Yalayaleerü maʼin paaʼin

1-3. «Jütamaa jümaala, jooʼuya yaajee», ¿jamüsü yalayalakaʼa naaʼin Jesús sutuma müin nünüiki?

«JÜTAMAA jümaala, jooʼuya yaajee», eesüjaʼa jaapüirüle müin nünüiki wanee wayuu yalayalakai maʼin aaʼin. «¿Jamüsü yalayalakaʼa maʼin naaʼin chi makai anüiki?», eesüjaʼa müle paaʼin. Watüjaapa saaʼu jaralin kanüikin tia pütchikat otta jamüin nüküjaka shia, wayaawateerü aaʼu jamüin yalayalaka maʼin naaʼin (Mat. 26:46).

² Nünüiki Jesús tia namüin na nikirajüinkana, piantuairü nüküjain tia namüin (Juan 14:31). Wanaa sümaa müin nünüiki Jesús namüin na nikirajüinkana, chajachi nia suluʼu tü mma kanüliakat Getsemaní, anooipaʼa sünain Jerusalén. Tia soʼujatü kaʼlein maʼin aika otta chuwatüin maʼin chi kashikai. Alüʼütshii süpüla nantapaatüin waneinnua wayuu kaʼapülajüshii, nütüjaa aaʼu Jesús tü aaʼinnajatkat nüka natuma naya wayuukana. Soʼu tia, alüʼütsü süpüla sülatüin nümüin Jesús wanee kasa kapüleeka maʼin. Nütüjaa aaʼu nüchecherüinjatüin naaʼin soʼunnaa tü alatajatkat nümüin.

³ Nnojotsü nütaʼülüin Jesús sukuwaʼipa tü alatajatkat nümüin. Nnojoishi nia achuntuin nümüin Jehová nuluwataainjanain na aapieekana nünainmüin sünain akaalinjaa nia (Mat. 26:53). «Jütamaa jümaala, jooʼuya yaajee», müshi neʼe nia namüin na nikirajüinkana. ¿Jalainjachi Jesús oʼunuin? Nütüjaa aaʼu Jesús nütaʼünajachin natuma na wayuu achajaakana nüchiki, müliainjachin nia jee outajachin nia natuma. ¿Jamüsü nuuʼulakaʼa Jesús müliain nia atumawaa jee nuʼutunuin aaʼin? Shia saaʼujee alin nüpüla chi Nüshikai otta na nikirajüinkana.

4, 5. ¿Kasa yalayalaka anainjee naaʼin Jesús? ¿Jamüsü choʼujaakaʼa wamüin yalayalain waaʼin maʼaka naaʼin Jesús?

⁴ Nnojoishi eeichin wanee wayuu yalayalakai maʼin aaʼin maʼaka naaʼin Jesús. Pialejeʼe wanee nikirajüin Jesús, yalayalasia paaʼin. Wayakana anoujashiikana, yalayalainjatü maʼin waaʼin. Choʼujaasü müinjatüin wakuwaʼipa maaʼulu süka kapüleein maʼin tü kasa alatakat jee keemain maʼin tü mmapaʼakat.

⁵ ¿Kasa yalayalaka anainjee naaʼin Jesús? Naashin waneinnua wayuu nnojoishi mmoluin wanee wayuu yalayalale naaʼin, meimmoluinsai nia naainjapa wanee kasa otta eʼnnaajünüshi suluʼu wayuuin jashichi nia (Sal. 11:5). Nnojotsü shiain tia yalayalaka anainjee naaʼin Jesús. Yalayalasü naaʼin süka naaʼinrüin tü kasa anakat noʼuluʼu Maleiwa jaʼitashi mmoluin nia jee kapüleein shia nümüin.

Yalayaleerü paaʼin maʼaka yalayalain naaʼin Jesús

6. Jülüjale waaʼin nnojoluin yalayalain waaʼin, ¿jamüsü sükatchinrakaʼa waaʼin tü nümakat Jesús namüin na nikirajüinkana?

⁶ «¿Yalayaleetche taaʼin maʼaka naaʼin Jesús soʼunnaa sülatüin kasa mojusü tamüin?», eesüjaʼa maa müle paaʼin. Jülüjale paaʼin tia, soto paaʼin nütüjaain saaʼu Jesús waleʼeruʼuin süchiki kaainjalaa. Müshi Jesús maʼaka naaʼin chi Nüshikai, nnojotsü naʼatapajüin waaʼinrüinjatüin wanee kasa eekai kapüleein maʼin wamüin (Sal. 103:14; Juan 14:9). Jamüshijaʼa nia, wanaa sümaa chajachin suluʼu tü mma kanüliakat Getsemaní, nuchuntuin namüin na nikirajüinkana nnojoliinjanain natunkuin. Nnojotpejeʼe naaʼinrüin tü nümakat Jesús, atunkajüshii neʼe naya. Anuujeseʼe nünüiki namüin sümaa kamaneein nia: «Mayaapejeʼe naaʼinreein maʼin wanee wayuu wanee kasa, eesüjaʼa matsüinre niʼiruku süpüla naaʼinrajatüin shia» (Mat. 26:41). Niyaawata aaʼu Jesús tü kapüleekat namüin otta naleʼeruʼuin süchiki kaainjalaa.

7, 8. ¿Jamüsü nünüiki Jesús namüin na nikirajüinkana süpüla anainjatüin naaʼin?

⁷ Nütüjaa aaʼu Jesús yalayaleerüin naaʼin na nikirajüinkana. «Yalayalainjatpejeʼe jaaʼin, tayamülüitpa tü kasa mojusü eekat saaʼu tü mmakat», anakajasaʼa naaʼin na nikirajüinkana Jesús wanaa sümaa müin nünüiki namüin (Juan 16:33). Nütüjaa aaʼu Jesús yalayaleerüin naaʼin na nikirajüinkana maʼaka naaʼin niakai, nountuinña müin nakuwaʼipa. Kojuyatua nükaaliijain Jesús na wayuukana süpüla yalayalain naaʼin, nüküjain pütchi namüin sükatchinraaka atuma naaʼin. «Nnojo mojuin paaʼin tachee, alatinnüitpa paainjala puulia», müshi Jesús nümüin wanee wayuu makutulaainkai sutuma ayuulii (Mat. 9:2). Nüküjainña tia pütchikat sümüin tü wayuu shipettakat sot nüsheʼin, naaʼinrüin tia süpüla nnojoluin shapaain saaʼin (Mat. 9:20-22). Wanaa sümaa mmoluin maʼin na nikirajüinkana sutuma wanee wawai, «nnojo mmoluin jia», müshi Jesús namüin süpüla jimatüin naaʼin (Mat. 14:27). «Yalayala paaʼin», müshi Jesús nümüin Pablo chejee iipünaajee wanaa sümaa najachijüin natuma waneinnua wayuu (Aluw. 23:9-11).

⁸ Müsia nünüiki Jesús wamüin maaʼulu yaa. «Yalayala paaʼin», müshi nia wamüin. Nücheküin wapüleerua yalayalainjatüin waaʼin otta nütüjaa aaʼu wounteerüin waaʼinrüin shia. Naapüin pümüin Jehová, chi Nüshikai Jesús, tü choʼujaakat pümüin süpüla yalayalain paaʼin.

Yalayalainjatü waaʼin sutuma tü sümakat tü Bibliakat

9. ¿Kasa waaʼinrajatka süpüla yalayalain waaʼin sutuma tü sümakat tü Bibliakat?

⁹ Nüshajirüin Jehová suluʼu tü Bibliakat nachiki waneinnua wayuu yalayalakana aaʼin. Jalouijeerü wamüin tia nakuwaʼipakat süpüla yalayalain waaʼin. Waashajeʼereerü nachiki wayuu miyoʼuyuu, tepichijayüliikana, laülaayuu, naatayaa maka ouyase otta akuwaʼipa. Eesüjaʼa wanaawale nakuwaʼipa wamaa, maʼaka «wanaawain nukuwaʼipa Elías wamaa» (Sant. 5:17). Wayuukana naainnua naleʼeruʼusü süchiki tü kaainjalaakat maʼaka waaʼin wayakana, eesü tü kasa isakat nachiki otta tü mmotkalü eema naya, wainma tü kasa alatakat namüin otta wainma tü kasa najachijakalü atuma. Alatüshii naya süchikumüin tia maʼaka nülatüin Jesús süchikumüin tia alatakat nümüin. Yalayalasü naaʼin otta akatchinraasü waaʼin waashajeʼerapa süchiki tü naaʼinrakat soʼunnaa tü alatakat namüin.

10, 11. ¿Kasa paaʼinrajatka süpüla jaloulin pümüin tü sümakat karaloʼutakat tüü? ¿Jamüinjatü shikirajaaya putuma? (Paashajeʼera tü pütchi kanüliakat «Sukuwaʼipainjatka pikirajaapa pümüiwaʼa sünain karaloʼutakat tüü otta puʼwaajapa Maleiwa sümaa püpüshi»).

¹⁰ Ashajünüsü karaloʼutakat tüü süpüla yalayalainjatüin paaʼin. Eesü 54 ekirajaaya suluʼu tü karaloʼutakat. Aküjünüsü nükaalinjain Jehová na anoujashiikana nünain süpüla yalayalainjatüin naaʼin mayaainjeʼe naleʼeruʼuin süchiki tü kaainjalaakat maaʼaya aka waleʼeruʼuin shia. Paashajeʼera nachiki naya wayuukana otta pikiraja sooʼomüin süchiki tü nakuwaʼipakat waneʼewai nakua, müle shia putuma, piʼrajeerü maʼin tü nakuwaʼipakat.

¹¹ Kasataalejeseʼe jaloulin pümüin tü nakuwaʼipakat süpüla yalayalain paaʼin otta süpüla püchecherüin paaʼin maaʼulu soʼunnaa sülüʼülüin «sükalia süpüla sajaʼttüin kasa mojusü» (2 Tim. 3:1). Jalouijeerü shia pümüin süpüla piʼitaain paaʼin sünain tü nümakat Jehová, tü makat mayaa: «Nnojoleechi pia tapütüin pümüiwaʼa». Yalayaleerü waaʼin otta meerü wanüiki maʼaka tü nüküjakat Pablo: «Nia Jehová akaalinjaka taya, nnojoleechi mmoluin taya» (Heb. 13: 5, 6).