Kojutuinjatü wamüin oʼuraajaa

1, 2. (1) ¿Jamüsü anashaataka maʼin oʼuraajaa nümüin Jeʼwaa? (2) ¿Jamüshii woʼuraajüinjanaka wanaapünaa sümaa tü sümakat tü Wiwüliakat?

JOʼUUCHON tü Mmakat suulialeʼeya tü shüliwaikalüirua chakat chaa iipünaa. Nümüin Jeʼwaa, napüshuaʼa na wayuukana müshii aka saaʼin wanee süshipirachon wüin (Salmo 115:15; Isaías 40:15). Mayaapejeʼe joʼuuchoin maʼin waya suulialeʼeya süpüshuaʼa tü nukumajakat Jeʼwaa chaa iipünaa, anuu sünüiki tü Wiwüliakat: «Pejeshi Jeʼwaa nanain napüshuaʼa na achuntakana nia otta nanain napüshuaʼa na aʼwaajakana nia süka tü shiimainkat. Nikeraajeerü tü nachuntakat na wayuu kojutukana amüin nia. Naapeerü nanüiki süka nachuntuin kaalinwaa nümüin otta nuʼtteʼereena naya» (Salmo 145:18, 19). Mayaapejeʼe niain Jeʼwaa kakumalain kasakat süpüshuaʼa sümaa pülashin maʼin nia, aleeweeshi nia wamaa otta naapajeein wanüiki woʼuraajapa. Anataʼaleesüjaʼa maʼin wakuwaʼipa nutuma Jeʼwaa. Oʼuraajaa nümüin Jeʼwaa shia wanee kasa anashaatasü maʼin.

² Naapajeerü wanüiki Jeʼwaa wachuntule nümüin wanaapünaa sümaa tü keeʼireekat naaʼin. Ashajünüsü suluʼu tü Wiwüliakat tü waaʼinrajatkat süpüla naapajüin Jeʼwaa wanüiki woʼuraajapa nümüin. Wekirajaa süchiki tia.

ANASHII WOʼURAAJÜLE NÜMÜIN JEʼWAA

3. ¿Jamüshi puʼuraajüinjachika nümüin Jeʼwaa?

³ Keeʼireesü naaʼin Jeʼwaa paashajaain nümaa. Watüjaa aaʼu tia sutuma tü nümakat suluʼu Filipos 4:6, 7 (paashajeʼera). Aishi pia nüpüla chi Kakumalakai kasakat süpüshuaʼa otta keeʼireesü naaʼin püküjain nümüin tü suluʼukat paaʼin jee tü alatakat pümüin.

4. ¿Jamüshi aleeweechika maʼin pia nümaa Jeʼwaa puʼuraajüle waneepia nümüin?

⁴ Aleeweena maʼin waya nümaa Jeʼwaa woʼuraajüle waneepia nümüin. Wanee wayuu eekai naashajaain waneepia nümaa wanee nütünajut, nüküjain nümüin süchiki tü jülüjakat naaʼin, tü talatakalü atuma naaʼin jee tü shapaakalü atuma naaʼin, sükajee tia, aleewaleejeechia maʼin nia nümaa. Müsia neʼe nukuwaʼipa Jeʼwaa, nüküjain pümüin suluʼu tü Wiwüliakat tü jülüjakat naaʼin, tü talatakalü atuma naaʼin jee tü naaʼinrajatkat mapeena. Akaataajaʼa piakai, eeshi süpüla püküjain nümüin Jeʼwaa tü suluʼukat paaʼin paashajaapa nümaa. Puʼuraajüle waneepia nümüin Jeʼwaa, arütkaajeechi maʼin pia nünainmüin (Santiago 4:8).

TÜ WAAʼINRAJATKAT SÜPÜLA NAAPAJÜIN JEʼWAA WANÜIKI

5. ¿Jamüsü watüjaaka saaʼu nnojoluin naapajüin Jeʼwaa sünüiki süpüshuaʼa wayuu eekai suʼuraajüin?

⁵ ¿Naapajüinche Jeʼwaa sünüiki süpüshuaʼa wayuu eekai suʼuraajüin? Nnojotsü naapajüin. Anuujeseʼe nünüiki namüin na israeliita eejanakana nükalioʼu Isaías: «Jaʼitaina achuntuin maʼin jia tamüin, nnojoleerü taapajüin jünüiki sükajee juʼutüliin saaʼin wayuu» (Isaías 1:15). Nnojoliire keisalain waya sümüin wakuwaʼipa, eeshii waainjale neʼe kasa mojusü. Shiasaʼa sünainjee tia, nnojoleerü naapajüin Jeʼwaa wanüiki woʼuraajapa nümüin.

6. (1) ¿Jamüshii kanoulainjanaka waya? (2) ¿Kasa waaʼinrajatka shiimainre kanoulain waya?

⁶ Keeʼireere waaʼin naapajüin Jeʼwaa wanüiki woʼuraajapa, kanoulainjana waya nünain (Marcos 11:24). Anuu nünüiki chi aluwataaushikai Pablo süchiki tia: «Nnojoleechi talatüin nia nümaa chi eekai manoujain nünain, chi eekai nürütkaain nünainmüin Maleiwa, acheküshi nunoujainjachin sünain eein nia sümaa naapeerüin kasa anasü namüin na achajaakana maʼin nüchiki» (Hebreokana 11:6, TNM). «Anoujashi taya» nnojoishii müinjanain neʼe waya, shiimainre wanoujain nünain Jeʼwaa, oonooinjana waya waneepia sümaa nünüiki (paashajeʼera Santiago 2:26).

7. (1) Woʼuraajapa nümüin Jeʼwaa, ¿jamüshi kojutuinjachika nia wamüin otta nnojoluinjatka yaletüin waaʼin? (2) ¿Kasa nnojoluinjatka waaʼinrüin woʼuraajapa?

⁷ Woʼuraajapa nümüin Jeʼwaa, ¿jamüshi kojutuinjachika nia wamüin otta nnojoluinjatka yaletüin waaʼin? Waashajaale nümaa wanee aluwataai, kojutushi nia wamüin, nialeekajaʼa nnojoleematüin kojutuin wamüin Jeʼwaa, chi Maleiwa pülashaatakai maʼin. Alanaʼaleeinjatü nujutu wamüin otta nnojoluinjatü yaletüin waaʼin woʼuraajapa (Génesis 17:1; Salmo 138:6). Woʼuraajapa nümüin Jeʼwaa, waküjainjatü nümüin tü suluʼukat waaʼin, nnojo weiteʼerakuʼu wamüin wanüiki nümüin (Mateo 6:7, 8, TNM).

8. ¿Kasa waaʼinrajatka wachuntapa wanee kasa nümüin Jeʼwaa?

⁸ Wane kasa jülüjeeka waaʼin woʼuraajapa nümüin Jeʼwaa shia pansaainjatüin wakuwaʼipa sümaa tü wachuntakat nümüin. Jamüshiijaʼa wachuntule nümüin kaalinwaa süpüla wantüin sünain tü wayaalujutkat, aʼyataainjana waya süchiirua tia, nnojotsü waʼatapajüinjatüin naapüin Jeʼwaa süpüshuaʼa tü choʼujaakat wamüin, nnojoishii shokulainjanain waya. Aʼyataainjana waya sünain wanee kasa eekai wainküin jaʼitairü shiain wanee aʼyatawaa eekai kapüleein (Mateo 6:11; 2 Tesalónica 3:10). Wachuntule kaalinwaa nümüin Jeʼwaa süpüla wooʼulaain suulia aaʼinraa kasa mojusü, nnojoluinjana waya sünainpünaain wanee kasa kaainjaleenaka atuma waya (Colosas 3:5). Wekirajaa sünain waneirua kasa jülüjainjatka waaʼin woʼuraajapa.

TÜ JÜLÜJAINJATKAT WAAʼIN WOʼURAAJAPA

9. (1) ¿Jarai chi woʼuraajüinjachikai amüin? (2) ¿Kasa watüjaka sünainjee Juan 14:6 süchiki sukuwaʼipa oʼuraajaa?

⁹ ¿Jarai chi woʼuraajüinjachikai amüin? Niʼiküin Jesuu na nikirajüinkana sünain oʼuraajaa, «meerü jünüiki juchuntapa nümüin Maleiwa: ‹Taata Maleiwa chakai sirumatuʼu›» müshi nia namüin (Mateo 6:9, TNM). Sükajee tia, wayaawata aaʼu niainjachin neʼe Jeʼwaa woʼuraajaka amüin. Anuu nünüiki Jesuʼuya: «Taya neʼe chi süntajachikai akajee wayuu nünainmüin Maleiwa, aküjakai sümüin wayuu tü shiimainkat otta chi katakai atuma soʼu wayuu» (Juan 14:6, TNM). Sükajee pütchikat tüü, wayaawata aaʼu woʼuraajüinjanain nümüin Jeʼwaa sükajee nünülia Jesuu. ¿Jamüshii wachuntajanaka sükajee nünülia Jesuu? Shia süka nüjütüin nia Jeʼwaa süpüla nuʼtteʼerüin waya suulia kaainjalaa jee outaa. Kojutule wamüin tia, naapajeerü Jeʼwaa wanüiki woʼuraajapa (Juan 3:16, TNM; Roma 5:12). Akaʼaya Jesuu, aneekünüshi nutuma Jeʼwaa süpüla niainjachin «chi sacerdote müloʼushikai», chi akaaliijakai waya süpüla sülaʼajaanüin waainjala woulia. Nüneeküinya nia Jeʼwaa süpüla süsalain saainjala wayuu nutuma (Juan 5:22; Hebreokana 6:19, 20).

10. Püküja müleka joyotuinjanale jee wasapainkainjanale woʼuraajapa nümüin Maleiwa.

¹⁰ ¿Joyotuinjanache jee wasapainkainjanache waya woʼuraajapa? Nnojotsü nüküjain Jeʼwaa wasapainkainjanale, joyotuinjanale jee shaʼwatüinjanale waya woʼuraajapa nümüin. Jaʼitaina jamüin waya sünain oʼuraajaa, kojutuinjachi Jeʼwaa wamüin (1 Crónicas 17:16; Nehemías 8:6; Daniel 6:10; Marcos 11:25). Tü anakat nümüin Jeʼwaa shia waküjale nümüin tü suluʼukat waaʼin süka tü anakalü akuwaʼipa, nnojotsü shiain jülüjain maʼin naaʼin wasapainkale, joyotule jee shaʼwatüle waya sünain oʼuraajaa. Eeshii süpüla woʼuraajüin nümüin suluʼu waaʼin jee jaʼyale wanüiki; eeshii süpüla woʼuraajüin nümüin eepünaale waya jee woʼuraajeepa nümüin, soʼukai jee saʼwai. Woʼuraajüle nümüin Jeʼwaa, watüjaa aaʼu naapeerüin wanüiki jaʼitaina woʼuraajüin suluʼu waaʼin (Nehemías 2:1-6).

11. ¿Kasa eeka süpüla wachuntuin nümüin Jeʼwaa?

¹¹ ¿Kasa eeka süpüla wachuntuin nümüin Jeʼwaa? Eeshii süpüla wachuntuin nümüin Jeʼwaa tü kasa nüchekakat wapüleerua. Anuu tü sümakat tü Wiwüliakat: «Müleka wachuntüle nümüin tü nüchekakat wapüleerua, jaʼitairü wachuntüin kasa eekai eein, watüjaa aaʼulu sünain naapüin wanüiki» (1 Juan 5:14, 15). ¿Eesüche süpüla waküjain nümüin tü alatakat wamüin? Aa, anasü waküjale nümüin Jeʼwaa süpüshuaʼa tü jülüjakat waaʼin otta tü jiwaʼatakalü atuma waaʼin (Salmo 62:8). Waküjainjatü nümüin tü suluʼukat waaʼin maʼaka waküjain shia nümüin wanee waʼaleewain. Wane kasa eeka süpüla wachuntuin nümüin Jeʼwaa shia nükaaliijain waya nükajee chi naaʼinkai süpüla waaʼinrajatüin tü kasa anasükat noʼuluʼu (Lucas 11:13). Wachunta kekiiwaa nümüin Jeʼwaa süpüla waneeküin waneepia kasa anasü. Jee süpüla nükatsüinrüinjatüin waaʼin soʼunnaa tü müliaa weʼrakat (Santiago 1:5). Achuntajana waya nümüin Jeʼwaa süpüla motuinjatüin naaʼin waainjala (Éfeso 1:3, 7). Anasü wachuntule napüleerua waneinnua wayuu maʼaka naaʼin wachonnii, waʼwayuuse jee na wawalayuukana sünain anoujaa (Aluwataaushikana [Hechos] 12:5; Colosas 4:12).

12. ¿Kasa alanaʼaleeinjatka ojutu wamüin woʼuraajapa?

¹² ¿Kasa alanaʼaleeinjatka ojutu wamüin woʼuraajapa? Alanaʼaleeinjatü nujutu Jeʼwaa wamüin otta tü kasa keeʼireekat naaʼin. Waapüinjatü analuʼut nümüin Jeʼwaa saaʼu süpüshuaʼa tü kasa naapakat wamüin (1 Crónicas 29:10-13). Wanaa sümaa niʼiküin Jesuu na nikirajüinkana sünain oʼuraajaa, nüküjain namüin tü alanaʼaleeinjatkalü ojutu namüin (paashajeʼera Mateo 6:9-13, TNM). Naashin Jesuu, achuntajana waya palajana süpüla shiʼraajüinjatüin wayuu tü nünüliakat Jeʼwaa otta kojutuinjachin nia atumawaa. Otta nüküjain Jesuu wachuntajanain süpüla nuluwataainjachin Maleiwa chaa iipünaajee otta süpüla saainjünüinjatüin tü keeʼireekat naaʼin sainküin Mmakat süpüshuaʼa. Naashin Jesuu, achuntajana waya palajana saaʼu tia kasakalüirua, süchikijee tia, eeshii süpüla wachuntuin saaʼu tü kasa choʼujaakat wamüin. Shiale alanaʼaleein ojutu wamüin Jeʼwaa otta tü keeʼireekat naaʼin, shieerü wachuntaka apüleerua tia palajana woʼuraajapa.

13. ¿Jetsüinjatü wamaʼa sünain oʼuraajaa?

¹³ ¿Jetsüinjatü wamaʼa sünain oʼuraajaa? Nnojotsü aküjünüin tia suluʼu tü Wiwüliakat. Eesü motsoʼole wamaʼa jee kamaʼale waya sünain oʼuraajaa. Oʼunusü tia süchiirua tü waashajaakalü achiki nümaa Jeʼwaa. Jamüshiijaʼa woʼuraajapa süpülapünaa ekaa, nnojoishii kamaʼain waya; aluʼujasaʼa waapüle analuʼut nümüin Jeʼwaa jee waküjale nümüin süchiki wanee kasa alataka wamüin (1 Samuel 1:12, 15). Nnojoishii waya kamaʼainjanain sünain oʼuraajaa suʼupala wayuu shiiʼiree kojuteein waya natuma maʼaka naainjapuʼuin waneinnua wayuu nükalioʼu Jesuu (Lucas 20:46, 47). Shia anaka nümüin Jeʼwaa waküjale nümüin tü suluʼukat waaʼin.

14. (1) ¿Jeʼratuainjana waya oʼuraajüin nümüin Maleiwa? (2) ¿Kasa watüjaka nüchiki Jeʼwaa sutuma tia?

¹⁴ ¿Jeʼratuainjana waya oʼuraajüin? Nücheküin Jeʼwaa wapüleerua waashajaain nümaa waneepia. Saashin tü Wiwüliakat, achuntajana waya nümüin Jeʼwaa soʼukai jee saʼwai, nnojoluinjana waya ooʼulaain suulia achuntaa (1 Timoteo 5:5; Roma 12:12; 1 Tesalónica 5:17). Naapajeein Jeʼwaa wanüiki waneepia woʼuraajapa. Anashii waapüle analuʼut nümüin saaʼu alin waya nüpüla otta saaʼu süpüshuaʼa tü kasa naapakat wamüin. Eeshii süpüla wachuntuin nümüin wayaawatüinjatüin saaʼu kasain tü nüchekakat wapüleerua, süpüla katsüinjatüin waaʼin jee süpüla nümülialüin waaʼin. Kojutule wamüin oʼuraajaa, oʼuraajeena waya waneepia.

15. ¿Jamüshii «amén» wamüinjanaka sajaʼlajaayamüin wanüiki sünain oʼuraajaa?

¹⁵ ¿Jamüshii «amén» wamüinjanaka sajaʼlajaayamüin wanüiki sünain oʼuraajaa? Tü pütchikat amén «shiimain tia» jee «kasataalejeseʼe shikeraajüin» maluʼulu. Sükajee wachuntuin pütchikat tüü, atüjaana aaʼu shiimain maʼin tü wamakat sünain oʼuraajaa (Salmo 41:13). Saashin tü Wiwüliakat, sajaʼlajaayamüin nünüiki wanee wawala oʼuraajakai wapüleerua, «amén» müinjana waya sümaa emetuluin wanüiki jee shiale wachuntuin shia suluʼu waaʼin. Sükajee tia, atüjaaneerü aaʼu anashiin wamüin tü nümakat chi wawala oʼuraajakai (1 Crónicas 16:36; 1 Corinto 14:16).

TÜ NUSOUTAKALÜ AKAJEE MALEIWA WAMÜIN

16. ¿Asoutushiche Maleiwa shiʼipajee tü wachuntakat nümüin? ¿Jamüsü sünüiki tü Wiwüliakat süchiki tia?

¹⁶ ¿Asoutushiche Maleiwa shiʼipajee tü wachuntakat nümüin? Jamüsaʼa shia. Saashin tü Wiwüliakat, nia Jeʼwaa «chi aapajakai sünüiki wayuu suʼuraajapa» (Salmo 65:2). Naapüin Jeʼwaa nanüiki na oʼuraajakana nümüin suluʼujee naaʼin otta wainma sukuwaʼipa nutuma süpüla nusoutuin shiʼipajee tü nachuntakat nümüin.

17. ¿Jamüsü süpüla nusoutuin Jeʼwaa wamüin nakajee na aapieekana jee nakajee na wawalayuukana?

¹⁷ Eeshi nusoutule Jeʼwaa shiʼipajee tü wachuntakat nümüin nakajee na aapieekana jee nakajee na wawalayuukana (Hebreokana 1:13, 14). Wainmainna wayuu achuntaka kaalinwaa nümüin Maleiwa süpüla nayaawatüin saaʼu sünüiki tü Wiwüliakat, nantakalaka mapa na Aküjaliikana pütchi namaʼanamüin. Saashin tü Wiwüliakat oʼuninnüshii waya natuma na aapieekana süpüla waküjain tü pütchi anasükat sümüin wayuu (paashajeʼera Alateetkat Mapeena 14:6). Eeshii woʼuraajüle nümüin Jeʼwaa süpüla waküjain nümüin wanee kasa alataka wamüin jee shiale süka weʼrüin jaʼijawaa, wakaaliijünaka mapa nutuma wanee wawala (Proverbios 12:25; Santiago 2:16).

18. ¿Jamüsü sukuwaʼipa süpüla nusoutuin Jeʼwaa wamüin nükajee chi naaʼinkai jee sükajee tü Wiwüliakat?

¹⁸ Asoutawaishi Jeʼwaa wamüin nükajee chi naaʼinkai. Jamüshiijaʼa wachuntule kaalinwaa nümüin Jeʼwaa süpüla wachecherüin waaʼin soʼunnaa wanee kasa alataka wamüin, nükaaliijain waya nükajee chi naaʼinkai süpüla wayaawatüin saaʼu tü nüchekakat wapüleerua jee süpüla katsüinjatüin waaʼin (2 Corinto 4:7). Wane kasa nusoutaka akajee Jeʼwaa shiʼipajee tü wachuntakat nümüin shia sükajee tü Wiwüliakat. Nükaaliijain waya sükajee tü Wiwüliakat süpüla waaʼinrajatüin tü anasükat. Waashajeʼerapa shia, eesü waashajeʼerüle süchiki wanee kasa anaka süpüla waaʼinrüin. Eeshi nusoutule Jeʼwaa wamüin sükajee tü nümakat wanee wawala sünain tü outkajawaakat jee tü nümakat wanee laülaashi wamüin sükajee tü Wiwüliakat (Galacia 6:1).

19. ¿Kasa sotuinjatka paaʼin nnojorüle nusoutamaatüin Jeʼwaa shiʼipajee tü puchuntakat nümüin?

¹⁹ Jülüjale paaʼin nnojolin nusoutuin Jeʼwaa shiʼipajee tü puchuntakat nümüin, soteesü paaʼin niain atüjaain saaʼu Jeʼwaa joujainjachin nusoutuin pümüin otta jamüinjatüin sukuwaʼipa nutuma. Nütüja aaʼu Jeʼwaa tü kasa choʼujaakat wamüin. Ayatüinjanapejeʼe waya sünain achuntaa nümüin Jeʼwaa süpüla nütüjaain saaʼu choʼujaain maʼin wamüin tü wachuntakat nümüin otta weʼitaain maʼin waaʼin nünain (Lucas 11:5-10). Eesü naatawaire sukuwaʼipa nusoutia Jeʼwaa wamüin. Jamüshiijaʼa wachuntule kaalinwaa nümüin saaʼu wanee kasa mojusü eekai sülatüin wamüin, eesü nnojorüle nunouteʼeramaatüin tü alatakat wamüin, nükatsüinrapejeʼe waaʼin süpüla wachecherüin waaʼin soʼunnaa tia (paashajeʼera 2 Corinto 4:7).

20. ¿Jamüshii woʼuraajüinjanaka maʼin nümüin Jeʼwaa?

²⁰ Anashaatasü maʼin oʼuraajaa nümüin Jeʼwaa. Watüjaa aaʼu naapajüin wanüiki (Salmo 145:18). Woʼuraajüle waneepia nümüin Jeʼwaa süka süpüshuaʼa waaʼin aleeweena maʼin waya nümaa.