EKIRAJAAYA 47
¿Kasa waaʼinrajatka süpüla aijiraain maʼin waya?
«Ayataʼaya aijiraain jia, jama niain Maleiwa chi palajachikai alin apüla wayuu» (1 JUAN 4:7).
JAYEECHI 109 Aijiraainjana waya süka süpüshuaʼa waaʼin
SÜCHIKI TÜ WEKIRAJAAINJATKALÜ ANAINa
1, 2. (1) ¿Jamüsü nümaka Pablo shiainjatüin «alanaʼaleeinña maʼin tü aliikalü apüla wayuu»? (2) ¿Jarat tü pütchi wasoutuinjatkalü eʼipajee?
NAASHIN chi aluwataaushikai Pablo «ayateeria eein tü kanoulaakat, ayateeria waʼatapüin sunoutaain wanee kasa jee ayateeria alin wapüla wayuu. Shiapejeʼe alanaʼaleeinña maʼin tü aliikalü apüla wayuu» (1 Cor. 13:13). Nüküjain Pablo nnojoleerüin choʼujaain mapeena waʼatapajüin paʼaraiisüinjatüin tü mmakat süka weʼreerüin shikeraajüin. Ayateetpejeʼe choʼujaain waneepia alin wapüla Jehová jee alin wapüla na wayuukana. Akooʼomüinraajeerü tü naalinkat wapüla shiʼipaʼaya.
2 Sutuma ayatüinjatüin alin wapüla wayuu waneepia, anasü wasoutule shiʼipajee pütchikat tüü: «¿Jamüshii aijiraainjanaka waya? ¿Kasa waaʼinrajatka süpüla aijiraain maʼin waya? ¿Kasa waaʼinrajatka suulia maalinjiraain waya?».
¿JAMÜSHII AIJIRAAINJANAKA WAYA?
3. ¿Jamüshii aijiraainjanaka waya?
3 ¿Jamüshii aijiraainjanaka waya waneʼewai wakua? Aijiraale waya shiyaawateerü aaʼu wayuu wayain na anoujashii shiimainshiikana. Müshi Jesús namüin na aluwataaushikana: «Aijiraale jia waneʼewai jukua, shiyaawateerü aaʼu wayuu tekirajanain jia» (Juan 13:35). Aijiraale waya, paaʼinweena waya. «Alinjatü jüpüla wayuu, jama shiain kottiraain atuma wayuu tia», müshi Pablo (Col. 3:14). Eesü waneʼeya kasa aijiraainjanaka aaʼujee waya namaa na wawalayuukana. Nüküjain tia chi aluwataaushikai Juan wanaa sümaa nümüin namüin na anoujashiikana mayaa: «Chi wayuu aikai apüla Maleiwa alinjachi nuwala nüpüla» (1 Juan 4:21). Aijiraale waya, aishijaʼamata wapüla Maleiwa.
4, 5. Püküja sükajee wanee sukuwaʼipa jamüin aijeechika wapüla Maleiwa aijiraale waya.
4 ¿Jamüshi aijeechika wapüla Maleiwa aire wapüla na wawalayuukana? Süpüla wayaawatüin saaʼu tia, jülüjataa waaʼin tüü: jamüsüjaʼa tü waaʼinkat shiʼyateʼerüin tü washakat süpüla süntajatüin wataluʼupünaa süpüshuaʼa. Eesü naapaale wanee tottoot tü wajapükiikat süpüla nütüjaain saaʼu matsüinre jee katsüinre sukua tü waaʼinkat. Naaʼinrüin tia süpüla nütüjaain saaʼu ayuuire tü waaʼinkat. ¿Kasa watüjaka sünainjee tia akuwaʼipaakat?
5 Nünaʼlaapa wanee tottoot sukua tü waaʼinkat, eesü süpüla nütüjaain saaʼu anale jee ayuuire shia. Müsia neʼe tü waaʼinrajatkat, eesü süpüla watüjaain saaʼu muloʼule tü naalinkat Maleiwa wapüla wayaawatüle saaʼu jeʼtsüin naalin wapüla na waneinnua. Wayaawatüle saaʼu sumotsojuin naalin wapüla na wawalayuukana, wayaawateerü saaʼu sumotsojuin naalin Maleiwa wapüla. Jaʼyale waaʼu alin maʼin wapüla na wawalayuukana, muloʼujaʼamata tü naalinkat Maleiwa wapüla.
6. ¿Jamüsü eejüinjatka waaʼin wayaawatüle saaʼu sumotsojuin naalin wapüla na wawalayuukana? (1 Juan 4:7-9, 11).
6 Eejüinjatü waaʼin wayaawatüle saaʼu sumotsojuin naalin wapüla na wawalayuukana. Sülatüle wamüin tia, eemiajaasü wanoula. Anuu nünüiki chi aluwataaushikai Juan süchiki tia: «Chi wayuu maalinkai apüla nuwala eerejeʼeya niʼrüin nia, niaka aijeematüin Maleiwa nüpüla eerejeʼe nnojolin niʼrüin nia» (1 Juan 4:20). ¿Kasa watüjaka sünainjee tia? Shia talateechin Jehová wamaa aijiraale waya waneʼewai wakua (paashajeʼera 1 Juan 4:7-9, 11).
¿KASA WAAʼINRAJATKA SÜPÜLA AIJIRAAIN MAʼIN WAYA?
7, 8. ¿Kasa waaʼinrajatka süpüla aijiraain waya?
7 Kojuyatua süküjain tü Bibliakat aijiraainjanain waya waneʼewai wakua (Juan 15:12, 17; Roma 13:8; 1 Tes. 4:9; 1 Ped. 1:22; 1 Juan 4:11). Ojuʼitüsü suluʼujee waaʼin aire wapüla wayuu, nnojotsü jaralüin eʼrüin tia. ¿Kasakaʼa waaʼinrüinjatüin süpüla neʼrüin na wawalayuukana alin naya wapüla? Neʼreerü tia saaʼujee tü wamakat jee tü waaʼinrakat napüleerua.
8 Anuu waneirua kasa waaʼinrajatka süpüla alin wapüla na wawalayuukana: «Jüküjiraainjatü tü shiimainkat» (Zac. 8:16). «Anajiraainjana jia namaa na waneinnua» (Mar. 9:50). «Anashii palajanale jia sünain kojutuinjanain jutuma na juwalayuukana» (Roma 12:10). «Kamaneejiraainjana jia» (Roma 15:7). «Ayataʼaya jülatirüin sooʼopünaa jaaʼin naainjala na waneinnua» (Col. 3:13). «Ayataʼaya jükaalinjiraain waneʼewai jukua soʼunnaa jiʼrüin müliaa» (Gal. 6:2). «Shiakalaka anain aluʼu jümüliarüle jaaʼin waneʼewai jukua» (1 Tes. 4:18). «Anakajaʼa ayatüleʼeya jia [...] jükatchinjiraain jaaʼin» (1 Tes. 5:11). «Anakajaʼa [...] juʼuraajiraale jüpüleeruajiraa» (Sant. 5:16).
¿Kasa waaʼinrajatka süpüla wakatsüinrüin naaʼin wanee wawala mojukai aaʼin? (Paashajeʼera tü pütchikat 7-9).
9. ¿Jamüshii aika wapüla na waneinnua wamüliajüle naaʼin? (Piirakaa sümüin tü ayaakuaakat).
9 Wekirajaa süchiki wanee kasa waaʼinrajatka süpüla alin wapüla na waneinnua. Anuu tü nümakat Pablo: «Shiakalaka anain aluʼu jümüliarüle jaaʼin waneʼewai jukua». ¿Jamüshii aika wapüla na waneinnua wamüliajüle naaʼin? Saashin wanee karaloʼuta aashajaaka süchiki tü Bibliakat, tü pütchi «amüliajaa aaʼin» nümakat Pablo shia yalale wanee wayuu nüʼütpaʼa wanee wayuu eʼrakai müliaa süpüla nükatchinrüin naaʼin. Wamüliajüle wanee wawala soʼunnaa müliaa, wakaalinjeechi nia süpüla ayatüin niʼyataain nümüin Jehová. Wamüliajüle naaʼin na wawalayuukana, jaʼyeerü waaʼu alin naya wapüla (2 Cor. 7:6, 7, 13).
10. ¿Kaseerü waaʼinraka wamüliajüle naaʼin na waneinnua?
10 Sümülialaale naaʼin wanee wayuu naalin chi wayuu eʼrakai müliaa, nüchajaajeerü sukuwaʼipa süpüla niiʼiyatüin naalin nüpüla. Müshi Pablo nüchiki Jehová: «Nia kanainjeejachika tü aliikalü apüla wayuu jee nia chi amülialakai saaʼin wayuu» (2 Cor. 1:3). Sünainjee tü nümakat Pablo, wayaawata aaʼu jamüin nümüliajaka Jehová saaʼin wayuu waneepia sümaa nüchajaain sukuwaʼipa süpüla niiʼiyatüin alin wayuu nüpüla. Niakalaka kanainjeejachin tü aliikalü apüla wayuu. Sutuma müin nukuwaʼipa Maleiwa, nümüliajeein waaʼin weʼrapa müliaa (2 Cor. 1:4). Jamüsüjaʼa eejeere süparalüin wüin jemetüsü, süsamatüin naaʼin wanee wayuu eekai miñaasüin. Müsia neʼe tü naaʼinrakat Jehová, müsü nüsamatakai naaʼin na eʼrakana müliaa nükatsüinrapa naaʼin. ¿Kasa waaʼinrajatka süpüla wamüliajüin naaʼin na waneinnua jee wakatsüinrüin naaʼin maʼaka naaʼinrüin shia Jehová? Shia waʼyataale süchiirua waneirua kasa süpüla wountuin tia. Wekirajaa süchiki tia.
11. Saashin Colosas 3:12 otta 1 Pedro 3:8, ¿kasa waaʼinrajatka süpüla ayatüin aijiraain waya jee ayatüin wamüliajiraain?
11 ¿Kasa waaʼinrajatka süpüla ayatüin aijiraain waya jee ayatüin wamüliajiraain? Kachipünaainjatü waaʼin nakuwaʼipa na waneinnua, aijiraainjana waya maʼaka alin nuwalayuu wanee wayuu nüpüla otta kamaneejiraainjana waya (paashajeʼera Colosas 3:12; 1 Pedro 3:8). ¿Kasa wounteetka müle wakuwaʼipa? Mapüleejeerü wamüin wamüliajüin naaʼin na wawalayuukana, kachipünaajeena naya waaʼin otta wachajaajeerü maʼin sukuwaʼipa süpüla wakatsüinrüin naaʼin soʼunnaa neʼrüin müliaa. Naashin Jesús «tü naashajaakalü achiki wanee wayuu shia tü suluʼukat naaʼin. Wanee wayuu eekai anamiain, aashajaashi süchiki kasa anasü süka anain tü suluʼukat naaʼin» (Mat. 12:34, 35). Wamüliajüle naaʼin na wawalayuukana soʼunnaa müliaa, jaʼyeerü waaʼu alin naya wapüla.
¿KASA WAAʼINRAJATKA SUULIA MAALINJIRAAIN WAYA?
12. (1) ¿Kasa eejüinjatka oulia waaʼin? (2) ¿Kasa wasakireʼerüinjatka anain waaʼin?
12 Keeʼireesü maʼin waaʼin ayatüin aijiraain waya (1 Juan 4:7). Jülüjainjatpejeʼe waaʼin tü nümakat Jesús wanaa sümaa nümüin: «Maalinjiraajeerü wayuu jooutpa maʼin tü mojulawaakat» (Mat. 24:12). Nnojotsü shiain nüküjeein achiki Jesús nooʼulaayaa nameenain napüshuaʼa na nikirajüinkana suulia aijirawaa. Eejüinjatpejeʼe waaʼin suulia washatüin nakuwaʼipa na wayuu nnojoliikana aijiraain. Anasü wasakirüle waaʼin sünain tüü: «¿Kasa waaʼinrajatka süpüla wayaawatüin saaʼu aire maʼin wapüla na wawalayuukana?».
13. ¿Kasa kapüleejeetka atuma alin wapüla na wawalayuukana?
13 Süpüla watüjaain saaʼu aire maʼin wayuu wapüla, jülüjainjatü waaʼin tü wakuwaʼipakat namaa na waneinnua (2 Cor. 8:8). Anuu tü waaʼinrajatkat naashin chi aluwataaushikai Pedro saainjünapa kasa wamüin: «Shia alanaʼaleeinjatka maʼin jümüin aijiraain jia, chi wayuu aikai apüla wanee wayuu nülatirüin waneepia sooʼopünaa naaʼin tü kasa aainjünakat nümüin» (1 Ped. 4:8). Wayaawateerü aaʼu shiimainre alin wapüla na wawalayuukana sünainjee tü wakuwaʼipakat namaa mojupa natuma wanee kasa jee naainjale kasa mojusü wamüin.
14. Saashin 1 Pedro 4:8, ¿jeʼtsüinjatü maʼin naalin wapüla na wawalayuukana? Püküja sükajee wanee sukuwaʼipa.
14 Wekirajaa süchiki tü nümakat Pedro. Suʼttianainjee wetsiikulo 8 nüküjain Pedro shiain alanaʼaleeinjatüin maʼin wamüin aijiraain waya. Tü pütchikat «shia alanaʼaleeinjatka maʼin jümüin» nümaka amüin Pedro, «ayurulaa» maluʼulu shia. Nüküjain Pedro sajaʼttiamüin wetsiikulo 8 walatirüinjatüin sooʼopünaa waaʼin tü kasa mojusü naainjakat wamüin na wawalayuukana. Waaʼinrüle tia, jaʼyeerü waaʼu alin maʼin naya wapüla. Anuu wanee sukuwaʼipa süpüla wayaawatüin saaʼu tia: jamüsüjaʼa eere wanee meesa eekai rayaain maʼin, wachajaain süchiki wanee kuluulu süpüla weʼitaain shia sooʼopünaa. Wayuruluin tia kuluutkat sooʼopünaa tü meesakat süpüla nnojoluin jaʼyain tü mojukat sünain. Müsia neʼe tü waaʼinrajatkat shiimainre alin wapüla na wawalayuukana, müsü weʼitaainjatkai saaʼin wanee kuluulu sooʼopünaa tü kasa mojukat natuma.
15. ¿Kasa waaʼinreetka aire maʼin wapüla na wawalayuukana? (Colosas 3:13).
15 Walatireerü sooʼopünaa waaʼin naainjala na wawalayuukana shiimainre alin naya wapüla. Waainjeerü tia jaʼitairü kapüleein maʼin wamüin motuin waaʼin naainjala (paashajeʼera Colosas 3:13). Motule waaʼin naainjala na waneinnua, jaʼyeerü waaʼu aijiraain maʼin waya otta talateechi Jehová watuma. ¿Kasa amaa waaʼinrajatka süpüla motuin waaʼin naainjala na waneinnua? ¿Kasa waaʼinrajatka suulia jashichin waya namüin na aainjakana kasa mojusü wamüin?
Wanaajaa suluʼu wekii tü kasa anasü weʼrakat namaa na wawalayuukana, maʼaka wanaajaain wanee ayaakuaa anaka maʼin. (Paashajeʼera tü pütchikat 16 otta 17).
16, 17. ¿Kasa waaʼinrajatka süpüla walatirüin sooʼopünaa waaʼin naainjala na waneinnua wamüin? Püküja sükajee wanee sukuwaʼipa (piirakaa sümüin tü ayaakuaakat).
16 Waaʼinmaa tü kasa anakat natuma na wawalayuukana. Jülüjataa paaʼin jutkatüin pia namaa na wawalayuukana sümaa talatüin paaʼin namaa. Shiasaʼa noʼunajanapa na wawalayuukana, piyuʼlaka piyaakua namaa, kojuyasü ayaakuaa piyuʼlaka. Saʼakajee tü ayaakuaa piyuʼlakat, piʼrüin niyaakua wanee wawala jashichikai oʼupünaa. ¿Kaseetka paaʼinrüin sükajee tia ayaakuaakat? ¿Aashin puborrajeerüin shia sutuma eeitpain pümaʼana waneirua ayaakuaa eere talatüin naaʼin napüshuaʼa na wawalayuukana?
17 Tü ayaakuaa wanaajaakat müsü aka saaʼin tü wanaajaakat suluʼu wekii süchiki tü kasa anasü alatakat wamüin. Shiimain sotuin waaʼin tü kasa anasü alatakat wamüin namaa na wawalayuukana. ¿Jama naainjale jee nüküjale wanee kasa mojusü wamüin wanee wawala? ¿Wanaajaajeetche tia suluʼu wekii? Anasü wasünneʼerüle tia suluʼujee wekii maʼaka waborraajüin tü ayaakuaa mojukat (Prov. 19:11; Éf. 4:32). Mapüleejeerü wamüin walatirüin sooʼopünaa waaʼin tü naainjakat wanee wawala wamüin sutuma wainmain tü kasa anasü weʼrakat nümaa. Shia wanaajaainjatka suluʼu wekii tü kasa anasü weʼrakat nümaa wanee wawala.
¿JAMÜSHII AIJIRAAINJANAKA MAʼIN WAYA MAAʼULU?
18. ¿Kasa wekirajaaitpaka anain sünain ekirajaayakat tüü?
18 ¿Jamüshii aijiraweeka maʼin waya? Soto waaʼin tü wekirajaaitpakalü anain. Aire wapüla na wawalayuukana, aishijaʼamata wapüla Jehová. ¿Kaseerü waaʼinraka aire wapüla na wawalayuukana? Wamüliajeerü naaʼin süpüla weeʼiyatüin naalin wapüla. ¿Kasa waaʼinrajatka süpüla ayatüin aijiraain maʼin waya? Wachajaainjatü sukuwaʼipa süpüla walatirüin sooʼopünaa waaʼin naainjala na waneinnua.
19. ¿Jamüshii aijiraainjanaka maʼin waya maaʼulu?
19 ¿Jamüshii aijiraainjanaka maʼin waya maaʼulu? Müshi Pedro: «Alüʼütsü maʼin tü kaʼi sajaʼttajatkalü oʼu kasa süpüshuaʼa [...]. Shia alanaʼaleeinjatka maʼin jümüin aijiraain jia» (1 Ped. 4:7, 8). Sümaʼainruʼu sülüʼülüin maʼin tü kaʼi sajaʼttajatkalü oʼu kasa süpüshuaʼa, ¿jameerü sukuwaʼipa wayuu wamüin? Anuu tü nümatüjütkalia Jesús namüin na nikirajüinkana: «Süʼürüleena jia wayuu maʼleekalia saaʼujee tekirajanain jia» (Mat. 24:9). Süpüla wachecherüin waaʼin soʼunnaa saainjünüin tia wamüin, paaʼinwainjana waya. Aijiraale maʼin waya namaa na wawalayuukana, nnojoleena mojujiraain waya nutuma Satanás (Col. 3:14; Filip. 2:1, 2).
JAYEECHI 130 Moto waaʼin saainjala wayuu
a Aijiraainjana maʼin waya maaʼulu namaa na wawalayuukana. ¿Jamüshii aijiraainjanaka maʼin waya namaa na wawalayuukana? ¿Kasa waaʼinrajatka süpüla aijiraain maʼin waya?