Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
OʼUTUUPÜROʼU 5-11
KOROLO KOJUTUSÜ SULUʼUKA TÜ WIWÜLIAKAT | ÉXODO 31, 32
«Nnojo waʼwaajüin maleiwayaasü»
(Éxodo 32:1) Süshapalaakalaka naaʼin na israeliitakana sükajee nnojoluin nüshakatamaatüin Moisés saaʼujee tü uuchikat. Narütkaakalaka nünainmüin Aarón jee namaka nümüin: «Paainjamaata wamüin wanee maleiwa süpüla niainjachin oʼunirüin waya süka nnojoluin watüjaain saaʼu kasain alatüin nümüin Moisés, chi wayuu ojuʼitirakai waya Egiptojee».
(Éxodo 32:4-6) Naapaakalaka tü oorokot, nukumajakalaka shia süka wanee kachueera otta naainjakalaka wanee niyaakua wanee paaʼachon. Anuukalaka nanüiki: «Israel, anii chi pümaleiwasekai, nia ojuʼitiraka pia chejee Egiptojee». 5 Niʼrapa Aarón tia, nukumajakalaka wanee aʼwaajülee chi paaʼachonkai. Nümaka süchikijee: «Aainjeena waya wanee miʼiraa nümüin Jeʼwaa wattaʼa». 6 Waneemüin kaʼi, natamaakalaka wattacheʼechon otta naʼajakalaka mürüt otta müsia tü naapakat süpüla anajiraain naya nümaa Jeʼwaa. Mapa, nekaakalaka na israeliitakana otta nasaakalaka. Jee süchikijee tia, nayonnojokalaka maʼin.
(Éxodo 32:9, 10) Anuukalaka sooʼomüin nünüiki Jeʼwaa nümüin Moisés: «Teʼrüin macheʼereein pueulokot tüü. 10 Puuʼulaa toʼutaiwa naaʼin, süka jamüin, jashichin maʼin taya namüin pieechikalaka wainmain ooʼuliwoʼu tatuma».
Püchajaa süchiki kaaʼürüi suluʼu tü Wiwüliakat
(Éxodo 31:17) Tüü, shia wanee shiyaawase tapansaajüitpain wanee pütchi namaa na israeliitakana, süka nukumajalain Jeʼwaa tü sirumatuʼukat otta tü mmakat soʼu aipirua kaʼi otta müsia soʼu tü akaratshikat kaʼi ojoʼlooshi nia suulia aʼyatawaa jee neemeraakalaka›».
(Éxodo 32:32, 33) Müleka anale saaʼin pümüin, pülatira naainjala noulia. Nnojorüle pülatirüin naainjala noulia, taya mata püsünneʼera anülia suluʼujee tü karaloʼuta püshajakat, jaman». 33 Anuukalaka nünüiki Jeʼwaa nümüin Moisés: «Nayeena tasüʼnneʼeraka anülia na kaainjalakana toulia.
OʼUTUUPÜROʼU 12-18
KOROLO KOJUTUSÜ SULUʼUKA TÜ WIWÜLIAKAT | ÉXODO 33, 34
«Anasü maʼin nukuwaʼipa Jeʼwaa»
(Éxodo 34:5) Nüshakatakalaka Jeʼwaa saaʼu tü sirumakat jee nüntakalaka nüʼütpaʼa Moisés otta nüküjakalaka Jeʼwaa nünülia.
(Éxodo 34:6) Nülatakalaka Jeʼwaa nüpüleeruajee Moisés jee nümakalaka: «Jeʼwaa, Jeʼwaa, amüliajüi nia, anamia maʼin nia, nnojoishi aashichijaamaatüin, aisü maʼin wayuu nüpüla otta nüküjain tü shiimainkat,
(Éxodo 34:7) Ayatüsia alin wainma wayuu nüpüla, nülatirüin sooʼopünaa naaʼin tü kasa mojusü aainjünakat, tü eʼraakat wayumüin otta tü kaainjalaakat, kasalajaneetpejeʼe namüin naainjala na wayuu aainjakana kasa mojusü, nüchekajeerü Jeʼwaa naainjala wanee wayuu namüin na nüchonniikana, na nüikeyuukana, na nachonniikana na nüikeyuukana otta na wanee nuuʼuliwoʼukana».
Püchajaa süchiki kaaʼürüi suluʼu tü Wiwüliakat
(Éxodo 33:11) Yootushi Jeʼwaa nümaa Moisés maʼaka yootuin wanee wayuu nümaa waneʼeya. Nujuʼittaapa Moisés anooipaʼamüin nnojoishi wattaluʼuin Josué suulia tü aʼwaajüleekat Maleiwa, niyuraanse nia Moisés otta aʼyataashi nia nümüin, nüchon nia Nun.
(Éxodo 33:20) Anuukalaka nünüiki: «Nnojotsü süpüla piʼrüinjatüin toʼupünaa, nnojoishi süpüla niʼrüinjachin taya wanee wayuu sümaa ayatüin katüin noʼu süchikijee tia».
(Éxodo 34:23, 24) »Napüshuaʼa na tooloyuukana, chainjana arütkaain nünainmüin Jeʼwaa, chi Senyot shiimainshikai, chi Nümaleiwasekai Israel. Oʼunajana apünüintua süpüla juyakat. 24 Tasüʼnneʼereerü püpüleerua tü wanee pueulokalüirua otta miyoʼujeerü tü puumainkat tatuma. Puʼunapa apünüintua süpüla juyakat sünain analawaa nümüin Jeʼwaa, nnojoleechi jaralüin ashutaka saaʼu tü puumainkat.
OʼUTUUPÜROʼU 19-25
KOROLO KOJUTUSÜ SULUʼUKA TÜ WIWÜLIAKAT | ÉXODO 35, 36
«Yapainjana waya süpüla waaʼinrüin tü nümakat wamüin Jeʼwaa»
(Éxodo 35:25, 26) Napüshuaʼa na jieyuu atüjakana eʼinaa, neʼikajaain tü neʼinainkat: jiitpai wüitüsü, laana jepisiiya oʼuu, jiitpai ishoshootosü otta tü lino anasükat. 26 Napüshuaʼa na jieyuu atüjakana eʼinaa, eʼinüshii naya süka naaʼin namüiwaʼa süka soi tü kaaʼulakat.
(Éxodo 35:30-35) Anuukalaka nünüiki Moisés namüin na israeliitakana: «Jiirakaa, anii nüneeküichipa Jeʼwaa Bezalel, chi nüchonkai Urí, chi nüchonkai Hur, chi nuuʼuliwoʼukai Judá. 31 Naapüin chi Maleiwakai chi naaʼinkai nümüin süpüla kekiinjachin maʼin nia, niyaawatüinjatüin sukuwaʼipa wanee kasa otta süpüla nukumajüinjachin süpüshuaʼa kasa eekai eein neʼe, 32 aainjeechi nia kasa anakalü maʼin, naainjeerü kasa süka tü oorokot, tü pülaatakat otta cobre, 33 niʼyotoojeerü tü ipakalüirua otta aneerü maʼin saainjia nutuma otta aainjeechi nia kasa eekai eein süka tü wunuʼukalüirua. 34 Niʼitaain suluʼu naaʼin Bezalel otta Oholiab süpüla natüjainjanain ekirajaa wayuu. Oholiab nüchon nia Ahisamac, chi nuuʼuliwoʼukai Dan. 35 Atüjashii maʼin naya nutuma süpüla naainjainjanain kasa eekai eein. Wainmeerü kasa nakumajaka eʼineena naya süka jiitpai wüitüsü, süka laana jepisiiya oʼuu, süka jiitpai ishoshootosü otta aainjeena lino anasü maʼin, atüjeena maʼin naya eʼinaa. Wayuukana naainnua, nounteerü naaʼinrüin kasa eekai eein otta wainmeerü sukuwaʼipa sukumajia natuma.
(Éxodo 36:1, 2) »Aʼyataajeechi Bezalel nümaa Oholiab otta müshiʼiya napüshuaʼa na tooloyuu atüjakana sutuma naapüin Jeʼwaa kekiiwaa namüin otta na ayaawatakana saaʼu sukuwaʼipa tü akumajünüinjatkat suluʼu tü aʼwaajüleekat Maleiwa, naaʼinrüinjatü süpüshuaʼa maʼakaajüle nuluwataain Jeʼwaa». 2 Nuunejüinjeseʼe Moisés Bezalel, Oholiab otta napüshuaʼa na tooloyuu atüjakana nutuma Jeʼwaa, na naapakana amüin kekiiwaa otta napüshuaʼa na akaalinjeekana süka naaʼin namüiwaʼa.
Püchajaa süchiki kaaʼürüi suluʼu tü Wiwüliakat
(Éxodo 35:1-3) Nuutkajeʼerüin mapa Moisés na israeliitakana otta nümaka namüin: «Anuu tü aainjünajatkat naajüin Jeʼwaa: 2 eeshii süpüla jiʼyataain soʼu aipirua kaʼi, eekajasaʼa chi akaratshikai kaʼi, pülashoʼuinjachi nia jümüin, saawanoʼukat tia eemeraainjana jia, nüpülainjachi Jeʼwaa kaʼikai chia. Müleka eere wanee wayuu aʼyataakai saawanoʼuluʼu, outajachi nia. 3 Nnojoishii epejaainjanain jia siki saawanoʼu chaa jipialuʼu».
(Éxodo 35:21) Nantakalaka napüshuaʼa na asülajeekana süka naaʼin, nantiraka tü nasülajüinjatkat nümüin Jeʼwaa, naaʼinrüin shia napüshuaʼa na asülajeekana süka naaʼin. Süpüshuaʼa tia nasülajakat süpülajatü saainjünüin tü piichi outkajaaleekat, süpülajatü eein suluʼu süpüshuaʼa tü kasa choʼujaakat süpüla tü aʼyatawaa aainjünajatkat suluʼu jee müsia süpüla saainjiainjatüin tü kuluulu aʼyataayainjatkat nümüin Maleiwa.
OʼUTUUPÜROʼU 26– NOWIENPÜROʼU 1
KOROLO KOJUTUSÜ SULUʼUKA TÜ WIWÜLIAKAT | ÉXODO 37, 38
«Tü aʼajüleekat wunuʼu jemeta eejuu otta tü aʼajüleekat mürüt»
(Éxodo 37:25) Naainjakalaka tü aʼajüleekat wunuʼu jemeta eejuu süka tü wunuʼu kanüliakat acacia. Pienchisü shiʼipapaʼa otta tü shimeriiasekat wanee codo sajaʼapüin otta wanee codo seeruluin, tü sajaʼapüinkat iipünaamüin piamasü codo. Tü aʼajüleekat wunuʼu jemeta eejuu nnojotsü shia katataawain suulia tü oʼuwa eekat sünain.
(Éxodo 37:29) Naainjakalaka tü seita jemetakalü eejuu süpülajatka tü aʼwaajüleekat Maleiwa otta naainjain tü wunuʼu jemetakalü eejuu. Anasü maʼin sukuwaʼipa nutuma nüpalirajapa tia.
(Éxodo 38:1) Naainjakalaka tü aʼajüleekat mürüt süka tü wunuʼu kanüliakat acacia. Pienchisü shiʼipapaʼa. Anuu tü shimeriiasekat: tü sajaʼapüinkat jaʼrai codo otta tü seeruluinkat jaʼrai codo, tü sajaʼapüinkat iipünaamüin apünüin codo.
Püchajaa süchiki kaaʼürüi suluʼu tü Wiwüliakat
(Éxodo 37:1) Mapa, naainjakalaka Bezalel tü Jürasükeetkat süka tü wunuʼu kanüliakat acacia. Anuu tü shimeriiasekat: tü sajaʼapüinkat piama codo shiatapünaamüin, tü seeruluinkat wanee codo shiatapünaamüin otta tü sajaʼapüinkat iipünaamüin wanee codo shiatapünaamüin
(Éxodo 37:10) Mapa, naainjakalaka tü meesakat süka tü wunuʼu kanüliakat acacia. Anuu tü shimeriiasekat: tü sajaʼapüinkat piama codo, tü seeruluinkat wanee codo otta tü sajaʼapüinkat iipünaamüin wanee codo shiatapünaamüin.
(Éxodo 37:25) Tü wanee kasa naainjakat shia tü aʼajüleekat wunuʼu jemeta eejuu. Naainjain shia süka tü wunuʼu kanüliakat acacia. Pienchisü shiʼipapaʼa. Anuu tü shimeriiasekat: wanee codo sajaʼapüin, wanee codo seeruluin otta piama codo sajaʼapüin iipünaamüin. Tü aʼajüleekat wunuʼu jemeta eejuu, nnojotsü shia katataawain suulia tü oʼuwa eejeetka sünain.
(Éxodo 38:8) Mapa, naainjain tü iita kaluʼukat wüin otta müsia tü süpülajanakat, naainjain shia süka cobre. Naainjain tia süka tü rouya eejatkat namaʼana na jieyuu soʼuluʼukana tü piichi outkajaaleekat.