Enero

Entéro Ñandejára siérvo iñeʼẽrendúva chupe oikuaase mbaʼéichapa ikatu ojapo porãve pe tembiapo oñemeʼẽ vaʼekue chupekuéra (2 Tim. 4:5). Ko traváho ningo iñimportanteve ha iñurhenteve oimeraẽ ótro traváhogui. Péro ikatu hína ijetuʼu ñandéve ñamboyke hetave tiémpo jajapo hag̃ua ko tembiapo. Oĩ heta mbaʼe iñimportánteva ikatúva hoʼupa ñane tiémpo ha ñanemokaneʼõ. Por ehémplo, ikatu hína ñambaʼapoiterei ñañemantene hag̃ua ha ñamantene hag̃ua ñane famíliape. Ikatu avei jareko rresponsavilida ñande rogapýpe, ñanderasykatu, ñañedeprimi, térã ijetuʼu ñanendive ñandeedáma rupi. Aníkena ñañedesanima oiméramo ñane situasión nopermitíri jajapove Jehovápe g̃uarã. Jesús oikuaa ndaikatumoʼãiha enterove japrodusi peteĩchapa Jehová servísiope (Mat. 13:23). Jehová omombaʼeterei la jajapóva hesehápe, ñañehaʼãma guive jajapo la ikatúva entéro (Heb. 6:10-12). w19.04 2 párr. 1-3

Umi japu Satanás omosarambíva umi omanóvare oheja vai Jehovápe. Por ehémplo, Satanás oroviaka umi héntepe umi omanóva ohoha osufri pe infiérnope, péro koʼãichagua japu oheja vai Jehovápe. ¿Mbaʼérepa jaʼe upéva? La Biblia ningo heʼi Ñandejára haʼeha mborayhu, péro umi japu káusare oĩ heta hénte oimoʼãva haʼe iñaña ha ipyʼahatãha Satanáicha (1 Juan 4:8). ¿Mbaʼéichapa nemoñeñandu upéva? Ha iñimportanteveha, ¿mbaʼéichapa upéva omoñeñandu Jehovápe? Añetehápe ningo haʼe ndoipotái oñembohasa asy avavépe (Jer. 19:5). Umi japu Satanás omosarambíva umi omanóvare ontendeka avave noikotevẽiha Jesús sakrifísiore (Mat. 20:28). Satanás ombotavy avei umi héntepe heʼívo ñande jarekoha peteĩ álma nomanóiva. Oiméramo upéicha, entéro ikatútama voi jaiko pára siémpre, ha Cristo natekotevẽi kuri omano ñanderehehápe ikatu hag̃uáicha jahupyty pe jeikove opaveʼỹva. Ñanemanduʼa vaʼerã Jehová ha Jesús ojapo hague ko sakrifísio ñanderayhuetereígui, ha upéva hína pe rregálo iporãvéva oñemeʼẽ vaʼekue yvyporakuérape (Juan 3:16; 15:13). Epensamíntena mbaʼéichapa oiméne oñeñandu Jehová ha Jesús ohendúvo koʼã japu ontendekáva natekotevẽi hague ojejapo upe sakrifísio. w19.04 14 párr. 1; 16 párr. 8, 9

¿Moõpa ikatu jatopa umi mbaʼe Jesús omboʼe vaʼekue? Umi lívro de Mateo, Marcos, Lucas ha Juánpe oñemombeʼu heta mbaʼe haʼe heʼi ha ojapo vaʼekue ko yvy ape ári. Umi ótro lívro oĩva umi Escrituras Griégaspe ñanepytyvõ avei jaikuaa hag̃ua mbaʼéichapa Jesús opensa. ¿Mbaʼérepa jaʼe upéva? Pórke koʼã lívro ojeskrivi vaʼekue espíritu sánto rupive ha umi eskritór opensa vaʼekue “Cristo opensaháicha”. Umi mbaʼe Jesús omboʼe vaʼekue ñanepytyvõ opaite mbaʼépe ñande rekovépe. Por ehémplo “Cristo léi” ñanepytyvõ ñande rogapýpe, ñande travahohápe, eskuéla térã koléhiope ha kongregasiónpe (Gál. 6:2). Jaikuaa porã hag̃ua ko léi jalee vaʼerã umi Escrituras Griegas ha jajepyʼamongeta umívare. Ha ñakumpli hag̃ua ko léi jasegi vaʼerã umi instruksión, mandamiénto ha konsého jatopáva umi Escrituras Griégaspe. Ñakumpli jave Cristo Léi añetehápe ñaneñeʼẽrendu hína Ñandejára Jehová ñanderayhuetévape, pórke chugui ou hína entéro mbaʼe Jesús omboʼe vaʼekue (Juan 8:28). w19.05 3 párr. 6, 7

Ñambyasyeterei oĩ haguére umi hénte ojapóva umi mbaʼe ogustáva Satanáspe. Péro Jehová ningo oikuaapa la Satanás ojapóva. Haʼe oikuaa porã mbaʼeichaitépa jasufri ha ikatuha omeʼẽ ñandéve pe konsuélo ñaikotevẽva. ¡Ajépa javyʼaite ikatu haguére jaservi Ñandejára omeʼẽvape opaichagua konsuélo! “Haʼe ñanekonsola opa umi ñande jehasa asýpe, ikatu hag̃uáicha pe konsuélo Ñandejára omeʼẽva ñandéve rupive, ñande avei ñakonsola umi ohasávape opaichagua jehasa asýre” (2 Cor. 1:3, 4). Oĩ ningo imitãme ituakuéra ndoprotehéi vaʼekue chupe pe avúsogui térã oavusa vaʼekue hese ihénte teete, umíva koʼýte oikotevẽ hína konsuélo. Rréi David oikuaa vaʼekue ikatuha jajerovia Jehová siémpre oporokonsolataha (Sal. 27:10). David ojerovia vaʼekue Jehová oñangarekotaha umi ndoprotehéi vaʼekuépe chupe ituakuéra, ha haʼetaha peteĩ Túa chupekuéra g̃uarã. Upearã haʼe ojevale umi isiervokuéra ifiélvare. Umi ermáno ha ermanakuéra kongregasionpegua ningo haʼe peteĩ família ñandéve g̃uarã. Jesús voi heʼi vaʼekue umi oadorávare Jehovápe haʼeha iñermáno, iñermána ha isýicha chupe g̃uarã (Mat. 12:48-50). w19.05 15, 16 párr. 8, 9

¿Mbaʼe mbaʼépa primeroite jastudia vaʼerã? Ñande ñañemotiémpo vaʼerã káda día jastudia hag̃ua la Biblia. Por ehémplo, koʼág̃a oñemombykyve pe lektúra káda semanagua ikatu hag̃uáicha jarekove tiémpo jajepyʼamongeta hag̃ua pe jaleévare, ha ñainvestiga porãve hag̃ua ñane puvlikasionkuérape. Ñande ningo ndahaʼéi ñakompletasénteva pe lektúra káda semanagua, síno jaipota pe mensáhe oĩva la Bíbliape og̃uahẽ ñane korasõme ha ñanemoag̃uive Jehováre (Sal. 19:14). Kongregasiónpe ningo jastudia pe rrevísta Ñemañaha ikatu hag̃uáicha ñantende la Biblia. Upévare ñañatende porã vaʼerã umi téxto bíblicore, koʼýte umi oĩvare negrítape ha ojeleétava ojestudia vove pe rrevísta kongregasiónpe. Jahecha vaʼerã mbaʼéichapa umi palávra ha fráse oĩva umi versíkulope omyesakã pe idéa prinsipál orekóva pe párrafo. Ha jaleekuévo umi téxto ñañemotiémpo vaʼerã jajepyʼamongeta hag̃ua mbaʼéichapa umi mbaʼe heʼíva ikatu ñanepytyvõ ñande rekovépe (Jos. 1:8). w19.05 27 párr. 5, 9

Jesús ehémplo ningo ñanepytyvõiterei pórke ohechauka mbaʼéichapa jahecha vaʼerã Jehová servísio. Haʼe oñeʼẽ meme vaʼekue Ñandejára Rréinore, upéva la iñimportantevéva kuri chupe g̃uarã. Hetaiterei oguata vaʼekue ikatu hag̃uáicha opredika ikatúva guivépe. Jesús oaprovecha voi tahaʼe haʼéva oportunida oñeʼẽ hag̃ua umi héntepe hogapekuéra ha avei umi lugár ijatyhápe heta persóna. Oiko aja ko yvy ape ári Jesús omotenonde kuri Jehová servísio. Ikatu jasegi Jesús ehémplo ñañehaʼãvo jaheka oportunida ñañeʼẽ hag̃ua umi notísia porãre oimeha óra ha oimeraẽ lugárpe. Ñaĩ dispuésto jajesakrifikávo ikatu hag̃uáicha japredika (Mar. 6:31-34; 1 Ped. 2:21). Kongregasiónpe ikatu oĩ umi ermáno oservíva kómo prekursór espesiál, rregulár térã auxiliár. Avei ikatu oĩ umi oaprende vaʼekue ótro idióma térã umi ova vaʼekue peteĩ lugár oñekotevẽvehápe opredikávare. Upéicharõ jepe, heta mbaʼe ojehupyty predikasiónpe entéro umi puvlikadór oñehaʼãmbaite rupi ojapo la ikatúva guive. Tahaʼe haʼéva la situasión, Jehová ndojeruremoʼãi ñandéve peteĩ mbaʼe ndaikatumoʼãiva jajapo. w19.04 4 párr. 7, 8

Iporãta ñañeporandúramo: “¿Che piko cheenvidiosoʼimi jepi sapyʼánte che pyʼapýpe?” (1 Ped. 2:1). “¿Chépa añemombaʼeguasuse aju haguére ótro lugárgui, cheestúdio porã térã chepláta haguére?” (Prov. 16:5). “¿Aapoʼi piko che rapichápe che pyʼapýpe ndorekói haguére umi mbaʼe che arekóva, térã apensa cheimportanteveha ótrogui che pire kolór diferénte haguére?” (Sant. 2:2-4). “¿Chegusta piko umi mbaʼe oofreséva Satanás múndo?” (1 Juan 2:15-17). “¿Chegusta piko umi diversión oĩháme hekovaíva térã ivioléntova?” (Sal. 97:10; 101:3; Amós 5:15). Ñambohováivo koʼã porandu ikatu hína jahechakuaa algúna kósa tekotevẽva ñakambia. Umi ñane amigokuéra katuete orova ñanderehe la ilája (Prov. 13:20). Tahaʼe eskuéla, koléhiope térã ñande travahohápe, oĩ ñande jerére heta hénte nañanepytyvõmoʼãiva ñapensa hag̃ua Ñandejára oipotaháicha. Péro umi ñane rreunionhápe ikatu jatopa umi amígo iporãvéva, pórke upépe haʼekuéra ñanemokyreʼỹta “japorohayhu ha jajapo hag̃ua iporãva” (Heb. 10:24, 25). w19.06 12 párr. 13, 14

Jehová ndoipotái vaʼekue jahasa asy ni jareko umi provléma koʼág̃a jarekóva. Upévare nañanesorprendéi vaʼerã Jehová siérvo ifiélva oñeʼẽramo opensa porãʼỹre oĩ jave peteĩ situasión ijetuʼuetereívape (Job 6:2, 3). Oñeʼẽ vaíramo jepe Jehováre térã ñanderehe, ani ensegída voi ñandepochy upévare ni jahusga chupe umi mbaʼe heʼívare. Sapyʼánte peteĩ persóna osufríva hína oikotevẽ avei oñemeʼẽ chupe konsého térã ojekorrehiʼimi oñepytyvõ hag̃ua chupe (Gál. 6:1). ¿Mbaʼéichapa umi ansiáno ikatu ojapo upéva? Haʼekuéra osegi vaʼerã Elihú ehémplo, haʼe ningo ojapysaka porã vaʼekue Job rehe ha oñemoĩ ilugárpe (Job 33:6, 7). Elihú omeʼẽ konsého Jóbpe ontende porã rire ae mbaʼépa haʼe opensa. Umi ansiáno osegíva Elihú ehémplo ojapysaka porãta pe ermánore ha oñehaʼãta ontende isituasión. Péicha ojapóramo, pe konsého omeʼẽva hikuái katuete opokóne pe ermáno korasõre. w19.06 22, 23 párr. 10, 11

¿Mbaʼéichapa ikatu jasegi jaadora Jehovápe ojeproivi vove ñandehegui? Pe sukursál omeʼẽta instruksión ha konsého umi ansianokuéra oĩvape ñane kongregasiónpe. Pe sukursál ndaikatúiramo oñekomunika umi ansianokuérandi, upéicharõ umi ansiáno ñanepytyvõta ñandéve ha enterove ñaimévape kongregasiónpe jasegi hag̃ua jaadora Jehovápe. Haʼekuéra oipurúta la Biblia ha ñane puvlikasionkuéra ñandegia hag̃ua (Mat. 28:19, 20; Heb. 10:24, 25). Jehová opromete enterove isiervokuéra orekotaha opa mbaʼe oikotevẽva osegi hag̃ua ijerovia mbarete (Is. 65:13, 14; Luc. 12:42-44). Upévare ikatu ñaime segúro iñorganisasión ojapotaha ikatúva guive omeʼẽ hag̃ua ñandéve entéro mbaʼe ñaikotevẽva jasegi hag̃ua jaservi fiélmente Jehovápe. ¿Mbaʼépa ikatu jajapo káda uno ág̃a ojeproivi vove ñandehegui jaadora Jehovápe? Jaheka vaʼerã peteĩ lugár isegúro porãva ñañomi hag̃ua ñande Biblia ha oimeraẽ ótro puvlikasión jarekóva. Ñañatende vaʼerã ani hag̃ua jaheja umi lugár oimeraẽva ikatuhápe otopa koʼã mbaʼe ivaliosoitéva, tahaʼe umi puvlikasión oñeimprimíva térã oĩva teléfono térã távletpe. Káda uno jahecha vaʼerã mbaʼe mbaʼépa jajapóta jasegi hag̃ua ñandejerovia mbarete. w19.07 10 párr. 10, 11

Hetaiterei áñore la majoría umi hénte oĩva ko múndope oreko vaʼekue irrelihión. Péro ojapo unos kuánto áño oiko hague peteĩ kámbio tuichaitereíva. Koʼág̃arupi heta hetave oĩ umi heʼíva ijehe ndairrelihiosoiha. Añetehápe oĩ voi umi país la majoría umi hénte heʼihápe ijehe ndorekoiha peteĩ rrelihión (Mat. 24:12). ¿Mbaʼérepa? Oĩ umi oikóva vyʼarã rapykuéri térã ojepyʼapyetereíva iprovlémare, ha upévare hesarái Ñandejáragui (Luc. 8:14). Ótro katu ymave oreko vaʼekue irrelihión péro upéi ou oiko chuguikuéra atéo. Oĩ avei ogueroviáva Ñandejára oexistiha péro heʼi pe rrelihión ohasáma hague de móda, vyroreiha, naisentidoiha térã okontradesiha la siénsia heʼíva. Haʼekuéra oiméne ohendu iñamígo, umi profesór térã umi ifamósova heʼiha la vída oñepyrũ hague pe evolusión rupive, péro oiméne nohenduguasúiva hikuái mbaʼérepa ikatu oguerovia Ñandejára oexistiha. Ha oĩ umi ndoikuaaséiva mbaʼeve rrelihióngui pórke heta omoakãva rrelihión omandasénte ha iplatapota. Avei oĩ umi lugár pe goviérno omoĩháme umi léi heʼíva mbaʼe mbaʼépa ndojapói vaʼerã umi rrelihión. w19.07 20 párr. 1, 2

Natekotevẽi ñanembarete físikamente ñandejerovia mbareteve ha ñanekyreʼỹve hag̃ua Jehová servísiope. Oĩ voi hetaiterei ermáno naimbaretevéimava ijeda térã hasykatu rupi, ha lomímonte osegi ojapo ikatúva guive Jehovápe g̃uarã (2 Cor. 4:16). Ikatu oime ñande heta áñorema jaservi Jehovápe, péro koʼág̃a ñanderasýma ha ijetuʼúma ñandéve jajapo hag̃ua umi mbaʼe jajapo vaʼekue yma. Oiméramo upéicha, ani ñañedesanima. Ikatu ñaime segúro Jehová imanduʼaha ha omombaʼetereiha umi mbaʼe jajapo vaʼekue iservísiope (Heb. 6:10). Avei ñanemanduʼa vaʼerã ndahaʼeiha jajapo haguérente heta mbaʼe Jehová servísiope jahechaukáva jahayhuha chupe. Upéva rangue, ñande jahechauka jahayhuha Jehovápe ñandepositívo jave ha jajapo jave opa ikatúva iservísiope (Col. 3:23). Jehová ningo oikuaa mbaʼépa ikatu jajapo, ha ndojeruremoʼãi ñandéve álgo ikatuʼỹ vaʼerã jajapo (Mar. 12:43, 44). w19.08 3 párr. 6; 5, 6 párr. 11, 12

Omoag̃ui hag̃ua la héntepe ijehe, Jehová ojevale “umi mbaʼe porã” ojapóvare pe kongregasión (Mat. 5:14, 15; 1 Ped. 2:12). Ñane ména térã ñane rembireko ndahaʼéiramo testígo de Jehová, ¿oikuaa piko umi ermáno ha ermanakuéra oĩvape ñane kongregasiónpe? Ñainvitákena ñane ména térã ñane rembirekópe oho hag̃ua ñanendive rreunionhápe (1 Cor. 14:24, 25). Hiʼãite ningo ñandéve enterove ñane parientekuéra ñanemoirũ jaservi hag̃ua Jehovápe oñondivepa. Péro ñañehaʼãmbaitéramo jepe ñaipytyvõ chupekuéra oservi hag̃ua Jehovápe, ikatu hína ndoaseptái hikuái la Biblia omboʼéva. Upéicha oikóramo, ani jajekulpa haʼekuéra odesidi haguére upéicha. Jaikuaa voi ñande ndaikatuiha jaovliga avavépe oasepta hag̃ua umi mbaʼe jagueroviáva. Upéicharõ jepe, ani ñapensa noipytyvõmoʼãiha ñane parientekuérape ñanderechávo javyʼaha jaservi haguére Jehovápe. Ñañemboʼékena hesekuéra, ñañeʼẽ porãnte chupekuéra ha jasegi ñaipytyvõ chupekuéra (Hech. 20:20). Ani jaduda Jehová katuete ovendesitaha umi mbaʼe ñañehaʼãva jajapo. Ha ñane parientekuéra odesidíramo ñanerendu, ¡upéicharõ ojesalváta hikuái! w19.08 18, 19 párr. 15-17

¿Mbaʼépa la Jesús heʼise vaʼekue? Tekotevẽha jaiko sensillomi ikatu hag̃uáicha jajesareko peteĩ mbaʼe jahupytysévarente, ha ani hag̃ua ótra kósa ñanderesarea. Jesús voi ohechauka vaʼekue upéva ojesarekóvo iservísiore, ha omboʼe avei idisipulokuérape oñekonsentra hag̃ua Jehová servísiore ha pe Rréinore. Ñande ñahaʼangáta Jesúspe jahechaukáramo iñimportanteveha ñandéve g̃uarã Jehová rembipota, péicha ñamotenonde meméta “Ñandejára Rréino ha ihustísia” (Mat. 6:33). ¿Mbaʼéichapa ikatu jajesareko Jehová servísiore? Ikatu jajapo upéva ñañehaʼãramo jaiko sensillomínte, péicha ñanetiempovéta ñaipytyvõ hag̃ua ñande rapichápe oikuaa ha ohayhu hag̃ua Jehovápe. Por ehémplo, ¿ikatúpa saʼive ñambaʼapo japredikave hag̃ua éntre semanakue? ¿Térã ikatúpa menove jaipuru ñane tiémpo jajediverti hag̃ua? w19.04 5, 6 párr. 12, 13

Umi áño ohasa vaʼekuépe, heta ermáno ha ermána oservímava Jehovápe heta áñore okambia iñasignasión. Añetehápe heta koʼã ermánope ijetuʼu kuri umi kámbio. Oĩ ndovyʼái vaʼekue pórke ogustaiterei kuri chupekuéra umi traváho ojapo vaʼekue, térã ojapo rupi upéva heta tiémporema. Péro upéi oñeñandu porãvéma. ¿Mbaʼéicha rupípa? Pórke haʼekuéra ohayhu Jehovápe ha oikuaa porã oñemeʼẽ hague chupe, ndahaʼéi peteĩ asignasiónpe ni oreko hag̃ua peteĩ título (Col. 3:23). Haʼekuéra iñumílde ha ovyʼa osegi haguére oservi Jehovápe tahaʼe haʼéva pe traváho ojapóva koʼág̃a. Koʼã ermáno omoĩ Ñandejára pópe entéro mbaʼe oipyʼapýva chupekuéra pórke oikuaa haʼe ojepyʼapyha hesekuéra (1 Ped. 5:6, 7). Ñande ñaneumílderamo, ñandéve voi ou porã ha avei ñande rapichakuérape. Ikatúta avei jagueropuʼaka umi situasión ijetuʼúva, ha iñimportanteveha katu, ñañemoag̃uive ñande Ru yvagapeguáre. w19.09 6, 7 párr. 15-17

Jehová ningo omoĩ Davídpe ndahaʼéi omoakã hag̃ua ifamíliante síno avei omoakã hag̃ua Israel kompletoite. Haʼe ningo rréi vaʼekue ha oreko heta podér, péro sapyʼánte oipuru vai avei ijautorida ha tuicha opeka (2 Sam. 11:14, 15). Upéicharõ jepe ohechauka oñemoĩha Jehová poguýpe ohejávo ojekorrehi chupe. Avei haʼe oñemboʼe ipyʼaite guive (Sal. 51:1-4). Rréi David ningo iñumílde vaʼekue, upévare oasepta umi konsého omeʼẽva chupe tahaʼe kuimbaʼe térã kuña (1 Sam. 19:11, 12; 25:32, 33). Haʼe oaprende umi mbaʼe vai ojapo vaʼekuégui ha oservi porã jey Jehovápe, upéva ningo pe iñimportantevéva chupe g̃uarã. Haʼe oikuaa porã vaʼekue ideprovechoitereiha ñañemoĩ Jehová poguýpe. Koʼág̃arupi ikatu jahecha mbaʼeichaitépa idiferénte umi oñemoĩva Jehová poguýpe ha umi orrechasáva ikonsehokuéra. Umi oñemoĩva Jehová poguýpe ‘osapukái vyʼágui, pórke oñeñandu porãiterei’ (Is. 65:13, 14). w19.09 17 párr. 15; 19 párr. 21

Áño 1935-pe, umi testígo de Jehová ohechakuaáma pe aty guasu natekotevẽiha oĩ yvágape oñemboʼy hag̃ua “pe tróno ha pe Ovecha Raʼy renondépe”, síno koʼã mbaʼe orrepresentaha ótra kósa. Umi oĩva pe aty guasúpe oikóramo jepe ko yvy ape ári, ikatúta oñemboʼy “pe tróno renondépe” orrekonoséramo Jehovápe kómo governánte ha oñemoĩ ipoguýpe (Is. 66:1). Avei ikatúta oñemboʼy hikuái “pe Ovecha Raʼy renondépe” ojeroviáramo Jesús sakrifísiore. Umi mbaʼe oñemombeʼúva Mateo 25:31, 32-pe ojogua lénto avei ko situasiónpe. Upépe heʼi “entéro tetãnguéra”, ha avei umi hénte iñañáva, ‘oñembyatytaha’ Jesús ha itróno omimbipáva renondépe, ha ikatu jaʼe upéva oiko vove enterove koʼã tetãnguéra oĩtaha ko yvy ape ári, ndahaʼéi yvágape. Upéi umi mbaʼe ojeʼe vaʼekue 1935-pe tuichaiterei omyesakãve ko téma. Upépe oñemyesakã kuri mbaʼérepa la Biblia ndeʼíri peteĩ aty guasu ohotaha yvágape, síno peteĩ grúponte, pórke 144.000 persónante la ogovernátava Jesús ndive ko yvy (Apoc. 5:10). w19.09 28 párr. 9

Jehová oipota isiervokuéra jajeiete Babilonia Guasúgui. Péro tekotevẽ avei jajapo ótra kósa: jajedesidi vaʼerã jasegitaha jaservi Ñandejárape. Oĩ mokõi mbaʼe tekotevẽva jajapo, jahechamína umíva. Primero, ñakumpli porã vaʼerã umi mbaʼe Ñandejára omandáva ñandéve. Ni mbaʼevéicharõ ndajaikói vaʼerã umi hénte ko mundopegua oikoháicha. Por ehémplo, ndaikatúi jaasepta mbaʼeveichagua tekovai, umíva apytépe kuimbaʼe omendáva kuimbaʼéndi, térã kuña kuñándi, ni mbaʼeveichagua práktika sexuál orekóva umichagua hénte térã oñekomporta lája hikuái (Mat. 19:4, 5; Rom. 1:26, 27). Segundo, jasegi vaʼerã jaadora Ñandejárape ñane ermanokuérandi. Upéva jajapo ikatuhápe, tahaʼe umi Salón del Réinope, umi ermáno rógape térã ñemiháme jepe. Toiko la oikóva, ñande ndaikatúi jaheja umi rreunión jajapóva jaadora hag̃ua Ñandejárape, ha “koʼýte koʼág̃a jahechávo Ñandejára día hiʼag̃uimbaitemaha” (Heb. 10:24, 25). w19.10 16 párr. 6, 7

Jehová ningo oipota ñande javyʼa, ha umi entretenimiénto ikatu ñanepytyvõ upearã. Ñandejára Ñeʼẽ heʼi voi “ndaiporiha ótra kósa iporãvéva kóvagui: jakaru, jaʼu vevída ha javyʼa ñambaʼapo pohýivo” (Ecl. 2:24). Péro pe entretenimiénto oĩva ko múndope ikatu hína ñandeperhudika. ¿Mbaʼérepa jaʼe upéva? Pórke umi entretenimiénto ikatu omomýi umi héntepe oasepta térã ohayhu hag̃ua umi mbaʼe la Biblia okondenáva. Ñande jaadorase Jehovápe añoite, upévare ndaikatúi jakaru “Jehová meságui” ha “demoniokuéra meságui” (1 Cor. 10:21, 22). Ñakompartíramo peteĩ tembiʼu peteĩ persónandi, upéva heʼise jaikoha iñamígoramo. Ñande jaiporavóramo umi entretenimiénto ikatúva omomýi peteĩ persónape iviolénto hag̃ua, ojapo hag̃ua espiritísmo, hekovai hag̃ua, térã ojapo hag̃ua ótra kósa ivaíva, añetehápe jaʼu hína peteĩ tembiʼu opreparáva Ñandejára enemigokuéra. Jajapóramo upéva, ñande voi jajeperhudikáta ha avei ñañemomombyrýta Jehovágui. w19.10 26 párr. 2; 29, 30 párr. 11, 12

Peteĩ odirihíva peteĩ várko oaprovechaséramo pe yvytu ojapo vaʼerã mokõi mbaʼe: Primero, ogueraha vaʼerã ivárko pe yvytu oipejuha gotyo, pórke opytánteramo pe puértope, ndohomoʼãi moõve. Segundo, ohupi ha oipyso porã vaʼerã umi véla omeʼẽmíva entéro, upéicharõmante ojagarra porãta pe yvytu ha ogueraháta pe várko. Upéicha avei ñande ñaikotevẽ Jehová espíritu sánto jasegi hag̃ua jaservi chupe. Upearã jajapo vaʼerã mokõi mbaʼe: Primero, jaha vaʼerã pe yvytu térã espíritu sánto “oipejuha gotyo”, upearã jajapo vaʼerã umi mbaʼe ñanepytyvõtava jarresivi hag̃ua pe gía omeʼẽva Ñandejára espíritu. Segundo, japartisipa vaʼerã koʼã aktividápe ñane situasión omeʼẽmíva entéro, péicha haʼete ku “jahupi ha jaipysóva umi ñande véla” omeʼẽmíva entéro (Sal. 119:32). Upéicharõ, pe espíritu sánto ñanepytyvõta jasegi hag̃ua jaservi Jehovápe fiélmente, oĩramo jepe umi pruéva térã oñemoĩva ñanderehe. w19.11 9 párr. 8; 10 párr. 11

Jesús omano mbotávo ojepyʼapyeterei kuri. Haʼe oikuaa saʼíma ofaltaha iñenemigokuéra otortura ha ojuka hag̃ua chupe. Péro ndahaʼéi upéva la oipyʼapyvéva Jesúspe. Haʼe ohayhueterei Itúape ha siémpre ojapose hembipota, ha oikuaa porã oaguantáramo umi pruéva ijetuʼuetéva ikatutaha oipytyvõ oñemopotĩ hag̃ua Jehová réra. Jesús ohayhu avei umi héntepe, ha oikuaa iñeʼẽrendu vaʼerãha ipahaite peve ikatu hag̃uáicha entéro yvypóra oikove opa ára g̃uarã. Jesús ojepyʼapyetereíramo jepe ipyʼaguapy vaʼekue. Haʼe oreko vaʼekue “Ñandejára pyʼaguapy”, upéva heʼise oreko hague pe trankilida ohupytýva umi persóna oĩ porãva Jehovándi. Upe pyʼaguapy otrankilisa kuri Jesúspe ha oipytyvõ chupe ani hag̃ua ojedesespera (Filip. 4:6, 7). Ndaipóri ñande apytépe tekotevẽtava ohasa umi mbaʼe ijetuʼuetéva Jesús ohasa vaʼekue. Péro entéro ñamoirũva chupe, jahasátante voi heta mbaʼe ijetuʼúva (Mat. 16:24, 25; Juan 15:20). Sapyʼánte umichagua situasión ñanekevrantáta avei Jesúspe okevranta haguéicha. w19.04 8 párr. 1-3

Iporã ningo ñañeporandumi: “¿Ahechaukápa aagradeseha aime haguére Jehová organisasión oĩvape ko yvy ape ári?”. Ñane tiémpope Jehová ohechauka porãiterei oapojaha hína iñorganisasión. Añetehápe oĩ heta mbaʼe jaagradese hag̃ua (1 Tes. 5:18). ¿Mbaʼéichapa jahechauka jaapojaha pe organisasión Jehová oipurúva hína? Jasegívo umi konsého oúva la Bíbliagui ha osẽva umi puvlikasiónpe, térã ñaaprendéva umi rreuniónpe ha asambleahápe. Avei jajapóvo ikatumíva entéro japredika ha ñaporomboʼe hag̃ua umi héntepe (1 Cor. 15:58). Primero, ñañehaʼãmbaitékena Jehová tañandeguerohory oasepta hag̃ua ñande sakrifísio. Segundo, jaservi Ñandejárape jaagradese rupi chupe. Tercero, jasegíkena ñameʼẽ chupe pe iporãvéva jahayhu rupi chupe. Ha cuarto, jaapoja ñande pyʼaite guive pe organisasión Jehová oipurúva hína ñane tiémpope. Jajapóramo koʼã mbaʼe, jahechaukáta hína Jehovápe jaagradeseha jaservi haguére chupe, ha haʼe haguére Itestígo. w19.11 25 párr. 17, 18

Jesús ndeʼiséi kuri jajapotaha milágro haʼe ojapo haguéicha. Upéva rangue, heʼise kuri japredikataha hetave lugárpe, hetave persónape ha hetave tiémpore. Oiméramo jareko peteĩ traváho, ñañeporandumína: “¿Ojeʼénepa cherehe chetravahadorha? ¿Aterminápa che traváho a tiémpo ha ajapo ikatúva entéro osẽ porã hag̃ua?”. Ikatúramo ñambohovái “si”, upéicharõ ñane patrón katuete ojeroviáta ñanderehe. Avei péicha ñane kompañéro de traváho ohendusevéta umi notísia porã. Ha ñapensávo predikasiónre ha pe traváho jajapóvare ñaporomboʼévo umi héntepe, ikatu ñañeporandu: “¿Ojeʼénepa cherehe cheguapoha predikasiónpe? ¿Ajeprepara porãpa asẽ hag̃ua apredika? ¿Aha jeýpa ensegída avisita umi ohendu porã vaʼekuépe? ¿Ajepokuaápa apredika por ehémplo aikohárupi, kállere, karríto reheve, térã hetave hendáicha?”. Ikatúramo ñambohovái “si”, upéicharõ katuete javyʼáta jajapóvo ko tembiapo. w19.12 5 párr. 14, 15

Peteĩ matrimónio odesidíramo orekotaha mitã, haʼekuéra oñemongeta vaʼerã koʼã mbaʼe iñimportántevare: Primero, arakaʼépa orekose hikuái umi mitã, ha segundo, mboýpa orekose hikuái. Péro, ¿arakaʼépa iporãve oñemongeta hikuái koʼã mbaʼére? ¿Ha mbaʼérepa iñimportantete upéva? Iporãve jepi peteĩ kuña ha peteĩ kuimbaʼe oĩva de nóvio oñemongetáramo koʼã mbaʼére omenda mboyve. ¿Mbaʼérepa? Pórke mokõivéva oñemoĩma vaʼerã de akuérdo koʼã mbaʼépe. Avei opensa vaʼerã hikuái oĩpa preparádo ojagarra hag̃ua ko rresponsavilida. Oĩ matrimónio ohechakuaáva iporãveha ohaʼarõramo 1 térã 2 áño ifamília mboyve hikuái, pórke ou vove umi mitã oñangarekóma vaʼerã hesekuéra, ha katuete ikaneʼõta ha saʼíma itiémpota hikuái. Péro ohaʼarõramo ifamília hag̃ua, itiempovéta hikuái ojepokuaa hag̃ua pe ivída pyahúre ha omombaretevéta hikuái imatrimónio. w19.12 23 párr. 4, 5

Oparupiete ko yvy apére Jehová siervokuéra ohasa hína heta mbaʼe okevrantáva ha ombosufrietereíva chupekuéra. Oĩ umi hasyetéva, térã omanóva chugui peteĩ ohayhúva. Ótrope katu ojopyeterei ohechávo peteĩ iñamígo teete térã peteĩ ihénte oñemosẽha kongregasióngui. Ha oĩ avei ohasa asýva umi desástre naturál káusare. Enterovete koʼã ñane ermáno ningo oikotevẽ konsuélo. ¿Mbaʼéichapa ikatu ñaipytyvõmi chupekuéra? Oiko vaʼerã ñandehegui iñamigokuéra ifiélva. Umi amígo ifiélva ojesakrifika iñermanokuéra rehehápe. Jahechamína peteĩ káso. Peteĩ ermáno hérava Piter hasyete, ha ijestúdiope osẽ chupe orekoha peteĩ mbaʼasy inkurávle pyaʼeterei oavansáva. Hembireko Kateryn heʼi: “Peteĩ matrimónio ore kongregasionpegua oregueraha pe ospitálpe, ha upérõ oñemombeʼu oréve pe mbaʼasy orekóva Piter. Upepete voi ko matrimónio odesidi ndaorerejamoʼãiha oreaño, pórke ohechakuaa hikuái ijetuʼuha la ore situasión. Haʼekuéra oĩ orendive ha orepytyvõ opa mbaʼe roikotevẽvape”. ¡Ajépa ñanemokyreʼỹete jarekóramo peichagua amígo tee ñanepytyvõva jahasa asy jave! w20.01 8 párr. 1; 9 párr. 5, 6

Epensamíntena nde haʼeha peteĩva umi disípulo oñembyaty vaʼekue pe Pentekostés áño 33-pe. Ni michĩmi nderedudamoʼãi kuri rejeporavo hague espíritu sánto rupive (Hech. 2:5-12). Péro, ¿siémprepa Jehová ojapo upeichagua milágro oiporavo hag̃ua ijespíritu sánto rupive enterove umi ohótavape yvágape? ¿Oiporavópa Jehová enterovépe al mísmo tiémpo? Nahániri. Jahechamína arakaʼépa ojeporavo peteĩ persónape espíritu sánto rupive. Upérõ ningo oñembyaty kuri 120 disípulorupi, péro ndahaʼéi chupekuérante ojeporavo vaʼekue upérõ. Upe rire, upe díape voi, 3.000 persónarupi orresivi avei pe espíritu sánto Jesús opromete vaʼekue. Chupekuéra ojeporavo vaʼekue ojevautisárõ guare (Hech. 2:37, 38, 41). Péro naentéroi umi kristiáno ojeporavo ojevautisárõ guare. Por ehémplo, umi samaritánope ojeporavo ojevautisa riréma (Hech. 8:14-17). Ha Cornelio ha umi hogaygua katu ojeporavo ojevautisa mboyve jepe (Hech. 10:44-48). w20.01 20, 21 párr. 2-4

Jaleévo umi 4 lívro omombeʼúva umi mbaʼe Jesús heʼi ha ojapo vaʼekue, umívapente voi jatopa Jesús oipuru hague haimete 200 vése umi palávra “Ru”, térã “Túa” oñeʼẽ hag̃ua Jehováre. ¿Mbaʼérepa Jesús oipuru vaʼekue hetaiterei vése umi palávra? Pórke haʼe oipota vaʼekue umi hénte oĩ segúro Jehová haʼeha peteĩ Túa oporohayhúva, ha upéva peteĩ mbaʼe omomýi vaʼekue chupe ojapo hag̃ua upéva (Juan 17:25). Jahechamína mbaʼépa ñaaprende Jehovágui jahechávo mbaʼéichapa haʼe otrata vaʼekue Itaʼýra Jesúspe. Jehová ningo siémpre ohendu vaʼekue Jesús ñemboʼe, péro ndahaʼéi ohendúnteva, síno ombohovái avei umíva (Juan 11:41, 42). Tahaʼe haʼéva umi mbaʼe ohasáva, Jesús siémpre oñandu vaʼekue Itúa ohayhu ha oapojaha chupe (Luc. 22:42, 43). Jehová haʼe rupi peteĩ Túa oporohayhúva, oikuaauka vaʼekue Itaʼýrape oapojaha chupe (Mat. 26:53; Juan 8:16). Jehová ndoprotehéiramo jepe Jesúspe pono ojehu chupe mbaʼeve ivaíva, haʼe oipytyvõ vaʼekue chupe oaguanta hag̃ua umi pruéva ijetuʼuetéva. Jesús oikuaa vaʼekue umi mbaʼe ikatúva oiko hese sapyʼaite g̃uarãnteha (Heb. 12:2). Jehová ohechauka vaʼekue ohayhuha Jesúspe ohendúvo chupe, omeʼẽvo chupe entéro mbaʼe oikotevẽva, ohekomboʼévo ha avei oipytyvõvo chupe (Juan 5:20; 8:28). w20.02 3 párr. 6, 7, 9

Tekotevẽramo jadesidi japartisipátapa peteĩ kostúmbre ojerekóvape, jareko vaʼerã enkuénta ñande rapichakuéra konsiénsia, ha koʼýte umi ermanokuéra konsiénsia. ¡Ñande ningo arakaʼeve nañamoñepysangaséi avavépe! (Mar. 9:42). Ndajaipotái avei umi ndahaʼéiva Testígo ipochy ñanendive. Upévare jahechauka vaʼerã jahayhu ha jarrespetaha chupekuéra ñañeʼẽ jave hendivekuéra, pórke upéva omombaʼeguasu Jehovápe. Naiporãmoʼãi avei jaiko vaíramo hendivekuéra térã jaapoʼi umi kostúmbre orekóva hikuái. Upéva rangue, jarrespeta ha jatratáramo chupekuéra mborayhúpe, ikatu voi hína umi oñemoĩ mbaretevéva ñanderehe jepe okambia. Eikuaauka nde haʼeha testígo de Jehová (Is. 43:10). Omanóramo peteĩ ne pariénte, ikatu hína ne hénte ha ne vesinokuéra ipochy nendive nderepartisipái haguére hendivekuéra umi kostúmbre osegívape hikuái omano jave peteĩ persóna. Péro voimi reexplikámarõ chupekuéra umi mbaʼe regueroviáva, ifasilvéta ndéve regueropuʼaka oñepresentáramo peichagua situasión. Núnka nañatĩri vaʼerã ñadefende hag̃ua la Biblia omboʼéva (Rom. 1:16). w19.04 17, 18 párr. 14-16

Umi 12 apóstol ningo omoirũ vaʼekue Jesúspe haʼe opredika aja ko yvy ape ári, péro apóstol Páblogui oiko vaʼekue kristiáno Jesús orresusita rire ae. Tiémpo rire, oñenombráramo jepe chupe “apóstol” opredika hag̃ua umi nasiónpe, haʼe noĩri vaʼekue umi 12 apóstol apytépe (Rom. 11:13; Hech. 1:21-26). Péro Pablo ndoikói vaʼekue oenvidia umi 12 apóstolpe ha pe amista oreko vaʼekue hikuái Jesúsndi, upéva rangue haʼe oñekontenta vaʼekue pe priviléhio orekóvare. Ñande ñaneumílde ha ñañekontentáramo umi mbaʼe jarekóvare, jasegíta Pablo ehémplo ha jahechaukáta jarrespetaha pe autorida Jehová omeʼẽ vaʼekue umi ótro ermánope (Hech. 21:20-26). Jehová onombra vaʼekue koʼã kuimbaʼépe ikatu hag̃uáicha ogia pe kongregasión. Ha iñimperféktoramo jepe hikuái, Jehová ohecha “koʼã kuimbaʼépe rregáloramo” (Efes. 4:8, 11). Jarrespetáramo koʼã ermánope ha ñaneumílde jasegívo pe gía haʼekuéra omeʼẽva, jarekóta peteĩ amista iporãva Jehovándi ha jaikóta pyʼaguapýpe ñane ermanokuérandi. w20.02 17 párr. 13, 14

Restudia mboyve jepe umi testígo de Jehovándi, oiméne nde rerrespeta ha remombaʼéma voi raʼe la Biblia. Ha oime vaʼerã rehayhu avei Jesúspe. Ha koʼág̃a reikuaa rire umi testígo de Jehovápe oiméne igústo ndéve rehasa hendivekuéra tiémpo. Iporã ningo ndegusta ha rehayhu koʼã mbaʼe, péro ndahaʼéi upe haguérente reñemeʼẽtamava Jehovápe ha rejevautisa. Pe rrasón iñimportantevéva rejevautisa hag̃ua haʼe hína rehayhu Ñandejára Jehovápe voi. Ha rehayhúramo Jehovápe opa mbaʼe ári, nderehejamoʼãi mbaʼeve ndejoko reservi hag̃ua chupe. Upe mborayhu nemomýita rejevautisa hag̃ua ha nepytyvõta avei resegi hag̃ua reservi fiélmente Jehovápe ág̃a rejevautisa rire. Jesús heʼi vaʼekue jahayhu vaʼerãha Jehovápe ñande pyʼaite guive, ñande rekove kompletoite reheve, entéro ñane pensamiénto reheve, ha ñane mbaretekue omeʼẽmíva reheve (Mar. 12:30). ¿Mbaʼépa rejapo vaʼerã upeichaite rehayhu ha rerrespeta hag̃ua Jehovápe? Rejepyʼamongeta vaʼerã mbaʼeichaitépa Jehová nderayhu, ha upéva nemomýita rehayhu hag̃ua avei chupe. w20.03 4 párr. 4, 5

¿Mbaʼépa heʼise jajapo porãha ñane rembiapo Ñandejára servísiope g̃uarã? Jaʼe porãsérõ g̃uarã, jajapo ikatúva guive predikasiónpe heʼise ñañemeʼẽmbaiteha ñamombeʼu hag̃ua umi héntepe umi notísia porã ha ñamboʼe hag̃ua chupekuéra la Biblia. Péro la ointeresavéva Jehovápe ningo ndahaʼéi mboy tiémpopa ñamboyke japredika hag̃ua, síno mbaʼépa ñanemomýi jajapo hag̃ua upéva. Jahayhúramo Jehovápe ha ñande rapichakuérape, ñañemeʼẽmbaitéta Jehová servísiope (Mar. 12:30, 31; Col. 3:23). Jajapóramo la ikatúva guive Jehovápe g̃uarã, jaipurúta ñane mbaretekue ha ñande kapasida jajapo hag̃ua iporãveháicha ko servísio. Ñamombaʼéramo ko priviléhio, ñañehaʼãta ñamog̃uahẽ umi notísia porã opa ikatúvape. Jepe japredikase hetave tiémpo, sapyʼánte ndaikatúi jajapo ñandegustahaichaite. Péro pe predikasión la añetehápe ñandegustavéva. Upévare ñañehaʼãmbaite ñandekatupyryve jahávo japoko hag̃ua umi hénte korasõre japredika jave chupekuéra, ha jajapo ikatúva guive ñamotenonde hag̃ua pe predikasión. w19.04 2 párr. 3; 3 párr. 4, 6

Umi japu Satanás omosarambíva ombosufrive umi héntepe. Omano jave peteĩ mitã, sapyʼánte ojeʼe ituakuérape oiméne hag̃ua Ñandejára oipota raʼe yvágape peteĩ iñanhelitorã. ¿Omoñeñandu porãmiépa chupekuéra ko japu, térãpa omoñeñandu vaive? Pe enseñánsa heʼíva umi omanóva ohoha osufri pe infiérnope ojepurúmi vaʼekue kómo exkúsa ojetortura hag̃ua umi héntepe. Por ehémplo, oĩramo opuʼãva pe iglésia omboʼévare, oñemoĩmi vaʼekue chupekuéra peteĩ yvyráre ha ojehapy. Peteĩ lívro oñeʼẽva pe Inquisición Españólare heʼi umi oporotortura vaʼekue ikatúne hague orovia haʼekuéra ohechaukanteha umi eréhepe “mbaʼéichapa oñeñandúta ág̃a oĩ vove pe infiérnope”. Upéicha guaʼu oipytyvõ chupekuéra ikatu hag̃uáicha oñarrepenti ha ani hag̃ua oho osufri pe infiérnope. Koʼág̃arupi heta lugárpe oĩ umi oadoráva ihénte ymave omano vaʼekuépe, ha ojapo upéva oipotágui ovendesi chupekuéra. Ótro katu oñehaʼã otrankilisa umi ihénte ymave omano vaʼekuépe ani hag̃ua ipochy ha okastiga algúnope upe haguére. Ñambyasýramo jepe, koʼã japu Satanás omosarambíva añetehápe nokonsolái avavépe, upéva rangue okevranta rei ha omongyhyje chupekuéra. w19.04 14 párr. 1; 16 párr. 10