Sukuwaʼipainjatka watuma «Wanüikinjatka sünain aküjaa pütchi»

Alatüirü maʼaka jeʼra juya sünain süshajünüin tü pütchi «Wanüikinjatka sünain aküjaa pütchi». Tia, ashajünüsü sünain tü karaloʼutakat Wekirajaayainjatü sünain tü outkajawaakat Wakuwaʼipa otta Waʼyataain nümüin Maleiwa. ¿Jamüinjatche sukuwaʼipa watuma tia?

Tü wekirajüinjatkat sünain tü outkajawaakat. Shiainjatü waküjaka tü pütchi eʼitaanakat yala, maʼaka saaʼin tü asakiraakat, tü wetsiikulokot otta tü pikirajüinjateetkat anain. Nnojotpejeʼe choʼujaain washatüin süpüshuaʼa tü sümakat tü videokot. Eesüjaʼa süpüla waküjain pütchi wanaapünaa sümaa nakuwaʼipa na wayuukana, naatain watuma suʼttia wanüiki jee tü waneirua pütchi waküjakat. Eesü süpüla waapüin wanee karaloʼuta wekirajaka aka wayuu, mayaapejeʼe nnojoluin aküjünüin shia yala.

Sünain aküjaa pütchi. Tü pütchi eʼitaanakat yala, süpülajatü anainjatüin watuma wanüiki waküjapa pütchi. Kamalainre sümüin wanee wayuu tü pütchi waküjakat otta sütüjaweere saaʼu sooʼomüin, eeshii süpüla ayatüin waashajaain sümaa jee shiale yootuin waya süchiki tü pütchi wekirajüinjateetkalü anain wouyantapa wachikuaʼa. Eeshii süpüla waainjain tü aküjünakat yala jee shiale waküjain wanee pütchi naata. ¿Shiache kamalainjeetka namüin na wayuukana tü pütchi eʼitaanakat süpüla kashikat tiainka jee shiale wanee wetsiikulo naata? ¿Yooteshiiche na wayuukana süchiki tü kasa naapakat yalapünaa? ¿Yooteetaapa naya süchiki tü kasa alatakat noumainpaʼa? Eesü süpüla naatain watuma tü wanüikinjatkat sünain aküjaa pütchi, nnojotpejeʼe motuinjatüin waaʼin waaʼinrüin shia süpüla waküjainjatüin «tü pütchi anasükat» namüin na wayuukana (1Co 9:22, 23, TNM).