Waraita waya soʼu luusa, jalia waya suulia piʼyuushi

1, 2. (1) ¿Jalajachi Pablo wanaa sümaa nüshajüin namüin na anoujashii chajanakana Éfeso? (2) ¿Jarat tü pütchi wasoutuinjatkalü eʼipajee?

WANAA SÜMAA püreesain Pablo suluʼu wanee piichi chaa Roma, nütütüleʼereein naaʼin na anoujashiikana. Süka nnojolin süpüla yootuin nia namaa ashajüshi nia karaloʼuta namüin. Wanee karaloʼuta nüshajaka nuluwataain shia namüin na anoujashii chajanakana Éfeso soʼu tü juyakat 60 jee shiale 61 (Éf. 1:1; 4:1).

² Maʼaka poloo juya süpülapünaa tia chajachi Pablo Éfeso sünain aküjaa pütchi jee ekirajaa wayuu (Aluw. 19:1, 8-10; 20:20, 21). Aishii nüpüla na nuwalayuukana jee nükaalinjeein naya süpüla waneepiain nümaa Jehová. ¿Jamüsü nüshajaka Pablo namüin na anoujashii aneekuushikana süchiki tü luusakat jee tü piʼyuushikat? ¿Kasa watüjaka sünainjee tü nümakat namüin? Sünain ekirajaayakat tüü, wasouteerü eʼipajee tia pütchikalüirua.

«MÜSÜ KOJOPUʼUKAI SAAʼIN PIʼYUUSHI JAAʼU [...] MÜITPA CHUWATUUIKAI JAAʼU»

3. ¿Kasa naashajaaka achiki Pablo suluʼu tü karaloʼuta nuluwataakat namüin na anoujashii chajanakana Éfeso?

³ Müshi Pablo namüin na anoujashii chajanakana Éfeso: «Müsü kojopuʼukai saaʼin piʼyuushi jaaʼu, shiasaʼa süka paaʼinwainnapain jia nümaa chi Señotkai, müitpa chuwatuuikai jaaʼu» (Éf. 5:8). Aashajaashi Pablo süchiki tü luusakat jee tü piʼyuushikat namüin na anoujashii chajanakana Éfeso süpüla sütüjaanüin aaʼu tü naaʼinrakat süpüla nanouteʼerüin nakuwaʼipa. Wekirajaa süchiki jamüin nüküjaka Pablo namüin müin kojopuʼukai saaʼin piʼyuushi naaʼu.

4. ¿Jamüsü watüjaaka saaʼu müin saʼakakai naaʼin piʼyuushi na chajanakana Éfeso sutuma tü nanoujakalü anain?

⁴ Müsü kojopuʼukai saaʼin piʼyuushi naaʼu sutuma tü alawaa nanoujakalü anain. Wainma kasa nanoujapuʼuka anain na chajanakana Éfeso süpülapünaa nanoujain sünain tü shiimainkat nüchiki Maleiwa. Anoujapuʼushii naya sünain tü kasa pülasü naaʼinrakat na ooʼulaküliikana. Chaa Éfeso chajatü wanee aʼwaajülee müleʼu eʼnnaajünaka maʼin eere suʼwaajünüin Ártemis. Na wayuukana aʼwaajüshii maʼin naya maleiwayaasü. Wainma na wayuu akumajakana shiyaakua maleiwayaasü otta wainma nneerü nakanajaka na oikaakana shia (Aluw. 19:23-27). Eʼnnaajünüshii maʼin na chajanakana Éfeso sünain nooʼulaküliin (Aluw. 19:19).

5. ¿Jamüsü watüjaaka saaʼu müin saʼakakai naaʼin piʼyuushi na chajanakana Éfeso sutuma sünainpünaain naya aʼluwajirawaa akuwaʼipaa?

⁵ Müsü kojopuʼukai saaʼin piʼyuushi naaʼu sutuma sünainpünaain naya aʼluwajirawaa akuwaʼipaa. Yarüttüsü maʼin nakuwaʼipa na wayuu chajanakana Éfeso. Tü aainjünakat suluʼu teatro jee tü naaʼinrakat sünain tü miʼiraa naainjakat shikiira naʼwaajüin namaleiwase sünainpünaasü shia aʼluwajirawaa akuwaʼipaa (Éf. 5:3). «Süka nnojoluitpain wulein tü suluʼukat naaʼin, maapülinsalii neʼe naya sünain aaʼinraa kasa mojusü» (Éf. 4:17-19). Nnojotsü mojuin naaʼin sutuma tü naaʼinrakat otta nnojotsü jülüjain naaʼin nasouteenain nümüin Jehová. Müshi Pablo nachiki süka nnojoluin nayaawatüin saaʼu tü anakat süpüla naaʼinrüin: «Müsü kojokoi saaʼin piʼyuushi naaʼu [...] jee wattaluʼushii naya suulia tü akuwaʼipaa nümaʼanajeejatkat Maleiwa».

6. ¿Jamüsü nüküjaka Pablo müitpain chuwatuuikai naaʼu na anoujashii chajanakana Éfeso?

⁶ Eepejeʼe waneinnua wayuu chajanakana Éfeso ooʼulaakana suulia tü kasa yarüttüsü naaʼinrapuʼukat. Müshijeseʼe nümüin Pablo namüin: «Süka paaʼinwainnapain jia nümaa chi Señotkai, müitpa chuwatuuikai jaaʼu» (Éf. 5:8). Shia naaʼinraka tü nümakat Jehová namüin, tü makalü aka saaʼin luusa oʼuniraka nakuwaʼipa (Sal. 119:105). Ooʼulaashii naya suulia naʼwaajüin maleiwayaasü otta suulia aʼluwajirawaa akuwaʼipaa. Nashatüin nukuwaʼipa Maleiwa jee nachajaain sukuwaʼipa süpüla naʼwaajüin nia maʼaka nücheküin shia (Éf. 5:1).

7. ¿Kasa wanaawaka aluʼu wakuwaʼipa namaa na anoujashii chajanakana Éfeso?

⁷ Müsia wakuwaʼipa wayakana, süpülapünaa wekirajaain sünain tü Bibliakat müshii saʼakakai waaʼin piʼyuushi. Eeshii na sünainpünaapuʼukana tü miʼiraa saaʼinrakat tü iküleesia ekirajakalü alawaa otta eeshii na sünainpünaapuʼukana aʼluwajirawaa akuwaʼipaa. Weʼraajapa Jehová waʼwanajaain tü wakuwaʼipakat, shiaitpa waaʼinraka tü nuluwataakalü anain. Wainma kasa anasü weʼraka suluʼujee tia (Is. 48:17). Eepejeʼe kaʼi kapüleeka oʼu wamüin nnojoliin sünainpünaain waya tü kasa mojusükat jee waaʼinrüin tü kasa anasükat. Wekirajaa süchiki tü waaʼinrajatkat süpüla ayatüin waya waraitüin soʼu luusa.

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

EEJA WAAʼIN SUULIA PIʼYUUSHI

8. Saashin Éfeso 5:3-5, ¿kasa eejüinjatka oulia naaʼin na anoujashii chajanakana Éfeso?

⁸ (Paashajeʼera Éfeso 5:3-5). Süpüla nnojoliinjanain sünainpünaain aʼluwajirawaa akuwaʼipaa na anoujashii chajanakana Éfeso, nayoutuinjatü süpüshuaʼa tü kasa mojukat nümüin Maleiwa. Nnojotsü shiain neʼe nayoutuinjatüin aʼluwajirawaa akuwaʼipaa, nnojoliinjanaʼaya aashajaain naya süka pütchi yarüttüsü. Nüküjain Pablo namüin eejüinjatüin naaʼin suulia naaʼinrüin tia süpüla neʼrüinjanain kasa anasü «nuluwataapeena Maleiwa jee nuluwataapeena Cristo».

9. ¿Jamüsü eejüinjatka waaʼin suulia sünainpünaain waya aʼluwajirawaa akuwaʼipaa?

⁹ Eejüinjatü waaʼin suulia sünainpünaain waya wanee kasa waaʼinreetka atuma wanee kasa mojusü, «tü aaʼinnakat saʼaka piʼyuushi» (Éf. 5:11). Nünajüle wanee wayuu wanee kasa sünainpünaaka aʼluwajirawaa akuwaʼipaa, naapajüle shia jee naashajaale süchiki, aainjeechi kasa mojusü (Gén. 3:6; Sant. 1:14, 15). Jamüsüinkajaʼa suluʼu wanee mma eejana waneinnua wawalayuu akumajakana wanee grupo suluʼupünaa redes sociales süpüla naluwanaajiraain mensaaje. Paala, aashajaashii naya süchiki tü sünainpünaakat nanoula. Shiasaʼa mapa, aʼwanajaasü tü naashajaakalü achiki, shiaitpa neʼe naashajaaka achiki aʼluwajirawaa akuwaʼipaa. Wainma noʼutku nayakana aküjakana süchiki naʼluwajiraain nakuwaʼipa sutuma tü naashajaakalü achiki.

10. ¿Kasa nunoujireeka anain waya Satanás? (Éfeso 5:6)

¹⁰ Nimeejüin Satanás na wayuukana süpüla nnojoluin nayaawatüin saaʼu tü anakat suulia tü mojukat (Is. 5:20; 2 Cor. 4:4). Nunoujireein waya sünain nnojoluin mojuin tü kasa mojukat noʼuluʼu Jehová maʼaka saaʼin aʼluwajirawaa akuwaʼipaa (2 Ped. 2:19). Müsüjeseʼe wainmain peliikula, programa alatinnaka suluʼupünaa telewisoot otta internet eere shiiʼiyatünüin kasa mojuka noʼuluʼu Jehová. Sükajee nakuwaʼipa na wayuukana maaʼulu, nunoujireein waya chi Yolujaakai sünain nnojoluin mojuin jee talatüin saaʼin wayuu naʼluwajiraale nakuwaʼipa (paashajeʼera Éfeso 5:6).

11. Sünainjee tü alatakat sümüin Angela, ¿jamüsü anaka woonoole sümaa tü sümakat Éfeso 5:7? (Piirakaa sümüin tü ayaakuaakat).

¹¹ Keeʼireesü naaʼin Satanás waʼaleewajaain namaa na wayuu mojukana akuwaʼipa shiiʼiree nnojoliin woonooin nümaa Jehová. Nüchiaain Pablo na anoujashii chajanakana Éfeso suulia naʼaleewajaain sümaa wayuu aaʼinraka kasa mojusü. Müshi nia namüin: «Anakajaʼa nnojorüle wanaawain jaaʼin namaa» (Éf. 5:7). Eejüinjatü waaʼin noulialeʼeya na anoujashii chajanakana Éfeso, süka jamüin, eein süpüla waʼaleewajaain suluʼupünaa redes sociales namaa na wayuu mojukana akuwaʼipa. Jülüja waaʼin tü alatakat sümüin wanee wawala Angela sünülia,a kepiasü shia Asia. Anuu sünüiki: «Nnojorüle eejüin paaʼin, eesü süpüla nnojoluin piyaawatüin saaʼu anale jee mojule tü paaʼinrakat suluʼupünaa redes sociales. Jamüsüjaʼa tayakat anasü tamüin taʼaleewajaain sümaa wayuu mojuka akuwaʼipa. Jülüjaka taaʼin mapa nnojoluin mojuin kachiiruale taaʼin nakuwaʼipa na manoujainsaliikana». Akalajasaʼa nakaalinjain shia na laülaashiikana süpüla sunouteʼerüin sukuwaʼipa. Anuu sünüiki süchiki tia: «Shia taaʼinmaaka maaʼulu tü sünainpünaakat tanoula suulialeʼeya taaʼinmaain redes sociales».

12. ¿Kasa waaʼinrajatka süpüla woonooin sümaa tü nümakat Jehová?

¹² Jalia waya suulia wemeejünüin sutuma wayuu sünain anain sünainpünaale waya aʼluwajirawaa akuwaʼipaa, alawaa neʼe tia (Éf. 4:19, 20). Anashii wasakireʼerüle waaʼin sünain tüü: «¿Eejüsüche taaʼin suulia namaain taya waneepia na wayuu mojutukana amüin tü nümakat Jehová maʼaka naaʼin na wayuu taʼyataajiraakana amaa jee na koleejiajiraakana tamaa? ¿Meimmoluinsatche taaʼin sünain aaʼinraa tü nümakat Jehová?». Anasü jülüjale waaʼin tü sümakat 2 Timoteo 2:20-22 süpüla waneeküin na wawalayuu waʼaleewajaainjanakana amaa, süka jamüin, eejeenain na nnojoleenakana aleewain atuma waya nümaa Jehová.

AYATAʼAYA WARAITÜIN WAYA SOʼU LUUSA

13. ¿Kasa nüküjeeka achiki Pablo wanaa sümaa nümüin «ayataʼaya müin jia maʼaka nakuwaʼipa na wayuu waraitakana soʼu luusa»? (Éfeso 5:7-9).

¹³ Nnojotsü shiain neʼe nüküjain Pablo namüin na anoujashii chajanakana Éfeso süchiki nnojoliinjanain naya sünainpünaain tü aaʼinnakat saʼaka piʼyuushi, nüküjainña namüin ayatüinjanain naya «maʼaka nakuwaʼipa na wayuu waraitakana soʼu luusa» (paashajeʼera Éfeso 5:7-9). Tü nüküjeekalü achiki Pablo shia laülaainjatüin waaʼin waneepia sünain anoujaa. Süpüla wountuin tia, waashajeʼerüinjatü jee wekirajaainjatü anain tü Bibliakat jee sünain tü karaloʼuta naapakat wamüin na wawalayuukana. Waaʼinrapa tia, anasü jülüjale maʼin waaʼin tü nukuwaʼipakat Jesús jee tü nikirajakalü anain, jama müin nia «maʼaka saaʼin wanee luusa naʼaka na wayuukana» (Juan 8:12; Prov. 6:23).

14. ¿Jameerü wakuwaʼipa eere waaʼu tü nüpülainkat Maleiwa?

¹⁴ Süpüla ayatüin müin waya «maʼaka nakuwaʼipa na wayuu waraitakana soʼu luusa», eeinjatü waaʼu tü nüpülainkat Maleiwa. Choʼujaasü wamüin tü nüpülainkat Maleiwa süpüla wulein wakuwaʼipa, jama yarüttüin maʼin sukuwaʼipa wayuu maaʼutpünaa (1 Tes. 4:3-5, 7, 8). Wayouteerü tü shikiiruʼujeejatkat wayuu, tü mojukat noʼuluʼu Jehová, eere waaʼu tü nüpülainkat Maleiwa jee müsia «loteerü sukuwaʼipa tü kasa waaʼinrakat jee loteeriaʼaya wakuwaʼipa sutuma» (Éf. 5:9).

15. ¿Kasa waaʼinrajatka süpüla eein waaʼu tü nüpülainkat Maleiwa? (Éfeso 5:19, 20).

¹⁵ Naashin Jesús naapeerü Jehová tü nüpülainkat namüin na wayuu achuntakana shia nümüin (Luc. 11:13). Süpüla eeinjatüin tü nüpülainkat Maleiwa waaʼu wachuntuinjatü shia nümüin woʼuraajapa otta waʼwaajüinjachi Jehová namaa na wawalayuukana sünain tü outkajawaakat (paashajeʼera Éfeso 5:19, 20). Eere waaʼu tü nüpülainkat Maleiwa aneerü wakuwaʼipa nümaa jee talateechi nia wamaa.

16. ¿Kasa waaʼinrajatka süpüla anain tü waneekakat? (Éfeso 5:10, 17).

¹⁶ Waneekajatpa wanee kasa anashii wekirajaale süchiirua tia süpüla wayaawatüin saaʼu tü nüchekakat Jehová otta waaʼinrajatü shia (paashajeʼera Éfeso 5:10, 17). Wousütapa wanee pütchi suluʼu tü Bibliakat sünainpünaaka wakuwaʼipa shia wousütaka anain tü jülüjakat naaʼin Jehová süchiki tü waneeküinjatkat. Waaʼinrüle tü sümakat tia pütchikat aneerü tü kasa waneekakat.

17. ¿Kasa waaʼinrajatka süpüla wajayatüin kaʼi? (Éfeso 5:15, 16; piirakaa sümüin tü ayaakuaakat).

¹⁷ Nüküjain Pablo namüin na anoujashii chajanakana Éfeso shiain anain nalatirüle kaʼi sünain kasa eekai anain (paashajeʼera Éfeso 5:15, 16). Keeʼireesü naaʼin chi Yolujaakai waaʼinmaain tü kachiiruakat naaʼin na manoujainsaliikana suulia walatirüin kaʼi sünain aʼyatawaa nümüin Maleiwa (1 Juan 5:19). Nnojorüle eejüin waaʼin eesü süpüla kachiiruain waaʼin washirüü, wekirajaain suluʼu eʼikülee miyoʼu otta anain maʼin waʼyataain suulialeʼeya kachiiruain waaʼin waʼyataain nümüin Jehová. Sülatüle wamüin tia wanaawasü waaʼin yalapünaa namaa na manoujainsaliikana. Nnojotsiaajeʼe mojuin keeʼireere waaʼin tia, shia mojuka kachiiruale waaʼin shia. Süpüla ayatüin müin waya maʼaka «nakuwaʼipa na wayuu waraitakana soʼu luusa» anasü walatirüle kaʼi sünain kasa eekai anain.

18. ¿Kasa naaʼinraka Donald süpüla nülatirüin kaʼi sünain kasa eekai anain?

¹⁸ Wachajaa maʼin sukuwaʼipa süpüla wakooʼomüinrüin tü waʼyataainkat nümüin Jehová. Tia shia tü naaʼinrakat Donald, wanee wawala kepiakai Sudáfrica. Anuu nünüiki: «Jülüjasü taaʼin takuwaʼipa otta achuntushi taya kaalinwaa nümüin Jehová süpüla tousütüin sünain wanee aʼyatawaa eere süpütaainjatüin kaʼi tapüla süpüla takooʼomüinrüin taʼyataain sünain aküjaa pütchi. Nükaalinjaka taya Jehová, taʼyataaka waneepia nümüin Jehová sümaa taʼwayuuse».

19. ¿Kasa waaʼinrajatka süpüla ayatüin müin waya maʼaka nakuwaʼipa na wayuu waraitakana soʼu luusa?

¹⁹ Sükajee tü karaloʼuta nüshajakat Pablo namüin na anoujashii chajanakana Éfeso, natüjaa aaʼu tü naaʼinrajatkat süpüla waneepiain naya nümaa Jehová otta jalouileeriaʼaya wamüin tia karaloʼutakat süpüla waneepiain waya nümaa Jehová. Wekirajaaitpa anain jalouijeerüin shia wamüin süpüla anain tü waneekakat waaʼinrajatpa wanee kasa otta aleeweena waya namaa na wayuu anakana akuwaʼipa. Sütütüleʼerüin waaʼin süpüla wekirajaain sünain tü Bibliakat süpüla wooʼulaain suʼunirüin wakuwaʼipa otta süküjain choʼujaain wamüin tü nüpülainkat Maleiwa süpüla wanoutuin wakuwaʼipa. Waaʼinrüle tü nümakat Pablo waaʼinreerü tü kasa talateechikai atuma Jehová jee nnojoleena sünainpünaain waya tü aaʼinnakat saʼaka piʼyuushi, tü keejiakat namüin na manoujainsaliikana otta ayateena müin waya maʼaka nakuwaʼipa na wayuu waraitakana soʼu luusa.