Waaʼinrajatka wainmajüle waaʼin

1, 2. (1) ¿Kasa eeka süpüla wainmajüin aaʼujee waaʼin? (2) ¿Kasa wekirajaajeetka anain sünain ekirajaayakat tüü?

EESÜ wainmajüle waaʼin wapüshuaʼa saaʼu wanee kasa.a Jamüshijaʼa wanee jimaʼai, eesüjaʼa wainmajüle naaʼin airejeʼe nüpüla Jehová, nnojoikalaka woutiiseein nia sünainjee tia. Eetaashi joo wanee wawala aaʼinmaakai maʼin tü niʼyataainkat nümüin Jehová suulia kachiiruain naaʼin tü nneetkat, nüneeküin naaʼinrüin tia jimaʼaliiwaʼaya nia. Shiasaʼa kaʼwayuusepa nia jee kachonpa nia, nnojotsü asetaain tü nneetkat süpüla niyaʼlajüin tü choʼujaakat sümüin nüpüshi, müsüjeseʼe nüsakirüin naaʼin müleka analejeʼe tü nüneekakat paala. Eetaasü wanee wawala laülaairü mojuka aaʼin süka nnojoluitpain katchin maʼin shia süpüla saaʼinrüin tü saaʼinrapuʼukat paala. Sünainjee tü alatakat pümüin, eesüjaʼa püsakirüle paaʼin sünain tüü: «¿Aisüche taya nüpüla Jehová? ¿Amülasüche tü kasa tooʼulaaka süpüleerua taʼyataain nümüin? ¿Ayatayüichejeʼeya taya jaloulin nümüin Jehová?».

² Ayatülejeʼeya wainmajüin waaʼin saaʼu tia, amatchinjaajeerü wanoula otta ooʼulaweena waya suulia anoujaa nünain Jehová. Wekirajaajeerü anain sünain ekirajaayakat tüü tü sümakat tü Bibliakat wainmajüle waaʼin saaʼu shiimainre alin waya nüpüla Jehová, amürale neʼe saaʼin wamüin tü kasa waneekakat paala jee nnojoliire waya jaloulin nümüin Jehová saaʼin wamüin.

WAAʼINRAJATKA SÜPÜLA NNOJOLUIN WAINMAJÜIN WAAʼIN

3. ¿Kasa wekirajaainjatka anain wainmajüle waaʼin saaʼu wanee kasa?

³ Wainmajüle waaʼin saaʼu wanee kasa wekirajaa sünain tü sümakat tü Bibliakat süchiki tia. Katchinjeerü wanoula nünain Jehová, aleeweena maʼin waya nümaa otta wachechereerü waaʼin sünain tü anoujaakat (1 Cor. 16:13).

4. ¿Kasa waaʼinrajatka süpüla wekirajaain «sünain kasa süpüshuaʼa» süpüla watüjaainjatüin saaʼu shiimainrejeʼeya shia? (1 Tesalónica 5:21).

⁴ (Paashajeʼera 1 Tesalónica 5:21). Anuu sünüiki tü Bibliakat: «Jikirajaa sünain kasa süpüshuaʼa süpüla jütüjaain saaʼu shiimainrejeʼeya shia». Pikirajaa sünain tü sümakat tü Bibliakat süchiki tü kasa wainmajakalü aaʼujee paaʼin. ¿Kasa naaʼinrajatka chi jimaʼai wainmajakai aaʼin saaʼu airejeʼe nia nüpüla Jehová? Ekirajaainjachi nia sünain tü sümakat tü Bibliakat süpüla nütüjaain saaʼu tü nümakat Jehová süchiki tia.

5. ¿Kasa waaʼinrajatka süpüla waapajüin tü nümakat Jehová wamüin?

⁵ Waashajeʼerapa tü Bibliakat müshi naashajaakai Jehová wamüin. Eepejeʼe tü kasa waaʼinrajatkat süpüla waapajüin tü nümakat wamüin süchiki tü wainmajakalü aaʼujee waaʼin. Ekirajaainjana waya sünain waneirua wetsiikulo aashajaaka süchiki tü alatakat wamüin, wachajaa shia suluʼupünaa tü karaloʼuta nashajakat wamüin na wawalayuukana (Prov. 2:3-6). Wanaa sümaa wekirajaain süchiki tü alatakat wamüin, wachunta nümüin Jehová süpüla wayaawatüinjatüin saaʼu tü waaʼinrajatkat. Wachajaa waneirua wetsiikulo otta waneirua pütchi anouteʼerajatka tü alatakat wamüin. Anashiʼiya wekirajaale süchiki tü naaʼinrakat na wayuu namaiwajanakana, na saashajaakana achiki tü Bibliakat, na alatakana amüin tü alatakat wamüin.

6. ¿Kasa nüküjaka wamüin Jehová sünain tü outkajawaakat süpüla nnojoluinjatüin wainmajüin waaʼin?

⁶ Waapajüinña nünüiki Jehová sünain tü outkajawaakat. Waneepiale waya sünain tü outkajawaakat nüküjeerü wamüin Jehová tü waaʼinrajatkat süpüla wanouteʼerüin tü jülüjakat waaʼin süchiki wanee kasa. Eesüjaʼa nüküjeerüle shia sükajee wanee pütchi nikirajakalü anain wanee wawala jee shiale sükajee tü nümakat wanee wawala asoutakai shiʼipajee tü asakinnakalü anain (Prov. 27:17). Wekirajaa jooluʼu süchiki waneirua kasa wainmajakalü aaʼujee waaʼin otta tü waaʼinrajatkat süpüla nnojoluin wainmajüin waaʼin.

«¿KAPÜLASÜCHE NAAʼIN JEHOVÁ TAKUWAʼIPA?»

7. ¿Kasa eeka süpüla wasakirüin anain waaʼin?

⁷ Eesüjaʼa müirüle pünüiki: «¿Kapülasüche naaʼin Jehová takuwaʼipa?». Müleka jülüjale paaʼin nnojoluin kapülain naaʼin Jehová pukuwaʼipa, eesüjaʼa kapüleere pümüin aleewain pia nümaa, chi Kakumalakai kasa süpüshuaʼa. Eesüjaʼa müle tü jülüjakat naaʼin David, ponusü maʼin naaʼin kapülain naaʼin Jehová nukuwaʼipa wanee wayuu. Anuujeseʼe nünüiki: «Jehovákalee, ¿jamüshi paaʼinmajaka maʼin chi wayuukai? Otta ¿jamüsü kapülaka paaʼin nukuwaʼipa?» (Sal. 144:3). Wekirajaa sünain tü sümakat tü Bibliakat süchiki jamüin kapülakaʼa naaʼin Jehová nukuwaʼipa wanee wayuu.

8. ¿Kasa jülüjaka naaʼin Jehová nünain wanee wayuu saashin 1 Samuel 16:6, 7, 10-12?

⁸ Süküjain tü Bibliakat kapülain naaʼin Jehová nukuwaʼipa wanee wayuu eekai müin mojutukai naaʼin sümüin wayuu. Soʼu wanee kaʼi nuluwataain Samuel nipialuʼumüin Jesé süpüla nüneeküin wanee nüchon aluwataainjachikai saaʼu Israel. Nüntiraka Jesé akaratshishii nüchonnii nünainmüin Samuel, nnojoipejeʼe nümaain David chi emülieekai.b Niapejeʼe aneekünatüjülin David nutuma Jehová (paashajeʼera 1 Samuel 16: 6, 7, 10-12). ¿Jamüshi nüneekakaʼa nia? Shia süka jülüjain naaʼin tü suluʼukat naaʼin David. Niʼrüin kojutuin nümüin tü kasa nümaʼanajeejatkat Jehová.

9. ¿Kasa piyaawataka atuma alin pia nüpüla Jehová? (Piirakaa sümüin tü ayaakuaakat).

⁹ Süpüla pütüjaain saaʼu alin pia nüpüla Jehová jülüja paaʼin tü naaʼinrakat püpüleerua. Nüküjain pümüin tü paaʼinrajatkat süpüla sunoutaainjatüin tü jülüjakat paaʼin (Sal. 32:8). Naaʼinrüin tia süka niʼraajüin maʼin pukuwaʼipa (Sal. 139:1). Poonoole sümaa nünüiki piʼreerü anain pukuwaʼipa sünainjee, piyaawateerü aaʼu alin pia nüpüla Jehová (1 Crón. 28:9; Aluw. 17:26, 27). Jülüjasü naaʼin Jehová tü paaʼinrakat nüpüleerua otta kojutusü nümüin anain maʼin pukuwaʼipa (Jer. 17:10). Aleeweeshi nia pümaa otta nücheküin süchiki aleewainña pia nümaa (1 Juan 4:19).

«¿AMÜLASÜCHE NEʼE TÜ KASA TANEEKAKAT PAALA?»

10. ¿Kasa eeka süpüla jülüjain waaʼin amürale neʼe saaʼin wamüin wooʼulaain suulia waneirua kasa süpüla wakooʼomüinrüin waʼyataain nümüin Jehová?

¹⁰ Eesüjaʼa jülüjale waaʼin amülain neʼe wooʼulaain suulia wanee kasa paala. Eeshiijaʼa wooʼulaale waneirua aʼyatawaa süpüla wakooʼomüinrüin waʼyataain nümüin Jehová. Shiasaʼa kakalia juya süchikijee tia weʼrapa na weʼraajüinkana anain maʼin nakuwaʼipa sünainjee naʼyataain. Eesüjaʼa müle wanüiki waleʼeruʼu: «¿Amülasüche neʼe tooʼulaain waneirua kasa süpüla takooʼomüinrüin taʼyataain nümüin Jehová? ¿Anasüjeʼe maʼin takuwaʼipa shiale toʼunuin achiirua waneirua kasa?».

11. ¿Jamüsü shapaawaikaʼa naaʼin waneepia chi ashajakai Salmo 73?

¹¹ Mülejeʼeya pünüiki püleʼeruʼu nnojo mojuin paaʼin, alatüsia tia nümüin chi ashajakai Salmo 73. Niʼrüin anain maʼin nakuwaʼipa, jimatüin naaʼin otta wainmain nneerü namaʼana na nnojoliikana aʼyataain nümüin Jehová (Sal. 73:3-5, 12). Sutuma müin anakai saaʼin nakuwaʼipa naya wayuukana, nnojotsü anain tü jülüjakat naaʼin, müsü amülakai saaʼin nümüin nuuʼulaain waneirua kasa süpüla niʼyataain nümüin Jehová. «Shapaʼawaisü taaʼin waneepia», müshi nia sutuma jülüjain naaʼin tia (Sal. 73:13, 14). ¿Kasakaʼa naaʼinrüin süpüla niiʼiratüin tü jülüjakat naaʼin?

12. ¿Kasa naaʼinraka chi salmistakai süpüla nunouteʼerüin tü jülüjakat naaʼin saashin Salmo 73:16-18?

¹² (Paashajeʼera Salmo 73:16-18). Oʼunushi chi salmistakai suluʼumüin tü aʼwaajüleekat Jehová, niyaawata aaʼu chaʼayaa anainjatüin tü jülüjakat naaʼin. Niyaawata aaʼu nnojoleerüin anain nakuwaʼipa mapeena na wayuu anakana maʼin akuwaʼipa niʼrüin. Niyaawata aaʼu anain maʼin naaʼinmaale tü niʼyataainkat nümüin Jehová, müsüjeseʼe jimatüin naaʼin jee sükatchinrüin naaʼin süpüla ayatüin niʼyataain nümüin Jehová (Sal. 73:23-28).

13. ¿Kasa paaʼinrajatka süpüla jimatüin paaʼin? (Piirakaa sümüin tü ayaakuaakat).

¹³ Jimateʼeriaʼaya paaʼin maʼaka jimatüin naaʼin chi salmistakai. Süpüla jimatüin paaʼin jülüja paaʼin tü kasa anasü naapakat pümüin Jehová otta tü kasa anasü paaʼinrakat sünain aʼyatawaa nümüin. Akaajasaʼa na wayuu nnojoliikana aʼyataain nümüin Jehová shia neʼe namaʼanaka tü kasa naʼyataakalü achiirua. Nnojotpejeʼe aneerüin nakuwaʼipa mapeena sutuma tia, ajaʼlajaaʼala meerü noulia. Nüküjain wamüin Jehová wainmalejeʼerüin tü kasa naapeetkat wamüin (Sal. 145:16). Nnojotsü watüjaain saaʼu jamüinjeʼe pukuwaʼipa püneeküle wanee kasa naata suulia pukooʼomüinrüin piʼyataain nümüin Jehová, eepejeʼe wanee kasa watüjaaka saaʼu, shia nnojoleerüin kasain choʼujaain namüin na wayuu aneekakana wanee kasa saaʼujee alin napüla Jehová otta na wayuukana.

«¿JALOUISHICHE TAYA NÜMÜIN JEHOVÁ?»

14. ¿Kasa alataka namüin waneinnua wawalayuu otta kasa jülüjaka naaʼin sutuma tia?

¹⁴ Eeshii wawalayuu keeʼireekana aaʼin nakooʼomüinrüin naʼyataain nümüin Jehová, isapejeʼe shia nachiki sünainjee laülaainnain naya, ayuulin naya jee sünainjee waneirua kasa alataka namüin. Eesüjaʼa jülüjale naaʼin nnojoluin kapülain naaʼin Jehová tü nakuwaʼipakat. «¿Ayatayüichejeʼeya taya jaloulin nümüin Jehová?», eesüjaʼa müle nanüiki.

15. ¿Kasa niyaawataka aaʼu chi ashajakai Salmo 71?

¹⁵ Müsia tü jülüjakat naaʼin chi ashajakai Salmo 71. Anuu nünüiki nümüin Jehová: «Nnojoishi püpütüinjachin taya matchinpa taya» (Sal. 71:9, 18). Nütüjaapejeʼe aaʼu chi salmistakai nuʼunireerüin nukuwaʼipa Jehová otta nükaalinjeechin nia niʼyataale waneepia nümüin. Niyaawata aaʼu talatüin naaʼin Jehová nümaa chi wayuu aʼyataakai nümüin süka süpüshuaʼa naaʼin, jaʼitairü eein tü kasa isakat nüchiki (Sal. 37:23-25).

16. ¿Jamüshii jalouikaʼa nümüin Jehová na wawalayuu laülaayuuinnakana? (Salmo 92:12-15).

¹⁶ Laülaaichire pia, jülüja paaʼin kojutuin pia nümüin Jehová. Nükaalinjeechi pia süpüla piʼyataain waneepia nümüin, jaʼitairü eein tü kasa isakat püchiki (paashajeʼera Salmo 92:12-15). Shia jülüja paaʼin tü kasa puuntakat paaʼinrüin, nnojo jülüjain paaʼin tü kasa isakat püchiki. Ana pukuwaʼipa napüleerua na waneinnua jee kamanee pia namüin. Yooto pia namaa süchiki tü naaʼinrakat Jehová püpüleerua süpüla nükaalinjain pia otta püküja namüin piʼreein shikeraajüin tü nümakat Jehová. Soto paaʼin kojutuin maʼin nümüin Jehová puʼuraajüin napüleerua na waneinnua (1 Ped. 3:12). Eesü süpüla waaʼinrüin kasa nüpüleerua Jehová otta napüleerua na waneinnua, jaʼitairü jamüin maʼin tü wakuwaʼipakat.

17. ¿Jamüsü nnojoluinjatkaʼa wayoujireʼerüin wakuwaʼipa sümaa nakuwaʼipa na waneinnua?

¹⁷ Mojule paaʼin sutuma isain püchiki paaʼinrüin waneirua aʼyatawaa nümüin Jehová soto paaʼin kojutuin nümüin Jehová tü paaʼinrakat. Nnojo piyoujireʼerüin pukuwaʼipa sümaa nakuwaʼipa na waneinnua, nnojotsü niyoujireʼerüin Jehová nukuwaʼipa wanee wayuu sümaa nakuwaʼipa na waneinnua (Gal. 6:4). Jamüsüjaʼa María shiʼyotuin saaʼu nuuʼui Jesús wanee seita jemeta eejuu kojutuka maʼin (Juan 12:3-5). Akaajasaʼa wane wayuu outa aʼwayuuse, ejitüsü suluʼu tü kojonchonkot piamasüchein nneerü maliasat (Luc. 21:1-4). Tü naaʼinrakat na piamashiikana jieyuu naashin Jesús naaʼinrüin shia süka kanoulain maʼin naya. Paaʼinrüle wanee kasa süka alin püpüla Jehová jee süka kanoulain pia nünain, kojutusü nümüin tia, jaʼitairü müin nnojotkai kasain anain apüla saaʼin pümüin.

18. ¿Kasa paaʼinrajatka süpüla nnojoluin wainmajüin paaʼin? (Paashajeʼera tü pütchikat «Nnojoleerü wainmajüin paaʼin sutuma tü sümakat tü Bibliakat»).

¹⁸ Eesü wainmajüle waaʼin saaʼu wanee kasa, nükaalinjeepejeʼe waya Jehová sükajee tü Bibliakat süpüla nnojoluinjatüin wainmajüin waaʼin. Pikirajaa sünain süpüla piyaawatüin saaʼu tü paaʼinrajatkat, nnojoleerü shapaain paaʼin süka punouteʼereerüin tü jülüjakat paaʼin. Kapülasü naaʼin Jehová tü pukuwaʼipakat, kojutusü nümüin tü kasa paaʼinrakat nüpüleerua otta nüküjain pümüin naapeerüin pümüin wainma kasa anasü. Nnojo motuin paaʼin, aishi pia nüpüla Jehová otta naaʼinmajüin pia süka punoujain nünain waneepia.