¿Shiache aneetka atuma nukuwaʼipa wanee wayuu watta kaʼi kamaneere nia?

Kakaliairü jülüjain naaʼin na wayuukana aneerüin nakuwaʼipa watta kaʼi kamaneere naya. Anuu nünüiki Confusio, wanee ekirajüi kepiakai soʼunnaa tü juyakat 551 otta 479 süpülapünaa wakalia: «Nnojo paainjain namüin na waneinua wanee kasa eekai nnojoluin saainjüneein pümüin».a Wainma wayuu chejeʼewalii Asia anakana amüin tü nümakat.

TÜ NAAʼINRAKAT WAINMA WAYUU

Wainma wayuu jülüjakana aaʼin aneerüin nakuwaʼipa watta kaʼi nnojoliire mojulaain naya. Makalaka kachiiruain naaʼin kojutuinjatüin wayuu natuma, anainjatüin nanüikipala, anainjatüin nakuwaʼipa sümaa wayuu otta wuleinjatüin naaʼin. Anuu sünüiki Linh, wanee wayuu kepiaka Vietnam: «Jülüjapuʼusü taaʼin aneerüin takuwaʼipa anale takuwaʼipa suʼupala wayuu jee pansaale tanüiki».

Eitajüsü eküülü tia majayütkat namüin na wayuu maletsesaliikana jee mepiakana.

Eeshii wayuu aaʼinrakana kasa anasü sümüin wayuu süka shiain ekirajünüin anain naya suluʼu tü iküleesia kaluʼukat naya. Anuu nünüiki Hsu-Yun, wanee wayuu kepiakai Taiwán: «Outule wanee wayuu, eesü süpüla anain nukuwaʼipa jee müliain nia süpüla kaʼikat süpüshuaʼa sünainjee tü kasa naaʼinrakat kataiwaʼaya noʼu, shia ekirajünapuʼuka anain taya tia».

TÜ EEKAT SÜNAINJEE TIA

Sajaʼttiamüin kaʼikat mapüsasü maʼin jee shapaasü saaʼin tia wayuukot jee shiyuujüin süchonkai.

Waaʼinrüle kasa anasü sümüin wayuu aneerü wakuwaʼipa. Nnojotpejeʼe neʼrüin waneinnua wayuu tü kasa anasü keeʼireekat naaʼin naaʼinrüle neʼe tia. Anuu sünüiki Shiu Ping, wanee wayuu kepiaka chaa Hong Kong: «Waaʼinrüle kasa anasü sümüin wayuu eesü nnojorüle saaʼinrüin kasa anasü wapüleerua, tayaawata aaʼu tia süka sülatüirüin tamüin. Jülüjapuʼusü maʼin taaʼin anainjatüin takuwaʼipa nümaa taʼwayuuse, tachon otta tü kasakalüirua tatuma. Amülasü neʼe taaʼinrüin tia, oʼunushi taʼwayuuse toulia otta tepijüin tachon tamüiwaʼa».

Nnojotsü anain maʼin sukuwaʼipa wayuu sutuma tü iküleesiakat, wainma na ayaawatakana saaʼu tia. Anuu sünüiki Etsuko, wanee wayuu kepiaka chaa Japón: «Taya akumajapuʼuka sukuwaʼipa tü kasa naaʼinrajatkat na jimaʼaliikana jee na majayünnüükana suluʼu tü iküleesia kaluʼupuʼukat taya. Nnojotsü anain tamüin tü naaʼinrakat na wayuu suluʼukana tü iküleesiakat, yarüttüsü nakuwaʼipa, aʼülüjiraashii naya saaʼu jaralinjachin laülaain napüleerua otta nnojotsü anain sukuwaʼipa natuma sünneetse tü iküleesiakat».

«Jülüjapuʼusü maʼin taaʼin anainjatüin takuwaʼipa nümaa taʼwayuuse, tachon otta tü kasakalüirua tatuma. Amülasü neʼe taaʼinrüin tia, oʼunushi taʼwayuuse toulia otta tepijüin tachon tamüiwaʼa» (SHIU PING, HONG KONG)

Eeshii wayuu anoujashii mojukana aaʼin sutuma amülain neʼe naaʼinrüin kasa anasü. Shia alataka tia sümüin Van, wanee wayuu kepiaka chaa Vietnam. Anuu sünüiki: «Süpüla anainjatüin takuwaʼipa natuma na tapüshi outuinnapakana, eʼikajaapuʼusü taya süchon wunuʼu, süsii wunuʼu otta eküülü eere taʼwaajüin naya. Mayaapejeʼe taaʼinrapuʼuin tia soʼu wainma juya, ayuuishi maʼin chi taʼwayuusekai otta 20 suuyase tachon soʼu sünaajaain, koleejiapuʼusü shia suluʼu wanee mma naata».

NNOJOISHII KAMANEEINJANAIN NEʼE WAYA

Mayaainjeʼe kamaneeinjanain waya namüin na waneinnua, nnojotpejeʼe shiain neʼe aneerüin atuma wakuwaʼipa watta kaʼi. Süpüla pütüjaain saaʼu tia, jülüja paaʼin tü sümakat tü Bibliakat.

WAINMA WAYUU NNOJOLIIKANA AAʼINREEIN KASA ANASÜ.

«Wainma maʼin kasa mojusü eeka nünainjee neʼe waneeshia wayuu kaainjalakai» (ECLESIASTÉS 9:18).

Mayaainjeʼe keeʼireein waaʼin kamaneein waya, eepejeʼe süpüla mojuin wakuwaʼipa watta kaʼi natuma na kapülakana aaʼin nakuwaʼipa neʼe namüiwaʼa. Jülüja waaʼin tüü: sükalioʼu wanee ayuulii eekai keemain maʼin, eesüjaʼa süpüla poonooin namaa na sülaülakana mma nnojolinjachin pia pejepünaain nanain na waneinnua. ¿Jama nnojorüle noonooin na waneinnua sümaa tia? Eeshiijaʼa süpüla ayuulin na aaʼinmajakana nakuwaʼipa natuma na moonooinkana sümaa tia pütchikat.

WAINMA NA NNOJOLIIKANA AYAAWATÜIN SAAʼU TÜ ANASÜKAT SUULIA TÜ MOJUSÜKAT.

«Eesü wanee wopu anaka noʼuluʼu wanee wayuu, süntireechipejeʼe nia sünainmüin tü outaakat» (PROVERBIOS 14:12).

Wainma wayuu aaʼinraka tü anakat naaʼinruʼu, nayaawatapejeʼe saaʼu mapa nnojoluin anain tü naaʼinrakat. Jaʼitairü nayaawatüin saaʼu tia, eʼreenaʼaya naya kasa mojusü sünainjee tü naaʼinrakat.

NNOJOTSÜ WATÜJAAIN AAʼU TÜ ALATEETKAT WAMÜIN.

«Nnojotsü jütüjaain aaʼu tü alatajateetkat jümüin mapeena» (SANTIAGO 4:14).

Jaʼitaichi wanee wayuu eekai kamaneein maʼin, eeshi süpüla outalaa nümüin. Jamüsüjaʼa soʼunnaa tü ayuuliikat COVID-19, wainma wayuu outakana sutuma nakaalinjain na ayuuikana. Jülüjataa waaʼin tü alatakat sümüin Liting, wanee wayuu kepiakat chaa China, kemionsitshi chi süshikai, outaka nia. Anuu sünüiki: «Nnojotsü tatüjaain aaʼu jamüin makaʼa outuin nia sümaa wayuuin kamaneeshi nia, tütüin nia, nnojoluin yaletüin naaʼin. Nia neʼe outaka nümüiwaʼa naʼakajee na wayuu eejanakana suluʼu kemion».

Watüjaaitpa aaʼu nnojoluin aneerüin wakuwaʼipa watta kaʼi sutuma kamaneein neʼe waya. ¿Kasa waaʼinrüinjatka süpüla anain wakuwaʼipa watta kaʼi? Acheküsü eeinjatüin wanee pütchi pansaaka maʼin oʼunirajatka wakuwaʼipa. Sükajee tia pütchikat, wayaawateerü aaʼu tü wasakitkalü anain jee tü waaʼinrajatkat süpüla anain wakuwaʼipa watta kaʼi. ¿Jaleetche wantüin anain tia pütchikat?

a Pütüjeere sooʼomüin tü nikirajakalü anain Confusio, paashajeʼera tü karaloʼutakat El hombre en busca de Dios ekirajaaya 7, pütchi 31-35, (alijunaikiruʼusü). Nakumala shia na aküjaliikana pütchi nüchiki Jeʼwaa. Eesü shiaʼaya suluʼu www.pr2711.com.