1 ENOC
Talatüshi Maleiwa nümaa
NIYAAWATA AAʼU Enoc jamüin naaʼin wanee wayuu nümüiwaʼale nia. Nnojotsü nüshatüin sukuwaʼipa wayuu eejatka nükalioʼu. Saashin tü Bibliakat «ayatüshia Enoc nümaa chi shiimainshikai suluʼu Maleiwain». Nia neʼe münaka achiki sükajee pütchikat tia. ¿Jamüsüche sukuwaʼipa süpüla nuuntajatüin wanee wayuu tia? ¿Kasa watüjaka sünainjee yalayalain naaʼin Enoc?
Talatüshi Maleiwa nümaa Enoc süka niyoutuin tü kasa mojusükat otta naaʼinrüin tü kasa anasükat. Niyouta achikit wanaawain naaʼin namaa na wayuu mojulaashiikana. Eejachi Adán nükalioʼu Enoc,a shiajaʼa laülaaichin nia wanaa sümaa tia (pünaʼla tü pütchi kanüliakat «Nükalioʼu Enoc sünainmüinreʼeya nükalioʼu Samuel»). Eʼrüliishii wayumüin napüshuaʼa na wayuukana, nashatüin tia nünainjee Adán sümaa Eva. Jamüshijaʼa Caín chi nüchonkai Adán sümaa Eva, nuʼuta aaʼinchi Abel sümaa nuwalain nia. Abel nia chi palajachikai wayuu kanoulakai maʼin. Eeshii waneinnua nüikeyuu Caín mojulaakana maʼin nuulialeʼeya niakai (Gén. 4:23, 24). Yalayala aaʼinchi Enoc süka niyoutuin süchiki müin nukuwaʼipa maʼaka nakuwaʼipa na wayuu mojulaashii eejanakana nükalioʼu. Eekajasaʼa Enoc anajiraashi sümaa wayuu jee talatüshi Maleiwa nümaa.
Maʼaka jeʼra juya süpülapünaa joʼuuin Enoc, oʼttusü wayuu sünain achuntaa nünülia Jehová (Gén. 4:26). Mojupejeʼe nanüiki na wayuukana nüchiki Maleiwa nachuntapa nünülia, nnojotsü neeʼiyatüin sükajee tü nakuwaʼipakat shiimain naʼwaajüin Maleiwa. Naatajatpejeʼe nukuwaʼipa Enoc suulia nakuwaʼipa naya wayuukana. Aishi Jehová nüpüla jee kojutushi nia nümüin, müsüjeseʼe nnojoluin wanaawain naaʼin namaa.
Aaʼinmajünüshi Enoc nutuma Jehová soʼu nuʼutuneein aaʼin natuma na wayuu aʼürülaakana nooʼomüin
Yalayalainjatü maʼin naaʼin Enoc süpüla naaʼinrüin wanee kasa nuluwataainjachika anain nia Jehová. Nüneeküin nia süpüla nünüikeʼejanainjachin jee nüküjainjatüin wanee pütchi namüin na wayuu naatakana maʼin akuwaʼipa nuulia. Anuu tü nüküjainjatkat namüin: «Antüshi Jehová namaa na aapiee wattakana naalii. Antüshi nia süpüla süsalainjatüin saainjala wayuu nutuma otta süpüla sütüjaanüin aaʼu mojuin maʼin tü naaʼinrakat na mojutukana amüin nia jee saaʼu airuʼuluin nanüiki nüchiki».
Tü pütchi nüküjakalü Enoc müsü shikeraajüitpakai saaʼin, müsü süsalaitpakai saaʼin saainjala wayuu nutuma Maleiwa. Shiimain maʼin sülatajatüin tü nümakat Enoc. Wayaawata aaʼu sükajee tia pütchikat jashichin maʼin Jehová namüin naya wayuukana. Nüküjain Enoc tü kasa alatajatkat namüin otta nüküjain mojutuin chi Maleiwakai namüin. Jashichikajasaʼa maʼin naya wayuukana sutuma tü pütchi nüküjakat Enoc. Yalayalapejeʼe naaʼin Enoc sünain aküjaa tü nünüikikat Jehová süpüla saapüin shia wayuu.
¿Jamüsü sünüiki wayuu sutuma tü nümakat Enoc? Nnojotsü aküjünüin tia suluʼu tü Bibliakat, wayaawatapejeʼe saaʼu nuʼutuneein aaʼin Enoc. Wayaawata aaʼu tia süka süküjain tü Bibliakat nümaanüin Enoc nutuma Maleiwa. Eeshijaʼa nüchajaanüle achiki Enoc sutuma tia wayuu mojulaasükalüirua, nnojoipejeʼe nuuʼulaain Jehová müliainjachin Enoc atumawaa jee nuʼutunajachin aaʼin, jama alin nia nüpüla jee naʼaleewain nia. Müsüjeseʼe sajaʼttalaʼa sümüin nutuma Jehová sütchin naaʼin Enoc. Nnojoikalaka jamajüin Enoc sutuma wayuu mojulaasü, soteechipejeʼe nia naaʼin Maleiwa süpüla nüsoʼireʼerüin naaʼin nüchikuaʼa.
Eepejeʼe wanee kasa anasü maʼin nüküjaka Jehová nümüin Enoc. Anuu sünüiki tü Bibliakat süchiki: «Süpülapünaa nümaanüin [Enoc] aküjünüsü nümüin talatüin naaʼin Maleiwa nümaa». Eesüjaʼa niiʼiyatüle Jehová nümüin Enoc tü kasa anasü niʼreetkat mapeena, niiʼiyatüin nümüin anainjatüin nukuwaʼipa suluʼu wanee paʼaraiisü yaa mmapaʼa. Eesü wanee kasa nütüjaaka maʼin aaʼu Enoc süpülapünaa nünaajaain, nütüjaa aaʼu alin nia nüpüla Jehová jee anain nukuwaʼipa nutuma saaʼujee katsüin nunoula jee yalayalain maʼin naaʼin.
Paashajeʼera pütchikat suluʼujee tü Bibliakat
Yooto waya süchiki tüü:
¿Kasa naaʼinraka Enoc sutuma yalayalain naaʼin?
Pikirajaa sooʼomüin
1. ¿Jamaluʼulu sünüiki tü Bibliakat wanaa sümaa sümüin suʼttuin wayuu sünain achuntaa nünülia Jehová? (Gén. 4:26; w01 9/15 29 püt. 3).
2. ¿Kasa aʼyatawaa naapaka Maleiwa nümüin Enoc? ¿Kasa naaʼinraka süpüla naaʼinrüin tia aʼyatawaakat? (w01 9/15 31 püt. 5).
3. Eesüjaʼa nütüjaale saaʼu Enoc yalayalainjatüin naaʼin süpülapünaa nünüikeʼejanainjachin nia Maleiwa, ¿jamüsü watüjaakaʼa saaʼu tia? (w06 10/1 19 püt. 13, 14). 1
Ayaakuaa 1
4. Eeshii wayuu aküjakana nümaanüin Enoc sirumatuʼumüin, ¿jameerü süpansaajia putuma nnojoluin shiimain tia? (Juan 3:13; Heb. 11:5, 13).
Paaʼinrajatka süpüla yalayalain paaʼin
¿Kasa alatawaika wamüin sünain aküjaa pütchi choʼujaweetka yalayalain anain waaʼin? ¿Kasa watüjaka sünainjee nukuwaʼipa Enoc? 2
Ayaakuaa 2
¿Jamüsü naaʼin Jehová sutuma yalayalain waaʼin sünain aʼwaajaa nia? (Prov. 27:11; Heb. 11:5).
¿Kasa amaa paaʼinrajatka süpüla yalayalain paaʼin maʼaka yalayalain naaʼin Enoc?
Pütüjaka nüchiki Jehová
¿Kasa tatüjaka nüchiki Jehová sünainjee pütchikat tüü?
¿Kasapülajatche nüshajiraka Jehová suluʼu tü Bibliakat tü tekirajaaitpakalü anain?
¿Kasa tasakireechika anain Enoc nüsoʼiraapa aaʼin nutuma Jehová?
Sooʼomüin tü pütüjaainjatkalü aaʼu
¿Kasa paaʼinrajatka süpüla püshatüin nukuwaʼipa Enoc kepiale pia eere wainmain wayuu mojulaasü?
Na anakana süpüla washatüin anoula: Enoc nuulia Lamec (2:53)
Paashajeʼera süchiki tü kasa kanoulakalü atuma Enoc.
a Aipiruashii nutuushinuu Enoc nünainjeʼereeya Adán sümaa Eva.