Asakinnaka Anain
◼ Kasaaleere wanee wawalayuu suluʼu tü piichi outkajaaleekat, ¿kasa naashajaainjatka achiki namaa na laülaayuukana?
Yaletüsü naaʼin Jeowa wanaa sümaa jülüjüin naaʼin na kasaalüinjanakana tü sümakat tü Wiwüliakat. Naaʼinrajatü maʼin tia kasaalüinjanale suluʼu tü outkajaaleekat. Tü aainjünakat suluʼu tü outkajaaleekat jaʼyainjatü wakuwaʼipa noʼuluʼu na waneeinnua. Süpüla ‹lotuinjatüin sukuaippa süpüshua tü aainjünakat suluʼu tü outkajaaleekat› jülüjüinjatü naaʼin na laülaayuukana tü naaʼinrajatkat na kasaalüinjanakana (1 Cor. 14:40).
Na kasaalüinjanakana nachuntajatü maalü sükajee wanee karaloukta kasaaleein naya suluʼu tü outkajaaleekat. Ashajünajatü tia karalouktakat namüin na laülaayuu oʼunirakana sukuwaʼipa tü aʼyatawaakat suluʼu tü outkajaaleekat eeinjanale kasaalüin naya otta naküjüinjatü tü oora otta kaʼi aainjünajatkat oʼu shia. Sotuinjatü naaʼin nnojoluin süpüla naʼwanajaain na laülaayuukana tü oora otta kaʼi aainjünakat oʼu tü outkajawaakat süka kasaalüinjanain naya. Anainjatü nanüiki na waneeinnua süchiki tü jietkat otta chi toolokoi otta pansaainjatü nakuwaʼipa sümaa tü nümakat Jeowa suluʼu tü Wiwüliakat.
Süpüla natüjaain saaʼu anain nümüin Maleiwa tü naaʼinrajatkat sünain kasaalüü, naküjüinjatü shia namüin na wawalayuu oʼunirakana sukuwaʼipa tü aʼyatawaakat süpülapünaa kettaain shia natuma. Mayaapejee nnojoluinjatüin aainjünüin tü anakat saaʼin namüin na laülaayuukana akatsaʼa neʼrüle wanee kasa nnojotka anain nanoʼuteʼerüinjatü shia na kasaalüinjanakana. Maʼaka saaʼin tü muusika eʼitaanajatkat, shiainjatü neʼe Kingdom Melodies otta tü suluʼukat tü karaloukta weeʼirajiakat. Otta taasia tü kasa eʼitaanajatkat süpüla anainjatüin tü piichi outkajaaleekat jee tü einaseekalüirua. Wanaa sümaa shiyuʼnnuin ayaakuaa otta tü alatinnakat suluʼu telewisoot nnojotsü mojuinjatüin sukuwaʼipa tü kasaalüükat sutuma. Na kasaalüinjanakana eeshi süpüla nooʼulaküin suluʼu tü outkajaaleekat tü naaʼinrajatkat soʼu tü kaʼi kasaalüinjanakat oʼu naya müleka nnojorüle eein wanee outkajawaa soʼu kaʼikat tia. Tü ounejaayakat sünain kasaalüü nnojotsü eʼitaanajatüin eere shiʼitaanüin karaloukta. Akatsaʼa eesü süpüla süküjünüin sünain tü outkajawaakat Süpüla Waʼyataain Nümüin Maleiwa eejeerüin wanee kasaalüü suluʼu tü piichi outkajaaleekat.
Nnojotsü choʼujaain woutiisainjanain na wayuu aneekünakana süpüla ekerotaa wanaajiraa namaa na kasaalüinjanakana. Akatsaʼa nnojotsü anain süneekünüle wayuu eeka shiyouktüin tü sümakat tü Wiwüliakat otta eeka mojuin akuwaʼipa noʼuluʼu na antakana sünain eʼrajaa tü kasaalüükat. Chi aapüinjachikai tü pütchi sümakat tü Wiwüliakat namüin na kasaatshiikana niainjachi wanee laülaashi süka nayain keraain süpüla ekirajaa sünain tia aainjünajatkat (1 Tim. 3:2).
Süka eein süpüla anain jee mojuin pütchi nüchiki chi laülaashi ekirajüinjachikai, aküjünajatü nümüin tü aainjünajatkat sünain tü kasaalüükat. Aashajaainjachi nia namaa süpüla nütüjaain saaʼu wulere nakuwaʼipa wanaa sümaa namüraajiraain otta naküjüinjatü tü shiimainkat. Müleka niale jee shiale tü jietkat kasaalüin paalainka, neeʼiyatüinjatü sükajee tü Wiwüliakat otta tü namakat na aluwataashiikana eein süpüla kasaalüin nachikuaʼa (Mat. 19:9). Tia sünainpünaasü eeʼiyataa nümüin chi laülaashikai tü karaloukta aküjakat nooʼulaain suulia kasaalüü.
Wanaa sümaa naashajaain na kasaalüinjanakana namaa na laülaayuukana otta naainjüin tü namakat, talateena naya otta na oʼunakana sünain eʼrajaa tia kasaalüükat (Pro. 15:22; Heb. 13:17).