Nuʼtteʼerüin taya Jehová süka teʼitaain taaʼin nünain

TEʼRAAJÜIN JEHOVÁ OTTA TEʼITAAIN TAAʼIN NÜNAIN

Joʼuushi taya soʼu 1948 suluʼu wanee pueulo uuchijeeruʼuka sünain tü mmakat Nigeria. Moustapha nünülia chi talaülakai, nimülia nia chi tashikai otta Wahabi nünülia chi tepayakai. Woutiisashii naya soʼunnaa tia juyakat. Amülouishi chi tashikai wanaa sümaa mekietsalin touyase. Mojushaatasü maʼin taaʼin nüchiirua. Nüküjain tamüin Wahabi weʼreechin nüchikuaʼa nüsoʼiraapa aaʼin. Müshijeseʼe tekirajaain sünain tü Bibliakat. Woutiisashi taya soʼu 1963 otta woutiisashii mapa apünüinshii tawalayuu.

Soʼu 1965, akolojooshi taya suluʼumüin tü mmakat Lagos, eejachire kepiain Wilson wanee tawala. Kottiraashii waya yala namaa waneinnua pürekutsoot rekulaat. Outkajaashii naya suluʼu tü outkajaaleekat Igbobi. Sutuma teʼrüin talatüin maʼin naaʼin, pürekutsootshi taya eneeroʼu soʼu 1968.

Eejachi wanee wawala kanüliakai Albert Olugbebi, aʼyataashi nia suluʼu Weteet. Nukumajüin sukuwaʼipa wanee outkajawaa napülajatü na jimaʼaliikana otta na majayünnüükana. Nüküjain yala choʼujaain maʼin pürekutsoot pesiaat eeka süpüla naküjain pütchi palaajeeruʼu sünain tü mmakat Nigeria. Sotoyülia taaʼin tü nüküjakat chi wawalakai sümaa talatüin naaʼin. «Katchinshii jia otta eeyülia süpüla jajayatüin tü jukuwaʼipakat süpüla jaaʼinmaain maʼin tü jiʼyataainkat nümüin Jehová», müshi nia. Tashateein maʼin nukuwaʼipa Isaías, chi nünüikimaajachikai Maleiwa. Sutuma toʼuneein eepünaale nuluwataain taya Jehová, tashajirüin tanülia süpüla pürekutsoolin pesiaat taya (Is. 6:8).

Aneekünüshi taya maayoʼu soʼu 1968 süpüla pürekutsoolin pesiaat taya suluʼu tü pueulo chakat Kano, palaajeeruʼusü shia sünainjee Nigeria. Wanaapünaajatü sümaa tü kasachiki chajatkat Biafra, oʼttusü shia soʼujee 1967 waneʼereeya sajaʼttüin soʼu 1970. Wainma müliaa jee outaa eeka sutuma. Mapa, antüsü tia atkawaakat wopumüin sünainjee Nigeria. Eejachi wanee wawala aʼalijirakai taya suulia toʼunuin chaa Kanomüin. «Anasia müin püküjain tia tamüin, nnojo shapaain paaʼin taaʼu. Nüchekülejeʼeya Jehová toʼunuin chamüin, naaʼinmajeechi taya chayaa», tamaka nümüin.

TEʼITAAIN TAAʼIN SÜNAIN NAAʼINMAJEECHIN TAYA JEHOVÁ SOʼUNNAA KASACHIKI

Keemasü maʼin tü teʼrakat chaa Kano. Wainma maʼin müliaa shiʼraka wayuu suluʼu tia pueulokot sutuma tü atkawaakat. Eepünaale walatüin sünain aküjaa pütchi, eesü weʼrawaire wayuu oʼutunaka aaʼin. Nnojoishii alatüin suulia 15 wawalayuu makatakana chayaa mayaainjeʼe wainma naya paala. Mmotshii maʼin naya otta eemiajaasü nanoula. Talatüsü maʼin naaʼin neʼrapa wantüin aipiruashii pürekutsoot pesiaat, akatsüinraasü naaʼin watuma. Wakaalinjain naya süpüla nakumajüin sukuwaʼipa süchikuaʼa tü outkajawaakat, tü aküjaakat pütchi otta süpüla naluwataain sümüin Weteet tü sümaajatkat naʼyataain nümüin Maleiwa otta müsia süpüla nachuntuin karaloʼuta sümüin Weteet.

Wayakana pürekutsootkana pesiaat ekirajaashii waya sünain tü anüikiikat hausa. Sutuma waküjain pütchi suluʼu tia anüikiikat, wainma na wayuu aapajakana wanüiki chayaa. Nayoutapejeʼe tia wapüleerua na shikiipüʼükana tü iküleesia chajatkat Kano, müsüjeseʼe eejüinjatüin waaʼin eepünaale waya. Soʼu wanee kaʼi, eipinnüshi taya nümaa chi taʼaleewainkai nutuma wanee wayuu rüimaajachi, awataashii maʼin waya jee isajüshii waya nuulia. Mayaainjeʼe keemain maʼin tü mmapaʼakat chayaa, naaʼinmajüin waya Jehová maʼaka süküjain Salmo 4:8. Awainmalaashii neʼipaʼaya na wawalayuukana. Maaʼulu yaa eeitpa 11 outkajaalee otta alatüshii suulia 500 wawalayuu.

APÜLEERUAANÜSÜ WAAʼIN CHAA NÍGER

Maʼaka jeʼra kashi süchikijee wantüin Kanomüin, aluwataanüshi taya namaa piamashii pürekutsoot pesiaat chamüin Niamey, tü pueulo shikiisükat República de Níger (África Occidental), alatüsü tia soʼu 1968. Ekiʼralaainjana waya saʼaka walatshi otta ekirajaainjana waya sünain tü anüikiikat francés, tü nanüikipalakat na wayuu kepiakana chayaa. Mayaainjeʼe kapüleein wamüin tia, ayatüsia weʼitaain waaʼin nünain Jehová. Oʼttushii waya sünain aküjaa tü pütchikat namaa na palitchon wawalayuu kepiakana chayaa. Shiasaʼa maʼaka jeʼra kaʼi, namaʼanayaa namüsü na wayuu kepiakana chayaa tü karaloʼutakat La verdad que lleva a vida eterna (alijunaikiruʼusü), tü wekirajakalü aka wayuu. Eeshii waneinnua antaka wamaʼanamüin süpüla nachuntuin wamüin tü karaloʼutakat.

Mojusü nashoʼu na aküjaliikana pütchi nüchiki Jehová namüin na sülaülakana mma. Naainjain tü palajatkat outkajawaa miyoʼu chayaa juulioʼu soʼu 1969, eetaashi maʼaka 20 wayuu antakana sünain. Talatashaatasü waaʼin sutuma woutiisainjanain piamashii wayuu. Soʼu tü palajatkat kaʼi suʼttaka oʼu tü outkajawaakat miyoʼu, antüshii waneinnua pulusiia jee nashaʼwaleʼeraka tü outkajawaakat. Namaaka joo chi wawala alapalaaikai naaʼu na wawalayuukana namaa na pürekutsootkana pesiaat. Wantapa chaa eere tü süpüleekat pulusiia, nasakiijüin waya jee naküjaka wamüin wantüinjanain wachikuaʼa waneemüin kaʼi. Sutuma wayaawatüin saaʼu ayateerüin nekeʼejüin waaʼin, wakumajüin sukuwaʼipa süpüla süküjünüin suluʼu wanee piichi tü pütchi napülajatkat na woutiisakana. Sujutaapa tia pütchikat, awoutisaajünüshii na wawalayuu woutiisainjanakana suluʼu wanee süchi eere nnojoluin neʼnnüin maʼin sutuma wayuu.

Shiasaʼa maʼaka jeʼra semaana süchikijee tia, tajünajaanaka namaa jaʼraishii pürekutsoot pesiaat suluʼujee tia mmakat natuma na sülaülakana mma. Naapaka neʼe piama kaʼi süpüla woʼunajanain suluʼujee Níger, wayainjana neʼe akumajaka sukuwaʼipa süpüla woʼunajanain. Wantaka suluʼumüin tü Weteet chakat Nigeria. Suluwataaka waya Weteet yalejee suluʼumüin waneirua mma.

Taluwataanaka suluʼumüin wanee pueulo chakat Nigeria, Orisunbare sünülia. Talatüsü taaʼin sünain aküjaa pütchi namaa na palitchon wawalayuu kepiakana chayaa jee ekirajüshi taya waneirua wayuu sünain tü Bibliakat. Aipirua kashi süchikijee tia, suluwataaka taya Weteet süpüla toʼunajachin tachikuaʼa Nígermüin. Ainkuusü taaʼin sutuma toʼunajachin tamüiwaʼa. Oʼuneepejeʼe taya chamüin süka teʼreeshaatain na wawalayuu kepiakana Níger.

Shiasaʼa waneemüin kaʼi süchikijee tantüin chamüin Niamey, eejachi wanee wayuu washirü kepiaka suluʼu tü mmakat Nigeria. Niyaawata aaʼuchi Taküjalin pütchi, nüsakiijaka taya sünain waneirua pütchi nütüjaweeka aaʼu suluʼujee tü Bibliakat. Ekirajaashii waya, woutiisashi nia nuuʼulaapa suulia akaijaa jee suulia asawaa. Aküjashi taya pütchi suluʼupünaa waneirua pueulo sulujutka tü mmakat Níger jee teʼrüin neʼipaʼaya na wayuukana naapaain tü anoujaakat. Tantaiwaʼaya chamüin Níger, eejana 31 wawalayuu, shiasaʼa toʼunapa eejana 69.

«MATÜJAAJU AAʼU JAMÜIN NAKUWAʼIPA NA WAWALAYUU CHAKANA GUINEA»

Antüshi tachikuaʼa Nigeriamüin tisienpüroʼu soʼu 1977 süpüla tekirajünüin soʼu apünüin semaana. Kettaapa shia, aapünüsü tamüin wanee karaloʼuta suluwataala tamüin tü Weteet chakat Sierra Leona, naapajala shia tamüin Malcolm Vigo, chi akumajakai sukuwaʼipa tü aʼyatawaa aainjünakat suluʼu Weteet. Achajaana achikichi wanee wawala pürekutsoot eekai maʼwayuusein, eekai nnojolin jooin süpüla ayuulii otta eekai nütüjain süpüleerua inglés sümaa francés süpüla nülapalaainjachin naaʼu na wawalayuu kepiakana chaa Guinea. Shia tounejaanaka apüla sünain tia ekirajawaakat. «Süpülapünaa paapaain tia aʼyatawaakat, anasü jülüjale paaʼin tü sünainpünaakat», müshi tamüin chi wawalakai Malcolm süka nütüjaain saaʼu kapüleein tia aʼyatawaakat. «Süka niain Jehová aluwataain taya, oʼuneechi taya», tamaka nümüin.

Oʼunushi taya suluʼu katünasü süpüla tantajachin Sierra Leonamüin namaʼanamüin na wawalayuu aʼyataakana suluʼu Weteet. Anuu nünüiki tamüin wanee wawala noʼutku na Laülaashii Jülüjakana aaʼin tü Aʼyatawaakat suluʼu Weteet: «Matüjaaju aaʼu jamüin nakuwaʼipa na wawalayuu chakana Guinea». Mayaainjeʼe nayain jülüjain aaʼin tü aküjaakat pütchi chayaa Guinea, nnojotsü jutatüin nakuwaʼipa süpüla naashajaain namaa na wawalayuukana sutuma tü kasachiki alatakat chayaa. Kojuyatua naluwataweein wanee wawala chamüin Guinea, isapejeʼe nachiki. Müsüjeseʼe suchuntunuin tamüin toʼunajachin chamüin Conakri, tü pueulo shikiisükat Guinea jee tachajaainjatüin sukuwaʼipa süpüla takumajirüin takaraloʼutse.

Tantapa chamüin Conakri, taashajaaka nümaa chi embajador münakai, chi chejeʼewaikai Nigeria. Taküjaka nümüin tekirajeein wayuu nüchiki Maleiwa yaa Guinea. Nüküjapejeʼe tamüin nnojoluin anain süpüla taaʼinrüin tia süka eein süpüla jamajüin taya atumawaa. «Anashi pikirajüle nüchiki Maleiwa chaa Nigeria, aneechi pia yala», nümaka tamüin. «Nnojoishi taya oʼuneein, makateeshi taya yaʼayaa», tamaka nümüin. Niasaʼa chi embajadorkai nüshajaka wanee karaloʼuta nümüin wanee neʼipajana na sülaülakana tü mmakat Guinea süpüla nükaalinjainjachin taya.

Tantapa tachikuaʼa suluʼumüin tü Weteet chakat Sierra Leona, taküjaka namüin na wawalayuukana nükaalinjain taya wanee neʼipajana na sülaülakana tü mmakat Guinea. Talatüsü naaʼin natüjaapa saaʼu nükaalinjain taya Jehová süpüla eeinjatüin tamaʼana takaraloʼutse süpüla makatüinjachin taya Guinea.

Soʼujee 1978 sünainmüin 1989, alapalaashi taya naaʼu na wawalayuu chajanakana Guinea otta Sierra Leona. Otta niʼipajanashi taya chi wawala alapalaaikai naaʼu na wawalayuu chajanakana Liberia. Soʼu tia jooshi maʼin taya süpüla ayuulii, eesü sülatawaire tamüin tia talapalaapa naaʼu na wawalayuu wattakana epia suulia pueulo. Nachajaapejeʼe sukuwaʼipa na wawalayuukana süpüla noʼunirüin taya pitaaruluʼumüin.

Soʼu wanee kaʼi, taapaain tü ayuulii kanüliakat malaria otta uliyuunasitshi taya. Taawalaapa, taapa achiki nakumajüin sukuwaʼipa na wawalayuukana jalainjachin neʼiküin taya outapa taya. Mayaainjeʼe teʼrüin tü outaakat tooʼomüin, nnojotsü antapünaain tekiiruʼu tooʼulaainjachin suulia aʼyatawaa nümüin Jehová, jaʼitakajeʼe outule waya nüsoʼireʼereerü waaʼin.

TAYAKAI SÜMAA TAʼWAYUUSE WEʼITAAIN WAAʼIN NÜNAIN JEHOVÁ

Teʼraajüin Dorcas soʼu 1988, pürekutsoot shia, nnojotsü yaletüin saaʼin otta saaʼinmaasü maʼin tü shiʼyataainkat nümüin Maleiwa. Mapa, kasaatshii waya. Ayatüshii waya alapalaain naaʼu na wawalayuukana. Sükaalinjain taya Dorcas sünain aʼyatawaa nümüin Maleiwa, wainma kasa suuʼulaaka süpüleerua shiʼyataain nümüin Jehová. Süpüla walapalaain naaʼu na wawalayuukana, eeshii wooʼuikale maʼaka 25 kiloometüro sümaa walüʼüjain tü maletakat. Wattale maʼin nepia na wawalayuukana, eeshii woʼotoowaire suluʼu eʼejetuu eekai eein süpüla wantajanain namaʼanamüin, eeshii kamaʼale maʼin waya wooʼuikain saʼakapünaa pootshi otta keinotshisü tü wopukot eepünaale waya.

Meimmoluinsat Dorcas. Eeshii walatawaire süchi wainmaka aluʼu cocodrilo. Süpüla wantajanain namaʼanamüin waneinnua wawalayuu, eeshii jaʼraire kaʼi waya wopuluʼuin. Süpüla walatüinjatüin wanee süchi, anuwaluʼushii waya, jama mojuin tü puentekat. Wanaa sümaa süshakatüinjatüin Dorcas suluʼujee tü anuwakat, asiranajaasü shia sümaa sujutuuleein shiroku tü wüinkat, shimerojooko. Matüjainsalii waya ashuunajaa. Akanajasaʼa eejanain waneinnua jimaʼalii akaalinjaka shia. Sutuma tü alatakat wamüin, mojuwaisü waʼlapüin. Nnojoliipejeʼe ooʼulaain waya suulia tü waʼyataainkat nümüin Maleiwa chayaa.

Ipuotsü Dorcas soʼu 1992, ainküsü waaʼin tia. «¿Jameetche sukuwaʼipa waʼyataain nümüin Jehová?», maa müshii waya. «Nüsülajala wamüin Jehová tü joʼuukot», müshii waya. Weʼitaakalaka Jahgift sünülia tü wachonkat, «nüsülajala wamüin Jah» maluʼulu tia. Pienchi juya süchikijee tia, joʼuushi chi wane wachonkai, Eric nünülia. Aʼyataapuʼusü Jahgift suluʼu Oficina Remota de Traducción de Conakri otta müshia Eric niʼipajanashi nia na laülaashiikana.

Ooʼulaasü Dorcas suulia pürekutsoolüin pesiaat, ayatapejeʼe pürekutsoolüin shia rekulaat soʼunnaa joʼuuin na tepichikana. Sükajee nükaalinjain waya Jehová, ayatüshi taya pürekutsoolin pesiaat. Miyoʼuyuupa wachonnii, pürekutsootsü pesiaat Dorcas süchikuaʼa. Maaʼulu yaa, misioneeroshii waya chaa Conakri.

NIA JEHOVÁ AAʼINMAJAKA WAYA

Oʼunushi taya eepünaale nuluwataain taya Jehová. Kojuyatuairü teʼrüin sümaa taʼwayuuse naaʼinmajüin waya Jehová jee wainmairü tü kasa anasü naapakat wamüin. Sutuma weʼitaain waaʼin nünain Jehová jee nnojoluin woʼunuin süchiirua washirüü, jutatüsü waaʼin suulia shapawaa aaʼin. Nia Jehová aaʼinmajaka waya, nia chi Maleiwa oʼtteʼerakai waya soʼunnaa tü alatakat wamüin (1 Crón. 16:35). Shiimainshaata weʼrüin süpüshuaʼa tü naaʼinrakat wapüleerua (1 Sam. 25:29).