Ekirajaaya 7
¿Kasa waainjüinjatka süpüla waashajaain nümaa Maleiwa?
¿Jamüsü anaka maʼin aashajawaa waneepia nümaa Maleiwa? (1)
¿Jarai chi waashajaainjachikai amaa otta jamüinjatü sukuwaʼipa watuma? (2, 3)
¿Kasa waashajaainjatka achiki nümaa Jeowa? (4)
¿Jouja paashajaaka nümaa Maleiwa? (5, 6)
¿Jaralii na naapakana anüiki Maleiwa? (7)
1. Tü aashajawaakat nümaa Maleiwa shia wanaa sümaa waashajaain nümaa sümaa nnojoluin pülayaain waaʼin. Aashajaainjana waya waneepia nümaa Maleiwa. Mülee shia watuma meena waya maʼaka naaʼin wanee naʼaleewain eeka alin maʼin nüpüla. Jaʼitaichi miyoʼuin otta pülain Jeowa naapüin wanüiki. ¿Paashajaa amaachi Maleiwa waneepia? (1 Juan 5:14, 15; 1 Tesalónica 5:17).
2. Waʼwaajüin Maleiwa wanaa sümaa waashajaain nümaa, makalaka niain Jeowa nümüiwaʼa waashajaainjachika amaa. Wanaa sümaa yaajachin Jesús mmapaʼa nia neʼe naashajaapuʼuka amaa waneepia chi Nüshikai. Müinjanaʼaya wayakana (Mateo 4:10; 6:9). Achuntuinjana waya waneepia süka nünülia Jesús. Weeʼiyatüin mayaa kojutuin nia wamüin otta weʼitaain waaʼin nünain süka ouktuin nia saaʼu waainjala (Juan 14:6; 1 Juan 2:1, 2).
3. Wanaa sümaa waashajaain nümaa Maleiwa ojuʼitajatü suluʼujee waaʼin tü wanüikikat. Nnojotsü waashajeʼerüinjatüin sünainjee wanee karaloukta otta weʼitirakuʼu wamüinjatüin tü wanüikinjatkat (Mateo 6:7, 8). Eeshii süpüla wasapainkain, shaʼwatüin otta joyotüin waya süpüla waashajaain nümaa Jeowa akaisaʼa kojutuinjachin nia watuma wanaa sümaa waainjüin tia. Waashajaale waleʼeruʼujee nümaa Jeowa naapüin wanüiki (1 Samuel 1:12, 13). Waashajaale wamüiwaʼa nümaa Maleiwa anasü waainjüle shia eere yüütüülin ooʼulaka wattaluʼu suulia wayuu (Marcos 1:35).
4. ¿Kasa paashajaainjatka achiki nümaa Jeowa? Aashajaainjana waya süchiki tü kasa anakat atuma wakuwaʼipa nümaa (Filipos 4:6, 7). Sukuwaʼipa tü aashajawaakat nümaa Jeowa niʼitaaka Jesús shiiʼiyatüin wachuntajanain saaʼu nünülia Maleiwa ooʼulaka saaʼu tü naainjüinjatkat. Otta taasia eesü süpüla wachuntuin saaʼu weküin, motuinjatüin naaʼin waainjala otta süpüla wachecherüinjatüin waaʼin wanaa sümaa suuʼulakünüin waaʼin (Mateo 6:9-13). Nnojotsü wachuntajatüin tü keeʼireekat waaʼin shiainjatü wachuntaka tü nüchekakat Maleiwa wapüleerua (1 Juan 5:14).
5. Eesü süpüla paashajaain nümaa Maleiwa müleka paapeere tü analuʼukat nümüin otta puʼwaajeere nia (1 Crónicas 29:10-13). Puchunta waneepia nümüin wanaa sümaa sülatüin kasa mojusü pümüin otta puuʼuleʼeneere suulia anoujaa (1 Pedro 5:7). Otta taasia anasü aashajawaa nümaa Jeowa süpülapünaa ekaa (Mateo 14:19). Naashin niakai waashajaainjachi amaa «waneepia saʼwai je soʼukaʼi» (Éfeso 6:18).
6. Maʼaka waainjüle wanee kasa eeka mojuin maʼin achuntamaatüinjana waya nümüin Jeowa süpüla nümüliajüin otta motuinjatüin naaʼin waainjala. Yapashi Maleiwa süpüla «nülatirüinjatüin shia woulia» maʼaka waküjüle süchiki nümüin ooʼulaka nnojorüle waainjüin shia süchikuaʼa (1 Juan 1:9).
7. Naapaka anüiki Jeowa naya mülee na lotushiikana akuwaʼipa. Süpüla naapüinjatüin pünüiki paainjüinjatü maʼin tü nuluwataakat anain (1 Pedro 3:12; Juan 9:31). Nnojotsü yaletayaainjatüin paaʼin wanaa sümaa paashajaain nümaa (Lucas 18:9-14). Piiʼiyatüinjatü süka tü paainjakat tü puchuntakat nümüin Maleiwa. Piiʼiyateetka mayaa punoujuin ooʼulaka püküjüin tü shiimainkat. Müle shia putuma naapeerü Jeowa pünüiki (Hebreokana 11:6).