MAATSOʼU 30-AAʼURIIROʼU 5, 2026
JAYEECHI 76 ¿Aashin talatüin paaʼin?
Anainjatü saaʼin wayuu sutuma wanüiki
«Chi Maleiwa matüjainkai aküjaa alawaa» (SAL. 31:5).
TÜ WATÜJEETKAT
Waküjainjatü tü shiimainkat waneepia otta tü sukuwaʼipainjatka watuma waküjapa tü shiimainkat nüchiki Maleiwa.
1. ¿Jamakuwaʼipalii süpüla naʼakain waya na nüpüshikana Jehová?
WEʼRAAJAPA wanee wawala eeshijaʼa nüsakirüle waya süchiki jamakuwaʼipaliin süpüla wanoujain nünain Jehová, «anoujashii na wayuu kachooinkana taya jee nekirajüin taya tü shiimainkat nüchiki Maleiwa», eeshiijaʼa wamüle. «Jekechi taya sünain anouja», eeshii na makana. Yootushii waya namaa na wawalayuukana süchiki tia süka shiain aʼwanajaain atuma wakuwaʼipa tü shiimainkat nüchiki Maleiwa jee naʼakashii waya na nüpüshikana suluʼujee tia. Müsüjeseʼe kojutuin shia wamüin, jaʼyasü tia saaʼu wakuwaʼipa sutuma waküjain tü shiimainkat waneepia jee lotusü sukuwaʼipa tü kasa waaʼinrakat (Sal. 15:1-3).
2. (1) ¿Jamapuʼusü nukuwaʼipa Jesús? (2) ¿Jamapuʼusü sukuwaʼipa wayuu sutuma tü pütchi nüküjakat Jesús namüin?
2 Nüküjain Jesús tü shiimainkat waneepia. Jamüshiijaʼa na nüʼünüükana natüjaa aaʼulu müin nukuwaʼipa Jesús mayaainjeʼe niʼnnüin amüin sutuma wayuu sünainjee tia (Mat. 22:16). Anuujeseʼe nünüiki Jesús: «Antüshi taya süpüla mojujiraainjatüin tatuma wayuu. Peʼipaajeechikalaka wanee wayuu nümaa nüshi. Akaataajaʼa wanee wayuu, peʼipaajeerü sümaa shii otta sümaa saʼüt» (Mat. 10:35). Nnojotsü nüküjain Jesús tü shiimainkat nüchiki Maleiwa sümüin wayuu shiiʼiree mojujiraainjatüin naya nutuma, nütüjaapejeʼe saaʼu sülatajatüin tia, müsüjeseʼe nüküjain Jesús tia (Mat. 23:37). Otta nütüjaa aaʼulu eejeenain na wayuu aapaweekana sümaa otta na ayoutakana shia (2 Tes. 2:9-11).
3. ¿Kasa wekirajaainjatka anain sünain ekirajaayakat tüü?
3 Süka washatüin nukuwaʼipa Jesús wachajaain sukuwaʼipa shiiʼiree waküjain tü shiimainkat waneepia jee wekirajüin wayuu süchiki tü shiimainkat nüchiki Maleiwa. Waaʼinrüin tia mayaainjeʼe weʼnnüin amüin sutuma wayuu, nnojotpejeʼe maluʼuluin tia mayaawajaainjanain waya saaʼu wanüiki yootopa waya sümaa wayuu. Jülüjainjatü waaʼin wanüiki waneepia. Sünain ekirajaayakat tüü wekirajaajeerü anain jalain ashajünüin tü shiimainkat nüchiki Maleiwa, jamüin waküjainjatka tü shiimainkat, jamüinjatü sukuwaʼipa watuma waküjapa shia jee joujain anaka süpüla waküjain shia. Watüjaapa saaʼu tia, aneerü saaʼin wayuu sutuma wanüiki.
¿JALASÜ ASHAJÜNÜIN TÜ SHIIMAINKAT NÜCHIKI MALEIWA?
4. ¿Jamaluʼulu niain Jehová kanainjeejachika tü shiimainkat?
4 Nia Jehová kanainjeejachika tü shiimainkat. Nüküjain tü shiimainkat waneepia, jamüshijaʼa nia nüküjain kasain wayu anain jee kasain mojuin (Sal. 19:9; 119:142, 151). Ekeraajüsü waneepia tü nümakat Jehová jee nnojotsü niiʼiratüin tü nümakat (Is. 55:10, 11; Núm. 23:19). «Nnojoishi süpüla nüküjainjachin alawaa chi Maleiwakai» (Heb. 6:18). Chi Maleiwa matüjainkai aküjaa alawaa, müsü tü Bibliakat nüchiki Jehová (Sal. 31:5).
5. ¿Isasüche wachiki weʼraajüin nukuwaʼipa Jehová? (Aluwataaushikana 17:27).
5 «Nnojoishi süpüla weʼraajüin chi Maleiwakai jama nnojoluin weʼrüin nia», eeshi chi eekai nümüin, eepejeʼe süpüla weʼraajüin nia jülüjale waaʼin tü kasa nukumajalakat (Roma 1:20). Nüküjain Pablo anain wachajaale nüchiki Maleiwa süka jamüin, «nnojoishi wattain nia woulia» (paashajeʼera Aluwataaushikana 17:27). Nürütkeʼerüin Jehová nünainmüin na wayuu nnojoliikana yaletüin aaʼin jee na atüjaweekana saaʼu tü shiimainkat nüchiki (Juan 6:44).
6. (1) Püküja waneirua kasa ashajünaka achiki suluʼu tü Bibliakat. (2) ¿Jamüsü kojutukaʼa wamüin watüjaain saaʼu tia?
6 Wane kasa waaʼinrajatka süpüla weʼraajüin nukuwaʼipa Jehová shia wekirajaain sünain tü Bibliakat. Nuʼunirüin Jehová sükajee tü nüpülainkat na wayuu ashajakana tü Bibliakat (2 Ped. 1:20, 21). Müsüjeseʼe wanoujain sünain tü sümakat, jama shiimain shia, eeshii süpüla wanoujain sünain tü sümakat süchiki niain Jehová chi kakumalakai kasakat süpüshuaʼa (Gén. 1:1, 26). Wanouja anainrü süchiki müliain waya jee outuin waya sutuma waleʼeruʼuin süchiki kaainjalaa (Roma 5:12; 6:23). Otta eeshii süpüla wanoujain sünain tü sümakat süchiki najaʼttirüinjatüin Maleiwa nükajee Jesucristo süpüshuaʼa tü müliaa weʼrakat nutuma Satanás chi «shikiishikai tü alawaakat» (Juan 8:44; Roma 16:20). Wanouja anainrü najaʼttireenain Jesucristo na mojulaashiikana, nüsoʼireʼereerüin naaʼin na outushiikana, paʼaraiiseerüin tü mmakat nutuma jee nükaalinjeenain waya süpüla lotuinjatüin wakuwaʼipa (Juan 11:25, 26; 1 Juan 3:8). Nüküjain wamüin Jehová tü shiimainkat nüchiki otta nücheküin wapüleerua wekirajüin wayuu süchiki tia (Mat. 28:19, 20). Talatashaatasü waaʼin süka naapüin Jehová wamüin tia aʼyatawaakat.
¿JAMÜSÜ WAKÜJAINJATKA TÜ SHIIMAINKAT?
7, 8. ¿Jamüsü jülüjainjatkaʼa waaʼin kasain waküjain atuma wanee kasa? Püküja wanee sukuwaʼipa. (Marcos 3:11, 12; piirakaa sümüin tü ayaakuaakat).
7 Naʼakashii waya na nüpüshikana Jehová süka nnojoluin waküjain alawaa, nnojotpejeʼe shiain neʼe tia nüchekaka Jehová wapüleerua. Jülüjasü naaʼin Jehová jamüin waküjaka wanee kasa. Jülüjataa waaʼin tü alatakat wanaa sümaa yaajachin Jesús yaa saaʼu tü mmakat (paashajeʼera Marcos 3:11, 12). Wanaa sümaa chajachin Jesús aküjain pütchi sotpaʼa tü palaakat Galilea, antapaatüsü nünainmüin watta saalii wayuu, eejatü naʼaka wayuu kaleʼeruʼukana yolujaa, nasapainkashii naya nümülatuʼu Jesús sümaa nümüin nümüin: «Pia chi Nüchonkai Maleiwa». Mayaainjeʼe shiimain tü namakat na yolujaakana nüchiki Jesús, naküjain tia shiiʼiree nemeejeein wayuu jee nakayaleʼerüin naya nuulia Jehová. Nnojoipejeʼe emeejünüin Jesús natuma, nüchiaain naya suulia naküjaʼalüin nüchiki sümüin wayuu.
8 Tü watüjakat sünainjee tia shia jülüjain naaʼin Jehová jamüin waküjaka wanee kasa, jaʼitairü shiimain shia. Nücheküin Jehová wekirajüin wayuu nüchiki sutuma alin nia wapüla jee niainjachin aʼwaajünüin sünainjee tü waʼyataainkat nümüin (Mat. 5:16; anasü paashajeʼerüle Aluwataaushikana 14:12-15).
¿Jaralinjachi aʼwaajünaka wekirajapa tü shiimain suluʼukat tü Bibliakat? (Paashajeʼera tü pütchikat 7 otta 8)
9. (1) ¿Kasa tü nnojoluinjatkat waaʼinrüin? (2) ¿Jamüsü nnojoluinjatkaʼa waaʼinrüin tia?
9 Jülüjainjatü waaʼin jamüin waküjaka wanee kasa shialejeʼe shiiʼiree kapülain waya sünainjee jee anain pütchi wachiki. Jülüjataa waaʼin nüküjale wamüin wanee laülaashi wanee kasa nnojoluinjatka atüjaanüin aaʼu, waküjataarüle shia namüin na wawalayuukana, shiasaʼa natüjaapa saaʼu shiimain tü wamakat namüin, eesüjaʼa poneerüle naaʼin tia. «Anashi niale wasakirüin, nia aküjünakai amüin palajana süchiki wanee kasa», eeshiijaʼa namüle na wawalayuukana. Mayaainjeʼe anain pütchi wachiki natuma na wawalayuukana, nnojoleerü talatüin naaʼin Jehová wamaa waküjale süchiki wanee kasa nnojoluinjatka atüjaanüin aaʼu (Prov. 11:13). Mayaainjeʼe shiimain tü wamakat, nnojotsü anain waküjale süchiki wanee kasa nnojoluinjatka natüjaain aaʼu na wawalayuukana jama nnojoluin saapünüin shikii wamüin süpüla waaʼinrüin tia. Nnojoleerü talatüin naaʼin Jehová wamaa süka waküjain süchiki tia shiiʼiree kapülainjanain waya sünainjee.
¿JAMÜINJATÜ SUKUWAʼIPA WATUMA WAKÜJAPA TÜ SHIIMAINKAT?
10. ¿Jamaluʼulu nünüiki Pablo namüin na anoujashii chajanakana Colosas?
10 (Paashajeʼera Colosas 4:6). «Anakajaʼa anale saaʼin wayuu waneepia sutuma jünüiki», müshi Pablo namüin na anoujashii chajanakana Colosas. Tü nüküjakat Pablo namüin maluʼulu atüjainjanain naya süpüleerua nanüiki jee kamaneeinjana naya yootopa naya sümaa wayuu.
11, 12. ¿Jamüsü jülüjainjatkaʼa waaʼin sukuwaʼipa wanüiki waküjapa pütchi? Püküja wanee sukuwaʼipa (piirakaa sümüin tü ayaakuaakat).
11 Nüküjain Pablo anainjatü saaʼin wayuu sutuma wanüiki wekirajapa naya sünain tü shiimainkat nüchiki Maleiwa. Saashin Hebreokana 4:12 eesü süpüla sütüjaanüin aaʼu tü suluʼukat naaʼin wanee wayuu jee tü jaʼyakat saaʼu nukuwaʼipa sutuma tü Nünüikikat Maleiwa. Nnojorüle anain sukuwaʼipa watuma wekirajapa wayuu sünain tü shiimainkat nüchiki Maleiwa, eeshiijaʼa jashichire naya watuma jee alin namüin tü wamakat. Wekirajaa sünain wanee sukuwaʼipa.
12 Jamüsüjaʼa waküjale pütchi nümüin wanee wayuu oʼuraajawaikai sümüin shiyaakua wanee kasa, anoujashi nia nünain Maleiwa otta aaʼinrawaishi nia tü miʼiraa aainjünawaikat tisienpüroʼu. Eesüjaʼa waküjeere nümüin tü sümakat tü Bibliakat süchiki nnojoluin anain waʼwaajüin shiyaakua wanee kasa jee nnojoluin anain waainjain tü miʼiraa aainjünawaikat tisienpüroʼu süka sünainpünaain shia yolujaa (Is. 44:14-20; 2 Cor. 6:14-17). Nnojotsü anain müle sukuwaʼipa watuma waküjapa pütchi sümüin wayuu, mayaainjeʼe waküjain tü shiimainkat nüchiki Maleiwa.
¿Kasa waaʼinrajatka süpüla anainjatüin sukuwaʼipa watuma wekirajapa wanee wayuu sünain tü Bibliakat? (Paashajeʼera tü pütchikat 11 otta 12).a
13. ¿Kasa waaʼinrajatka süpüla müinjatü sukuwaʼipa wanüiki maʼaka saaʼin wanee eküülü eekai jemetüin?
13 Naashin Pablo müinjatü sukuwaʼipa wanüiki maʼaka saaʼin wanee eküülü eekai jemetüin sutuma «kaʼakain shia ichii». Nnojotpejeʼe maluʼuluin tia wakooʼomüinrüinjatüin wanee pütchi suluʼuka tü Bibliakat shiiʼiree saapaainjatüin wayuu sümaa jee anainjatüin saaʼin watuma. Waküjapa nümüin wanee wayuu tü shiimainkat nüchiki Maleiwa, wakaalinjainjachi nia süpüla «niyaawatüin saaʼu» jee sütanalüinjatüin naaʼin tü pütchikat (Job 12:11). Eesüjaʼa jemetüle wanee eküülü nümüin wanee wayuu eepejeʼe süpüla meʼejüin shia nümüin wane, akaʼaya neʼe sukuwaʼipa wanüiki, eesüjaʼa anale naaʼin wanee wayuu watuma eepejeʼe süpüla mojushiin shia nümüin wane. Jamüsüjaʼa suluʼu waneirua mma nnojotsü alin sümüin wayuu lotule sukuwaʼipa nünüiki wanee wayuu nüküjapa tü suluʼukat naaʼin, jaʼitashi yootuin nia nümaa wanee wayuu eekai miyoʼuin nuulia. Eepejeʼe waneirua mma eere mojushiin tia sümüin wayuu. «Atüjainjana jia süpüleerua jünüiki sümüin wayuu», müshi Pablo. «Wakuwaʼipapalaʼaya neʼe tia», «alejatia takuwaʼipa», nnojoishii müinjanain waya, anainjatüin saaʼin wayuu süpüshuaʼa sutuma wanüiki.
¿JOUJA ANAKA SÜPÜLA WAKÜJAIN TÜ SHIIMAINKAT?
14. ¿Nikirajüinche Jesús na nikirajüinkana uwatuwoʼushi sünain süpüshuaʼa tü kasa nütüjaakalü aaʼu?
14 Kemeʼeriasü nünüiki Jesús yootopa nia namaa na nikirajüinkana otta kamaneeshi nia namüin (Mar. 6:34). Niyaawata aaʼu Jesús eein tü kasa isakat nachiki, müsüjeseʼe nnojoluin nikirajüin naya uwatuwoʼushi sünain süpüshuaʼa tü kasa nütüjaakalü aaʼu. «Nnojoleerü jiyaawatüin saaʼu», müshi Jesús namüin süka anain natüjaale saaʼu tia shiʼipaʼaya (Juan 16:12). ¿Kasa waaʼinrajatka süpüla washatüin nukuwaʼipa Jesús?
15. ¿Wekirajüinjanache na wekirajüinkana uwatuwoʼushi sünain süpüshuaʼa tü kasa watüjaakalü aaʼu? (Proverbios 25:11; piirakaa sümüin tü ayaakuaakat).
15 Mayaainjeʼe watüjaain saaʼu tü shiimainkat nüchiki Maleiwa nnojotsü anain waküjale uwatuwoʼushi sümüin wayuu süpüshuaʼa tü kasa watüjaakalü aaʼu. Shia anaka aluʼu wayaawatüle saaʼu tü isakat süchiki wayuu maʼaka naaʼinrüin shia Jesús. Jamüshiijaʼa woʼttüle sünain ekirajaa wanee wayuu sünain tü Bibliakat piama semaana süpülapünaa saainjünüin tü miʼiraa aainjünawaikat tisienpüroʼu nnojotsü anain waküjamaatüle nümüin nuuʼulaainjachin suulia aaʼinraa tia süka sünainpünaain shia yolujaa jee nnojoluin anain shia nümüin Jehová. Eeshii na wayuu ekirajaakana sünain tü Bibliakat anouteʼeraamatakana nakuwaʼipa, eepejeʼe na anouteʼerakana nakuwaʼipa shiʼipaʼaya. Süpüla katchinjatüin nunoula wanee wayuu ekirajaakai sünain tü Bibliakat nnojotsü choʼujaain neʼe wekirajüin nia sünain tü kasa nunouteʼerüinjatkat sünain nukuwaʼipa, wayaawatüinjatü saaʼu joujain anain süpüla wekirajüin nia sünain tia (paashajeʼera Proverbios 25:11).
Anasü washatüle nukuwaʼipa Jesús wekirajapa wanee wayuu. Jülüjainjatü waaʼin tü waküjainjatkat nümüin jee joujain anain süpüla waküjain tia. (Paashajeʼera tü pütchikat 15).
16. ¿Kasa waaʼinrajatka süpüla ayatüinjatüin naapaain sümaa tü shiimainkat na wekirajüinkana?
16 Talatashaatasü waaʼin wekirajapa wanee wayuu sünain tü shiimainkat nüchiki Jehová. Süpüla «ayatüinjachin naapaain» chi wayuukai sümaa tü shiimainkat, anainjatü wakuwaʼipa nüpüleerua jee jaʼyainjatü saaʼu wakuwaʼipa wanoujain sünain tü sümakat tü Bibliakat (3 Juan 3, 4). Maʼaka wekirajaainapain anain nnojotsü anain waküjale tü shiimainkat shiiʼiree kapülain waya sünainjee, anainjatü saaʼin wayuu sutuma wanüiki, kamaneeinjanain waya jee waküjainjatü tü shiimainkat soʼu tü kaʼi anakalü oʼu shia. Otta niainjachi Jehová aʼwaajünaka sünainjee tü waʼyataainkat nümüin, waaʼinrüle tia jaʼyeerü saaʼu wakuwaʼipa niain Jehová Washin, chi Maleiwa matüjainkai aküjaa alawaa.
JAYEECHI 160 Waküja tü pütchi anakat maʼin
a SÜCHIKI TÜ AYAAKUAAKAT: Sünain tü palajatkat ayaakuaa, weʼrüin wanee wawala aküjakai pütchi nümüin wanee wayuu eekai amaʼana wanee árbol de navidad, nüküjamaataka chi wawalakai nümüin nnojoluin anain tü aainjünawaikat tisienpüroʼu süka sünainpünaain shia yolujaa. Sünain tü wane ayaakuaakat weʼrüin naashajeʼerüin chi wawalakai wanee pütchi nümüin chi wayuukai süchiki tü naaʼinrajatkat wanee wayuu süpüla anain sukuwaʼipa nepijia nüchonnii. Sünainjee tia piamasükat sukuwaʼipa, ¿jeʼtsüche tü anakat saaʼin pümüin?