Nükaalinjain waya Jehová süpüla wachecherüin waaʼin

1. (1) ¿Jamüsü choʼujaakaʼa wamüin wachecherüin waaʼin? (2) ¿Jarai akaalinjeenaka waya? (1 Pedro 5:10).

KEEMASÜ MAʼIN tü mmapaʼakat maaʼutpünaa yaa jee wainma tü kasa oʼttaaka wanain. Eeshii na müliakana sutuma wanee ayuulii jee shiale sutuma nünaajaain wanee napüshi. Eeshii na apüleeruaanakana aaʼin natuma na kasayuukana nanain jee natuma na süʼlaülashiikana mma saalinjee nanoujain (Mat. 10:18, 36, 37). Choʼujaasüjeseʼe maʼin wamüin wachecherüin waaʼin. Watüjaa aaʼulu nükaalinjeenain Jehová napüshuaʼa na aʼyataashiikana nümüin, maʼaka paaʼin piakai (paashajeʼera 1 Pedro 5:10).

2. ¿Kasa wountaka atuma wachecherüin waaʼin waya anoujashiikana?

² Nüchecherüle naaʼin wanee wayuu nnojoleerü sümalajaain naaʼin mayaainjeʼe niʼrüin nümüliala, nüpüleeruaanüle aaʼin jee suuʼulakünüle naaʼin, jama shiain jülüjain naaʼin tü kasa anasü niʼreetkat mapeena sünainjee. ¿Kasa wountaka atuma wachecherüin waaʼin waya anoujashiikana? «Wountuin waaʼinrüin tia sükajee tü nüpülainkat Maleiwa, nnojotsü sükajeejatüin waaʼin wamüiwaʼa» (2 Cor. 4:7). Sünain ekirajaayakat tüü, ekirajaainjana waya sünain pienchisü kasa nükaalinjaka akajee waya Jehová süpüla wachecherüin waaʼin jee tü waaʼinrajatkat süpüla kojutuin shia wamüin.

WOʼURAAJÜLE

3. ¿Jamüsü anakaʼa maʼin eein süpüla woʼuraajüin nümüin Jehová?

³ Eesü wanee kasa anashaatasü nükaalinjaka aka waya Jehová süpüla wachecherüin waaʼin. Shia eein süpüla yootuin waya nümaa eerejeʼe waleʼeruʼuin süchiki kaainjalaa (Heb. 4:16). Eeshii süpüla yootuin waya nümaa Jehová soʼu tü oora wachekakat, süchiki tü kasa keeʼireekat waaʼin, suluʼu tü wanüikikat, eepünaale waya, wamüiwaʼale jee püreesale waya (Jon. 2:1, 2; Aluw. 16:25, 26). Mayaainjeʼe kapüleein wamüin watüjaain saaʼu tü wachuntuinjatkat nümüin Maleiwa sutuma shapaain maʼin waaʼin, niyaawata aaʼu tü suluʼukat waaʼin (Roma 8:26, 27). ¿Aashin anashaatain maʼin eein süpüla woʼuraajüin nümüin Jehová?

4. ¿Jamüsü wachuntuinjatkaʼa kaalinwaa nümüin Jehová süpüla wachecherüin waaʼin?

⁴ Anuu wanee kasa ashajünaka suluʼu tü Bibliakat: «Jaʼitasü kasain wachuntuin nümüin [Jehová] wanaapünaa sümaa tü nüchekakalü achiki, naapeeriaʼaya wanüiki» (1 Juan 5:14). Anasüjeseʼe wachuntule kaalinwaa nümüin Jehová süpüla wachecherüin waaʼin, jama wanaapünaain shia sümaa tü nüchekakalü achiki. Watüjaa aaʼu müin tia sutuma süshajünüin suluʼu tü Bibliakat nusouteechin Jehová niʼipajee chi ojuyaajakai nia wachecherüle waaʼin (Prov. 27:11). Ashajünüsiaʼaya suluʼu tü Bibliakat nükaalinjeenain Jehová na aʼyataashiikana nümüin «süka süpüshuaʼa naaʼin» (2 Crón. 16:9). Watüjaa aaʼulu nükaalinjeenain waya Jehová süpüla wachecherüin waaʼin (Is. 30:18; 41:10; Luc. 11:13).

5. ¿Jamüsü süpüla jimatüin waaʼin woʼuraajüle? (Isaías 26:3).

⁵ Ashajünüsü suluʼu tü Bibliakat anain woʼuraajüle nümüin Jehová süchiki tü kasa shapaakalü atuma waaʼin, jimateetka waaʼin nutuma jee naaʼinmajeerü tü suluʼukat waaʼin jee tü suluʼukat wekii. «Nnojoishi eein wanee wayuu ayaawatakai saaʼu tia jimataa aaʼin naapakat Maleiwa» (Filip. 4:7). Talatüsü maʼin waaʼin nümaa Jehová sutuma naaʼinrüin tia wapüleerua. Wainma kasa naaʼinraka na wayuu nnojoliikana anoujain nünain Jehová süpüla motuin naaʼin tü kasa müliakalü atuma naya jee süpüla jimatüinjatüin naaʼin. Nooʼulaküin wainmain kasa shiiʼiree nnojoluin kasain nekiiruʼu, keemapejeʼe maʼin tia, jama eein süpüla kaleʼeruʼuin yolujaa wanee wayuu sutuma tia (anasü paashajeʼerüle Mateo 12:43-45). Mayaainjeʼe eein süpüla jimatüin naaʼin, motsomüin neʼe tia, nnojotsü antapünaain tia sümaa tü anaa naapakat wamüin Maleiwa woʼuraajapa. Sutuma weʼitaain maʼin waaʼin nünain Jehová naaʼinmajüin tü suluʼukat wekii jee tü suluʼukat waaʼin otta naapüin wamüin wanee anaa waneepia (paashajeʼera Isaías 26:3). Jamüshijaʼa nia, nüsoʼirüin waaʼin sükajee tü Bibliakat sünain alin maʼin waya nüpüla jee nükaalinjeein waya (Sal. 62:1, 2).

6. ¿Kasa waaʼinrajatka süpüla kojutuin wamüin eein süpüla woʼuraajüin nümüin Maleiwa? (Piirakaa sümüin tü ayaakuaakat).

⁶ Waaʼinrajatka süpüla kojutuin tia wamüin. Anashi woʼuraajüle nümüin Jehová süpüla waküjain nümüin tü alatakat wamüin jee wachunta nümüin jimatüinjatüin waaʼin jee watüjainjanain süpüleerua wakuwaʼipa (Sal. 55:22; Prov. 2:10, 11). Nnojo motuin waaʼin waapüin analuʼut nümüin Maleiwa süka nükaalinjain waya süpüla wachecherüin waaʼin (Filip. 4:6). Anasü jülüjale waaʼin tü naaʼinrakat Jehová wapüleerua weʼrapa wamüliala. Jalia waya suulia waaʼinmaain maʼin tü alatakat wamüin suulia tü naapakat wamüin Jehová (Sal. 16:5, 6).

WAASHAJEʼERÜLE TÜ BIBLIAKAT

7. ¿Jamüsü wachechereetkaʼa waaʼin waashajeʼerüle tü Bibliakat?

⁷ Nükaalinjain waya Jehová sükajee tü Nünüikikat süpüla wachecherüin waaʼin. Wainmatua nüküjain wamüin suluʼu tü Bibliakat nükaalinjeenain waya. Jülüjataa waaʼin tü ashajünakat suluʼu Mateo 6:8: «Nütüjaatüjülia aaʼu chi Jüshi iipünaajachikai tü kasa choʼujaakat jümüin süpülapünaa juchuntuin shia nümüin». Nüküjain tia Jesús süka niʼraajüin maʼin nukuwaʼipa Jehová. Nnojo wainmajüin waaʼin sünain nükaalinjeenain waya Jehová weʼrapa wamüliala, jama nütüjaain saaʼu tü choʼujaakat wamüin. Katchinsü waaʼin jee süchecherüin waaʼin sutuma tü weʼrüinjatkat saashin tü Bibliakat (Sal. 94:19).

8. (1) Püküja wanee pütchi suluʼuka tü Bibliakat achecheraka atuma waaʼin (2) ¿Kasa waaʼinrajatka süpüla sotuin waaʼin tü pütchi suluʼujeejatkat tü Bibliakat?

⁸ Wainma pütchi sümaka tü Bibliakat achecheraka atuma waaʼin. Jamüshiijaʼa waya atüjashii waya sünainjee jee anasü süneekia watuma wanee kasa (Prov. 2:6, 7). Ashajünüsü suluʼu tü Bibliakat nnojoluin anain shapaakuʼu müle waaʼin saaʼu tü kasa choʼujaajeetkat wamüin watta kaʼi, jama wainmain tü kasa alatakat wamüin soʼukaiwai (Mat. 6:34). Waashajeʼerüle tü Bibliakat waneepia sümaa wasakireʼerüin waaʼin sünain soteerü waaʼin tü pütchi suluʼukat pansaaka sümaa tü alatakat wamüin.

9. ¿Jamüsü anakaʼa wasakireʼerüle waaʼin sünain nakuwaʼipa na wayuu ashajünakana achiki suluʼu tü Bibliakat?

⁹ Ashajünüsiaʼaya suluʼu tü Bibliakat nachiki wayuu namaiwajana anoujakana nünain Jehová jee akaalinjünakana nutuma (Heb. 11:32-34; Sant. 5:17). Wasakireʼerüle waaʼin sünain tü nakuwaʼipakat katsüinjeerü wanoula sünain müin aka saaʼin wanee «wounjulaaya chi Maleiwakai, nia katchinka atuma waaʼin, nükaalinjain waya soʼunnaa weʼrüin müliaa» (Sal. 46:1). Keeʼireejeerü waaʼin washatüin nakuwaʼipa naya wayuukana, jama kanoulain maʼin naya sümaa nachecherüin naaʼin (Sant. 5:10, 11).

10. ¿Kasa waaʼinrajatka kojutule wamüin tü Bibliakat?

¹⁰ Waaʼinrajatka süpüla kojutuin wamüin shia. Anasü waashajeʼerüle tü Bibliakat soʼukaiwai sümaa washajüin tü wetsiikulo jalouijeetkat wamüin. Anasü maʼin tü karaloʼutakat aashajeʼennüinjatka soʼukaiwai, jama sükatchinrüin naaʼin wainma wawalayuu süka naashajeʼerawalin shia waneepia. Jülüjataa waaʼin tü alatakat sümüin wanee wawala Marie sünülia,a kanainsü kanset tü shiikat otta müshia chi süshikai. Shia aaʼinmajaka naya outaleepa naya. Süküjain wamüin Marie kasain wayu süchecheraka atuma saaʼin: «Taashajeʼerawalin wattaʼa maalü tü wetsiikulo aashajeʼennajatkat soʼukaiwai sümaa tasakireʼerüin taaʼin sünain. Shia jülüjaka taaʼin anain nukuwaʼipa Jehová jee anain maʼin tü nikirajakalü anain waya suluʼu tü Nünüikikat suulialeʼeya taaʼinmaain neʼe tü alatakat tamüin» (Sal. 61:2).

NAKAJEE NA WAWALAYUUKANA

11. ¿Jamüsü katchinkaʼa wanoula watüjaapa saaʼu nachecherüin naaʼin na wawalayuukana?

¹¹ Paaʼinwajiraashii waya namaa na wawalayuukana nutuma Jehová jee nüchecherüin waaʼin nakajee. Amülialaasü waaʼin sutuma watüjaain saaʼu wanaawain tü wamülialakat «sümaa namüliala na wawalayuukana sainküin tü mmakat» (1 Ped. 5:9). Watüjaapa saaʼu nachecherüin naaʼin na wawalayuukana neʼrapa müliaa katchinsü wanoula jee wayaawata aaʼulu eein süpüla wachecherüin waaʼin weʼrapa müliaa maʼaka naaʼin nayakana (Aluw. 14:22).

12. ¿Kasa wakaalinjiraainjanaka anain namaa na wawalayuukana? (2 Corinto 1:3, 4).

¹² Amülialaasü waaʼinña sutuma tü naaʼinrakat na wawalayuukana wapüleerua. Jamüshijaʼa chi aluwataaushikai Pablo akaalinjünüshi nia natuma waneinnua anoujashii soʼu püreesain nia chaa nipialuʼu. Müshijeseʼe nüshajüin nanülia suluʼu tü karaloʼuta nüshajakat namüin na anoujashiikana sutuma wainmain tü kasa naaʼinrakat nüpüleerua süpüla namülialüin naaʼin (Filip. 2:25, 29, 30; Col. 4:10, 11). Maaʼulu yaa namülialüin waaʼin na wawalayuukana süpüla wachecherüin waaʼin jee eeshii süpüla wamülialüin naaʼinña choʼujaapa shia namüin (paashajeʼera 2 Corinto 1:3, 4).

13. ¿Kasa süchecheraka atuma saaʼin Maya?

¹³ Jülüjataa waaʼin sukuwaʼipa Maya, wanee wawala chejeʼewat Rusia. Soʼu tü juyakat 2020 asaijünüsü shipia natuma waneinnua pulusiia sümaanaka laülaapialuʼumüin sutuma saashajaain namaa na waneinnua süchiki tü sunoujakalü anain. ¿Kasa naainjaka na wawalayuukana süpüleerua? Anuu tü sümakat: «Soʼu wanee kaʼi tayüülajaweekalü oʼu taaʼin nayamaajüin taya waneinnua wawalayuu otta nashajüin tamüin alin maʼin taya napüla. Tatüjaatüjülia aaʼu pawalaawain waya namaa na wawalayuukana, pansaapejeʼe maʼin shia tamüin soʼujee juyaka 2020, jama nakaalinjain maʼin taya na wawalayuukana».

14. ¿Kasa waaʼinrajatka kojutule wamüin na wawalayuukana? (Piirakaa sümüin tü ayaakuaakat).

¹⁴ Waaʼinrajatka süpüla kojutuin wamüin naya. Choʼujaasü maʼin wamüin paaʼinwain maʼin waya namaa na wawalayuukana, shialeekajaʼa weʼrapa müliaa. Anashii wachuntawaire kaalinwaa namüin na laülaashiikana choʼujaapa shia wamüin, jama müin naya «maʼaka saaʼin wanee ounjulaaya suulia joutai otta suulia juya wawaimaajatü» (Is. 32:2). Anasü wachajaale sukuwaʼipa süpüla wakaalinjain na waneinnua, jama choʼujaain shia namüinña. Waaʼinrüle tia talateerü waaʼin jee wachechereerü waaʼin (Aluw. 20:35).

SUTUMA TÜ KASA ANASÜ WEʼRÜINJATKAT

15. (1) ¿Kasa naaʼinraka Jesús süpüla nüchecherüin naaʼin soʼunnaa niʼrüin müliaa? (2) ¿Kasa waaʼinrajatka süpüla washatüin nukuwaʼipa? (Hebreokana 12:2).

¹⁵ Achecheraasü waaʼin sutuma tü kasa anasü weʼrüinjatkat nutuma Jehová (Roma 15:13). Jamüshijaʼa Jesús nüchecherüin naaʼin niʼrapa maʼin müliaa yaaiwaʼaya nia mmapaʼa sutuma nütüjaain saaʼu tü kasa anasü niʼrüinjatkat mapeena (paashajeʼera Hebreokana 12:2). Nütüjaa aaʼulu kojutuinjachin Jehová atumawaa waneepiale nia nümaa. Naʼatapajüin maʼin tü kaʼi chainjachikalü oʼu nia nüchikuaʼa nümaa chi Nüshikai chaa iipünaa jee tü kaʼi nuluwataainjachikalü oʼu namaa na nuwalayuukana chaa iipünaa. Akaʼaya joo wayakana, wachecherüin maʼin waaʼin mayaainjeʼe weʼrüin müliaa maaʼulu yaa, jama waʼatapajüin talatüinjatüin waaʼin waneepia yaa saaʼu mmakat paʼaraiisüpa shia.

16. (1) ¿Kasa süchecheraka atuma saaʼin Alla? (2) ¿Kasa pütüjaka sünainjee sukuwaʼipa?

¹⁶ Achecheraasü maʼin saaʼin Alla, wanee wawala chejeʼewat Rusia sutuma tü kasa shiʼrüinjatkat mapeena paʼaraiisüpa tü mmakat. Anuu tü sümakat nüpüreesajinnapa chi suʼwayuusekai: «Achecheraasü taaʼin sutuma toʼuraajawalin jee jülüjain maʼin taaʼin tü kasa anasü weʼrüinjatkat mapeena. Tatüjaa aaʼulu nnojoleenain müliain waya waneepia. Najaʼttireerü Jehová tü kasa müliakat atuma waya, müiria nnojoluin shia».

17. ¿Kasa waaʼinrajatka kojutule wamüin tü kasa anasü weʼrüinjatkat mapeena? (Piirakaa sümüin tü ayaakuaakat).

¹⁷ Waaʼinrajatka süpüla kojutuin wamüin shia. Anasü jülüjawaire waaʼin tü kasa anasü weʼrüinjatkat mapeena nutuma Jehová. Maa chakai waaʼin suluʼu tü paʼaraiisükat sümaa talatüin waaʼin. Müle shia watuma, motsomüinjeerü wamüin tü müliaa weʼrakat (2 Cor. 4:17). Anashii waküjale pütchi sümüin wayuu süchiki tü kasa anasü weʼrüinjatkat mapeena nutuma Maleiwa, jama choʼujaain maʼin namüin süpüla nachecherüin naaʼin soʼunnaa neʼrüin müliaa. Waaʼinrüle tia, eeshii süpüla natüjaweein saaʼu sooʼomüin süchiki tü naaʼinrüinjatkat Jehová wapüleerua mapeena.

18. ¿Kasa wanoujaka atumaa shikeraajeerüin tü nümakat Jehová?

¹⁸ Anuu nünüiki Job sutuma niʼrüin nükaalinjünüin nutuma Jehová süpüla nüchecherüin naaʼin: «Tatüjaaitpa aaʼu puuntuin paaʼinrüin kasa süpüshuaʼa, nnojotsü kasain isain püchiki» (Job 42:2). Niyaawata aaʼu Job nnojoluin kasain ataʼülüin nukuwaʼipa Jehová süpüla nikeraajüin tü nümakat. Achecheraasü waaʼin sutuma watüjaain saaʼu tia. Jülüjataa waaʼin wanee sukuwaʼipa. Jamüsüjaʼa shiʼrajeʼerüle wanee wayuu waneepia pitaaraluʼumüin sutuma ayuulin maʼin shia, eesüjaʼa sukuʼlajaale saaʼin sutuma nnojoluin süküjünüin sümüin kasain wayu tü sünainkat jee nnojoluin saawalaain. Shiasaʼa soʼu wanee kaʼi shiʼrajeʼerakalü oʼu aküjünüsü sümüin kasain wayu tü sünainkat jee tü shipinaseinjatkat. Anaka saaʼin süka sütüjaain saaʼu saawalaajeerüin. Akaʼaya wayakana, wachecherüin waaʼin mayaainjeʼe weʼrüin müliaa süka watüjaain saaʼu paʼaraiiseerüin tü mmakat mapeena.

19. ¿Kasa nükaalinjaka akajee waya Jehová süpüla wachecherüin waaʼin?

¹⁹ Wekirajaaitpa anain nüchecherüin waaʼin Jehová soʼunnaa weʼrüin müliaa woʼuraajüle nümüin, waashajeʼerüle tü Bibliakat, nakajee na wawalayuukana otta sutuma tü kasa anasü weʼrüinjatkat mapeena. Kojutule wamüin tia nükaalinjeena waya Jehová süpüla wachecherüin waaʼin waneepia najaʼttiraleepa tü kasa mojusü müliakat atuma waaʼin (Filip. 4:13).