16 BARAC OTTA DÉBORA
«Oʼuneerü taya pümaa»
MOJUSÜ maʼin nakuwaʼipa na israelitakana. Eʼrüliijaashii naya wayumüin nümüin Jehová. Naaʼinraka Jehová tü nümakat paala namüin, nuuʼulaain nakanajuuin natuma na naʼünüükana maʼaka naaʼin na cananeokana. Nia Jabín aluwataakai saaʼu Canaán soʼu kaʼikat tia otta chi süʼlaülakai surulaat nia Sísara. Watta saalii surulaat namaa otta keʼejenashii naya. Eejatü 900 neʼejena pirapiratsü kachueera atkaaya.
20 juya mmoluin maʼin na israelitakana seema nusurulaatse Sísara. Nashutapa saaʼu wanee pueulo, namaashii jee nataüjaain na majayünnüükana, müshiijeseʼe mmoluin maʼin na israelitakana neema. Nnojotsü kasain eein suluʼu tü wopukot otta malujunasat tü miichikalüirua. Wainma na israelita nnojoliikana kaʼapülain otta nnojotsü kasain natkaayainjatüin aka.
Soʼu kaʼikat tia, eejatü wanee wayuu nünüikimaajatü Jehová, kanüliakat Débora, yalayala aaʼinrü maʼin shia. Antawaisü wayuu sünainmüin süpüla sunouteʼerüin wanee kasa eekai kapüleein maʼin. Nüküjain Jehová nümüin Barac sükajee Débora tü naaʼinrajatkat. Barac nia wanee wayuu nüneekakai Jehová süpüla süsalainjatüin saainjala wayuu nutuma otta süpüla nuʼtteʼerüin na israelitakana. Nütüjaapa saaʼu Barac tü naaʼinrajatkat Jehová, eesüjaʼa ponule maʼin naaʼin shia. Nuutkajeʼerüinjana 10.000 surulaat süpüla nümaain naya saaʼumüin tü uuchikat Tabor. Akanajuuinjachi Sísara nutuma Jehová namaʼaleeya na nusurulaatsekana.
¿Mojusüche nümüin Barac süka wayuuin jierü tü aküjakat nümüin tü naaʼinrajatkat? Nnojotsü mojuin nümüin. Nüküjain nuʼuneechin sünain atkawaa suʼunule Débora nümaa. ¿Manoulasaiche nia makaʼa nünüiki? Nnojo. Nüshajüin Pablo mapa nünülia Barac naʼaka na tooloyuu otta na jieyuu kanoulakana maʼin (Heb. 11:1, 2, 32). Jaʼyasü naaʼu Barac kanoulain maʼin nia sükajee nuchuntuin sümüin Débora suʼunuinjatüin nümaa otta namaa na nusurulaatsekana. Nütüjaa aaʼu nuʼunirüin Jehová nakuwaʼipa na israelitakana sükajee Débora. Shiajaʼa neʼe nütüjaweeka aaʼu Barac tü keeʼireekat naaʼin Jehová. Yalayala aaʼinrü maʼin Débora, anasü sümüin tü nümakat Barac, anuukaʼa sünüiki: «Oʼuneerü taya pümaa». Süküjaleeinña nümüin nükanajeerüin tü atkawaakat, nnojoipejeʼe niainjachin wanee wayuu toolo oʼutaka naaʼin Sísara. Nüküjain Maleiwa nuʼutunajachin aaʼin Sísara sutuma wanee wayuu jierü.
Nuutkajeʼerüin Barac na nusurulaatsekana. Nuutkajeʼerüin 10.000 wayuu yalayalakana maʼin aaʼin, kaʼapülashii naya nutuma. Nuutkajeʼeraka naya saaʼu tü uuchikat Tabor, miyoʼu maʼin tia uuchikat, müsü koʼoyookai saaʼin, eesü maʼaka saaʼin 600 meetüro tü uuchikat namünashiimüin otta suluʼusü shia tü patajatshiikat Jezreel. Shiʼrüin Débora nümaa Barac namünajee soʼotooin neʼejena na nusurulaatsekana Sísara.
¿Kaseetche naaʼinraka Barac? Süka nütüjain maʼin süpüleerua sukuwaʼipa atkawaa, eeshijaʼa naʼatapajüle nüntüin Sísara namaa na nusurulaatsekana eere katuʼushiin maʼin tü uuchikat Tabor. Süka katuʼushiin maʼin shia mawachirasat tü neʼejenakat. Mapüleejeerü namüin na nusurulaatsekana Barac nashakatüin wünapümüin. Natüjaapejeʼe saaʼu nnojoleenain nayamülüin na naʼünüükana süka naaʼin neʼe namüiwaʼa, nieechi Jehová ayamülaka naya. Nüküjain Jehová nümüin Barac sükajee Débora nashakatüinjanain wünapümüinkana, naaʼinrüinña tia. Ashakatüshii naya wünapümüinkana sümaa nawataain maʼin eemüinre tü patajatshiikat eeinjanale natkaain namaa nusurulaatse Sísara, na keemakana maʼin eʼejenaa.
Atkaashi wanee nekiipüʼü na israelitakana otta wanee nünüikimaajatü Maleiwa nümaa wanee süʼlaüla surulaat wainmaka asurulaatse otta wainmaka eʼejena
Akanajuuinjachiaa Barac naaʼinruʼu namaa na nusurulaatsekana. Anapejeʼe nakuwaʼipa sünain atkawaa süka niʼrüin Jehová yalayalain maʼin naaʼin. Müshii jalapaʼakai naaʼin nutuma Jehová na surulaat cananeokana. Nüʼitirüin wanee juya miyoʼu maʼin, poopooka maʼin tü mmakat eeinjanale natkaain. Apootoyoo müsü joo tü kemionkalüirua. Nashakanuaayaa namaka na nusurulaatsekana Sísara süpüla natkaain namaa na israelitakana. Nnojoluitpa kasain anain apüla tü neʼejenakat. Outushii napüshuaʼa na nusurulaatsekana Sísara. ¿Kasakaʼa alatüin nümüin Sísara?
Awatawaaja nümüin Sísara saʼakapünaa tü pootshikat, chakuwaishi nia namünamüin, isakalaka nia. Awataashi shiiʼiree katüin noʼu. Nnojoishii jülüjain naaʼin na nusurulaatsekana, isajayaashi nia naaʼinruʼu, chakaijasaʼa awataain Barac nüchiirua. Niʼrapejeʼe Jehová süpüshuaʼa tü alatakat. Alüʼütshi Sísara süpüla süsalain naainjala nutuma Jehová.
Paashajeʼera pütchikat suluʼujee tü Bibliakat
Yooto waya süchiki tüü:
¿Kasa naaʼinraka Barac otta Débora sutuma yalayalain naaʼin?
Pikirajaa sooʼomüin
1. ¿Jamapuʼusü nakuwaʼipa na israelitakana müliaiwaʼaya naya nutuma Sísara? (w15 8/1 12 püt. 6).
2. ¿Jamüsü nnojotkaʼa eein Débora naʼaka na 12 nekiipüʼü na israelitakana süpülapünaa nünüikimaain Maleiwa Samuel? (w86 6/1 31 püt. 6-8).
3. ¿Jamüsü makaʼa Débora maʼaka saaʼin wanee nei namüin na israelitakana? (Juec. 4:4, 5; 5:7; w15 8/1 13 püt. 1). 1
Ayaakuaa 1
Ayaakuaa 1
4. ¿Jamaluʼut shiiʼirain Débora nümaa Barac wanaa sümaa namüin «nütkaain Sísara sümaa tü shüliwaikalüirua»? (Juec. 5:20; w05 1/15 25 püt. 5).
Paaʼinrajatka süpüla yalayalain paaʼin
Akaalinjünüshi Barac sutuma wane jierü anoujasü nünain Maleiwa, ¿kasa nüshatajatka wanee wawala sünainjee nukuwaʼipa Barac? 2
Ayaakuaa 2
¿Jamüsü yalayalakaʼa saaʼin Débora süka suʼunuin nümaa Barac? ¿Kasa yalayalainjatka anain waaʼin maʼaka saaʼin Débora?
¿Kasa amaa paaʼinrajatka süpüla yalayalain paaʼin maʼaka naaʼin Barac otta Débora?
Pütüjaka nüchiki Jehová
¿Kasa tatüjaka nüchiki Jehová sünainjee pütchikat tüü?
¿Kasapülajatche nüshajiraka Jehová suluʼu tü Bibliakat tü tekirajaaitpakalü anain?
¿Kasa tasakireechika anain Barac sümaa Débora nasoʼiraapa aaʼin nutuma Jehová?
Sooʼomüin tü pütüjaainjatkalü aaʼu
Paashajeʼera pütchikat tüü süpüla pütüjaain saaʼu kojutuin nümüin Jehová tü kasa waaʼinrakat.
¿Kasa watüjaka sünainjee noonooin waneepia Barac otta Débora sümaa nünüiki Jehová? ¿Kasa watüjaka sünainjee neʼitaain naaʼin nünain Jehová otta nnojoluin yaletüin naaʼin?
«Sünainjee kanoulain maʼin Barac nükanajüin wainma surulaat atüjaka maʼin atkawaa» (w03 11/15 28-31)