¿Pücheküin pütüjaain saaʼu tü shiimainkat?

¿KASA shiimain tia? Shia süpüshi tü kasa asakinnakat maʼin anain. Eesü püsakirüirüle paaʼin:

• ¿Naaʼinmajüin waya Maleiwa?

• ¿Nnojoleetche atkawaa otta müliaa mapeena?

• ¿Kasa alataka wamüin ouktapa waya?

• ¿Kateerü noʼu nachikuaʼa na ouktushiikana?

• ¿Kasa waainjüinjatka süpüla naapüin Maleiwa wanüiki?

• ¿Kasa waainjüinjatka süpüla talatüin waaʼin?

¿Jaleerü püchajaain süsouktia asakiraakat tüirua? Wainma karaloukta aashajaaka süchiki tia. Akatsaʼa nnojotsü wanaawain sünüiki. Eesü waneeirua asouktaka shiʼipajee tia asakinnakat, akatsaʼa tü sümakat nnojotsü kasain anain apüla, eeʼiratünüsü otta anaateʼennüsü mapa.

Akatsaʼa eesü wanee karaloukta aküjaka tü shiimainkat süchiki tü asakinnakat anain. Müshi Jesucristo nümüin Maleiwa: ‹Tü pünüikikat shia tü shiimainkat› (Juan 17:17). Tü pünüiki nümakat Jesús shia tü Wiwülia münakat. Tü aashajaanajatkat achiki jooluʼu shia süpüshi tü sümakat tü Wiwüliakat shiʼipajee tü asakiraa aküjünüipakat.

¿Naaʼinmajüin waya Maleiwa?

¿JAMÜSÜ SÜSAKINNAKA ANAIN TÜÜ? Aainjünüsü maʼin kasa mojusü otta müliasü wayuu maaʼulu atumawaa. Nia kasitka Maleiwa tü müliaa alatakat wamüin naashin na suluʼukana tü iküleesiakalüirua.

TÜ SHIKIRAJAKAT TÜ WIWÜLIAKAT. Nnojotsü müliain wayuu nutuma Maleiwa. Müsü Roma 9:14: ‹ «Nnojotsü lotüin nukuaippa Maleiwa», ¿müinjana waya? Nnojo›. Sükajee aipüralin Maleiwa nukumajüin waya süpüla wanee kasa anasü maʼin, makalaka nikirajüin waya Jesús sünain achunta nümüin Maleiwa: ‹Taata Maleiwa chi chakai sirumatuʼu [...]. Pünta maalü sünain aluwatawaa süpüla saainjünüin tü keeʼireekat paaʼin saaʼu tü Mmakat maʼaka chaaʼaya sirumatuʼu› (Mateo 6:9, 10). Shiimain naaʼinmajüin waya Maleiwa makalaka naainjüin wanee kasa süpüla shikeraajüin tü nümakat (Juan 3:16).

Paashajeʼera Génesis 1:26-28; Santiago 1:13 otta 1 Pedro 5:6, 7.

¿Nnojoleetche atkawaa otta müliaa mapeena?

¿JAMÜSÜ SÜSAKINNAKA ANAIN TÜÜ? Wainmayülia wayuu ouktaka sutuma tü atkawaakat. Otta müsia wainma tü kasa müliakat atuma waya.

TÜ SHIKIRAJAKAT TÜ WIWÜLIAKAT. Naashin Maleiwa nnojoleerü atkawaa saaʼu tü Mmakat. Nuluwataapa Maleiwa nnojoleena «ekirajaain sünain tü atkawaakat» na wayuukana otta «napünajieerü tü chajaruuta natkaayakat» (Isaías 2:4, NM). Otta taasia, nnojoleerü nutuma Maleiwa tü müliaakat. Müsü sünüiki tü Wiwüliakat nachiki na wayuukana: «Nümülialeena naya [Maleiwa]. Müiria nnojolüin ouktaa, mojuu aaʼin, aʼyalajaa, je saalii ayuulii, süka sülatüitpain süpüshuaʼale makat aka tia [tü müliaakat]» (Alateetkat Mapeena 21:3, 4).

Paashajeʼera Salmo 37:10, 11; 46:9 otta Miqueas 4:1-4.

¿Kasa alataka wamüin ouktapa waya?

¿JAMÜSÜ SÜSAKINNAKA ANAIN TÜÜ? Wainma tü iküleesia ekirajakat eein wanee kasa waleʼeruʼu ojuʼitaka woulia ouktapa waya. Naashin noʼutku na wayuukana aainjüshii kasa mojusü na ouktushiikana sümüin wayuu otta naashin waneeinnua müliashii na mojulaashiikana saʼaka siki nutuma Maleiwa.

TÜ SHIKIRAJAKAT TÜ WIWÜLIAKAT. Ouktapa waya nnojoluinnapa eein waya. Müsü Eclesiastés 9:5, NM: «Na ouktushiikana nnojotsü kasain natüjaain aaʼu». Nnojotsü natüjaain aaʼu otta naainjüin wanee kasa. Makalaka nnojoluin naainjüin kasa mojusü otta nakaaliinjüin wayuu (Salmo 146:3, 4).

Paashajeʼera Génesis 3:19 otta Eclesiastés 9:6, 10.

¿Kateerü noʼu nachikuaʼa na ouktushiikana?

¿JAMÜSÜ SÜSAKINNAKA ANAIN TÜÜ? Kateesü woʼu otta talateesü waaʼin namaa na wayuu aikana wapüla. Makalaka nnojoluin mojuin weʼreein nachikuaʼa na wapüshi ouktuinnapakana.

TÜ SHIKIRAJAKAT TÜ WIWÜLIAKAT. Kojuya na wayuu kateenakana oʼu nachikuaʼa. Müshi Jesús: «Saapeerü tanüiki süpüshua tü wayuu ouktüsükalüirua sümaa sujuitteerüin mmapüjee» (Juan 5:28, 29). Na wayuu asoʼiraainjanakana aaʼin Mmapaʼa kepieena suluʼu otta neʼreerü paraiisüin shia maʼaka nüküjüin shia Maleiwa paala (Lucas 23:43). Suluʼu tia mma anasükat na wayuu oonookana nümüin Maleiwa kateena oʼu waneepia otta nnojoleena ayuulin. Müsü tü Wiwüliakat: «Tü mmakat namüinjatü na lotushiikana akuwaʼipa otta kepiainjana naya waneepia saaʼu» (Salmo 37:29, NM).

Paashajeʼera Job 14:14, 15; Lucas 7:11-17 otta Aluwataaushikana 24:15.

¿Kasa waainjüinjatka süpüla naapüin Maleiwa wanüiki?

¿JAMÜSÜ SÜSAKINNAKA ANAIN TÜÜ? Napüshuaʼa na suluʼukana tü iküleesiakalüirua aashajaashii nümaa Maleiwa. Akanasaʼa wainma na nnojoliikana aapünüin anüiki nutuma Maleiwa naashin.

TÜ SHIKIRAJAKAT TÜ WIWÜLIAKAT. Naashin Jesús nnojotsü weiteʼerakuʼu wamüinjatüin tü wanüikikat waashajaapa nümaa Maleiwa. Müshi nia: «Paashajaapa nümaa Maleiwa nnojotsü piiteʼerakuʼu pümüinjatüin tü pünüikikat» (Mateo 6:7, NM). Süpüla naapüin Maleiwa wanüiki achuntajana waya pansaa sümaa tü nüchekakat. Süpüla tia, watüjaainjatü aaʼu tü nüchekakat otta pansaainjatü wanüiki sümaa. Saashin 1 Juan 5:14, 15 «wachuntüle nümüin tü nüchekakat wapüleerua, jaʼitairü wachuntüin kasa eekai eein, watüjaa aaʼulu sünain naapüin wanüiki».

Paashajeʼera Salmo 65:2; Juan 14:6, 14 otta 1 Juan 3:22.

¿Kasa waainjüinjatka süpüla talatüin waaʼin?

¿JAMÜSÜ SÜSAKINNAKA ANAIN TÜÜ? Süka talateein naaʼin na wayuukana oʼunushii süchiirua washirüü, eʼraajünaa maʼin otta anainjatüin nayolojo. Akanasaʼa naya nnojoishii talatüin.

TÜ SHIKIRAJAKAT TÜ WIWÜLIAKAT. Nüküjüin Jesús tü kasa talatakat atuma waaʼin, müshi nia: «Anataʼaleeshiijaʼa maʼi jia eʼrakana sünain cheʼojaain chi Maleiwakai jümüin» (Mateo 5:3). Talateena maʼin waya keeʼireere waaʼin watüjaain saaʼu tü shiimainkat nüchiki Maleiwa otta tü naainjüinjatkat wapüleerua. Tia shiimainkat suluʼusü tü Wiwüliakat otta watüjaale saaʼu sükaaliinjeena waya süpüla wayaawatüin tü kasa anakat maʼin otta tü nnojotkat anain maʼin. Waainjüle tü sümakat tü Wiwüliakat wanaa sümaa waainjüinjatüin wanee kasa, talatüshii maʼin waya (Lucas 11:28).

Paashajeʼera Proverbios 3:5, 6, 13-18 otta 1 Timoteo 6:9, 10.

Wekirajaaipa anain tü sümakat tü Wiwüliakat süchiki aipiruasü asakiraa. ¿Pücheküin pütüjüin sooʼomüin? Naʼakale pia na ‹eʼrakana cheʼojaain Maleiwa namüin›, püchekeerü pütüjüin sooʼomüin. Eesü müle pünüiki: «Shiimainre naaʼinmajüin waya Maleiwa, ¿jamüsü nuuʼulaaka eein kasa mojusü otta müliaa? ¿Kasa taainjüinjatka süpüla anain takuwaʼipa sümaa tapüshi?». Süküjüin tü Wiwüliakat süsouktia tia otta waneeirua asakiraa.

Akanasaʼa wainma na nnojoliikana ekirajaweein sünain. Kapüleesü shia naashin otta wainma sünüiki. ¿Pücheküin pükaaliinjünüin süpüla pütüjaain saaʼu tü sümakat tü Wiwüliakat shiʼipajee tü asakinnakat anain? Süpüla tia, eesü wanee kasa namaʼanaka otta naainjaka na aküjüliikana pütchi nüchiki Jeowa.

Tü palajatkat shia tü karalouktakat ¿Kasa shikirajaka maʼin tü Wiwüliakat?, aainjuushi süpüla shikirajaanüin anain tü sümakat tü Wiwüliakat shiʼipajee tü asakinnakat maʼin anain —maʼaka naaʼin na nnojoliikana jimatüin—. Tü wanee shia nekirajünüin masaloui na wayuukana sünain tü Wiwüliakat nepialuʼu. Anteechi pipialuʼumüin otta eere anain saaʼin pümüin wanee aküjüi pütchi, atüjaka ekirajaa süpüla nikirajüin pia sünain tü Wiwüliakat watua soʼu semaanaka. Wainma maʼin na wayuu aainjakana tia otta eeshii na makana sümaa talatüin naaʼin: «Wousütüipa anain tü shiimainkat nüchiki Maleiwa».

Eesü süpüla piʼrüin anain maʼin tü shiimain shikirajakat tü Wiwüliakat. Taashishii waya sutuma suulia tü kasa pülasü sümakat wayuu, nnojoluin watüjaain saaʼu tü nanoujakat anain otta mmoluin waya seema.Otta müsia talatüshii waya otta anasü waaʼin sutuma, süka waʼatapajüin wanee kasa anasü. Müshi Jesús: «Jiyaawateerü aaʼu tü shiimainkat süpüla jujuittüinjanain sütüma suulia achepchiaa» (Juan 8:32).