SUSOUKTAKA EʼIPAJEE TÜ WIWÜLIAKAT

¿Kasa watüjaaka aaʼu nüchiki Maleiwa?

Meʼrujusai chi Maleiwakai. Nukumajala tü sirumatuʼukat otta tü Mmakat sümaa tü kasa eekat saaʼu. Nnojoishi jaralin kakumalain nia, eetüjüiya nümaiwa (Salmo 90:2). Keeʼireesü naaʼin nüchajaanüin natuma na wayuukana otta natüjaainjatüin saaʼu tü shiimainkat nüchiki. (Paashajeʼera Aluwataaushikana 17:24-27.)

Kanüliashi Maleiwa. Jülüjüle waaʼin tü kasa nukumajakat, wayaawateerü aaʼu tü nukuwaʼipakat (Roma 1:20). Wekirajaainjatü anain tü Wiwüliakat süpüla weʼraajüinjachin maʼin nia otta watüjaainjatüin aaʼu jaralüin tü nukuwaʼipakat. (Paashajeʼera Salmo 103:7-10.)

¿Jamüsü naaʼin Maleiwa sutuma tü kasa mojusü aainjünakat?

Mojushaatasü maʼin nümüin tü kasa mojusü aainjünakat. Nukumajüin na wayuukana süpüla nashatüinjatüin tü nukuwaʼipakat (Deuteronomio 25:16). Makalaka mojushaatain maʼin wamüin tü kasa mojusü aainjünakat. Nnojoishi niain Maleiwa kasirüin tü kasa mojusü alatakat. Nukumajüin na wayuukana süpüla naneeküinjatüin tü kasa anakat saaʼin namüin. Akatsaʼa nnojoluin anain natuma süneekia tü kasa naaʼinrakat. Aainjüshii neʼe kasa mojusü. Mojusü maʼin naaʼin Jeʼwaa sutuma tia. (Paashajeʼera Génesis 6:​5, 6 otta Deuteronomio 32:​4, 5.)

Anasü nümüin Jeʼwaa saainjünüle tü kasa anasükat, makalaka najaʼttirüinjatüin tü kasa mojusü aainjünakat (Salmo 37:​28, 29). Saashin tü Wiwüliakat alüʼütsü süpüla najaʼttirüinjatüin Maleiwa tü kasa mojusü aainjünakat. (Paashajeʼera 2 Pedro 3:7-9, 13, NM.)