Lívro número 47 2 Corintios
Ohai: Pablo
Moõpa ojehai: Macedonia
Arakaʼépa ojehaipa: áño 55 rupi Jesús ou rire
OPAPOTÁVO arahaku térã oñepyrũvo otóño áño 55-pe, kongregasión Corintoyguápe oĩ gueteri heta mbaʼe oipyʼapýva apóstol Páblope. Ramoite ohaihague chupekuéra pe primera kárta. Títope oñemondo Coríntope oipytyvõ hag̃ua umi ombyatývape pláta umi kristiáno Judeaygua oikotevẽvape g̃uarã. Oiméne oho avei ohechávo mbaʼépa heʼi hikuái Pablo kuatiañeʼẽre (2 Cor. 8:1-6; 2:13). Mbaʼépa heʼi umi Corintoygua? Pablo ovyʼaiterei oikuaávo upe kárta omokyreʼỹhague chupekuéra oñembyasy ha oheja hag̃ua hembiapo vai. Tito oho jey Pablo rendápe Macedóniape ha omombeʼu chupe ã mbaʼe; upévare Pablo ovyʼaiterei (7:5-7; 6:11).
2 Upémarõ Pablo ohai jey chupekuéra. Ko kárta oporomokyreʼỹva oskrivi oĩ aja Macedóniape, ha oiméne ojevale avei Títore ogueraha hag̃ua (9:2, 4; 8:16-18, 22-24). Peteĩ mbaʼe oipyʼapýva Páblope ningo umi oikoséva “apóstol guasúramo”, ha heʼi hesekuéra “apóstol guaʼúnte, japúpe ohasáva Cristo apóstolramo” (11:5, 13, 14). Upe kongregasión ipyahu gueteri ha oĩ ombyaiséva chupekuéra. Avei oĩ otakýva Páblore ha heʼíva ndahaʼeiha voi apóstol. Upévare ko segunda kárta ou porãiterei chupekuéra.
3 Pablo heʼi: “Ambosakoʼimaʼaína che jeho mbohapyha pene rendápe” (2 Cor. 12:14; 13:1). Haʼe ohosemoʼãkuri hendapekuéra ‘ovyʼa hag̃ua’ hikuái, pe ohaírõ guare primera kárta, péro nosẽi upe viáhe (1 Cor. 16:5; 2 Cor. 1:15). Upéicharõ Pablo una vés ramo oho Coríntope ha opyta 18 mése aja, oñepyrũrõ guare kongregasión upepegua [áño 50-52] (Hech. 18:1-18). Upéi osẽ chupe pe viáhe ha ikatu oho jey Coríntope. Oĩrõ guare Gréciape 3 mése aja, oiméne áño 56-pe, opytaʼimi Coríntope ha upégui ohai ikárta umi Romayguápe (Rom. 16:1, 23; 1 Cor. 1:14).
4 Ymaite guive ojeguerovia ko lívro haʼeha Ñandejára Ñeʼẽ, haʼeháicha Primera a los Corintios ha umi ótro kuatiañeʼẽ Pablo ohaivaʼekue. Ko kárta rupive ikatu jaikuaa jey mbaʼépa oiko Corintoygua kongregasiónpe, ha jahecha mbaʼéicha ideprovécho ñandéve umi konsého Pablo omeʼẽvaʼekue chupekuéra.
MBAʼÉICHAPA ÑANEPYTYVÕ
18 Segunda a los Corintios ohechauka mbaʼéichapa Pablo omombaʼe predikasión ha upéva tuicha ñanemokyreʼỹ. Ñañehaʼãkena jajapo haʼe ojapohaguéicha! Ñandejára siérvo oñehekomboʼe porãva noñemúi Ñandejára Ñeʼẽre, oservi guei ipyʼaite guive. Noikotevẽi peteĩ sertifikádore opredika hag̃ua, síno umi mbaʼe ohupytývare predikasiónpe ohechauka Ñandejára omondoha chupe. Ñandejára siervokuéra ningo iñimperfékto, upévare ojeʼe ko predikasión haʼeha peteĩ tesóro oĩva kambuchi ojeka reívape. Péva ohechauka ojejapoha Ñandejára puʼaka rupive. Upéicharõ jaservi hag̃ua Ñandejárape naiporãi ñañemombaʼeguasu. Tuichaite mbaʼe ningo ikatuhaguére oiko ñandehegui “Cristo rembijokuái”. Upévare tekotevẽ ñañatende ha heʼihaguéicha apóstol Pablo ñamombaʼevaʼerã ‘Ñandejára pyʼaporã’ (2:14-17; 3:1-5; 4:7; 5:18-20; 6:1).
19 Pablo omeʼẽ ehémplo iporãitereíva enterove kristiánope g̃uarã. Primero, omombaʼe ha ostudia Evréo Kuatiañeʼẽ, jahecha upéva heta vése oñeʼẽgui hese (2 Cor. 6:2, 16-18; 7:1; 8:15; 9:9; 13:1; Isa. 49:8; Lev. 26:12; Isa. 52:11; Eze. 20:41; 2 Sam. 7:14; Ose. 1:10). Haʼe ningo ansiáno ha ojepyʼapy ermanokuérare. Haʼe heʼi: “Ha che, che pyʼaite guive, ameʼẽta opa arekóva ha añemeʼẽ jevy jevýta penderehehápe”. Pablo oñemeʼẽmbaite iñermanokuéra rehehápe, ha upéva jahecha opa ojapovaʼekuére (2 Cor. 12:15; 6:3-10). Haʼe naikaneʼõi voi oporomboʼe, oporomokyreʼỹ ha omoĩ porã hag̃ua oñekotevẽva kongregasión Corintoyguápe. Pablo ohechauka naiporãiha jajeheʼa umi ndojeroviáivare Ñandejárare heʼívo umi Corintoyguápe: “Ani peñemoĩ umi ogueroviaʼỹva ykére”. Ojepyʼapy ha ndoipotái avave ombotavy chupekuéra “mbói ombotavyhaguéicha Évape”. Upévare heʼi: “Pemaʼẽna pendejehe pehecha hag̃ua peime hatãpa pende jeroviápe, pejepyʼaraʼã peẽ voi”. Pablo omokyreʼỹ umi kristiánope ipojera hag̃ua hapichándi ‘Ñandejára ohayhu rupi ipyʼaite guive omeʼẽvape’. Haʼe voi oagradese Ñandejárape omeʼẽhaguére ñandéve hetave upe ikatuvaʼerãgui ñamombeʼu. Añetehápe Pablo ohayhu ipyʼaite guive umi ermáno Corintoyguápe, ha oñemeʼẽmbaite hesekuéra. Upéicha vaʼerã avei umi ansiáno ikyreʼỹ ha imbaʼerechakuaáva. Ajépa iporãite Pablo ojapovaʼekue! (6:14; 11:3; 13:5; 9:7, 15; 3:2.)
20 Pablo ohechauka ‘ñande Ru oporoporiahuverekóva ha tapia oporokonsoláva’ ñanemombaretetaha jajejopy vai jave. Haʼe niko “ñanekonsola opa umi ñande jepyʼapýpe” ikatu hag̃uáicha jagueropuʼaka ha jaike pe múndo pyahúpe. Avei heʼi ojeroviaha ‘Ñandejára orekoha chupekuéra g̃uarã yvágape peteĩ óga oñembyaiʼỹva, ndojejapoivaʼekue yvypóra po rupi’. Pablo heʼi: “Aipórõ, pe ojoajúva Crístore upéva peteĩ tapicha ipyahúva. Umi yma guare ohasáma, ha umi ipyahúva katu og̃uahẽ”. Segunda a los Corintios oreko hetaiterei konsého porã omombaretéva umi ohótavape yvágape ogoverna hag̃ua (1:3, 4, BNP; 5:1, 17).