Ekirajaaya 15
Pükaaliinja na wayuukana süpüla naainjüin tü keeʼireekat naaʼin Maleiwa
¿Jamüsü püküjüinjatka süchiki tü pikirajaakat anain? (1)
¿Jaralii na püküjüinjanakana amüin tü pütchi anasükat? (2)
¿Kaseerü naainjaka na wayuukana müleka anale maʼin pukuwaʼipa? (2)
¿Kasa paainjüinjatka süpüla püküjüin pütchi namaa na aküjüliikana pütchi nüchiki Jeowa eere puutkajaain? (3)
1. Wainma kasa anasü pütüjaaipaka aaʼu suluʼujee tü Wiwüliakat. Sutuma tüü, piiʼiranajaainjatü pukuwaʼipa maʼaka naaʼin na oʼunushiikana nüchiirua Cristo (Éfeso 4:22-24). Otta müsia eesü süpüla katüin poʼu waneepia sutuma (Juan 17:2, 3). Süpüla katüinjatüin noʼu na wayuukana aküjünüinjatü namüin tü pütchi anasükat. Napüshuaʼa na shiimainshiikana oʼunuin nüchiirua Cristo aküjüinjana pütchi naashin Maleiwa (Roma 10:10, NM; 1 Corinto 9:16; 1 Timoteo 4:16).
2. Eesü süpüla püküjüin süchiki tü pikirajaakat anain namüin na püpüshikana, na paʼaleewainkana, na ekirajaakana pümaa suluʼu tü koleejiakat otta na aʼyataajiraakana pümaa. Wanaa sümaa paainjüin shia kamanee pia otta nnojo pütkaain (2 Timoteo 2:24, 25). Soto paaʼin shiain kanain naaʼin na wayuukana tü wakuwaʼipakat suulialee tü wanüikikat. Maʼaka anale maʼin tü pukuwaʼipakat naapajeerü tü püküjakat achiki (Mateo 5:16; 1 Pedro 3:1, 2, 16).
3. Mapa eesü süpüla keraain putuma tü achuntunakat suluʼu tü Wiwüliakat süpüla püküjüin pütchi namaa na aküjüliikana pütchi nüchiki Jeowa eere puutkajaain. Paainjüle tüü, anashaatasü maʼin (Mateo 24:14). ¡Anakatche maʼin pükaaliinjüle wanee wayuu süpüla shiʼyataain nümüin Jeowa ooʼulaka süpüla katüin soʼu waneepia! (1 Tesalónica 2:19, 20).