Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
SETTIENPÜROʼU 7-13
KOROLO KOJUTUSÜ SULUʼUKA TÜ WIWÜLIAKAT | ÉXODO 23, 24
«Nnojo washatüin nakuwaʼipa na manoujainsaliikana»
(Éxodo 23:1) »Nnojo püküjain wanee alawaa sümüin wayuu. Nnojo pükaalinjain wanee wayuu mojulaashi sükajee piperulajüin wanee wayuu.
(Éxodo 23:2) Nnojo wanaawain paaʼin sümaa wayuu sünain aaʼinraa kasa mojusü. Nnojo püküjain perulaa süpüla neʼe paaʼinwaainjachin pia namaa na wanee wayuukanainnua.
(Éxodo 23:3) Mojujiraale wanee wayuu maʼletsesai nümaa wanee yalejee, nnojotsü koʼuinjatüin pukuwaʼipa namüin.
Püchajaa süchiki kaaʼürüi suluʼu tü Wiwüliakat
(Éxodo 23:9) »Nnojoishi eʼrüinjachin müliaa putuma chi wayuu suluʼujeejachikai wanee mma naatajatü. Süka jamüin, jütüjaa aaʼu jamüin naaʼin wanee wayuu kepiale nia suluʼu wanee mma nnojotka nuumain, maʼaka jaaʼin jiakana wanaa sümaa kepiapuʼuin jia chayaa Egipto.
(Éxodo 23:20, 21) »Taluwataajeechi wanee aapiee püpüleerua süpüla naaʼinmajüin pia suluʼupünaa tü wopu puʼunüinjatkalü aluʼu otta nüntirüinjachi pia suluʼumüin tü mma taneekakat püpüla. 21 Jülüja paaʼin tü nümakat pümüin otta poonoo sümaa nünüiki. Nnojo piʼrüijaain wayumüin nümüin süka nnojoleerüin nülatirüin sooʼopünaa naaʼin paainjala, süka jamüin tanüliamaain nia.
Wetsiikulo aashajeʼennajatka
(Éxodo 23:1-13) »Nnojo püküjain wanee alawaa sümüin wayuu. Nnojo pükaalinjain wanee wayuu mojulaashi sükajee piperulajüin wayuu. 2 Nnojo wanaawain paaʼin sümaa wayuu sünain aaʼinraa kasa mojusü. Nnojo püküjain perulaa süpüla neʼe paaʼinwainjachin pia namaa na wanee wayuukanainnua. 3 Mojujiraale wanee wayuu maʼletsesai nümaa wanee yalejee nnojotsü koʼuinjatüin pukuwaʼipa namüin. 4 »Müleka püntüle sünain nüpüliiküse chi püʼünüükai jee niale chi nüpaaʼainse toolokoi, püleʼejirüinjachi nia nümüin nüchikuaʼa. 5 Palasütüle chi nüpüliiküsekai chi püʼünüükai suupünaa nüchise, nnojo piirakaain neʼe nia süka poʼu. Pükaalinjainjachi chia wayuukai süpüla nütameʼrüinjachin nüchikuaʼa chi nüpüliiküsekai. 6 »Mojujiraale wanee wayuu maʼletsesai nümaa wanee wayuu yalejee, nnojo pukumajüin sukuwaʼipa süpüla nükanajuuinjachin chi wayuu maʼletsekai kepiakai juumainpaʼa. 7 »Nnojo püküjain alawaa süchiki wanee kasa süpüla nuʼutünüin neʼe naaʼin wanee wayuu eekai maainjalain otta chi eekai lotuin akuwaʼipa, süka jamüin, nnojoleerüin anain toʼuluʼu tü kasa mojusü naaʼinrakat chi mojulaashikai. 8 »Nnojo paapaain nneerü süpüla neʼe saainjünüinjatüin kasa mojusü, naapaale tia chi wayuu kekiishikai amojujaajeerü nukuwaʼipa sutuma. Akaajaʼa neʼe chi wayuu aküjakai tü shiimainkat, aküjashi nia alawaa mapa sutumajee tia. 9 »Nnojoishi eʼrüinjachin müliaa putuma chi wayuu suluʼujeejachikai wanee mma naatajatü, süka jamüin, jütüjaa aaʼu jamüin naaʼin wanee wayuu kepiale nia suluʼu wanee mma nnojotka nuumain maʼaka jaaʼin jiakana wanaa sümaa kepiapuʼuin jia chayaa Egipto. 10 »Apünajüinjachi pia soʼu aipirua juya otta pükotchojeerü süchon tia püttiakat soʼu tia aipiruakat juya. 11 Akaajasaʼa soʼu tü akaratshikat juya, nnojoishi pia apünajüinjachin, puuʼulaainjatü sheemeraain tü mmakat. Na wayuu maʼletsekana kepiakana chayaa suluʼu tü pupueulosekat ekeena süchon tia otta tü kasa napütakat shiküinjatü tü mürüt simoluunakalüirua. Müinjatia neʼe sukuwaʼipa putuma eere püpünajüin suuʼulia uuwa otta olivo. 12 »Aʼyataainjachi pia soʼu aipirua kaʼi, akaajasaʼa soʼu tü akaratshikat kaʼi nnojolinjachi pia aʼyataain süpüla neemeraainjachin chi püpaaʼainse toolokoi otta chi püpüliiküsekai, süpüla neemeraainjachin süchon tü püchepchiakat otta na wayuu naatakana oumain. 13 »Ayatüinjatia jaaʼinrüin süpüshuaʼa tü taküjaitpakat jümüin. Nnojotsü juchuntajatüin nanülia na maleiwayaashiikana, nnojotsü pujuʼitirüinjatüin wanee pütchi puwaraluʼujee süpüla puchuntuinjatüin nanülia.
SETTIENPÜROʼU 14-20
KOROLO KOJUTUSÜ SULUʼUKA TÜ WIWÜLIAKAT | ÉXODO 25, 26
«Tü kasa kojutuleekat suluʼujee tü aʼwaajüleekat Maleiwa»
(Éxodo 25:9) Anuu sukuwaʼipainjatü saainjia eere taʼwaajünüinjachin otta süpüshuaʼa tü suluʼuinjatkat. Jaainjainjatü shia maʼaka taküjain shia pümüin.
(Éxodo 25:21) Piʼitaainjatü tü shirousekat tü Jurasükeetkat otta suluʼu tü Jurasükeetkat piʼitaainjatü tü ipa tashajakalü anain tü Poloosükat Pütchi taapüinjatka pümüin.
(Éxodo 25:22) Eeʼiyalaajechi taya pümüin saaʼujee tü shirousekat tü Jurasükeetkat otta yooteechi taya pümaa yalejeechiki. Taküjeerü süpüshuaʼa tü pümüinjatkat namüin na israeliitakana yalejee eere na piamashiikana querubín, na saaʼukana tü Jurasükeetkat.
Püchajaa süchiki kaaʼürüi suluʼu tü Wiwüliakat
(Éxodo 25:20) Wayaatüinjatü iipünaamüin tü natünakat na piamashiikana querubín. Antaleeinjatia shia sünainmüin tü shirousekat tü Jurasükeetkat. Niʼipoʼujee wanee querubín yalainjachi chi wane nüpüleeruajee, jepüjepülüinjana naya piamaleʼeya sümaa neirakaain sümüin shirouse tü Jurasükeetkat.
(Éxodo 25:30) Otta saaʼu tü meesakat, tü yaakat tapüleeruajee, piʼitawalinjatü waneepia tü pan tamüinjatkat.
Wetsiikulo aashajeʼennajatka
(Éxodo 25:23-34) »Paainjainjatü wanee meesa süka tü wunuʼu kanüliakat acacia, piamainjatü codo sajaʼapüin, wanee codo sheerulüin otta wanee codo shiatapünaamüin sajaʼapüin iipünaamüin. 24 Pushulerüinjatü ooro sutoutajee otta kacheʼeyaa müinjatü putuma sotpünaa tü meesakat. Paainjainjatü tia süka ooro. 25 Sheerulüinjatka tia sücheʼekat shiainjatü wanee palmo menor otta eʼitaanüinjatü ooro sotpünaa tia sücheʼekat. 26 Paainjainjatü pienchisü süttiija süka ooro otta piʼitaajeerü shia sünain tü pienchisükat süshekeinruʼu tü meesakat, piʼitaainjatü tia sünain tü pienchisükalüirua süsaʼa tü meesakat. 27 Tü süttiijakat piʼitaainjatü peje sünain tü sücheʼekat tü meesakat. Tia shia eere shikerotinnüinjatüin tü wunuʼu alüʼüjiainjatkat tü meesakat. 28 Pushottüinjatü wunuʼu kanüliakat acacia, püshülerüinjatü ooro sutoutajee. Tia shia alüʼüjiainjatka tü meesakat. 29 »Aainjüinjachi pia pülaata, copa, jaarü otta müsia kuriiya süpülajanainjatü tü oʼyotunakat saaʼu tü aʼajüleekat. Paainjainjatü süpüshuaʼa tia süka ooro. 30 Otta saaʼu tü meesakat, tü yaakat tapüleeruajee, piʼitaʼawalinjatü waneepia tü pan tamüinjatkat. 31 »Paainjainjatü wanee ranpara. Ooroleeinjatü tia süpüshuaʼa. Achinuinjatü shia süka mattiia otta nnojotsü shia ejeʼipünajanajatüin. Eeinjatü wanee suuʼui sajapuluʼujianjatü, eeinjatü wanee ooro pasanainpünaa sünain katünayaa müinjatü shia, eeinjatü copa sünain, aainjünajatü wanee kasa koʼoyoosü otta shiyaakua süsii wunuʼu. 32 Tü ooro pasanainpünaakat sünain tü ranparakat ojuʼitajatü aipirua sütüna sünainjee: apünüinjatü sütüna yaajeeruʼu otta apünüinjatü sütüna chejeeruʼu. 33 Wanee saʼataʼata eʼitaanüinjatü wanee copa sünain waneʼewai sukua tü apünüinsükat sütüna. Müinjatü shiyaakua maʼaka saaʼin wanee süsii almendro. Aainjünajatü wanee kasa koʼoyoosü otta shiyaakua süsii wunuʼu. Müinjatü saainjia tia sümaa pachikuatüin shia atumawaa otta tü wanee apünüinsükat sütüna eʼitaanüinjatü wanee copa sünain waneʼewai sukua. Müinjatü aka saaʼin shiyaakua süsii almendro. Aainjünajatü wanee kasa koʼoyoosü otta shiyaakua süsii wunuʼu. Müinjatü saainjia tia sümaa pachikuatüin shia atumawaa, shia sukuwaʼipainjatka saainjia tia atumawaa tü aipiruasükat sütüna tü ranparakat. 34 Sünain tü ooro pasanainpünaakat sünain tü ranparakat, eʼitaanüinjatü pienchisü copa maʼaka saaʼin shiyaakua süsii almendro. Aainjünajatü wanee kasa koʼoyoosü otta shiyaakua süsii wunuʼu. Müinjatü saainjia tia sümaa pachikuatüin shia atumawaa.
SETTIENPÜROʼU 21-27
KOROLO KOJUTUSÜ SULUʼUKA TÜ WIWÜLIAKAT | ÉXODO 27, 28
«¿Kasa watüjaka sünainjee tü kuluulu naʼatapuʼukat na sacerdootekana?»
(Éxodo 28:30) Tü kanüliakat Urim otta Tumim eʼitaanüinjatü shia suluʼu tü kuluulu yaakat naaʼintoʼupünaa Aarón. Nikerotapa Aarón nümaʼanamüin Jeʼwaa eeinjatü tia waneepia naaʼintoʼupünaa süpüla naküjain namüin na israeliitakana jamüin nünüiki Jeʼwaa süchiki wanee kasa.
(Éxodo 28:36) »Paainjainjatü wanee kachueera süka ooro otta püshajüinjatü wanee pütchi sünain mayaa: ‹Tü akuwaʼipaa wulesükat nümaʼanajeejatü Jeʼwaa›.
(Éxodo 28:42, 43) Paainjainjatü naiche süka tü kuluulu kanüliakat lino suulia jaʼyain naya. Yaajeeinjatü shia eejeerü tü naseʼewainkat sünainmüinreʼeya napüʼü. 43 Naʼatüinjatü tia Aarón otta na nüchonniikana nekerotopa eere tü outkajaaleekat otta narütkaapa eere tü nuʼwaajüleekat Maleiwa. Müle shia natuma, nnojoleena kaainjalain otta nnojoliijeena outuin. Naainjainjatü Aarón tia suluʼu kaʼikat süpüshuaʼa otta müshiʼiya na nuuʼuliwoʼukana.
w08 8/15 15 püt. 17
Kojutuinjatü wamüin tü aainjünakat wanaa sümaa waʼwaajüin Jeʼwaa
17 «Puʼunapa eemüin tü aʼwaajüleekat Maleiwa, kojutuinjatü pümüin tia», müsü tü Wiwüliakat suluʼu Eclesiastés 5:1. Naakatüinjatü Moisés nükoʼusüin otta müshia Josué nantapa eemüin wanee mma eere chi Maleiwakai (Éx. 3:5; Jos. 5:15). Na sacerdoote chejeʼewaliikana Israel, kaicheinjana naya tü kuluulu kanüliakat lino suulia jaʼyajüin naya (Éx. 28:42, 43). Naainjale tia, nnojoleechi jaralin eʼrüin japülii wanaa sümaa naʼyataain nümüin Jeʼwaa chaa eere tü aʼajüleekat mürüt. Na nüpüshikana wanee sacerdoote oonooinjana sümaa tü nuluwataakalü anain Jeʼwaa otta kojutuinjana namüin na sacerdootekana.
Püchajaa süchiki kaaʼürüi suluʼu tü Wiwüliakat
(Éxodo 28:15-21) »Paainjireerü tü kuluulu eʼitaanüinjatkat naaʼintoʼupünaa Aarón nümaa wanee wayuu aʼyapüjüi, piʼitaainjatü ooro sünain maʼakaajüleʼe saainjünüin süka tü efod münakat. Piʼiteʼerüinjatü jiitpai wüitüsü sünain otta müsia laana jepisiiaka oʼu. Piʼiteʼera jiitpai ishotot maʼin sünain otta müsia lino asuttajuushinjatü. 16 Püshokolüinjatpa tia kuluutkat, acheküsü waneeinjatüin palmo sajaʼapüin otta waneeinjatü palmo sheerulüin. 17 Piʼitaainjatü pienchisü kakuuna unapümüin, pachiiruaainjatü otta müsia tü sotpünaainjatkat, tü aaliijüinjatkat shia. Anuu tü kakuuna piʼitaainjatkat palajana: rubí, topacio otta esmeralda. 18 Anuu tü wanee apünüinsükat kakuuna piʼitaainjatka sünain: turquesa, zafiro otta jaspe. 19 Anuu tü wanee kakuuna piʼitaainjatka sünainyaa: léshem, ágata otta amatista. 20 Anuu joo tü apünüinsükat kakuuna piʼitaainjatka sajaʼttiamüin: crisólito, ónice otta jade. Süpüshuaʼa tia kakuunakalüirua, eʼitaanüinjatü ooro sotpünaa. 21 Eʼitaanüinjatü nanülia na 12 nüchonnii Israel, waneʼewai sukua tia anülieekat shiyaawaseinjatü tü 12 eʼirukuu otta waneʼewai sukua tia kakuunakalüirua ashajünüinjatü nanülia sünain.
(Éxodo 28:38) Eʼitaanüinjatü tia sünain niʼipoʼu Aarón otta nianjachi asoutaka saaʼu saainjala wanee wayuu saainjapa kasa mojusü sümüin tü kasa wulesükalüirua. Tia shia tü kasa wulesü nasülajakat na israeliitakana. Tü kachueera aainjuushikat süka ooro nnojotsü naakatüinjatüin shia Aarón niʼipoʼunainjee süpüla anainjatüin tü naainjakat noʼuluʼu Jeʼwaa.
Wetsiikulo aashajeʼennajatka
(Éxodo 27:1-15) »Paainjainjatü tü aʼajüleekat mürüt süka tü wunuʼu kanüliakat acacia pienchinjatü shiʼipapaʼa, tü shimeriiasekat jaʼralinjatü codo sajaʼapüin otta jaʼralinjatü codo sheerulüin otta sajaʼapüin iipünaamüin apünüinjatü codo. 2 Sünain tü pienchisükat sot koʼuwainjatü putuma otta pushulerüinjatü cobre sutoutajee tü aʼajüleekat mürüt. 3 Paainjainjatü waatte süpüla sükotchojünüinjatüin tü paliʼikat, paainjainjatü paara, kuriiya, tenedor otta iita kaluʼuinjatka shimechi siki. Süpüshuaʼa tia paainjainjatü süka cobre. 4 Paainjainjatü wanee pariiya suluʼuinjatka tü aʼajüleekat mürüt, paainjainjatü shia süka cobre. Piʼitaainjatü pienchisü süttiija sünain tü aʼajüleekat mürüt, paainjainjatü shia süka cobre. 5 Puʼwachirüinjatü tü pariiyakat suluʼu tü aʼajüleekat mürüt. Piʼitaainjatü shia pasanain sünain. 6 Ashottüinjachi pia wunuʼu acacia münakat otta püshulerüinjatü cobre sutoutajee, tia shia tü alüʼüjiainjatkat tü aʼajüleekat mürüt. 7 Pikerotirüinjatü tia wunuʼukalüirua suluʼupünaa tü süttiijakat, wanee yaajeeruʼu sünain tü aʼajüleekat mürüt otta wanee chejeeruʼu sünain. Tia shia tü alüʼüjiainjatkat tü aʼajüleekat mürüt. 8 Tü aʼajüleekat mürüt, aainjünüinjatü süka taapüla pienchinjatü shiʼipapaʼa otta jotoolinjatü pasanain sünain. Pukumajüinjatü shia maʼakaajüle niiʼiyatüin shia pümüin chaa saaʼu tü uuchikat. 9 »Kapatiaseinjatü putuma tü aʼwaajüleekat Maleiwa uuchijeeruʼu sünain tüü, piʼitaainjatü tü kuluulu lino münakat asuttajuushinjatü shia 100 codo sajaʼapüinjatka. 10 20 suuʼui otta 20 süpülajana tü suuʼuikat. Aainjünuinjatü shia süka cobre otta tü ganchokat aainjünüinjatü shia süka pülaata otta müsia tü süttiijakat. 11 Palaajeeruʼu, eʼitaanüinjatü wanee kuluulu 100 codo sajaʼapüinjatka. 20 suuʼui otta 20 tü süpülajanainjatkat suuʼui aainjünajatüsü süka cobre. Paainjainjatü gancho süka tü kachueera pülaata münakat otta müsia süttiija süpüla suuʼui. 12 Otta müsia chaa wopujeeruʼu, eʼitaanüinjatü wanee kuluulu süpaatiaseinjatü 50 codo sheerulüin, aainjünajatü poloo suuʼui otta poloosü süpülajana tü suuʼuikat. 13 Chaa wüinpejeeruʼu eepünaale niweetüin chi Kaʼikai, 50 codo sheerulüinjatka tü paatiakat. 14 Sünainjee soʼu tü paatiakat, eeinjatü 15 codo kuluulu apünüinjatü suuʼui otta apünüinjatü süpülajana tü suuʼuikat. 15 otta müsia chejeeruʼu sünain soʼu tü paatiakat, eʼitaanajatü 15 codo kuluulu apünüinjatü suuʼui otta apünüinjatü süpülajana tü suuʼuikat
SETTIENPÜROʼU 28–OʼUTUUPÜROʼU 4
KOROLO KOJUTUSÜ SULUʼUKA TÜ WIWÜLIAKAT | ÉXODO 29, 30
«Tü asülajünüinjatkat nümüin Jeʼwaa»
(Éxodo 30:11, 12) Anuukalaka nünüiki Jeʼwaa nümüin Moisés: 12 «Paainjapa wanee censo jee piyaawajapa na nüchonniikana Israel, awalaajüinjana naya nümüin Jeʼwaa waneʼewai nakua süka katüin noʼu. Naainjüle tia, nnojoleena naya süsalain naainjala nashajinnapa nanülia.
(Éxodo 30:13-15) Napüshuaʼa na ayaawajünakana awalaajüinjana naya shiatapünaa siclo, wanaawainjatü sümaa tü siclo suluʼukat tü aʼwaajüleekat Maleiwa. Wanee siclo 20 guerás. Tü asülajünüinjatkat nümüin Jeʼwaa, shiatapünaainjatü wanee siclo. 14 Na awalaajüinjanakana nümüin Jeʼwaa nayainjana na 20 ouyase jee shiale sooʼomüin. 15 Na washinnuukana nnojotsü alanaainjatüin tü nawalaajakat suulia shiatapünaa siclo otta müshiʼiya na maʼletsekana, nnojotsü paliʼirüinjatüin nawalaajaka suulia tü shiatapünaakat siclo. Tia nümüinjatü Jeʼwaa otta süpülajatü sülatinnüin jaainjala.
(Éxodo 30:16) Pukotchojüinjatü tü nneerü naapakat na israeliitakana süpüla sülatinnüinjatüin naainjala otta paapüinjatü shia süpüla tü choʼujaakat suluʼu tü piichi outkajaaleekat. Nneetkat tüü, süpülajatü sotuin jaaʼin nuʼupala Jeʼwaa sülatinnüinjatüin jaainjala otta katüinjatüin joʼu».
Püchajaa süchiki kaaʼürüi suluʼu tü Wiwüliakat
(Éxodo 29:10) »Süchikijee, pülüʼüjeechi chi paaʼa toolokoi chaa eere tü outkajaaleekat otta müshia Aarón otta na nüchonniikana neʼitaainjatü najapü saaʼu nikii chi paaʼakai.
(Éxodo 30:31-33) »Anuu tü wanee kasa püküjainjatkat namüin na israeliitakana: ‹Seitakat tüü, kojutushaatasü maʼin süpülajatü neʼe shiʼyotunüin saaʼu nikii chi taneekakai. Jaainjainjatü tüü suluʼu kaʼikat süpüshuaʼa. 32 Nnojotsü shia ashuleʼennüinjatüin nutoutajee wanee wayuu otta nnojotsü aainjünüinjatüin wanee makalaka saaʼin tia, shia wanee kasa wulesü otta kojutuinjatü shia jümüin. 33 Chi wayuu ashatakai makalaka tia otta nushorotiʼttaale shia saaʼu nikii wanee wayuu nnojoikai aneekünüin süpüla tia, acheküshi nuʼutunüinjachin aaʼin chi aainjakai shia›».
Wetsiikulo aashajeʼennajatka
(Éxodo 29:31-42) »Chi anneerü aneekünakai süpüla shikiiraainjachin nüneekünüin wanee sacerdoote, acheküshi püʼlakajaainjachin nia chaa eere tü aʼwaajüleekat Maleiwa. 32 Aarón otta müshiʼiya na nüchonniikana, neküinjatü niʼiruku chi anneetkai chaʼayaa soʼuluʼu tü outkajaaleekat otta müsia neküinjatü tü pankat. 33 Neküinjatü tia piamasükalüirua kasa, nalatinnaka akajee naainjala süpüla sacerdooteinjanain naya otta süpüla wuleinjanain naya. Nnojotsü shia neküinjatüin na wayuu nnojoliikana aneekünüin süpüla tia, süka jamüin, shiain wanee kasa wulesü. 34 Waneemüin kaʼi süpütaale tü asalaakat otta tü pan shikiirakat naneekünüin sacerdooteinjanain naya, acheküsü saʼajünüinjatüin, nnojotsü shia ekünüinjatüin süka shiain wanee kasa wulesü. 35 »Müinjatü nukuwaʼipa putuma Aarón otta müshiʼiya na nüchonniikana wanaapünaa sümaa tü taluwataakalü anain pia. Pükatalüinjatü akaratshi kaʼi süpüla naneekünüinjanain saaliijee sacerdootein naya. 36 Nükaaluʼuwai wanee kaʼi puʼutirüinjachi aaʼin wanee paaʼa toolo süpüla sülaʼjaanüinjatüin naainjala naya wayuukana otta süpüla wuleinjatüin tü aʼajüleekat mürüt ooʼulaka püshorottirüinjatü seita jemeta eejuu saaʼu tü aʼajüleekat mürüt süpüla wuleinjatüin shia. 37 Pükatalüinjatü akaratshi kaʼi süpüla wuleinjatüin tü aʼajüleekat mürüt, paainjainjatü tia süpüla wuleshaatainjatüin shia. Chi wayuu eʼitaakai najapü saaʼu tü aʼajüleekat mürüt, wayuu wuleinjachi akuwaʼipa. 38 »Anuu tü eʼitaanajatkat suluʼu tü aʼajüleekat mürüt: nükaaluʼuwai wanee kaʼi paapüinjachi wanee anneerü waneeichika ouyase. 39 Chi palajaikai anneerü paapüinjachi nia wattaʼa maalü otta chi wanee paapüinjachi aipaʼa. 40 Paapüinjachi chi palajaikai anneerü sümaa poloowai sünainjee poloowai shikii wanee efá ariina otta shiatapünaa shiatapünaamüin wanee hin seita olivo otta paapüinjatü sümaa tia wanee shiatapünaa shiatapünaamüin hin wiino. 41 Chi anneerü paapüinjachikai chiirua, paapüinjachi nia aipaʼa sümaa tü ariinakat otta wiino maʼaka saaʼin tü paapakat wattaʼa maalü. Süpüshuaʼa tia, jemeteerü maʼin sheejuu saaʼuinjatü shia siki nümüin Jeʼwaa. 42 Shia jaapawalüinjatka nümüin Jeʼwaa tia suluʼu kaʼikat süpüshuaʼaleʼeya. Jaainjainjatü shia nümüin Jeʼwaa chaʼaya soʼuluʼu tü outkajaaleekat, cheechi taya jüpüleerua süpüla taashajaainjachin pümaa.