat namüin. Taainjain tia süpüla jütüjaainjatüin saaʼu tayain Jeʼwaa» (Éxodo 10:1, 2). Na israeliita jaa makana sümüin tü nümakat Jeʼwaa, naküjain namüin nachonnii tü kasa pülasü naainjakat Jeʼwaa. Nayasaʼa nachonnii na israeliitakana, naküja namüsüjaʼa namüin na nachooinkana. Mapuʼusü natuma süpüla sotuinjatüin naaʼin tü kasa pülasü naainjakat Jeʼwaa. Müshia neʼe na kachonshiikana maaʼulu yaa, nikirajüinjana nachonnii nüchiki Jeʼwaa (Deuteronomio 6:4-7; Proverbios 22:6).
(Éxodo 11:7) Nnojoleechi eein wanee erü ootokoi namüin na israeliitakana otta sümüin tü namünüinkalüirua. Sutumajee tia, jütüjaajeetkalaka saaʼu eein süpüla nükatalüin Jeʼwaa na egipciokana noulia na israeliitakana›.
it-1-S 895 püt. 7
Éxodo
Sükajee tia kasa pülasü naainjakat Jeʼwaa, kojutushi nia atumawaa otta taashishii na israeliitakana nutuma. Nalatapa na israeliitakana süchikumüin tü palaa Ishosükat, eeʼirajüshi Moisés namaa na israeliita tooloyuukana. Otta müsia Míriam, ayonnajüsü shia jee sütalejüin tü panderetakat wanaa namaa na jieyuu israeliitakana (Éx 15:1, 20, 21). Akatalaainnapa na israeliitakana noulia na naʼünüükana. Süchikijee nojuʼitüin Egiptojee, nnojoishii jamajüin naya atumawaa süka naaʼinmajüin naya Jeʼwaa. Eeyaai neʼe jashichi erü namüin (Éx 11:7). Nnojotsü aküjünüin suluʼu Éxodo, wüinsirüin faraón namaʼaleʼeya na nusurulaatsekana. Süküjapejeʼe Salmo 136:15 wüinsirüin faraón otta na nusurulaatsekana nutuma Jeʼwaa shiroku tü palaa Ishosükat.
Wetsiikulo aashajeʼennajatka
(Éxodo 10:1-11) Anuukalaka nünüiki Jeʼwaa nümüin Moisés: «Puʼuna nümaʼanamüin faraón, teʼitaaitpa suluʼu naaʼin nnojoluinjatüin alin namüin sümüliala wayuu, müsia neʼe nakuwaʼipa na wayuu aʼyataakana nümüʼinya. Taainjain tia süpüla neʼrüinjatüin tü kasa eekat süpüla tountüin. 2 Otta tü wanee taainjakalü aaʼujee shia, shia süpüla püküjainjatüin shia namüin na püchonniikana ooʼulaka na püikeyuukana jamüin nakuwaʼipa na egipciokana tatuma otta tü kasa pülasü taainjakat namüin. Taainjain tia süpüla jütüjaainjatüin saaʼu tayain Jeʼwaa». 3 Oʼunushijeseʼe Moisés nümaa Aarón chaa nümaʼanamüin faraón sümaa namüin nümüin: «Anuu nünüiki Jeʼwaa chi Namaleiwasekai na hebreokana, ‹¿jeʼrainjatkai maʼin kaʼi alataka süpüla jaa müin pia tamüin? Puuʼulaa suʼunaiwa tü tapueulosekat süpüla suʼwaajüinjachin taya. 4 Müleka ayatülejeʼe pia sünain paʼaliijüin tü tapueulosekat, taluwataajeerü kaashapa wattaʼa saaʼu tü puumainkat. 5 Watteerü saalin saaʼu tü mmakat, nnojoleerü jaʼyain tü mmapaʼakat sutuma. Shikeerü süpüshuaʼaleeya tü apütaakat süchikijee tü yeelo ajutuukat chejee iipünaajee, nnojoleerü kasain apütaain, shikeerü süpüshuaʼa tü wunuʼulia eekat süpaʼa mmakat. 6 Watteerü saalin suluʼu pipia jee suluʼu nepia na wayuu aʼyataakana pümüin ooʼulaka suluʼu nepia napüshuaʼa na egipciokana. Ainkeerü naaʼin na kachooinkana pia otta na putuushinuukana süka eʼiwalajatüin neʼrüin wanee kasa eekai müin aka tia yaa mmapaʼa›». Oʼunaatüjülia nümüin süchikijee nüküjain tia nümüin faraón. 7 Anuujeseʼe nanüiki na wayuu aʼyataakana nümüin faraón, chi anii aluwataain naaʼu: «¿Joujainjachikai maʼin puuʼulaaka wayuukai chii sünain naainjain kasa mojusü wamüin? Puuʼulaa suʼunaiwa tia wayuukalüirua süpüla naʼwaajüin Jeʼwaa chi Namaleiwasekai. ¿Piʼrayaainchejeʼe sajaʼttüin tü kasakalüirua yaa Egipto?». 8 Eenajinnüshijeseʼe Moisés nümaa Aarón süpüla nantajanain nümaʼanamüin faraón. Anuukalaka nünüiki namüin: «Juʼuna jümata juʼwaajaiwa Jeʼwaa chi Jümaleiwasekai, jüküjainjatpejeʼe wanee kasa tamüin. ¿Jaralii maʼin na oʼunajanakana sünain tia?». 9 Anuukalaka nünüiki Moisés nümüin: «Piʼrüinche waainjainjanain wanee miʼiraa nümüin Jeʼwaa, nayainjanakalaka oʼunuin wamaa na jimaʼaliikana, na majayünnüükana, na wayuu miyoʼuyuukana, na wachon tooloyuukana, na wachon jieyuukana, tü waʼanneetsekalüirua ooʼulaka müsia tü wapaaʼasekalüirua». 10 Anuukalaka nünüiki faraón namüin: «¿Kasa maʼin wayu taya jaaʼinruʼu toʼulaainjanaka juʼunüin ooʼulaka noʼunuin na jüchonniikana wanaa jümaa? Jamüshiijaʼa tajütüle jia, ¡shiimainshaata nükaalinjeenain jia Jeʼwaa! Jimeejeein neʼe taya makaʼa jia. 11 ¡Nnojotpejeʼe müinjatüin sukuwaʼipa tia! Na oʼunajanakana sünain aʼwaajaa Jeʼwaa nayainjana neʼe na tooloyuukana, taa jümakai paala tamüin». Ajünajaanüshiijeseʼe naya yalejee nümaʼanajee faraón.
JUULIOʼU 27–AKOOSÜTOʼU 2
KOROLO KOJUTUSÜ SULUʼUKA TÜ WIWÜLIAKAT | ÉXODO 12
«¿Jamüsü kojutuka maʼin namüin na anoujashiikana tü Pascuakat?»
(Éxodo 12:5-7) Chi anneerü jüüjaainjachikai tooloinjachi otta waneeinjachi juya nia, eeshi süpüla jüneeküin wanee anneetchon jee niale wanee kaaʼulachon. 6 Jükatalüinjachi nia ooʼulaka jüüjaainjachi nia 14 soʼu kashikat tüü, juʼutajachi naaʼin aipoʼuupa mmapaʼakat. 7 Süchikijee tia, jütülittirüinjatü tü nüshakat sünain sot tü soʼukat miichi otta jütülittirüinjatü tü nüshakat iipünaa sünain sot tü soʼukat tü miichi eere jikaainjanain.
w07-S 1/1 20 püt. 4
Talateerü maʼin jaaʼin
4 Outushi Jesuu soʼu tü kaʼikat 14 nisán soʼu juyakat 33. Soʼu tia, aainjünawaisü tü miʼiraa kanüliakat Pascua natuma na israeliitakana. Wanaa sümaa nekaain chi anneetchonkai, sotojoosü naaʼin na israeliitakana, tü isha nashulerakat soʼutpünaa soʼu tü miichikat süpüla nnojoluin noʼutunüin aaʼin na neʼirumakana. Aainjünüsü tia soʼu tü kaʼi 14 nisán soʼu juyakat 1513 süpülapünaa wakalia (Éxodo 12:1-14). Nia kayaawaseka Jesuu chia anneetchonkai. Müshi Pablo nüchiki: «Otta müshia Cristo maaʼulu yaa sünain nuʼutinnüin aaʼin saaʼu waainjala, müshi aka naaʼin chia anneetchonkai» (1 Corinto 5:7). Maʼaka katüin soʼu wayuu nutuma nüsha chi anneetchonkai, müsia neʼe nukuwaʼipa Jesuu, katüsü soʼu wainma wayuu nünainjee (Juan 3:16, 36, TNM).
(Éxodo 12:12, 13) Aipaʼa awaraijaajeechi taya suluʼupünaa tü mmakat Egipto, toʼuteetkalaka naaʼin neʼiruma na wayuukana napüshuaʼa ooʼulakaa shiʼiruma tü mürütkalüirua yaakat yaa Egipto, süsaleena tatuma namaleiwase na egipciokana ooʼulaka neʼreerü noʼukajatü tatuma. Tayaʼaya chi Jeʼwaakai anülia. 13 Tü ishaa jiʼitaakat sünain tü jipiakat, shiyaawaseinjatü tü miichi eere jiakana. Teʼrapa tü ishakat, nnojoleechi taya ekeroluin yalapünaa. Nnojoleechi jaralüin outuin jaʼakajee neʼrapa noʼukajatü tatuma na egipciokana».
it-2-S 603 püt. 3
Pascua
Ekeraajüsü nünain Jesuu waneirua kasa aainjünapuʼukat sünain tü Pascuakat. Wanee kasa ekeraajakat sünain nukuwaʼipa Jesuu, shia wanaa sümaa nnojoluin noʼutunüin aaʼin na neʼirumakana na israeliitakana süka sushulennüin nüsha chi anneetchonkai soʼutpünaa soʼu tü miichikat. Naashin Pablo, na anoujashii oʼunajanakana iipünaamüin nayaawaseshii na eʼirumaakana otta taashishii naya nutuma Jesuu sükajee naapajiraain nikii naaʼu (Heb 12:23; 1Te 1:10; Éf 1:7). Wanaa sümaa nuʼutunüin aaʼin chi anneetchonkai, nnojotsü ashataanüin tü niipüsekat. Müsia neʼe nukuwaʼipa Jesuu wanaa sümaa outuin nia, nnojotsü ashataanüin tü niipüsekat (Sl 34:20; Jn 19:36). Tü miʼiraa kanüliakat Pascua, shia süpüshi tü pütchi ekeraajakat nünain Jesuu wanaa sümaa outuin nia. Tü aküjünakat paala sünain tü Pütchi Aapünakat nümüin Moisés (Heb 10:1; Jn 1:29).
(Éxodo 12:24-27) Tü taluwataakalü anain jia, jaaʼinrüinjatü süpüla kaʼika süpüshuaʼa namaʼaleʼeya na jüchonniikana. 25 Ayatüinjatü jaaʼinrüin tia chapa jia suluʼu tü mma naapüinjatkat Jeʼwaa jümüin. 26 Shiasaʼa namapa na jüchonniikana jümüin: ‹¿Kasapülajatü shikeraajünaka tü Pascuakat?›, 27 meerü jünüiki namüin: ‹Chi anneetchon oʼutunakai aaʼin nümüin Jeʼwaa sünain tü Pascuakat, süpülajatü nnojoliinjanain outuin nachonnii na israeliitakana wanaa sümaa outuin nachonnii na egipciokana. Naaʼinmajüin Jeʼwaa na wachonniikana›. Shiasaʼa nasapainkalaka jee naʼwachiraakalaka na wayuukana».
Püchajaa süchiki kaaʼürüi suluʼu tü Wiwüliakat
(Éxodo 12:12) Aipaʼa awaraijaajeechi taya suluʼupünaa tü mmakat Egipto, toʼuteetkalaka naaʼin neʼiruma na wayuukana napüshuaʼa ooʼulakaa shiʼiruma tü mürütkalüirua yaakat yaa Egipto, süsaleena tatuma namaleiwase na egipciokana ooʼulaka neʼreerü noʼukajatü tatuma. Tayaʼaya chi Jeʼwaakai anülia.
it-2-S 601 püt. 5
Pascua
Tü poloosükat kasa antaka Egipto, süpülajatü neʼrüin noʼutkajatü na namaleiwasekana na egipciokana. Shiapejeʼe aʼireein namüin noʼutunüin aaʼin na neʼirumakana (Éx 12:12). Aisü namüin na egipciokana sushulennüin nüsha chi anneetchonkai sotpünaa soʼu tü miichikat. Aisü namüin tiaʼaya süka niain chi anneetchonkai niyaawasein Ra. Wanaa sümaa outuin neʼiruma na egipciokana, ayaawatüna aaʼu nnojoluin pülashin chi namaleiwase kanüliakai Osiris. Sutuma outuin chi niʼirumakai faraón, atüjaana aaʼu nnojolin pülain faraón otta müshia Ra.
(Éxodo 12:14-16) Jaainjawalinjatü wanee miʼiraa nümüin Jeʼwaa süpüla sotuinjatüin jaaʼin kaʼikat tüü. Naaʼinrüinjatü shia na puuʼuliwoʼukana süpüla kaʼikat süpüshuaʼa. Tüü, shia wanee kasa aikaleʼennakat akuwaʼipa süpüla saainjünüinjatüin waneepia. 15 Eküinjana jia pan maʼakakat soolojia soʼu akaratshi kaʼi. Soʼu tü palajatkat kaʼi, jiyuluinjatü jipialuʼujeʼe tü pan aashüʼüjaakat. Chi wayuu eekai eküin pan kaʼakakat soolojia soʼu tü palajatkat kaʼi sünainmüinreʼeya tü akaratshikat kaʼi, acheküshi nuʼutunajachin aaʼin naʼakajee na israeliitakana. 16 Soʼu tü palajatkat kaʼi, jaainjainjatü wanee outkajawaa nümüinjatka Maleiwa otta soʼu tü akaratshikat kaʼi, jaainjainjatü wane suwalaʼata outkajawaʼayaa. Nnojoishii jaralüinjachin aʼyataain soʼu kaʼikat tia. Tü eekat süpüla jaainjain shia jüʼlakajaain jiküin jiyaaluʼu.
it-1-S 548
Ounejaanüshii
Soʼunnaa tü outkajawaa aainjünakat nümüin Maleiwa, nnojoishii aʼyataainjanain na israeliitakana. Jamüsüjaʼa soʼu tü miʼiraa aainjünakalü oʼu soʼu tü pan maʼakakat soolojia, nüküjain Jeʼwaa namüin na israeliitakana nnojoliinjanain naʼyataain noʼu chi palajaikai kaʼi otta müsia chi akaratshikai kaʼi. Tü eekat süpüla naaʼinrüin shia naʼlakajaainjatüin tü neküinjatkat (Éx 12:15, 16). Tü naaʼinrapuʼukat na sacerdootekana soʼutpünaa kaʼikat tia, shia noʼutuinjatüin aaʼin mürüt nümüin Jeʼwaa. Nnojotpejeʼe mojuin naainjale tia (Le 23:37, 38). Tia kaʼikat nnojotsü aneekuushin süpüla neemeraainjanain na israeliitakana, aneekünüsü tia kaʼikat süpüla naʼwaajüinjachin Jeʼwaa. Outkajaapuʼushii naya süpüla naʼwaajüinjachin Jeʼwaa otta süpüla nikirajünüinjanain. Akatchinraapuʼusü nanoula na israeliitakana sutuma saashajeʼennapuʼuin tü Pütchi nüchikimaajatkat Maleiwa namüin otta shikirajünapa jamaluʼuluin shia (Alu 15:21). Sutuma nnojolin naʼyataain na israeliitakana noʼu chia kaʼikai, tü naaʼinrapuʼukat shia noʼuraajüin nümüin Jeʼwaa otta nasakireʼerüin naaʼin sünain tü naaʼinrajatkat Jeʼwaa (paashajeʼera ASAMBLEA).
Wetsiikulo aashajeʼennajatka
(Éxodo 12:1-13) Anuukalaka nünüiki Jeʼwaa nümüin Moisés otta nümüin Aarón chaa suluʼu tü makat Egipto: 2 «Kashikat tüü, shia suʼttiajeeinjatka tü wanee kashikalüirua, shieerü tü kashi palajatkat nuluʼu wanee juya. 3 Anuu tü jümüinjatkat sümüin tü pueulokot Israel. Soʼu kashikat tüü, soʼu tü kaʼikat 10 jüneeküinjachi wanee anneetchon waneʼewai jukua sümaa jüpüshi, jüneeküinjachi wanee anneetchon napüla na kepiakana jümaa. 4 Müleka nnojoliire wainmain maʼin na püpüshikana jikiraainjachi chi anneetchonkai namaa na wayuu kepiakana jüʼütpaʼa, jiyaawajüinjana palajana jeʼrainjanain na jüsülajüinjanakana amüin ooʼulaka jeʼrainjatüin tü asalaa neküinjatkat waneʼewai nakua. 5 Chi anneerü jüüjaainjachikai tooloinjachi otta waneeinjachi juya nia, eeshi süpüla jüneeküin wanee anneetchon jee niale wanee kaaʼulachon. 6 Jükatalüinjachi nia ooʼulaka jüüjaainjachi nia 14 soʼu kashikat tüü, juʼutajachi naaʼin aipoʼuupa mmapaʼakat. 7 Süchikijee tia, jütülittirüinjatü tü nüshakat sünain sot tü soʼukat miichi otta jütülittirüinjatü tü nüshakat iipünaa sünain sot tü soʼukat tü miichi eere jikaainjanain. 8 Jiküinjatü süpüshuaʼa tü asalaakat, jüsijaainjatü shia otta jiküinjatü shia sümaa wanee pan maʼakakat soolojia otta müsia jiküinjatü sümaa wüichii eekai ishin. 9 Nnojotsü jiküinjatüin tü asalaakat sümaa iyein shia jee sümaa ashujuushin shia, jüsijaainjatü süpüshuaʼa, jüsijaainjatü tü shikiikat, jüsijaainjatü tü süsaʼakalüirua otta müsia tü süleʼekat. 10 Nnojo jünaajaain süpüshi tü asalaakat süpüla waneemüin kaʼi, müleka süpütaale jüpüla tü asalaakat waneemüin kaʼi, jaʼajüinjatü shia. 11 Jiküinjatü tü asalaakat sünain jünain tü jüsiʼrainkat, sünain jünain tü jükoʼusüinkat otta müsia tü wunuʼu jajapuluʼukat, nnojoishii jia kamaʼainjanain sünain ekawaa, süka jamüin, shiain tü Pascua nukumajakalü akuwaʼipa Jeʼwaa. 12 Aipaʼa awaraijaajeechi taya suluʼupünaa tü mmakat Egipto, toʼuteetkalaka naaʼin neʼiruma na wayuukana napüshuaʼa ooʼulakaa shiʼiruma tü mürütkalüirua yaakat yaa Egipto, süsaleena tatuma namaleiwase na egipciokana ooʼulaka neʼreerü noʼukajatü tatuma. Tayaʼaya chi Jeʼwaakai anülia. 13 Tü ishaa jiʼitaakat sünain tü jipiakat, shiyaawaseinjatü tü miichi eere jiakana. Teʼrapa tü ishakat, nnojoleechi taya ekeroluin yalapünaa. Nnojoleechi jaralüin outuin jaʼakajee neʼrapa noʼukajatü tatuma na egipciokana».