Nnojoishii waya wamüiwaʼain

1, 2. (1) ¿Jamüsü watüjaakaʼa saaʼu nnojoluin wamüiwaʼain waya sülatapa kasa mojusü wamüin? (2) ¿Kasa wekirajaainjatka anain sünain ekirajaayakat tüü?

SÜLATÜLE wanee kasa kapüleeka maʼin wamüin müshi wamüiwaʼakai aaʼin pasanain sünain tü palaakat suluʼu wanee anuwa sümaa katchin maʼin tü wawaikat. Nnojoliipejeʼe wamüiwaʼain waya süka chi Washi aipüraikai niʼrüin tü wamülialakat otta nüküjain wamüin eejeechin nia wamaa. Sükajee alin maʼin waya nüpüla Jehová nüküjain wamüin nükaalinjeenain waya (Is. 41:10).

² Sünain ekirajaayakat tüü, wekirajaajeerü anain pienchisü kasa nükaalinjaka akajee waya Jehová: 1) nuʼunirüin wakuwaʼipa, 2) naapüin tü kasa choʼujaakat wamüin, 3) naaʼinmajüin waya otta 4) nümülialüin waaʼin. Jaʼitairü kasain maʼin tü alatakat wamüin maaʼulu nüküjain wamüin nnojoleena waya nüpütüin wamüiwaʼa, nükaalinjeena waya. Müsüjeseʼe sotuinjatüin waaʼin nnojoluin wamüiwaʼain waya.

NUʼUNIRÜIN JEHOVÁ WAKUWAʼIPA

3, 4. ¿Kasa naaʼinraka Jehová süpüla nuʼunirüin wakuwaʼipa? (Salmo 48:14).

³ (Paashajeʼera Salmo 48:14). Nütüjaa aaʼu Jehová isain süchiki wayuu suʼunirüin sukuwaʼipa müshijeseʼe nükaalinjeein waya. Naaʼinrüin tia sükajee tü Bibliakat (Sal. 119:105). Nikirajüin waya Jehová sükajee tü Bibliakat süpüla anainjatüin süneekia wanee kasa watuma, süpüla anainjatüin wakuwaʼipa, süpüla talatüinjatüin waaʼin maaʼulu jee katüinjatüin woʼu waneepia mapeena.a Nikirajüin waya sünain motuinjatüin waaʼin naainjala na waneinnua sümaa nnojolin jashichikuʼu müin waya namüin. Lotuinjatü wakuwaʼipa sünain süpüshuaʼa tü kasa waainjakat otta aijiraainjana waya süka süpüshuaʼa waaʼin (Sal. 37:8; Heb. 13:18; 1 Ped. 1:22). Müle shia watuma, aneerü nepijia wachonnii, aneerü wakuwaʼipa sümaa waʼwayuuse jee namaa waʼaleewainyuu.

⁴ Nüshajirüin Jehová suluʼu tü Bibliakat nachiki waneinnua wayuu alatakana namüin maʼaka tü alatakat wamüin maaʼulu (1 Cor. 10:13; Sant. 5:17). Piamasü kasa watüjaka nanainjee waashajeʼerapa nachiki. Tü palajatkat kasa watüjaka nanainjee shia eepuʼuin wayuu sümaiwa paala alatakana namüin kasa mojusü maʼaka tü alatakat wamüin maaʼulu, nükaalinjapejeʼe naya Jehová (1 Ped. 5:9). Tü wane kasa watüjakat nanainjee shia tü waaʼinrajatkat süpüla wachecherüin waaʼin soʼunnaa tü kasa mojusü alatakat wamüin (Roma 15:4).

5. ¿Jaralii na niʼitaakana Jehová süpüla nuʼunirüin wakuwaʼipa?

⁵ Wane kasa nuʼuniraka aka wakuwaʼipa Jehová shia nakajee na wawalayuukana.b Na wawalayuu alapalaakana waaʼu antawaishii naya süpüla nakatchinrüin waaʼin jee naküjain pütchi süpüla nakooʼomüinrüin wanoula jee süpüla paaʼinwain waya (Aluw. 15:40–16:5). Na laülaashiikana suluʼu tü outkajaaleekat nakaalinjain maʼin na wawalayuukana süpüla katchinjatüin nanoula (1 Ped. 5:2, 3). Na wayuu kachonshiikana nekirajüin nachonnii süpüla alinjachin Jehová napüla, süpüla naneeküinjatüin kasa anasü otta süpüla naaʼinmaainjatüin maʼin nanoula (Prov. 22:6). Na wawalayuu jieyuu laülaakana aaʼin sünain anouja nakaalinjain na wawalayuu majayünnüükana sükajee tü nakuwaʼipakat otta sükajee tü kasa namakat namüin sümaa alin maʼin naya napüla (Tito 2:3-5).

6. ¿Kasa waaʼinrajatka süpüla jaʼyainjatüin waaʼu kojutuin wamüin tü nikirajakalü anain waya Jehová?

⁶ Nüküjain Jehová wamüin tü waaʼinrajatkat süpüla anainjatüin watuma süneekia wanee kasa jee süpüla talatüinjatüin waaʼin. ¿Kasa waaʼinrajatka süpüla jaʼyainjatüin waaʼu kojutuin wamüin tü nikirajakalü anain waya Jehová? Müsü sünüiki Proverbios 3:5, 6: «Punouja nünain Jehová, nnojo piʼitaain paaʼin sünain tü pütüjaakalü aaʼu». ¿Kasa piʼreetka sünainjee tia? Loteerü pukuwaʼipa nutuma. Nükaalinjain waya Jehová süpüla anainjatüin wakuwaʼipa jee süpüla talatüin waaʼin. Waapüin analuʼutka nümüin Jehová sükajee alin maʼin waya nüpüla jee nikirajüin waya waneʼewai wakua (Sal. 32:8).

NAAPÜIN JEHOVÁ TÜ KASA CHOʼUJAAKAT WAMÜIN

7. Saashin Filipos 4:19, ¿kasa naapeetka Jehová wamüin?

⁷ (Paashajeʼera Filipos 4:19). Nnojotsü shiain neʼe nükaalinjain waya Jehová sünain tü wanoulakat. Nükaalinjainña waya Jehová süpüla wousütüinjatüin tü kasa choʼujaakat wamüin maʼaka tü weküinjatkat, tü washeʼinjatkat jee eeinjanale kepiain waya (Mat. 6:33; 2 Tes. 3:12). Shiimain shapaain maʼin waaʼin sutuma tü kasa choʼujaakat wamüin, nnojotpejeʼe keeʼireein naaʼin Jehová shapaainjatüin maʼin waaʼin saaʼujee tia (Mat. 6:25). Süka jamüin, nüküjain chi Washi iipünajachikai nnojoleenain nüpütüin nümüiwaʼa na aʼyataashiikana nümüin (Mat. 6:8; Heb. 13:5). Watüjaa aaʼu nikeraajeerüin tü nünüikikat jee naapeerüin tü kasa choʼujaakat wamüin.

8. ¿Kasa naaʼinraka Jehová nüpüleerua David?

⁸ Jülüjataa waaʼin nukuwaʼipa David wanaa sümaa nükaalinjain nia Jehová nuulia chi aluwataaikai Saúl. Soʼutpünaa kojuya juya naapüin Jehová nümüin David tü kasa choʼujaakat nümüin jee namüin na wayuu nümaajanakana. Anuu nünüiki David sotopa naaʼin tü naainjakat Jehová nüpüleerua: «Jintüitpuʼushi taya eekajasaʼa jooluʼu laülaaichipa taya. Nnojoishi teʼrüichin wanee wayuu lotokai akuwaʼipa müliain maʼin, nnojoishii teʼrüinain nüchonnii sünain ojulijakuʼu maa eküülü» (Sal. 37:25). Maʼaka naaʼin David piʼrüin naapüin Jehová tü kasa choʼujaakat pümüin jee namüin na wawalayuukana.

9. Sülatalaʼa sümüle wanee kasa, ¿kasa naaʼinreetka Jehová süpüla nükaalinjain waya? (Piirakaa sümüin tü ayaakuaakat).

⁹ Sülatalaʼa sümüle wanee kasa naapüin Jehová tü kasa choʼujaakat namüin na aʼyataashiikana nümüin. Soʼutpünaa nakalia na aluwataaushikana aipuʼusü maʼin jamü chaa Jerusalén. Akaalinjünüshii naya natuma waneinnua anoujashii suluʼujeejanakana waneirua mma (Aluw. 11:27-30; Roma 15:25, 26). Müsia neʼe nakuwaʼipa na wawalayuukana maaʼulu yaa, akaalinjiraashii maʼin naya. Sülatalaʼa sümüle wanee kasa maʼaka sukutkujaale tü mmakat jee shiale süntüin wanee wawai, nükaalinjain Jehová na aʼyataashiikana nümüin nakajee na wawalayuukana. Naapüin tü kasa choʼujaakat namüin, tü neküinjatkat, tü wüin nasüinjatkat, tü nasheʼinjatkat sümaa tü nepinaseinjatkat jee eeshii waneinnua wawalayuu akaalinjakana sünain anoutaa nepia na wawalayuukana jee tü piichi outkajaalee amojujaakat sutumajee tü alatakat namüin. Atütüleʼennüsü naaʼin otta akatchinnamaatüsü naaʼin na wawalayuu müliakana sutuma nnojoluin kasain eein namaʼana jee na anaajaakana napüshi.c

10, 11. ¿Kasa watüjaka sünainjee nukuwaʼipa Boris?

¹⁰ Kamaneeshi maʼin Jehová jee naapüinña tü kasa choʼujaakat namüin na wayuu nnojoliikana aʼyataain nümüin. Washatüin nukuwaʼipa Jehová jee waaʼinrüin kasa anasü napüleerua na wayuu nnojoliikana anoujain wanaa wamaa (Gal. 6:10). Sutumajee müin wakuwaʼipa anasü pütchi wachiki jee eesüjaʼa shikirajaweere wayuu nüchiki Jehová. Jülüjataa waaʼin nukuwaʼipa Boris, wanee wayuu shikiipüʼüjana nia wanee ekirajaalee chayaa Ucrania. Mayaainjeʼe nnojoluin nüküjalin pütchi nüchiki Jehová kamaneeshi maʼin nia namüin na wawalayuu ekirajaakana suluʼu tia koleejiakat. Sutuma tü atkawaa eejatkat, okolojooshi nia wattamüin suulia tia mmakat jee naya na wawalayuukana akaalinjaka nia. Shiasaʼa mapa, oʼunushi nia sünain tü Outkajawaakat eere Sotuin Waaʼin Outuin Jesús. Müsü nünüiki Boris sutumajee süpüshuaʼa tü kasa anasü naainjakat na wawalayuukana nüpüleerua: «Kamaneeshii tamüin na aküjaliikana pütchi nüchiki Jehová otta naaʼinmajüin maʼin taya. Kojutusü maʼin tamüin tia».

¹¹ Maʼaka naaʼin chi Washi iipünaajachikai eesü süpüla wamüliajüin naaʼin na wayuu nnojoliikana anoujain wanaa wamaa (Luc. 6:31, 36). Sutumajee neʼrüin alin naya wapüla eesüjaʼa süpüla narütkaweein nünainmüin Jehová jee naʼyataweein nümüin (1 Ped. 2:12). Jaʼitakajeʼe nnojoluin nanoujain wanaa wamaa talatüinjatia neʼe waaʼin süka waaʼinrüin kasa anasü napüleerua (Aluw. 20:35).

NAAʼINMAJÜIN WAYA JEHOVÁ

12. ¿Kasa naapeetka Jehová namüin na aʼyataashiikana nümüin? (Sal. 91:1, 2, 14).

¹² (Paashajeʼera Salmo 91:1, 2, 14). Nüküjain Jehová nükaalinjeenain waya süpüla waaʼinmajüin tü wanoulakat. Nnojoleerü nuuʼulaain Jehová numojujain Satanás sukuwaʼipa waʼwaajia Jehová (Juan 17:15). Shiʼrapa maʼin wayuu müliaa naapeerü Jehová namüin na aʼyataashiikana nümüin tü aneetkalü atuma nanoula jee tü choʼujaajeetkat namüin (Apoc. 7:9, 14).

13. ¿Kasa naaʼinmajaka akajee Jehová waneʼewai nakua na aʼyataashiikana nümüin?

¹³ ¿Kasa naaʼinmajaka akajee Jehová waneʼewai nakua na aʼyataashiikana nümüin? Naaʼinmajüin waya Jehová sükajee tü Bibliakat süpüla wayaawatüinjatüin saaʼu tü anakat jee tü mojukat (Heb. 5:14). Waaʼinrüle tü sümakat tü Bibliakat aneerü wakuwaʼipa nümaa Jehová jee weisatteerü wakuwaʼipa suulia kasa mojusü (Sal. 91:4). Naaʼinmajüinña Jehová waya nakajee na wawalayuukana (Is. 32:1, 2). Aleewale waya namaa na wayuu aikana apüla Jehová jee oonookana sümaa nünüiki katchinjeerü waaʼin süpüla wayoutuin tü kasa mojusükat (Prov. 13:20).

14. (1) ¿Jamüsü nuuʼulaakaʼa Jehová sülatüin kasa mojusü wamüin? (2) ¿Jamüsü nünüiki Jehová wamüin suluʼu Salmo 9:10? (Paashajeʼera tü nootakat).

¹⁴ Sümaiwa paala naaʼinmajüin Jehová waneinnua aʼyataashii nümüin suulia jamajüin naya jee noʼutunuin aaʼin, nnojotpejeʼe naaʼinrüin shia waneepia. Süküjain tü Bibliakat eein süpüla sülatalaʼa sümüle wanee kasa wamüin (Ecl. 9:11). Eeshijaʼa süpüla nuuʼulaain Jehová sülatüin kasa mojusü namüin na aʼyataashiikana nümüin jee outulejeʼe naya süpüla sütüjaanüin aaʼu alaain Satanás (Job 2:4-6; Mat. 23:34). Eejeerü tü kaʼi nnojoleetkalü oʼu ajaʼttüin maalü tü kasa mojusü weʼrakat, watüjaapejeʼe saaʼu nükaalinjeenain waya Jehová süpüla wachecherüin waaʼin (Sal. 9:10).d

NÜMÜLIALÜIN WAAʼIN JEHOVÁ

15. ¿Jamüsü anakaʼa waaʼin woʼuraajapa, waashajeʼerapa tü Bibliakat otta namaapa waya na wawalayuukana? (2 Corinto 1:3, 4).

¹⁵ (Paashajeʼera 2 Corinto 1:3, 4). Eesü kaʼi mojukalü oʼu waaʼin jee shapaaka oʼu waaʼin. Eesüjaʼa süpüla müin wamüiwaʼakai waaʼin jee shapaain waaʼin sutuma wanee kasa alataka wamüin. Eesüjaʼa süpüla jülüjain waaʼin nnojoluin jaralin atüjaain saaʼu jamüin waaʼin, nütüjaapejeʼe saaʼu Jehová tia jee müsia nümülialüin waaʼin weʼrapa müliaa. Woʼuraajüle nümüin Jehová jimateerü waaʼin nutuma, «nnojoishi eein wanee wayuu ayaawatakai saaʼu tia jimataa aaʼin naapakat Maleiwa» (Filip. 4:6, 7). Waashajeʼerapa tü Bibliakat wayaawata aaʼu alin maʼin waya nüpüla Jehová, kekiishii maʼin waya sutuma tü pütchi sümakat jee talatüsü waaʼin sutuma tü kasa eejeetkat mapeena. Chapa waya sünain tü outkajawaakat namaa na wawalayuukana kamaneeshii maʼin naya sümaa alin waya napüla jee natütüleʼerüin waaʼin sükajee pütchi suluʼujeejatkat tü Bibliakat.

16. ¿Kasa watüjaka sünainjee nukuwaʼipa Nathan otta Priscilla?

¹⁶ Jülüjataa waaʼin tü naaʼinrakat Jehová süpüla nümülialüin waaʼin sükajee tü Bibliakat. Anuu tü alatakat nümüin Nathan otta Priscilla, kepiashii naya chaa Estados Unidos. Akolojooshii naya suluʼumüin wanee mma süpüla nakaalinjain sünain aküjaa pütchi. Anuu nünüiki Nathan: «Anainjatiaa waaʼinruʼu wakuwaʼipa nutuma Jehová sükajee tü waneekakat». Shiasaʼa chapa naya suluʼumüin tü mma nakolojookalü aluʼu nnojotsü anain maʼin nakuwaʼipa, ayuuishii naya otta neʼrüin choʼujawaa. Naleʼejaka mapa nachikuaʼa noumainpaʼamüin, ayatapejeʼe neʼrüin choʼujawaa chayaa. Anuu sooʼomüin nünüiki Nathan: «Tasakitkat taaʼin jamüin nnojoliika nükaalinjain waya Jehová süpüla wekeraajüin tü waʼyataainkat chayaa. ‹Eetaaka tü kasa nnojotkalü anain tatuma›, maa müsü taaʼin». Niyaawataka aaʼu mapa Nathan sümaa nuʼwayuuse nnojolin nüpütüin naya Jehová namüiwaʼa. Müshi nia: «Wanaa sümaa taashajeʼerüin tü Bibliakat müsü taapajakat nünüiki wanee taʼaleewain atütüleʼerakai taaʼin süka pütchi anasü wanaa sümaa teʼrüin müliaa. Wayaawata aaʼu nnojoluinjatüin jülüjain neʼe waaʼin tü kasa alatakat wamüin, anasü jülüjale waaʼin tü kasa anasü naaʼinrakat Jehová wapüleerua süpüla eejiraain waya sümaa. Mayaainjeʼe watüjaain saaʼu weʼreerüin müliaa mapeena katsüinpa waaʼin süpüla eejiraain waya sümaa tü kasa alateetkat».

17. ¿Kasa naaʼinraka na wawalayuukana süpüla namülialüin saaʼin tü wawalakat Helga? (Piirakaa sümüin tü ayaakuaakat).

¹⁷ Namülialüin maʼin waaʼin na wawalayuukana. Jülüjataa waaʼin sukuwaʼipa Helga, wanee wawala kepiasü chayaa Hungría, wainma tü kasa alatakat sümüin soʼunnaa kojuya juya. Mojusü maʼin saaʼin jee shapaasü maʼin saaʼin sutuma. Sotopa saaʼin tü kasa alatakat sümüin jülüjasü saaʼin nümülialüin saaʼin Jehová nakajee na wawalayuukana. Anuu sünüiki: «Naaʼinmajüin maʼin taya Jehová wanaa sümaa mapüsain maʼin taya sutuma taʼyataainjatüin maʼin, taaʼinmajüinjachin wanee tachon ayuuishi jee waneirua kasa alatakat tamüin. Soʼunnaa tü 30 juya alatakat tayaawata aaʼu nümülialüin taaʼin Jehová waneepia. Teʼrüin taalin nüpüla Jehová sükajee natütüleʼerüin maʼin taaʼin na wawalayuukana. Naluwataain mensaaje jee nashajüin carta tamüin soʼu tü kaʼi choʼujaakalü oʼu maʼin tamüin tatütüleʼennüin aaʼin».

18. ¿Kasa waaʼinrajatka süpüla wamülialüin naaʼin na waneinnua?

¹⁸ Washatüin nukuwaʼipa Jehová wanaa sümaa wamülialüin naaʼin na waneinnua. Waaʼinrüin tia wanaa sümaa jülüjain waaʼin nanüiki, watütüleʼerüle naaʼin jee waaʼinrüle kasa anasü napüleerua (Prov. 3:27). Nnojoishii neʼe nayain wamülialüin naaʼin na wawalayuukana, wamülialüinña naaʼin na wayuu nnojoliikana aʼyataain nümüin Jehová. Sülatüle kasa kapüleesü namüin maʼaka wanee ayuulii jee shiale mojuin naaʼin, waapajüin nanüiki jee watütüleʼerüin naaʼin sükajee tü Bibliakat. Washatüle nukuwaʼipa chi Maleiwa amüliajakai saaʼin wayuu, nnojotsü shiain neʼe wamülialeerüin naaʼin na wawalayuukana, wakaalinjeenaʼaya na wayuukana süpüla narütkaainjanain nünainmüin Jehová (Mat. 5:16).

EEJEECHI JEHOVÁ WAMAA WANEEPIA

19. (1) ¿Kasa naaʼinraka Jehová wapüleerua? (2) ¿Kasa waaʼinrajatka süpüla washatüin nukuwaʼipa?

¹⁹ Jülüjashii naaʼin Jehová napüshuaʼa na aikana apüla nia, nnojoliishii waya nüpütüin wamüiwaʼa sülatüle kasa mojusü wamüin. Naaʼinmajüin waya Jehová maʼaka naaʼin wanee wayuu aaʼinmajakai wanee nüchon aikai maʼin nüpüla. Nuʼunirüin wakuwaʼipa Jehová, naapüin tü kasa choʼujaakat wamüin, naaʼinmajüin waya jee nümülialüin waaʼin. Washateerü nukuwaʼipa Jehová wakaalinjale jee watütüleʼerüle naaʼin na wayuu alatakana amüin kasa mojusü. Jaʼitairü maʼin kasain alatüin wamüin watüjaa aaʼulu eejeechin waneepia Jehová wamaa. Anuu nünüiki wamüin: «Nnojo mmoluin pia, anii taya pümaa» (Is. 41:10). Anataʼaleesüjaʼa maʼin süka watüjaain saaʼu eejeechi Jehová waneepia wamaa.