Keeʼireesü saaʼin wayuu anainjatüin sukuwaʼipa mapeena
¿Kasa keeʼireeka paaʼin püpüleerua jee süpüleerua püpüshi mapeena? Keeʼireesü paaʼin talatüin paaʼin namaa, nnojoluin ayuulin pia namaa, nnojoluin kasain shapaain atuma paaʼin namaa otta anain pukuwaʼipa namaa. Shiaʼaya keeʼireeka saaʼin tia wayuu maʼleekalia anainjatüin sukuwaʼipa mapeena.
Eeshii waneinnua wayuu jülüjakana aaʼin nnojoleerüin nasaʼwatüin tia süka eein süpüla sülatalaa sümüin wanee kasa maʼaka saaʼin sutuma tü ayuuliikat COVID-19. Wainma wayuu manneetsekana sutuma jee outakana. Wainmajeseʼe wayuu jülüjaka aaʼin nnojoleenain talatüin naya watta kaʼi.
Sutuma tia, wainma wayuu wainmajakana aaʼin jee achajaakana kaalinwaa shiiʼiree anain nakuwaʼipa watta kaʼi. Eetaashii wayuu jülüjakana aaʼin aneerüin nakuwaʼipa sutuma kasa pülasü. Eeshii na jülüjakana aaʼin aneerüin nakuwaʼipa watta kaʼi koleejiale naya suluʼu eʼikülee miyoʼu, wainmale nneerü namaʼana otta kamaneere naya.
¿Eesüche süpüla anain sukuwaʼipa wayuu watta kaʼi sutuma tü waashajaaitpakalü achiki? Süpüla watüjaain saaʼu tia, jülüja paaʼin tüü:
¿Kasa aneetka atuma pukuwaʼipa watta kaʼi?
¿Aneetche pukuwaʼipa sutuma pikirajaain suluʼu eʼikülee miyoʼu jee sutuma tü nneetkat?
¿Aneetche pukuwaʼipa watta kaʼi kamaneere pia?
¿Jaleerü puusütüin anain tü anainjatkalü atuma pukuwaʼipa watta kaʼi?
Karaloʼutakat tüü süküjeerü pümüin tia.