¿Aküjüshii maʼin waya pütchi süka?
1 «¡Keeʼireesü maʼin taaʼin aküjaa pütchi süka!», müsü sünüiki wanee wawala süchikijee saashajeʼerüin La Atalaya ojuʼitaka eneeroʼu 1 soʼu tü juyakat 2008. Wainma pütchi anaka maʼin suluʼu tü rewiisüta süpülajatkat wayuu süpüshuaʼa. ¿Pikirajaa anainrü? ¿Pütüjaa aaʼulu jamüinjatüin süküjia pütchi süka?
2 «Nikirajaka anain Jesús.» Pütchikat tüü sükaaliinjeena waya süpüla woʼttuin sünain ekirajaa wayuu süka tü Wiwüliakat, ¿müsia pümüin? Nnojoyürüle paainjüin shia, puʼulakapa: Paashajeʼera sünülia tü pütchikat namüin na wayuukana otta püküja namüin tü nikirajakat anain Jesús suluʼu tü palajatkat pütchi. Müleka piʼrüle kamalain shia namüin, ayata paashajaain namaa süka tü pütchi suupünaakat tü sünüliakat, ashajuushi süka wanee pütchi ponoko saaʼin wayuu. Puuʼulaa naashajaain na wayuukana, püküja tü shiyaakua sünainpünaakat tü pütchi pikirajakat otta süchikijee pikiraja sünain tü wanee pütchikat. Nnojotsü choʼujaain pikirajüin sünain süpüshuaʼa tü pütchikat, eesü süpüla pajaʼlajeʼerüin shia puuyantapeena. Yapa pia süpüla pikirajüin süka tü karalouktakat Kasa shikirajaka.
3 «Pütchi namüinjatü na apüshiikana.» Ojuʼitüsü shia apünüinwai kashi süpüla akaaliinjaa na wayuu kaʼwayuusekana otta na kachonshiikana süpüla naainjüin tü sümakat tü Wiwüliakat wanaa sümaa eein tü amojujeʼereekat tü jimataakat aaʼin nepialuʼu. Pütchikat tia eesü süpüla sükaaliinjüin na wayuu manoujuinsaliikana süpüla natüjaain saaʼu tü kekiiwaa eekat sutuma tü Wiwüliakat. (2 Tim. 3:16, 17).
4 Pütchi napülajatü na tepichikana. Pütchikat tüü, «Namüinjatü na tepichikana» nnojotsü süpülajatüin neʼe nachajaain na tepichikana tü aküjalaa suluʼujeejatkat tü Wiwüliakat, naküjüinjatü jamüin nanüiki süchiki. Anasü maʼin aküjaa pütchi süka otta eeʼiyataa namüin na tepichikana anain maʼin ekirajawaa sünain tü nünüikikat Maleiwa (Sal. 119:9, 105). Otta taasia, eesü süpüla piiʼiyatüin namüin na kachonshiikana tü pütchikat, «Nekirajia na kachonshiikana»; ojuʼitüsü shia piamawai kashi otta anasü süpüla ekirajaa na tepichikana süchiki tü kasa naainjakat na wayuu saashajaakana achiki tü Wiwüliakat. ¿Pikirajüin na püchonniikana süka pütchikat tüü?
5 Wanee sukuwaʼipairua. Ojuʼitüsü kashiwai tü pütchikat, «Tü natüjaweekat aaʼu na aashajeʼerakana tü rewiisütakat», ekirajaana anainrü wanee asakiraa naainjaka na manoujuinsaliikana. Eesü süpüla waashajaain süchiki wanaa sümaa waküjüin pütchi. Tü pütchikat, «Karaloukta suluwataala...» aküjünüsü suluʼu tü kasa alatakat namüin na wawalayuu aküjakana pütchi suluʼu wanee mma naata otta waneeinnua wawalayuu. Shiiʼiyateerü tia namüin na wayuukana süküjünüin tü pütchikat sainküin tü mmakat süpüshuaʼa, süka shikeraajüin tü kaʼi niweetakat oʼu Cristo (Mat. 24:3, 14).
6 Ounejaanüshii na wayuu atüjaweekana sooʼomüin nüchiki Jeowa süpüla nekirajaain sünain tü pütchi ojuʼitakat kashiwai, kanüliaka: «Pürütkaa nünainmüin Maleiwa», suluʼujeesü tü nünüiki Maleiwa aashajeʼennakat sünain tü outkajawaakat eere wekirajaain süpüla waʼyataain nümüin Maleiwa. Tü pütchi kanüliakat: «Na washatüinjanakana anoula» ojuʼitüsü pienchitua soʼu tü juyakat, süpülajatü akaaliinjaa na wayuukana sünain ayaawataa tü aküjalaa suluʼukat tü Wiwüliakat, müinjana chakai naaʼin na aashajeʼerakana süpüla nütüjaainjatüin saaʼu tü naaʼinrakat, tü kasa mojusü alatakat namüin otta tü nanoulakat.
7 ¡Talatüshii maʼin waya süka eein wamaʼana La Atalaya süpülajatka aküjaa pütchi! Müsüjeseʼe, wekirajaa maʼin sünain süpüshuaʼa tü pütchi suluʼukat otta waküja maʼin pütchi süka.