EKIRAJAAYA 08
Eeshi süpüla paʼaleewain Jehová
Keeʼireesü naaʼin Jehová piʼraajüin nia. Piʼraajapa maʼin tü nukuwaʼipakat, jamüin naaʼinraka wanee kasa otta tü keeʼireekat naaʼin süpüleerua wayuu, keeʼireejeerü maʼin paaʼin aleewain pia nümaa. ¿Eeshiche süpüla aleewain wanee wayuu nümaa Maleiwa? (Paashajeʼera Salmo 25:14). ¿Kasa paaʼinrajatka süpüla aleewain pia nümaa? Süküjain tü Bibliakat tü paaʼinrajatkat jee müsia süküjain jamüin anaka maʼin aleewale pia nümaa Jehová.
1. Aleeweeshi Jehová pümaa
«Jürütkaale nünainmüin Maleiwa, arütkaajeechi nia jünainmüin» (Santiago 4:8). Keeʼireesü naaʼin Jehová aleewain pia nümaa. Eesüjaʼa kapüleere saaʼin pümüin tia süka nnojoluin piʼrüin Maleiwa. Nüküjapejeʼe suluʼu tü Bibliakat tü waaʼinrüinjatkat süpüla weʼraajüin tü nukuwaʼipakat jee süpüla warütkaain nünainmüin. Wanaa sümaa waashajeʼerüin tü sümakat tü Bibliakat, aleewashii waya nümaa Jehová jaʼitashi nnojoluin weʼrüin nia.
2. ¿Jamüshi anaka Jehová süpüla paʼaleewain?
Miyoʼu maʼin paalin nüpüla Jehová, nücheka achikit anain pukuwaʼipa jee puchuntuin kaalinwaa nümüin. Püküja nümüin süpüshuaʼa tü shapaakalü atuma paaʼin, süka jamüin, nükaalinjeein pia (1 Pedro 5:7). Nükaalinjeein maʼin Jehová na wayuu aleewakana nümaa, nükatchinrüin naaʼin jee naapüin nanüiki (paashajeʼera Salmo 94:18, 19).
3. ¿Kasa nüchekaka achiki Jehová naaʼinrüin na naʼaleewainkana?
Aishii nüpüla Jehová napüshuaʼa na wayuukana, «aleewapejeʼe maʼin nia namaa na wayuu lotokana akuwaʼipa» (Proverbios 3:32). Nücheka achikit Jehová naaʼinrüinjatüin tü kasa anasükat na naʼaleewainkana jee nayoutuinjatüin tü kasa mojusükat. «Iseerü tachiki taaʼinrüin tü nuluwataakalü anain taya Jehová», eeshijaʼa eekai nameenain. Nütüjaa aaʼu Jehová tü isakat wachiki jee aishii maʼin nüpüla na wayuu aikana apüla nia otta na achajaakana sukuwaʼipa süpüla naaʼinrüin tü nüchekakat (Salmo 147:11; Aluwataaushikana [Hechos] 10:34, 35).
WEKIRAJAA SOOʼOMÜIN
Wekirajaa sooʼomüin tü waaʼinrajatkat süpüla aleewainjanain waya nümaa Jehová otta jamüin anaka nia süpüla waʼaleewain.
4. Aleewashi maʼin Abrahán nümaa Jehová
Wayaawata aaʼu tü naaʼinrajatkat wanee wayuu süpüla aleewain nia nümaa Maleiwa sünainjee tü naaʼinrakat Abrahán (eeshi Abrán nümünüle). Jaashajeʼera nüchiki Abrahán suluʼu Génesis 12:1-4 otta yooto jia süchiki tüü:
¿Kasa nuchuntaka Jehová nümüin Abrahán?
¿Kasa naapüinjatka Jehová nümüin Abrahán?
¿Kasa naaʼinraka Abrahán nüküjapa Jehová nümüin tü naaʼinrajatkat?
5. Tü nüchekakat Jehová süpüla naaʼinrüin na naʼaleewainkana
Eesü tü kasa wachekakat naaʼinreein na waʼaleewainkana.
¿Kasa püchekaka naaʼinreein na paʼaleewainkana?
Jaashajeʼera 1 Juan 5:3 otta yooto jia süchiki tüü:
¿Kasa nüchekaka Jehová süpüla naaʼinrüin na naʼaleewainkana?
Eesüjaʼa weeʼiratüinjatüle wakuwaʼipa süpüla woonooin sümaa nünüiki Jehová. Jaashajeʼera Isaías 48:17, 18 otta yooto jia süchiki tüü:
¿Jamüsü nuchuntaka Jehová namüin na naʼaleewainkana neeʼiratüinjatüin nakuwaʼipa?
Nüküjain wamüin wanee waʼaleewain tü waaʼinrajatkat süpüla nnojoliin jamajüin waya otta süpüla anainjatüin wakuwaʼipa. Müsia neʼe nukuwaʼipa Jehová namüin na naʼaleewainkana.
6. Tü naaʼinrakat Jehová napüleerua na naʼaleewainkana
Nükaalinjain Jehová na naʼaleewainkana sülatüle kasa mojusü namüin. Jünaja tü VIDEOKOT otta yooto jia süchiki tüü:
Suluʼu tü video wanajakat, ¿kasa naaʼinraka Jehová süpüla nnojoluinjatüin mojuin tü jülüjakat saaʼin tü wayuukot?
Jaashajeʼera Isaías 41:10, 13 otta yooto jia süchiki tüü:
¿Kasa naaʼinrajatka Jehová napüleerua na naʼaleewainkana?
¿Jamüshi anaka Jehová süpüla paʼaleewain?
Nakaalinjain waya na waʼaleewainkana. Akaataajaʼa neʼe Jehová, nükaalinjeena waya, jama waʼaleewain nia.
7. Yootuinjana waya nümaa Jehová süpüla aleewain waya nümaa
Aleewashii maʼin waya namaa na waʼaleewainkana yootule waya namaa waneepia. Jaashajeʼera Salmo 86:6, 11 otta yooto jia süchiki tüü:
¿Kasa waaʼinrajatka süpüla yootuin waya nümaa Jehová?
¿Kasa yootoka akajee wamaa Jehová?
Yootushii waya nümaa Jehová woʼuraajüle nümüin jee yootushi nia wamaa sükajee tü Bibliakat.
EESHII WAYUU EEKAI NAMÜIN: «Nnojoishi süpüla aleewain wanee wayuu nümaa Maleiwa».
¿Jarat tü wetsiikulo paashajeʼerüinjatkat süpüla püküjain nümüin wanee wayuu eein süpüla aleewain nia nümaa Jehová?
WATÜJAAITPAKA AAʼU
Aleeweeshi Jehová pümaa jee nükaalinjeein pia süpüla pürütkaain nünainmüin.
Pusouta shiʼipajee
¿Kasa naaʼinraka Jehová süpüla nükaalinjain na naʼaleewainkana?
¿Jamüsü nüküjaka Jehová namüin na naʼaleewainkana neeʼiratüinjatüin nakuwaʼipa?
¿Jamüshi nnojoika nuchuntuin Jehová kasa kapüleesü namüin na naʼaleewainkana?
PÜNAʼLA SOOʼOMÜIN
¿Kasa anasü piʼreetka aleewale pia nümaa Maleiwa?
«Anasü maʼin weʼraajüle nukuwaʼipa Maleiwa» (Aapiria Wayuu, peʼureeroʼu 15, 2003)
Pikirajaa süpüla aleewain pia nümaa Maleiwa.
Anuu süchiki wanee wayuu oʼttaaka sünainjee aleewain shia nümaa Jehová.
Anuu tü namakat waneinnua jimaʼalii jee majayünnüü nüchiki Jehová.
¿Kasa naaʼinrajatka wanee wayuu süpüla aleewain nia nümaa Maleiwa? (1:46)