Anaitpa naaʼin nutuma Jehová na mojukana aaʼin

1. ¿Jamüsü naaʼin Jehová saaʼu waʼyataain nümüin?

JÜLÜJASHII waya naaʼin Jehová. Nütüjaa aaʼu talatüle waaʼin jee mojule waaʼin (Sal. 37:18). Talatüsü naaʼin Jehová saaʼu waʼyataain nümüin süka süpüshuaʼa waaʼin mayaainjeʼe weʼrüin wamüliala. Nükaalinjeein waya jee nümülialeein waaʼin.

2. (1) ¿Kasa naaʼinraka Jehová napüleerua na mojukana aaʼin? (2) ¿Kasa waaʼinrajatka süpüla anain waaʼin sutuma tü naaʼinrakat Jehová wapüleerua?

² Saashin Salmo 147:3 müsü nukooʼoyolokoi saaʼin Jehová nalioʼu na mojukana aaʼin. Sünainjee tia wetsiikulokot wayaawata aaʼu sümülialaain naaʼin Jehová naalin na mojukana aaʼin saaʼujee wanee kasa alataka namüin. ¿Kasa waaʼinrajatka süpüla anain waaʼin sutuma tü naaʼinrakat Jehová wapüleerua? Süpüla watüjaain saaʼu tia, jülüjataa waaʼin tüü: neewaale wanee wayuu oʼunamaatüshi nia nümaʼanamüin wanee tottoot, ashateetpejeʼe nülioʼu naaʼinrüle tü nümakat chi tottootkai. Sünain ekirajaayakat tüü, wekirajaweerü anain tü nümakat Jehová sükajee tü Bibliakat namüin na mojukana aaʼin otta tü naaʼinrajatkat süpüla noonooin sümaa tü nümakat Jehová namüin.

NÜKÜJAIN JEHOVÁ KOJUTUIN WAYA NÜMÜIN

3. ¿Jamüsü jülüjakaʼa naaʼin waneinnua wayuu maalin naya apülaa?

³ Wainma na wayuu maalinkana apülaa maaʼulu yaa, nnojoishii kojutuin naya atumawaa otta jülüjasü naaʼin nnojoluin kasain anain apüla naya. Anuu sünüiki wanee wawala kanüliaka Helena: «Nnojotsü jaʼyain naaʼu na kachooinkana taya alin taya napüla, mojulaapuʼushi maʼin chi tashikai jee nüküjawalin tamüin nnojoluin kasain anain apüla taya». ¿Alatüitche pümüin tia? ¿Mojulaasüche wayuu pümüin? ¿Mojusüche sünüiki pümüin? ¿Eeitche jülüjain paaʼin nnojoluin kasain anain apüla pia? Eesüjaʼa jülüjale paaʼin maalin pia apülaa sutuma tü münakat pümüin.

4. ¿Jamüsü naaʼin Jehová naalin chi mojukai aaʼin otta kasa naaʼinraka nüpüleerua saashin Salmo 34:18?

⁴ Mayaainjeʼe mojulaain wayuu pümüin soto paaʼin alin pia nüpüla Jehová jee kojutuin pia nümüin. «Nnojoishi wattaluʼuin Jehová noulia na mojukana aaʼin» (paashajeʼera Salmo 34:18). Mojuwaire paaʼin, soto paaʼin niʼrüin Jehová anain pukuwaʼipa jee nücheküin piʼyataain nümüin (Juan 6:44). Nükaalinjeechi pia waneepia süka alin pia nüpüla.

5. ¿Kasa watüjaka sünainjee nukuwaʼipa Jesús namüin na wayuu mojutukana atumawaa?

⁵ Sükajee nukuwaʼipa Jesús, wayaawata aaʼu jamüin naaʼin Jehová naalin na mojukana aaʼin. Yaaiwaʼaya Jesús mmapaʼa kapülasü naaʼin nakuwaʼipa na wayuu mojutukana atumawaa jee amülialaasü naaʼin naalin (Mat. 9:9-12). Eejatü wanee wayuu ayuuisü epettaka nüsheʼin Jesús süka jülüjain saaʼin saawalaajeerüin nutuma. Nümülialüin saaʼin jee nüküjain sümüin anain maʼin tü saaʼinrakat süka kanoulain shia (Mar. 5:25-34). Nüshatüin maʼin Jesús nukuwaʼipa Jehová (Juan 14:9). Kojutushi maʼin pia nümüin Jehová, niʼrüin anain tü kasa paaʼinrakat, nütüjaa aaʼu kanoulain pia otta alin nia püpüla.

6. ¿Kasa waaʼinrajatka jülüjakuʼu sümüle waaʼin nnojoluin kasain anain apüla waya?

⁶ ¿Kasa paaʼinrajatka jülüjakuʼu sümüle paaʼin nnojoluin kasain anain apüla pia? Anasü paashajeʼerüle wetsiikulo suluʼujee tü Bibliakat piyaawateetka atuma kojutuin pia nümüin Jehová jee püsakireʼera paaʼin sünain tü sümakat (Sal. 94:19).b Nnojorüle puuntuin paaʼinrüin wanee kasa piʼyataweekalü anain jee isale püchiki paaʼinrüin tü naaʼinrakat na waneinnua, nnojo pümalajaain aaʼin, nnojo paaʼinmaain maʼin tü kasa isakat püchiki. Niyaawata aaʼu Jehová tü pukuwaʼipakat, nnojotsü nuchuntuin pümüin wanee kasa isaka püchiki (Sal. 103:13, 14). Mojulaale wayuu pümüin jee saainjale kasa mojusü pümüin, nnojo jülüjain paaʼin püsirüin tia, nnojotsü püchajaalain shia. Soto paaʼin süsaleenain naainjala nutuma Jehová na wayuu aaʼinrakana kasa mojusü (1 Ped. 3:12). Jamüsüjaʼa tü wawalakat Sandra, müliapuʼusü maʼin atumawaa jintüliiwaʼaya shia. Anuu sünüiki: «Achuntawaisü maʼin taya nümüin Jehová süpüla tayaawatüin saaʼu anain takuwaʼipa noʼuluʼu».

7. ¿Kasa mapüleejeetka atuma wakaalinjain na waneinnua?

⁷ «¿Kasasükai maʼin wayuu taya süpüla takaalinjain na waneinnua?», eesüjaʼa pümüle. Nnojo jülüjain paaʼin tia. Jamüshijaʼa Jehová nükaalinjain wayuu pükajee püküjapa tü pütchi anakat maʼin (1 Cor. 3:9). Sutumajee tü alatakat pümüin, eesüjaʼa mapüleere pümüin piyaawatüin saaʼu jamüin naaʼin na waneinnua otta pümülialüin naaʼin. Jamüsüjaʼa Helen, tü wachuntayütkalü anülia paala, akaalinjünüsü shia jee mapüleeitpa sümüin maaʼulu sükaalinjain na waneinnua. «Jülüjapuʼusü taaʼin nnojoluin kasain anain apüla taya. Nükaalinjain taya Jehová süpüla tayaawatüin saaʼu alin taya nüpüla otta süpüla takaalinjain na waneinnua», müsü shia. Pürekutsoot rekulaat shia maaʼulu jee talatüsü maʼin saaʼin.

KEEʼIREESÜ NAAʼIN JEHOVÁ WAYAAWATÜIN SAAʼU MOTUIN NAAʼIN WAAINJALA

8. ¿Jamüsü nünüiki Jehová suluʼu Isaías 1:18?

⁸ Eeshii wawalayuu mojukana maʼin aaʼin sutuma tü kasa mojusü naaʼinrapuʼukat süpülapünaa otta süchikijee woutiisain naya. Soteepejeʼe waaʼin alin maʼin waya nüpüla Jehová otta naapüin chi Nüchonkai süpüla outajachin nia saaʼu waainjala. Keeʼireesü naaʼin kojutuin wamüin tü naaʼinrakat wapüleerua. Anuujeseʼe nünüiki wamüin: «Jalainna waloʼireʼerai tü alatakat [pümüin]».c Waloʼireʼerapa sukuwaʼipa tü alatakat wamüin nümaa Jehová nülaʼajaajeerü woulia tü waainjalakat (paashajeʼera Isaías 1:18). Talatüsü waaʼin süka motuin naaʼin Jehová tü kasa mojusü waaʼinrapuʼukat, nnojotpejeʼe motuin naaʼin tü kasa anasü waaʼinrakat (Sal. 103:9, 12; Heb. 6:10).

9. ¿Jamüsü anakaʼa shiale jülüjain waaʼin tü wakuwaʼipakat maaʼulu otta tü kasa eeinjatkat mapeena suulialeʼeya tü kasa mojusü waaʼinrapuʼukat?

⁹ ¿Kasa paaʼinrajatka müleka sotokuʼu sümüle paaʼin tü kasa mojusü paaʼinrapuʼukat? Jülüja paaʼin tü pukuwaʼipakat maaʼulu otta tü kasa anasü eeinjatkat mapeena. Jülüja paaʼin tü nukuwaʼipakat chi aluwataaushikai Pablo. Mojupuʼusü maʼin naaʼin sünainjee müliapuʼuin maʼin nutuma na anoujashiikana, nütüjaapejeʼe saaʼu motuin naaʼin Jehová tü naainjalakat (1 Tim. 1:12-15). Nnojotsü jülüjakuʼu müin naaʼin Pablo tü kasa mojusü naaʼinrapuʼukat maʼaka nnojoluin jülüjakuʼu müin naaʼin tü kasa anasü nuuntaka sutuma fariseoin nia (Filip. 3:4-8, 13-15). Tü naaʼinmaakat shia nüküjain maʼin pütchi otta jülüjain naaʼin tü eeinjatkat mapeena. Nnojotsü süpüla motuinjatüin waaʼin tü kasa mojusü waaʼinrapuʼukat. Shiapejeʼe anain maʼin jülüjale paaʼin tü paaʼinrakat maaʼulu yaa süpüla kojutuin pümüin Jehová jee jülüjain paaʼin tü kasa anasü naapeetkat pümüin.

10. ¿Kasa waaʼinrajatka müleka waaʼinrüle wanee kasa mojuka atuma naaʼin na waneinnua?

¹⁰ Eesüjaʼa mojule maʼin paaʼin sünainjee mojuin naaʼin na waneinnua sutuma wanee kasa mojusü paaʼinrakat. ¿Kasakaʼa anain süpüla paaʼinrüin? Püchajaa sukuwaʼipa süpüla punouteʼerüin tü alatakat jee «moto paaʼin taainjala», maa nümüin chia wayuukai (2 Cor. 7:11). Puchunta nümüin Jehová napüleerua na wayuu mojukana aaʼin sutuma tü kasa mojusü paaʼinrakat. Nükaalinjeena naya Jehová süpüla jimatüin naaʼin jee nükaalinjeechi pia.

11. ¿Kasa watüjaka sünainjee nukuwaʼipa Jonás? (Piirakaa sümüin tü ayaakuaakat).

¹¹ Nüchiaale pia Jehová sünainjee tü kasa mojusü paaʼinrakat, poonoo sümaa nünüiki. Soto paaʼin tü alatakat nümüin Jonás. Aluwataanüshi nia nutuma Maleiwa süpüla nuʼunuin Nínivemüin. Nuʼunaka suluʼumüin wanee mma naatajatü. Achiaanüshi nia nutuma Jehová jee nunouteʼeraka nukuwaʼipa (Jon. 1:1-4, 15-17; 2:7-10). Nnojoishi ayüülajünüin Jonás nutuma Jehová. Nuluwataain nia nüchikuaʼa chaa Nínivemüin. Oonooshi Jonás sümaa nünüiki Jehová. Mayaainjeʼe mojuin naaʼin Jonás sünainjee tü kasa mojusü naaʼinrakat paala, nücheka achikit nuluwataanüin nüchikuaʼa nutuma Jehová (Jon. 3:1-3).

NÜMÜLIAJÜIN WAYA JEHOVÁ SÜKAJEE TÜ NÜPÜLAINKAT

12. ¿Kasa naapaka wamüin Jehová süpüla jimatüin waaʼin soʼu sülatüin kasa mojusü wamüin? (Filipos 4:6, 7).

¹² Nümüliajüin waya Jehová sükajee tü nüpülainkat wanaa sümaa sülatüin kasa mojusü wamüin. Shia alatakat tia nümüin Ron otta Carol. Oʼuniraashi naaʼin chi nachonkai. Anuu nanüiki: «Mayaainjeʼe sülatapuʼuin wamüin kasa eekai mojuin maʼin, keemaleesia maʼin tia alatakat wamüin. Süka matunkuin waya saʼwai, achuntushii maʼin waya nümüin Jehová. Jimatakalaka waaʼin nutuma maʼaka süküjain Filipos 4:6, 7» (paashajeʼera). Sülatüle pümüin wanee kasa eekai mojuin jee mojule maʼin paaʼin, püküja nümüin Jehová süpüshuaʼa tü alatakat pümüin. Paashajaa waneepia nümaa jaʼitaichi kamaʼain pia sünain aashajawaa nümaa (Sal. 86:3; 88:1). Ayataʼaya puchuntuin nümüin tü nüpülainkat, naapeeriaʼaya pünüiki Jehová (Luc. 11:9-13).

13. ¿Kaseerü naapaka wamüin Jehová sükajee tü nüpülainkat süpüla ayatüin waʼyataain nümüin? (Éfeso 3:16).

¹³ Sülatüle pümüin wanee kasa matchinka atuma paaʼin, katchinjeerü paaʼin sutuma tü nüpülainkat Jehová süpüla ayatüin piʼyataain nümüin (paashajeʼera Éfeso 3:16). Jülüja waaʼin tü alatakat sümüin tü wawalakat Flora, misioneeropuʼusü shia nümaa chi suʼwayuusekai, kawalaʼataka shia nutuma jee nooʼulaajiraaka. Anuu sünüiki Flora: «Shapaasü maʼin taaʼin soʼukai jee saʼwai sutuma tia alatakat tamüin. Isainjatü tia tachiki taaʼinruʼu talatüin süchikumüin tia. Tachuntaka maʼin nümüin Jehová naapai tü nüpülainkat tamüin. Nükaalinjain taya Jehová jee nümüliajüin taya». Shiyaawata aaʼu Flora nükaalinjain shia Jehová. Anuu sünüiki süchikuaʼa: «Shiaʼaya taaʼinraka nutuma Jehová tü sümakat Salmo 119:32, tü makat: ‹Ayateeriaʼaya taaʼinrüin tü puluwataakalü anain taya, jama pükaalinjain taya süpüla taaʼinreein maʼin shia›».

14. ¿Kasa waaʼinrajatka süpüla naapüin wamüin Jehová tü nüpülainkat?

¹⁴ ¿Kasa paaʼinrajatka süchikijee puchuntuin nümüin Jehová tü nüpülainkat? Waneepia pia sünain tü outkajawaakat otta sünain aküjaa pütchi. Paashajeʼera tü Bibliakat soʼukaiwai süpüla jülüjain paaʼin tü kasa anakat noʼuluʼu Jehová (Filip. 4:8, 9). Wanaa sümaa paashajeʼerüin tü Bibliakat jülüja paaʼin tü alatakat namüin na wayuu aküjünakana achiki yala otta jülüja paaʼin tü naaʼinrakat Jehová süpüla nachecherüinjatüin naaʼin soʼunnaa tia. Jamüsüjaʼa tü wawalakat Sandra, tü wachuntakalü anülia paala, wainma tü kasa alatakat sümüin. Anuu sünüiki: «Sütanalüin taaʼin tü aküjünakat nüchiki José. Nnojotsü naaʼinrüin wanee kasa amojujeʼeraka nukuwaʼipa nümaa Jehová sutuma tü kasa mojusü alatakat jee aaʼinnakat nümüin» (Gén. 39:21-23).

NÜMÜLIALÜIN WAAʼIN JEHOVÁ NAKAJEE NA WAWALAYUUKANA

15. ¿Kasa naaʼinraka na wawalayuukana wapüleerua süpüla namüliajüin waaʼin? (Piirakaa sümüin tü ayaakuaakat).

¹⁵ Namülialeerü waaʼin na wawalayuukana wanaa sümaa weʼrüin müliaa (Col. 4:11). Weʼrüin waalin nüpüla Jehová nakajee na wawalayuukana. Namülialeerü waaʼin jee naapajeerü wanüiki otta eejeena naya wamaa soʼu sülatüin kasa mojusü wamüin. Eesüjaʼa naashajeʼereerüle wamüin wanee pütchi suluʼujee tü Bibliakat jee nachuntuin wapüleerua (Roma 15:4).d Eesüjaʼa nüküjale wamüin wanee wawala tü nümakat Jehová süchiki tü alatakat wamüin jee jimateetkalaka waaʼin. Eeshiʼiya süpüla naaʼinrüin waneirua kasa wapüleerua na wawalayuukana maʼaka saaʼin nakolojuin eküülü wamüin.

16. ¿Kasa waaʼinrajatka süpüla nakaalinjain waya na wawalayuukana?

¹⁶ Eesüjaʼa nnojorüle natüjaain saaʼu na wawalayuukana tü alatakat pümüin otta tü choʼujaakat pümüin (Prov. 14:10). Süpüla nakaalinjain pia na wawalayuukana, puchunta kaalinwaa namüin, nakaaliijeein pia, jama alin pia napüla (Prov. 17:17). Mojule paaʼin yooto pia nümaa wanee wawala eekai laülaain naaʼin sünain anoujaa. Püküja nümüin tü anakat süpüla naaʼinrüin püpüleerua. Eeshijaʼa süpüla yootuin pia nümaa wanee jee piamashii laülaashii anakana amaa paaʼin. Eeshii na wawalayuu jieyuu anakana amüin yootule naya namaa na jieyuu laülaakana aaʼin sünain anoujaa.

17. ¿Kasa waaʼinrajatka süpüla natütüleʼerüin waaʼin na wawalayuukana?

¹⁷ Nnojo pükayalaain noulia na wawalayuukana. Eesüjaʼa nnojorüle paaʼin sünain namawaa pia na wawalayuukana müleka mojule paaʼin. Eesüjaʼa nnojorüle nayaawatüin saaʼu na wawalayuukana tü alatakat pümüin jee naküjale wanee kasa aika pümüin (Sant. 3:2). Nnojo piyoutuin natütüleʼerüin paaʼin, choʼujaasü pümüin tia. Anuu nünüiki Gavin wanee wawala laülaashi mojuwaikai aaʼin: «Eesü nnojorüle taaʼin sünain namawaa na tawalayuukana». Mayaainjeʼe jülüjain naaʼin tia Gavin, nüchajaain sukuwaʼipa süpüla namaainjachin nia na wawalayuukana. Anasü naaʼin sutuma naaʼinrüin tia. Anuu sünüiki tü wawalakat Amy: «Wainmajüsü taaʼin naaʼu na wawalayuukana sutuma tü kasa alatakat tamüin paala. Tachajaapejeʼe sukuwaʼipa süpüla tashatüin nukuwaʼipa Jehová, alin tapüla na tawalayuukana otta nnojoluin wainmajüin taaʼin naaʼu. Talatüsü naaʼin Jehová sutuma tia otta talatüsia taaʼin sutumaya».

TALATÜSÜ WAAʼIN SUTUMA TÜ NAAʼINREETKAT JEHOVÁ MAPEENA

18. ¿Kasa naaʼinreetka Jehová mapeena otta kasa waaʼinrajatka maaʼulu?

¹⁸ Talatüsü waaʼin süka watüjaain saaʼu nükaalinjeenain waya Jehová suulia ayuulii jee suulia mojuin waaʼin otta süka najaʼttireerüin süpüshuaʼa tü kasa müliakalü atuma waya (Apoc. 21:3, 4). Nnojoleerü jülüjain waaʼin tü kasa müliakalü atuma waya najaʼttirapa Jehová süpüshuaʼa tü kasa mojusükat (Is. 65:17). Wekirajaaitpa anain tü naaʼinrakat Jehová süpüla nümülialüin waaʼin maaʼulu. Wainma kasa naaʼinraka wapüleerua süpüla nümülialüin waaʼin otta süpüla nükatchinrüin waaʼin. Pücheka süchiki tia naaʼinrakat Jehová püpüleerua, jama jülüjain pia naaʼin Jehová (1 Ped. 5:7).