Miʼiraa shikiira kaʼwayuusee kojutuka atuma Jehová

1, 2. ¿Kasa nüchekaka Jehová napüleerua na wawalayuu kasaalüinjanakana?

¿PÜNEEKÜITPA tü kaʼi kasaalüinjachikalü oʼu pia sümaa pümüraajüin? Talatakajasaʼa maʼin jaaʼin sutuma tia. Wainmapejeʼe tü kasa jaaʼinrajatkat süpüla jukumajüin sukuwaʼipa tia. Nücheküin maʼin Jehová jüpülajiraa talatüin maʼin jaaʼin soʼu tü kaʼi kasaalüinjanakalü oʼu jiaa otta nücheküin jüpüleerua anainjatüin jukuwaʼipa mapeena kasaatpa jia (Prov. 5:18; Cant. 3:11).

² ¿Jamüinjatü sukuwaʼipa jutuma tü miʼiraa shikiirakat kaʼwayuusee süpüla kojutuinjachin Jehová atumawaa? ¿Jamüsü anakaʼa jaaʼinrüle tia? Wekirajaajeerü anain tia. Mayaainjeʼe napülajatüin na wawalayuu kasaalüinjanakana ekirajaayakat tüü, atüjeena waya wapüshuaʼa süchiki tü waaʼinrüinjatkat wounejaanüle sünain wanee miʼiraa jee tü waküjainjatkat wasakinnüle natuma na kasaalüinjanakana süchiki jamüinjatüin sukuwaʼipa natuma wanee kasa.

ANASHI KOJUTULE JUTUMA JEHOVÁ

3. (1) ¿Kasa jülüjainjatka naaʼin na wawalayuu kasaalüinjanakana nakumajapa sukuwaʼipa wanee miʼiraa shikiira kaʼwayuusee? (2) ¿Jamüsü naaʼinrüinjatka tia?

³ Jülüjeesü naaʼin na wawalayuu kasaalüinjanakana tü pütchi nümakat Jehová suluʼu tü Bibliakat nakumajapa sukuwaʼipa tü miʼiraa shikiirakat kaʼwayuusee, jama niain Jehová keʼinaajalaka sukuwaʼipa kaʼwayuusee. Jamüshijaʼa Adán kasaatshi nia sümaa Eva nutuma Jehová (Gén. 1:28; 2:24). Kojutuinjatüjeseʼe jümüin jiakana kasaalüinjanakana tü jülüjakat naaʼin Jehová.

4. ¿Jamüsü kojutuinjatkaʼa namüin na wawalayuu kasaalüinjanakana tü jülüjakat naaʼin Jehová?

⁴ Jiakana wawalayuu kasaalüinjanakana anasü kojutule jümüin tü jülüjakat naaʼin Jehová süchiki tü sukuwaʼipainjatkat jutuma tü miʼiraa shikiirainjatkat kaʼwayuusee, jama naʼaleewain jia jee jüshin nia (Heb. 12:9). Nnojotsü jaaʼinreein wanee kasa mojeetka atuma jukuwaʼipa nümaa Jehová, jalia suulia jaaʼinrüin wanee kasa mojeetka atuma naaʼin (Sal. 25:14). Kojuteechi Jehová jutuma, jama wainmain tü kasa naaʼinrüitkat jüpüleerua jee tü naaʼinreetkat mapeena (Sal. 116:12).

TÜ WAAʼINRAJATKAT SÜPÜLA KOJUTUIN WATUMA JEHOVÁ

5. ¿Jamüsü aneetkaʼa sukuwaʼipa tü miʼiraa shikiirakat kaʼwayuusee jülüjale naaʼin na kasaalüinjanakana tü ashajünakat suluʼu tü Bibliakat?

⁵ Nnojotsü ashajünüin suluʼu tü Bibliakat süpüshuaʼa tü aainjünajatkat kasaatpa wanee wayuu jee shiale soʼunnaa tü miʼiraa shikiirakat kaʼwayuusee. Jülüjainjatü naaʼin na kasaalüinjanakana tü keeʼireekat naaʼin, kettaale tü nneerü eekat namaʼana süpüla tia otta anasü jülüjale naaʼinña nakuwaʼipapala na wayuukana eere kepiain naya. Süpüla anainjatüin sukuwaʼipa tia miʼiraakat nümüin Jehová nekeraajüinjatüin tü achuntunakat natuma na süʼlaülashiikana mma eere kepiain naya (Mat. 22:21). Nakumajüle sukuwaʼipa tia miʼiraakat pansaainjatü sümaa tü ashajünakat suluʼu tü Bibliakat, kojuteechi Jehová natuma jee talateerü naaʼin namaa. Wekirajaa sünain waneirua kasa jülüjeeka waaʼin.

6. ¿Jamüsü naaʼinrajatkaʼa na wawalayuu kasaalüinjanakana tü namakat na süʼlaülashiikana mma?

⁶ Jaaʼinra tü namakat na süʼlaülashiikana mma (Roma 13:1, 2). Naata sümüin tü achuntunawaikat suluʼu waneirua mma namüin na wayuu kasaalüinjanakana. Anasü jütüjaale saaʼu palajana tü jaaʼinrajatkat naashin na süʼlaülashiikana mma eere kepiain jia. Choʼujaale jümüin kaalinwaa juchunta maa shia namüin na laülaashiikana.b

7. ¿Kasa naaʼinrajatka na kasaalüinjanakana nakumajapa sukuwaʼipa kasaalüü?

⁷ Anainjatüin jutuma tü kasa aainjünajatkat soʼu tü kaʼi kasaalüinjanakalü oʼu jia (1 Cor. 10:31, 32). Jaʼyainjatü saaʼu jukuwaʼipa wayuuin anoujashii jia sünain tü miʼiraa shikiirakat kaʼwayuusee. Nnojotsü anain jüshatüle nakuwaʼipa na manoujainsaliikana (Gal. 5:19-26). Süka niain chi toolokoi shikiipüʼüinjachin tü nuʼwayuusekat niainjachin akumajaka sukuwaʼipa tü miʼiraakat süpüla talatüin naaʼin na oʼunakana sünain jee suulia saainjünüin wanee kasa mojusü soʼunnaa. Müsüjeseʼe süküjünüin wanee pütchi suluʼujeejatka tü Bibliakat süchiki tü sukuwaʼipainjatkat kaʼwayuusee. Anainjatü sukuwaʼipa süküjia nutuma chi wawala ekirajüinjachikai, müle shia aneerü nakuwaʼipa na aapajakana tia pütchikat süka nayaawateerüin aaʼu niain keʼinaajalain Jehová sukuwaʼipa kaʼwayuusee otta kojuteerü shia namüin. Naneeküle saapajünüin tia pütchikat suluʼu wanee piichi outkajaalee, anasü nashajüle wanee karaloʼuta namüin na laülaashiikana kojuya kashi süpülapünaa süpüla saʼanapinnüin namüin tü piichi outkajaaleekat.

8. Jukumajüle sukuwaʼipa wanee miʼiraa shikiira kaʼwayuusee, ¿kasa jaaʼinrajatka süpüla kojutuinjachin atumawaa Jehová sünainjee? (Roma 13:13).

⁸ (Paashajeʼera Roma 13:13). Pukumajüle sukuwaʼipa wanee miʼiraa shikiira kaʼwayuusee nnojoluinjatü müin aka saaʼin tü naainjakat na manoujainsaliikana. «Nnojo maaʼin waaʼin sünain miʼiraa», müsü tü Bibliakat. Tü süküjeekalü achiki tia pütchikat suluʼu griego shia tü miʼiraa aainjünapuʼukat sümaiwa eere epeʼruwaain wayuu otta kaʼlesü aika naaʼu sünain aapajaa muusika. Süsülajünüinjatüle asüshii, jukumaja sukuwaʼipa suulia sülanaʼaleein nasüin na antakana.c Eeinjatüle muusika sünain tü miʼiraakat anasü nnojorüle emetuluin maʼin shia süpüla yootuin na antakana süka anakalü akuwaʼipa. Püneeka muusika eekai anain suulia mojushiin shia namüin na antakana.

9. ¿Kasa jülüjainjatka naaʼin na kasaalüinjanakana nakumajapa sukuwaʼipa tü aainjünajatkat soʼunnaa tü miʼiraakat?

⁹ Soʼunnaa tü miʼiraa shikiirakat kaʼwayuusee aainjünaka suluʼu waneirua mma eeshi nüküjale wanee pütchi anasü namüin na kasaalüinjanakana wanee napüshi jee niale wanee naʼaleewain noʼupala na antakana sünain tü miʼiraakat. Eesüjaʼa shiiʼiyatünüle nayaakua jee video nachikimaajatka jee shiale saainjünüin waneirua kasa. Naaʼinrüin tia shiiʼiree sotuinjatüin saaʼin wayuu tia kaʼikat. Jülüjainjatpejeʼe naaʼin saainjünüin wanee kasa kojutuinjatka atuma wayuu jee nnojoluinjatka japülin atuma saaʼin wayuu (Filip. 4:8). Süpülapünaa naaʼinrüin tia anasü nasakireʼerüle naaʼin: «¿Anashiijeetche shia sümüin wayuu mojushiitaajeetpa shia namüin? ¿Jaʼyeetche naaʼu sünainjee tü aainjünajatkat kojutuin namüin sukuwaʼipa kaʼwayuusee otta kojutuin namüin Jehová?». Nnojotsiaajeʼe mojuin emeeʼerajawaa, shia mojuka shimeeʼerajaanüle süka pütchi yarüttüsü (Éf. 5:3). Na kasaalüinjanakana naküjainjatü sümüin napüshi jee naʼaleewainyuu jamüinjatüin sukuwaʼipa nanüiki naküjeere wanee pütchi suʼupalapünaa wayuu soʼunnaa tü miʼiraakat. Shiainjatü wanee pütchi kojutuinjatka atuma naya, nnojotsü shiainjatüin wanee pütchi meʼerapalainjanaka anainjee neʼe naya.

10. ¿Jamüshii nnojoliinjanaka naʼwaataain saaʼu tü eekat namaʼana na kasaalüinjanakana? (1 Juan 2:15-17).

¹⁰ Nnojo juwataain saaʼu tü eekat jümaʼana (paashajeʼera 1 Juan 2:15-17). Talateerü naaʼin Jehová jümaa jüchajaale sukuwaʼipa süpüla kojutuinjachin nia sünainjee tü jaaʼinrakat suulialeʼeya juwataain suluʼu tü jukuwaʼipakat. Aneerü sukuwaʼipa tü miʼiraakat jutuma nnojorüle jujutuin wainma nneerü sünain, süka jamüin, naya aaʼinraka tia na wayuu aʼwaataakana «saaʼu tü eekat namaʼana». Jiʼreerü wainma kasa anasü nnojorüle jujutuin wainma nneerü sünain tü miʼiraakat. Anuu tü nümakat wanee wawala chejeʼewai Noruega, Mike nünülia: «Ayatüshii waya pürekutsoolüin, jama nnojoluin waya kojuyaalain süpüla wakumajüin sukuwaʼipa tü miʼiraakat. Nnojotsü wainmain tü kasa aainjünakat sünain, sotopejeʼe maʼin waaʼin tia kaʼikat sümaa talatüin waaʼin». Anuu tü sümakat wanee wawala chejeʼewat India, Tabitha sünülia: «Sutuma nnojoluin wainmain tü kasa waaʼinrakat sünain tü miʼiraakat paaʼinwashii waya sünain tü waneekakat otta nnojotsü shapaakuʼu müin waaʼin saaʼu».

11. ¿Kasa naaʼinrajatka na kasaalüinjanakana süpüla nnojoluin naʼalaajaain suluʼu nasheʼin? (Piirakaa sümüin tü ayaakuaakat).

¹¹ Aneesü natuma na kasaalüinjanakana nayolojo soʼu kasaatpa naya. Mapüsia neʼe nakuwaʼipa na wayuu namaiwajanakana (Is. 61:10). Naatawaisü sukuwaʼipa jaʼanaaya kasaalüinjanakalü oʼu jia, nnojoliinjanapejeʼe aʼalaajaain jia suluʼu jüsheʼin, laülaainjatü jaaʼin (1 Tim. 2:9). Nnojotsü shiainjatüin maʼin alanaʼaleein ojutu jaʼanaaya soʼu kaʼikat tia (1 Ped. 3:3, 4).

12. ¿Jamüsü nnojoluinjatka nashatüin na kasaalüinjanakana tü saaʼinrawaika wayuu nnojorüle pansaain shia sümaa tü sümakat tü Bibliakat?

¹² Nnojo jüshatüin tü saaʼinrakat wayuu nnojorüle pansaain shia sümaa tü sümakat tü Bibliakat (Apoc. 18:4). Wainma tü kasa naaʼinrawaikat na manoujainsaliikana soʼunnaa wanee miʼiraa shikiira kaʼwayuusee sünainpünaaka tü iküleesia ekirajakalü alawaa otta eeshii na makana pülasü tia nnojorüle saainjünüin. Wayoutuinjatpejeʼe tia, jama yarüttüin shia nümüin Jehová (2 Cor. 6:14-17). Wainmajüle jaaʼin anale jee mojule wanee kasa aainjünawaika eejeʼewaliire jia anashii jikirajaale süchiki, jütüjaaiwa saaʼu pansaale shia sümaa tü ashajünakat suluʼu tü Bibliakat. Jaaʼinrüle tia jütüjaajeerü aaʼu anale süpüla jaaʼinrüin tia soʼunnaa tü miʼiraa shikiirakat kaʼwayuusee.

13. ¿Kasa naaʼinrajatka na kasaalüinjanakana süpüla nashatüin nukuwaʼipa Jehová süsülajünapa namüin wanee kasa?

¹³ Suluʼu waneirua mma asülajünüsü kasa namüin na wayuu kasaalüinjanakana. Naaʼinrüin tia wanaapünaa sümaa tü kasa eekat namaʼana. Saashin tü Bibliakat «talataleesia maʼin waaʼin wasülajüle wanee kasa suulialeʼeya süsülajünapa wamüin» (Prov. 11:25; Aluw. 20:35). Nnojotsü shiain keeʼireein naaʼin na kasaalüinjanakana jülüjain naaʼin na ounejaaushiikana sünain tü miʼiraakat nayoujunüin sünainjee tü kasa nasülajakat. Washatüin nukuwaʼipa Jehová, talatüle waaʼin nümaa wanee wayuu asülajakai wamüin wanaapünaa sümaa tü suluʼukat naaʼin. Nnojotsü keeʼireein waaʼin süsülajünüin wamüin wanee kasa mojusheeka jee shiale süka münajalain neʼe nümüin chi wayuu asülajakai (2 Cor. 9:7).

TÜ JAAʼINRAJATKAT SÜLATÜLE WANEE KASA KAPÜLEESÜ

14. Püküja wanee kasa kapüleeka alatawaika namüin na kasaalüinjanakana.

¹⁴ Eesüjaʼa kapüleere jümüin jukumajüin sukuwaʼipa wanee miʼiraa shikiira kaʼwayuusee kojutuinjachika atuma Jehová. Eesüjaʼa kapüleere wamüin waneeküin tü kasa aainjünajatkat sünain otta jeʼrashiinjanain na wayuu wounejaainjanakana sünain. Jülüjataa waaʼin tü nümakat wanee wawala chejeʼewai Islas Salomón, Charlie nünülia: «Kapüleeshaatasü maʼin wamüin waneeküin na wayuu wounejaainjanakana sünain tü miʼiraakat. Jama sukuwaʼipapalakat wayuu yaʼaya eere kepiain waya nounejaanüin napüshuaʼaleʼeya». Anuu tü sümakat Tabitha tü achuntunakat anülia suluʼu pütchika 10: «Kamalainsü sümüin wayuu eere kepiain waya suunejaanüin wainma wayuu sünain wanee miʼiraa. Mojushiisüjeseʼe namüin na kachooinkana waya wounejaainjanain neʼe 100 wayuu sünain tü miʼiraakat. Naapapejeʼe sümaa tia mapa». Anuu tü sümakat wanee wawala chejeʼewat India, Sara sünülia: «Kamalainsü sümüin wainma wayuu neʼnnaajünüin suluʼu washinnuuin naya. Wainma tü nneerü nujutakat wanee tapüshi sünain tü aainjünakat kasaatkalü oʼu nia. Sutuma tia, jülüjasü taaʼin alanaʼaleeinjatüin sünain anaʼleein tü aainjünajatkat kasaalüinjatkalü oʼu taya». ¿Kasa jaaʼinrajatka sülatüle jümüin wanee kasa kapüleeka?

15. ¿Jamüshii noʼuraajüinjanakaʼa na wayuu kasaalüinjanakana süpülapünaa naneeküin wanee kasa aainjünajatka kasaatpa naya?

¹⁵ Juʼuraaja waneepia nümüin Jehová süchiki tü aainjünajatkat jukumajapa sukuwaʼipa kasaalüü. Jüküja nümüin süchiki tü kasa jüneeküinjatkat otta tü kasa shapaakalü atuma jaaʼin (Filip. 4:6, 7). Anasü juchuntule nümüin Jehová anainjatüin sukuwaʼipa tü kasa jüneekakat otta naapajatüin jimata aaʼin jümüin shapaale jaaʼin jee süpüla yalayalainjatüin jaaʼin sünain tü kasa jüneekakat (1 Ped. 5:7). Katsüinreejeerü maʼin junoula nünain Jehová jiʼrapa nusoutuin shiʼipajee tü kasa juchuntakat nümüin. Anuu sünüiki Tabitha: «Süpülapünaa yootuin waya süchiki tü aainjünajatkat soʼutpünaa tü kasaalüükat achuntushii waya nümüin Jehová süpüla nnojoluin mojujiraain waya sünainjee jee mojujiraain wapüshi sutuma. Sünainjee tia weʼrüin jimatüin waaʼin nutuma Jehová».

16, 17. ¿Jamüsü anaka yootojiraale na kasaalüinjanakana süchiki tü kasa aainjünajatkat kasaalüinjanapa naya?

¹⁶ Loto sukuwaʼipa jünüiki otta kojutujiraa jia (Prov. 15:22). Wainma tü kasa naneeküinjatkat na wayuukana kasaalüinjanapa naya maʼaka saaʼin tü kaʼi kasaalüinjanakalü oʼu naya, jeʼrainjatüin tü nneerü nakataajakat sünain jee jeʼrashiinjanain na wayuu nounejaakana. Anashii yootule jia süchiki tü kasa jüneeküinjatkat. Jüneeka wanee kasa pansaaka sümaa tü sümakat tü Bibliakat otta juchunta kaalinwaa namüin na wawalayuu laülaakana aaʼin sünain anoujaa. Yootopa jia süchiki tia kamanee jia, jiyaawata saaʼu jamüin naaʼin na waneinnua otta nnojo ichein jia saaʼu jünüiki. Nachuntule jümüin na kachooinkana jia jaaʼinrüin wanee kasa nnojotka isain jüchiki jaaʼinra shia, jama talateerüin naaʼin jümaa soʼu kaʼikat tia. Isale jüchiki jaaʼinrüin tü nachuntakat jümüin jüküja shia namüin sümaa kemeʼeriain jünüiki (Col. 4:6). Jüküja namüin jüpüshi shiain keeʼireein jaaʼin talatüin jaaʼin otta kojutuin Jehová jutuma.

¹⁷ Eesüjaʼa kapüleere jüküjain süchiki tü kasa jüneekakat kasaalüinjanapa jia namüin na kachooinkana jia sutuma nnojoluin nanoujain wanaa jümaa. Nayaawateetpejeʼe saaʼu yootule jia namaa sümaa kamaneein jia namüin. Anuu nünüiki wanee wawala chejeʼewai India, Santhosh nünülia: «Sutuma nanoujain na wapüshikana sünain hinduismo nachuntuin wamüin waaʼinrüinjatüin tü kasa aainjünawaikat sünain tü nanoujakalü anain. Kojuyatua yootuin waya namaa süpüla nayaawatüin saaʼu jamüin nnojotka sünainpünaain waya tia. Süpüla anain naaʼin na wapüshikana waaʼinrüin waneirua kasa nachuntakat wamüin nnojotka mojuin nümüin Jehová, maʼaka saaʼin wooʼulaain nayain aneeküin tü ekünajatkat sünain tü kasaalüükat jee waneeküin nnojoluin eein yonna sümaa eeʼirajaa, jama nnojoluin anashin shia namüin na kachooinkana waya».

18. ¿Kasa naaʼinrüinjatka na kasaalüinjanakana süpüla anainjatüin sukuwaʼipa natuma tü kasaalüükat? (1 Corinto 14:40; piirakaa sümüin tü ayaakuaakat).

¹⁸ Ana jutuma sukuwaʼipa süpüshuaʼa tü kasa jaaʼinrüinjatkat. Jütüjaale saaʼu palajana tü jaaʼinrüinjatkat kasaalüinjanapa jia nnojoleerü shapaain maʼin jaaʼin (paashajeʼera 1 Corinto 14:40). Anuu nünüiki wanee wawala chejeʼewai Taiwán, Wayne nünülia: «Sülüʼülapa süpüla kasaalüin waya, yootushii waya namaa na akaalinjainjanakana waya. Yootushii waya palajana süchiki tü aainjünajatkat otta ekirajaashii waya sünain tü sukuwaʼipainjatkat watuma tü kasaalüükat süpüla anainjatüin maʼin sukuwaʼipa». Sutuma kojutuin jümüin na juunejaakana antamaatajana jia soʼu tü oora jiʼitaakat napüleerua.

19. ¿Kasa naaʼinrüinjatka na kasaalüinjanakana süpüla anainjatüin sukuwaʼipa tü kasa aainjünajatkat kasaatpa naya?

¹⁹ Anasü jülüjale waaʼin tü eekat süpüla eejaʼalaa sümüin (Prov. 22:3). Eere kepiain jia eesüjaʼa sürütkawaire wayuu sünain tü shikiirakat kasaalüü mayaainjeʼe nnojoluin nounejaaushin. Anasü jülüjale jaaʼin tü jaaʼinrüinjatkat suulia sülatüin tia jümüin. Jüküja namüin na jüpüshi nnojoliikana anoujain wanaa jümaa jamüin sukuwaʼipa watuma tü aainjünawaikat shikiira kasaalüü jee jamüin nnojotka waaʼinrüin waneirua kasa. Jiiʼiyata namüin tü pütchi suluʼukat jw.org «¿Cómo son las bodas de los testigos de Jehová?», makat. Eeshii süpüla jüneeküin wanee wawala laülaakai aaʼin sünain anoujaa süpüla süʼlaülajanainjachin nia tü miʼiraakat süpüla anainjatüin sukuwaʼipa tü aainjünakat sünain (Juan 2:8). Jüküjale nümüin süchiki süpüshuaʼa tü kasa aneekünüitpakat mapüleejeerü nümüin nükaalinjain jia süpüla anainjatüin sukuwaʼipa otta saainjünajatüin maʼaka sukumajünüin akuwaʼipa paala.

20. ¿Kasa jülüjainjatka naaʼin na kasaalüinjanakana nakumajaka sukuwaʼipa kasaalüü?

²⁰ Eesüjaʼa shapaale jaaʼin sutuma wainmain tü kasa jukumajüinjatkat akuwaʼipa sünain tü aainjünajatkat kasaalüinjanapa jia. Kojutusü maʼin jümüin tü kaʼi kasaatkalü oʼu jia shialeekajaʼa sükajee jiʼyanaajiraainjanain piamale nümüin Jehová. Müsüjeseʼe ana jutuma sukuwaʼipa tü kasa jaainjainjatkat sünain kasaalüü süpüla kojutuinjachin Jehová sünainjee. Juuʼulaa niain Jehová oʼunirüin sukuwaʼipa tü kasa jüneekakat jukumajapa sukuwaʼipa kasaalüü, soteetka jaaʼin mapa tia shiain wanee kaʼi talataka atuma jaaʼin (Sal. 37:3, 4).