17 JAEL
«Kojutusü maʼin atumawaa naʼakajee na jieyuukana»
APANTAJAASHI Sísara suluʼujee tü patajatshii chakat Jezreel. Nüpütapünaaka na nusurulaatsekana napüla na israelitakana. Akanajuupejeʼe naya mayaainjeʼe eejatüin namaa 900 eʼejetuui otta nooʼuikain na israelitakana jee palitchoin naʼapüla. Jülüjakajasaʼa naaʼin Sísara mojuin nukuwaʼipa wanaa sümaa tia. Nuʼunaka nipialuʼumüin Héber, chi quenitakai. Ounjulaainjachi nia chayaa.
Paaʼinwashii na israelitakana namaa na quenitakana, kakaliainna naya aleewajiraain. Aleewajiraashii naya nükalioʼu Moisés, chi kasaatkai sümaa wanee wayuu napüshi na quenitakana. Kepiashii joo na quenitakana Israel, nnojoipejeʼe paaʼinwain Héber namaa na israelitakana, nia paaʼinwaka amaa nia Jabín, chi aluwataakai saaʼu Canaán. Süka süʼlaülain Sísara nusurulaatse Jabín, awataashi nia ounjulaain nipialuʼumüin Héber. Nnojotpejeʼe nütüjaain saaʼu tü jülüjakat saaʼin Jael, tü nuʼwayuusekat Héber.
Nüntapa Sísara nipialuʼumüin Héber, nnojoishi nüpüla, shia eejatkat Jael. Jülüjakajasaʼa saaʼin Jael tü saaʼinrajatkat nüka Sísara shiʼraiwaʼaya nia nüpanapa. Sütüjaa aaʼu jaralin Sísara otta mojulaain maʼin nia. Eesüjaʼa nnojorüle sütüjaain aaʼu Jael tü nüküjakat Jehová paala sükajee Débora. Nuʼutunajachin aaʼin Sísara, nnojoipejeʼe oʼutunajachin aaʼin nia nutuma wanee wayuu toolo, suʼutajachi aaʼin wanee wayuu jierü. Tü sütüjaakalü aaʼu Jael shia tü nüchekakat Jehová süpüla saaʼinrüin. ¿Jamüsü watüjaakaʼa saaʼu tia?
Watüjaa aaʼu tia süka nüshajirüin Jehová Débora wanee jayeechi süchiki tü naaʼinrakat Barac süpüla nükanajüin Sísara. Anuu süpüshi tia jayeechikat: «Kojutusü maʼin atumawaa Jael naʼakajee na jieyuukana, nuʼwayuuse shia Héber, chi quenitakai. Kojutusü maʼin shia naʼakajee na jieyuu kepiakana suluʼu miichi aainjuushi süka loona». Mayaainjeʼe eein waneinnua wayuu makana wayuuin alaa Jael jee mojulaain shia, nnojotsü shiimain tia, yalayala aaʼinrü Jael, atkaasü shia nüpüleerua Jehová. Saaʼinrüin tü saaʼinrakat Rahab, süneeküin Jehová otta peʼipaasü shia namaa na nüʼünüükana. Sütüjaa aaʼu Jael nüʼünüüin Jehová Sísara. Sütüjaa aaʼu nuʼutunajachin aaʼin nutuma Jehová otta saapünüinjatüin nikii sajapuluʼu. ¿Kasa saaʼinraka Jael süpüla suʼutuinjatüin naaʼin?
Watüjaa aaʼu nnojoluin süpüla saapiraain Jael nümaa Sísara. Wayuu atüjashi maʼin süpüleerua atkawaa jee katchinshi maʼin. Tü saaʼinrakat Jael shia suunejaain nia paülüʼümüin süpüla neemeraain. Shiʼitaaka saawana naaʼu. Nujulijapa wüin saaʼu, süsirüin nia leechi. Nümaka sümüin suʼunuinjatüin soʼuluʼumüin tü pottonkot. Süntüle wayuu sünain asakiraa nüchiirua, aküjainjatü shia saʼalain naashin jee süküjainjatü namüin nnojoluin shiʼrüin nia, nutunkaka süchikijee tia.
Oʼutunajachi aaʼin nutuma Maleiwa wanee surulaat mojulaashi maʼin, naaʼinrüinjatpejeʼe tia sükajee wanee wayuu jierü
Sütüjaa aaʼu Jael süntüin nükalia Sísara süpüla suʼutuinjatüin naaʼin. Saapaainjeseʼe wanee achitia jawatüsü maʼin sümaa wanee wunuʼu kasasü maʼin shiʼichi, sünainjatü shipia tia, müsü aka saaʼin wanee oʼojia, eesüjaʼa süchitapuʼule wanee kasa süka tia wunuʼukat. Arütkaasüjeseʼe shia nünainmüin sümaa koʼutuin shia. Sejepülaaka süʼütpaʼa nikii Sísara süpüla suʼutuinjatüin naaʼin. Mojukuwaʼiparüle nülioʼu sutuma, oʼutuna aaʼinrüjee Jael nutuma Sísara, nnojoipejeʼe nia suʼtchejüin. Pansaasü nülioʼu sutuma. Süchitüin tü wunuʼukat sünain suwalapaʼa nikii, sülataleeka waneemüin saʼata nikii. Outaka Sísara.
Nüntaka Barac mapa sünain achajawaa nüchiki Sísara, sujuʼitaaka Jael nüpanapa, anuuka sünüiki nümüin: «Jalaichi yaamüin teeʼiyataiwa pümüin chi wayuu püchajaakai achiki». Nikerotaka Barac paülüʼümüin. Niʼraka Sísara palasütüin. Ekeraajüsü tü nümakat Jehová sükajee Débora, tü makat mayaa: «Naapeerü Jehová nikii Sísara sajapuluʼu wanee wayuu jierü süpüla suʼutuinjatüin naaʼin».
Yaletüsü maʼin sünülia Jael nutuma Barac sümaa Débora sünainjee tü saaʼinrakat, naküjain tia neeʼirainruʼu. Mayaainjeʼe nnojoluin süküjünüin achiki suluʼu tü Bibliakat süchikijee tia, ayatayülia jaloulin sümüin wayuu tü aküjünakat süchiki. Nnojoishii kaʼapülain maaʼulu na anoujashiikana süpüla natkaainjanain. Eejiraapejeʼe naya nümaa Satanás otta na nümaajanakana, müsüjeseʼe choʼujaain maʼin wamüin maaʼulu yalayalainjatüin waaʼin maʼaka yalayalain saaʼin Jael.
Paashajeʼera pütchikat suluʼujee tü Bibliakat
Yooto waya süchiki tüü:
¿Kasa saaʼinraka Jael sutuma yalayalain saaʼin?
Pikirajaa sooʼomüin
1. ¿Jamüsü wanaawakaʼa sukuwaʼipa Armagedón sümaa tü alatakat wanaa sümaa nütkaain Sísara? (w19.09 8, 9 püt. 3-6).
2. Nnojoishi paaʼinwain Héber namaa na israelitakana mayaainjeʼe suʼwayuusein nia Jael, naya paaʼinwaka amaa nia na cananeokana, naʼünüü na israelitakana. ¿Kasaichi nia nanain na israelitakana? (it «Héber» nuum. 2).
3. Katchinsü nanoula na anoujashiikana soʼu wainma juya süchikijee nükanajuuin Sísara nümaa Jabín, ¿kasa naaʼinraka sutuma katchin nanoula? (w08 10/15 14, 15 püt. 12-15).
4. ¿Kasa tü alanaʼaleekat maʼin sümüin Débora wanaa sümaa shiiʼiyatüin sujutu Jael? ¿Kasa watüjaka sünainjee tia? (w15 8/1 15 püt. 2). 1
Ayaakuaa 1
Ayaakuaa 1
Paaʼinrajatka süpüla yalayalain paaʼin
Nnojoire nunoujain suʼwayuuse wanee wawala, ¿kasa yalayalainjatka anain saaʼin maʼaka yalayalain saaʼin Jael?
Mayaainjeʼe nnojoluin nünüikimaajatüin Maleiwa Jael maʼaka saaʼin Débora otta nnojoluin sütüjain atkawaa maʼaka naaʼin Barac, saaʼinrüin nümüin Jehová tü kasa suuntakat. ¿Kasa watüjaka sünainjee tü sukuwaʼipakat isale wachiki waaʼinrüin wanee kasa? 2
Ayaakuaa 2
¿Kasa amaa paaʼinrajatka süpüla yalayalain paaʼin maʼaka yalayalain saaʼin Jael?
Pütüjaka nüchiki Jehová
¿Kasa tatüjaka nüchiki Jehová sünainjee pütchikat tüü?
¿Kasapülajatche nüshajiraka Jehová suluʼu tü Bibliakat tü tekirajaaitpakalü anain?
¿Kasa tasakireetka anain Jael süsoʼiraapa aaʼin nutuma Jehová?
Sooʼomüin tü pütüjaainjatkalü aaʼu
Pünaja videokot tüü, piʼreerü yalayalain saaʼin wanee jintut maʼaka saaʼin Jael, asoutusü shia saaʼu sunoula.
Nnojo mmoleʼein waya, meimmoluin waya: Nnojo washatüin na chajanakana Meroz, washata Jael (1:40)
Paashajeʼera nachiki waneinnua jieyuu yalayalakana aaʼin maʼaka saaʼin Jael. Wainmeerü tü kasa watüjaakat sünainjee nakuwaʼipa.