Ahechárõmante aroviáne
Oĩ umi heʼíva “ndaikatuiha ojekuaa pe añetegua Ñandejáragui ha umi mbaʼe ñaneraʼarõva tenonderãme. Koʼã mbaʼe oikuaase jepi umi kristiáno ha ambue rrelihionpegua. Ha ikatúramo jepe ojekuaa koʼã mbaʼe, koʼag̃aitérõ hasy ojekuaa hag̃ua.” (BERTRAND RUSSELL, FILÓSOFO [1953])
PE OÑEPYRŨVAʼEKUE opensa péicha haʼe peteĩ zoólogo (ostudiáva umi animál rehe) hérava Thomas Huxley. Haʼe ningo onasevaʼekue 1825-pe. Huxley oiko Charles Darwin tiémpope ha oguerovia avei yvypóra ouha mymbágui. Áño 1863-pe ohaivaʼekue ndojuhuiha mbaʼeve ohechaukáva oĩha peteĩ Ñandejára, “ñanderayhu ha oñangarekóva ñanderehe, heʼiháicha umi kristianokuéra”.
Koʼág̃a rupi heta oĩ opensáva avei péicha ha heʼi haʼekuéra ohechárõmante ogueroviataha oĩha Ñandejára. Haʼekuéra heʼi avei jajeroviáramo peteĩ jahechaʼỹvare jagueroviatantemaha oimeraẽ mbaʼe.
Heʼípa ñandéve la Biblia jaguerovia reínte hag̃ua Ñandejárape? Nahaniriete katu. La Biblia heʼi umi ivýrovante orovia reiha oimeraẽ mbaʼe ojeʼéva. Pór ehémplo Proverbios 14:15 heʼi: “Ivýrova oguerovia opa mbaʼe ohendúva, iñakãguapýva katu oikuaa mamópa opyrũ”.
Mbaʼépa upéicharõ ikatu jaʼe Ñandejárare? Jahechápa heta mbaʼe ohechaukáva ñandéve Haʼe oĩha ha avei ñanderayhu ha ojepyʼapyha ñanderehe?
Ikatu jahecha mbaʼeichaguápa Ñandejára
Apóstol Pablo oñeʼẽrõ guare umi Atenasgua iñarandúvape, heʼi Ñandejára ‘ojapohague ko Yvy ha opa mbaʼe oĩva ipype’. Ha heʼi avei chupekuéra Ñandejára ojepyʼapyha ñanderehe ha “noĩriha mombyry ñandehegui” (Hechos 17:24-27).
Mbaʼéicha rupípa Pablo orovia Ñandejára oĩha ha ojepyʼapyha ñanderehe? Haʼe voi ohaívo umi Romayguápe, heʼi péicha Ñandejárare: ‘Pe Ñandejára rehegua ojehechaʼỹva ikatu ojekuaa, jajepyʼamongetárõ umi mbaʼe Haʼe ojapovaʼekuére. Ha upéicha rupi, ko Yvy oiko ñepyrũ guive ojehecha porã haʼeha Ñandejára, ha pe ipuʼaka arakaʼeve ndopamoʼãiha’ (Romanos 1:20).
Umi artíkulo oúvape jahecháta mbohapy mbaʼe ohechaukáva ñandéve mbaʼeichaguápa Ñandejára. Ñahesaʼỹijóvo koʼã mbohapy ehémplo ñañeporandumi: “Mbaʼépepa chepytyvõ aikuaávo koʼã mbaʼe Ñandejáragui?”.
[Komentário oĩva páhina 3-pe]
La Biblia ndojeruréi ñandéve jaguerovia reínte hag̃ua Ñandejára oĩha