Asakinnaka Anain

◼ ¿Wekirajüinjanache suluʼupünaa Internet na wayuu kepiakana suluʼu wanee mma naata?

Eeshii wawalayuu aapaakana Internet süpüla aküjaa pütchi otta ekirajaa na wayuu kepiakana suluʼu wanee mma eere süpülajünüin tü aküjaakat pütchi. Eeshii na wayuu anoujakana sünainjee tia. Nnojotpajaʼa anain waluwataale mensaaje otta yootule waya suluʼupünaa Internet sümaa wayuu nnojotka weʼraajüin (paashajeʼera Waʼyataain Nümüin Maleiwa ojuʼitaka juulioʼu 2007, süpana 3, alijunaikiruʼu). Mayaapejeʼe waküjeein pütchi namüin na wayuu aapajeekana nünüiki Maleiwa, nnojotsü anain waainjüle tia suluʼupünaa Internet. Süka jamüin, nnojoluin watüjaain saaʼu waashajaale neʼe sümaa wayuu mojulaasü otta namaa na akatalaakana nuulia Jeʼwaa süpüla ekirajaa alawaa (1 Cor. 1:19-25, TNM; Col. 2:8). Süka eein tü mma apülajünakalü aluʼu tü aküjaakat pütchi, nnojotsü anain waluwataale mensaaje jee yootule waya sümaa wayuu suluʼupünaa Internet. Jülüja waaʼin eein süpüla naliʼrajünüin na wawalayuukana sünainjee tia waainjakat. Nnojo waküjüin pütchi suluʼupünaa Internet namüin na suluʼukana wanee mma naata.

Waküjüle pütchi nümüin wanee wayuu apasiajaakai suluʼumüin woumain, nnojoishi wekirajüinjachin nia nuuyantapa nuumainpaʼamüin. Aluʼusaʼa süküjünüle wamüin sutuma Weteet. Tü waainjüinjatkat shia weeʼiyatüin nümüin tü paajinakat jw.org süpüla nüchajaain karaloukta jee shiale nuchuntüin nikirajünüin sünain tü Wiwüliakat chaa nuumainpaʼa. Pejere wanee piichi outkajaalee eere kepiain nia, wama nümüin nürütkaaiwa. Anale nümüin nünaʼlaanüin amüin, wepiraja tü karalouktakat Persona que mostró interés (S-43), waapa shia nümüin chi seküretaariokai eere woutkajaain. Nüjüteetka shia Weteetmüin suluʼupünaa jw.org. (Pütchikat tüü, nnojotsü süpülajatüin Kolonpia). Aainjünajatü tia süpüla nükaaliinjünüin sutuma tü Weteet chakat eere kepiain nia (paashajeʼera Waʼyataain Nümüin Maleiwa ojuʼitaka juunioʼu 2014, süpana 7, otta Waʼyataain Nümüin Maleiwa ojuʼitaka nowienpüroʼu 2011, süpana 2).

Eere wanee wekirajüin okolojookai suluʼumüin wanee mma naata jee wekirajüichipale suluʼupünaa Internet wanee wayuu naataka oumain, woonooinjatü amaa tü aküjünüitpakat wamüin. Eepajaʼa süpüla ayatüin wekirajüin nia nükaaliinjünaleepa natuma na wawalayuu kepiakana suluʼu tia mmakat. Kepiale nia suluʼu wanee mma apülajünaka aluʼu tü aküjaakat pütchi, eeinjatü waaʼin sünain tü wamüinjatkat nümüin müleka waküjüinjatüle nümüin tü sümakat tü Wiwüliakat suluʼupünaa Internet, süka teleepono jee waluwataainjanale karaloukta nümüin (Mat. 10:16).