Ñamombaʼékena Jehová ojapovaʼekue ñandesalva hag̃ua
‘Toñemombaʼeguasu Jehová Israel Járape omaʼẽ ha osalva haguére hetãme.’ (LUC. 1:68, BNP.)
1, 2. a) Mbaʼe ehémplopa ohechauka ñandéve ñaimeha peteĩ situasión ivaietereívape? b) Mbaʼépa ñambohováita ko artíkulope?
EPENSAMÍNTENA reimeha peteĩ ospitálpe. Upépe nemoĩ hikuái ambue nde rapichakuéra ndive peteĩ sálape ha enterove pereko peteĩ mbaʼasy naipohãiva ha ikatúva pendejuka. Péro upe rire, oñemombeʼu ndéve peteĩ doktór ohekahahikóni peteĩ pohã omongueráva upe mbaʼasy. Katuete ningo reikuaaséta mbaʼéichapa oho hese upe doktór ojapóva ha ojuhúpa peẽme pene pohãg̃ua. Ha upeichaháguinte heta oñehaʼã ha ombaʼapo rire upe doktór, ojuhu peteĩ pohã ikatúva omonguera upe mbaʼasy vai peẽ perekóva. Mbaʼéichapa reñeñandúne reikuaávo upéva? Katuete ningo reagradesetereíta upe doktórpe ndesalva haguére ndéve ha nde rapichakuérape.
2 Ikatu ningo ere, “moõ piko oikóta cherehe umi mbaʼe”. Péro ñapensa porãramo enterove ñaimeñaína peteĩ situasión ivaivévape. Ha ñaikotevẽtereíma peteĩ ñandesalvavaʼerã (jaleemína Romanos 7:24). Mávapa ikatu ñandesalva? Jehová ha Itaʼýra ojapo peteĩ sakrifísio tuichaitereíva ñandesalva hag̃ua. Ko artíkulope ñambohováita cuatro porandu: Mbaʼérepa ñaikotevẽ peteĩ ñandesalvavaʼerã? Mbaʼépa ojapo Jesús ñandesalva hag̃ua? Mbaʼe sakrifísiopa ojapo Jehová ñandesalva hag̃ua? Mbaʼéichapa ikatu jahechauka jaagradesetereiha chupekuéra ñandesalva haguére?
Mbaʼérepa ñaikotevẽ peteĩ ñandesalvavaʼerã?
3. Mbaʼérepa pe pekádo ikatu ñambojoja umi mbaʼasy vaíre?
3 Hetaitereípema ningo ojuka umi mbaʼasy vai oúva. Pór ehémplo, áño 1918-pe hetaiterei tapichápe ojuka pe gripe española. Ha oĩ avei umi mbaʼasy ndahetáipe ojagarráva, péro ojukapalénto umi ojagarrávape guive.a Pe pekádo ningo ikatu ñambojoja koʼãichagua mbaʼasy vaíre. Romanos 5:12-pe heʼi voi: ‘Pe pekádo oike yvy ári peteĩ kuimbaʼe rupi, ha pekádo rupi oike pe ñemano, upéicha avei pe ñemano ohasa opavavépe opavave opekágui’. Ikatu jaʼe enterovetépe ojagarraha upe mbaʼasy vai, pórke enterove ningo ñande pekadór (jaleemína Romanos 3:23). Hetápemapa ojuka upe mbaʼasy? Apóstol Pablo ningo heʼi voi “opavave” omanoha pe pekádo káusare.
4. Mbaʼéichapa la hénte ohecha ñande rekove ha mboy tiémpopa Jehová oipota jaikove?
4 Koʼág̃a rupi ningo la hénte ndohecharamovéima oĩramo omanóva térã ojapóva mbaʼe vai. Enterovénte voi omombaʼe ha ndogueroviaséi omanóramo peteĩ imitãva. Péro umi tujágui omanóvare katu ojeʼe peichantevaʼerãha voi. Heta oĩ hesaráimava ñande Apohare oipota hague jaiko opa ára g̃uarã, ndahaʼéi mbykymínte. Ñandejárape g̃uarã ningo ñande haʼete ni un día ndajaikovéiva (2 Ped. 3:8). Upévare Ñandejára Ñeʼẽ heʼi ñande jaikoveha sapyʼaitemínte peteĩ yvotýicha térã peteĩ pytuhẽicha (Sal. 39:5; 1 Ped. 1:24). Mbaʼérepa iporã jaikuaa mbykyha ñande rekove? Upéicharõmante jahechakuaáta ivaietereiha pe “mbaʼasy” jarekóva ha ñamombaʼevéta pe pohã ikatúva ñanemonguera. Upe mbaʼasy vai ningo pe pekádo ha pe pohã katu haʼehína opa mbaʼe Jehová ojapóva ñandesalva hag̃ua.
5. Mbaʼe mbaʼépa japerde pekadór haguére?
5 Jahechamína mbaʼe mbaʼépa japerde pekadór haguére. Ikatu ijetuʼu ñandéve ñantende hag̃ua upéva, pórke ñande ningo ñaneimperfékto, péro Adán ha Eva perfektovaʼekue. Haʼekuéra ikatu opensa, oñandu ha ojapo opa mbaʼe iporãva. Upéicha rupi ikatu avei koʼẽ koʼẽre oservi porãve Ñandejárape, iñarandu ha ivaletereive hikuái ohóvo. Péro haʼekuéra ndojapói upéva, ndoguerohorýi upe jopói porãite oñemeʼẽva chupekuéra. Adán ha Eva ningo odesidi naiñeʼẽrendúi Jehovápe. Upéicha rupi operdepaite oñemeʼẽvaʼekue chupekuéra ha ndoikovéima ymaguaréicha. Ha upéva ningo ñandéve entéro ñanderupyty (Gén. 3:16-19). Naiñeʼẽrendúigui avei ojagarra chupekuéra pe mbaʼasy vaiete térã pekádo ha oguerova hikuái opa ifamiliarére. Ha Jehová hekojoja rupi heʼi Adán ha Évape omanotaha upévare, péro ñandéve omeʼẽ esperánsa ñandesalvataha (Sal. 103:10).
Mbaʼépa ojapo Jesús ñandesalva hag̃ua
6, 7. a) Arakaʼépa Ñandejára heʼi ñepyrũ tekotevẽtaha peteĩ sakrifísio ojesalva hag̃ua yvyporakuérape? b) Mbaʼépa ñanemboʼe umi sakrifísio ojapovaʼekue Abel ha ambue Jehová rembiguaikuéra?
6 Jehová oikuaa porã hepy opagavaʼerãha osalva hag̃ua Adán ha Eva familiarépe. Pe profesía oĩva Génesis 3:15-pe ohechauka ñandéve mbaʼépa Jehová ojapóta. Upépe heʼi Jehová omboutaha peteĩ “ñemoñare” ñandesalvavaʼerã ha upe rire ohundietetaha Satanáspe. Péro upearã pe ñandesalvátava heta ohasa asy vaʼerã, pe profesía ningo heʼi voi ojesuʼutaha chupe ipytápe. Mbaʼépa heʼise upéva? Mbaʼe mbaʼépa ohasavaʼerã Jehová oiporavovaʼekue ñandesalva hag̃ua?
7 Mbaʼépa ojapovaʼerã pe ñandesalvátava ikatu hag̃uáicha oñeperdona ñandéve ñandepekádo ha ñaime porã jey Ñandejára ndive? Adán ha Eva opeka ypy guive Ñandejára heʼi tekotevẽtaha ojejapo peteĩ sakrifísio. Jehová ningo oguerohoryetereivaʼekue Abel osakrifikárõ guare chupe peteĩ mymba. Oguerohory avei Noé, Abrahán, Jacob, Job ha ambue hembiguái iñeʼẽrendúva osakrifikárõ guare chupe mymba (Gén. 4:4; 8:20, 21; 22:13; 31:54; Job 1:5). Heta áño rire pe léi mosáikape oñemyesakã porãvéma maʼerãpa ojesakrifika umi mymba Jehovápe g̃uarã.
8. Mbaʼépa ojapo pe saserdóte guasu Día de Expiación jave?
8 Pe léi mosáikape ningo ojejerure umi Israelguápe ojapo hag̃ua sakrifísio Jehovápe. Ha umi iñimportantevéva apytépe oĩ pe ojejapóva Día de Expiación jave. Upe arete ojejapo káda áño ha pe saserdóte guasu ojapo heta mbaʼe upe jave. Ñepyrũrã osakrifikavaʼerã peteĩ mymba Jehovápe ohejarei hag̃ua chupe ipekádo ha ambue saserdotekuérape. Upéi katu ojapo umi hentekuéra rérape. Ojapopa rire upéva oike pe tabernáculo térã témplo Santísimope. Haʼe añoiténte ikatu oike upépe ha Día de Expiación javénte avei. Upépe oike ohypýi pe arca del pacto renondépe umi mymba osakrifikavaʼekue ruguy. Ha sapyʼánte osẽ pe arca ári peteĩ arai omimbipáva. Upéva heʼisehína Jehová oĩha upépe (Éxo. 25:22; Lev. 16:1-30).
9. a) Pe Día de Expiación jave, mávapepa orrepresenta pe saserdóte guasu ha pe sakrifísio? b) Mbaʼépa orrepresenta pe saserdóte guasu oike hague pe Santísimope?
9 Apóstol Pablo rupive Jehová omombeʼu ñandéve mbaʼépa orrepresenta umi mbaʼe ojapomivaʼekue umi saserdóte. Haʼe heʼi pe saserdóte guasu orrepresentaha pe Mesías, Jesucrístope. Ha pe sakrifísio katu orrepresenta upe Mesías omanotaha ñanderehehápe (Heb. 9:11-14). Upe sakrifísio rupive oñeperdonáta umi 144.000 ungídope ipekádo ha avei ‘ambue ovechakuéra’ (Juan 10:16). Upe saserdóte guasu oike hague pe Santísimope katu orrepresenta Jesús oikeha yvágape omeʼẽ hag̃ua Jehovápe isakrifísio repykue ñandesalva hag̃ua (Heb. 9:24, 25).
10. Mbaʼépa heʼi umi profesía oikotaha pe Mesías rehe?
10 Jahechaháicha hepy ojepagavaʼerã ojesalva hag̃ua Adán ha Eva familiarépe: Pe Mesías osakrifikavaʼerã hekove upearã. Umi proféta ohaivaʼekue Escrituras Hebreas omombeʼu voi mbaʼéichapa oikóta upéva. Pór ehémplo, proféta Daniel heʼi: ‘Pe Mesías, pe Mburuvicha guasu ojejukáta oñeperdona hag̃ua umi tembiapo vai’ (Dan. 9:24-26, ÑÑB). Proféta Isaías katu heʼi oñemboyketaha pe Mesíaspe, ojepersegi ha ojejukataha ha oguerahataha ijapére ñane rembiapo vaikue (Isa. 53:4, 5, 7).
11. Mbaʼéichapa Ñandejára Raʼy peteĩetéva ohechauka omeʼẽseha hekove ñanderehehápe?
11 Ñandejára Raʼy peteĩetéva ningo ou mboyve voi ko yvy ape ári oikuaamavaʼekue hepy opagavaʼerãha omosãso hag̃ua yvyporakuérape. Haʼe oikuaa heta ohasa asytaha ha upéi ojejukataha chupe. Mbaʼépa heʼi Jesús, Itúva heʼírõ guare chupe ohasataha umi mbaʼe? Okyhyjépa ha heʼi ndojapomoʼãiha? Nahániri. Haʼe ningo pyʼaporãme ojapo heʼihaichaite chupe (Isa. 50:4-6). Ha oĩrõ guare ko yvy ape ári iñeʼẽrendu avei Itúvape opaite mbaʼépe. Mbaʼérepa Jesús ojapo upéicha? Haʼe voi heʼi: “Che ahayhu che Rúpe”. Upéi heʼive: “Ndaipóri ningo mborayhu tuichavéva kóvagui: Ñameʼẽ ñande rekove ñane angirũ rehehápe” (Juan 14:31; 15:13, JMP). Péicha jahecha Jesús ñandesalva hague ñanderayhúgui. Haʼe ningo omeʼẽsevaʼekue hekove perfékto ñanderehehápe, ha omeʼẽ voi katu.
Mbaʼe sakrifísiopa ojapo Jehová ñandesalva hag̃ua?
12. Mávapa oipotavaʼekue jajesalva ha mbaʼérepa?
12 Jaikuaa ningo Jesús ndodesidíri hague ijehegui reínte ojesakrifika hag̃ua ñanderehehápe. Jehová heʼi chupe ojapo hag̃ua, haʼe ningo oikuaa tekotevẽha upéva ojapopa hag̃ua hembipota. Apóstol Pablo omyesakã avei pe altár ojejapoha sakrifísio, orrepresentaha Ñandejára rembipota (Heb. 10:10). Upéicharõ Jehovápe jaagradesevaʼerã ñandesalva haguére, pórke haʼe oipotáguinte ñanemosãsovaʼekue. Upéicha Haʼe ohechauka ñandéve ñanderayhuetereiha (jaleemína Juan 3:16).
13, 14. Mbaʼéichapa Abrahán ohasavaʼekue ñanepytyvõ ñamombaʼe hag̃ua Jehová ojapóva ñanderayhupápe?
13 Mbaʼépa Jehová ojapovaʼekue ñanderayhupápe? Jahechamína upearã peteĩ istória oĩva la Bíbliape. Upéva ñanepytyvõ ñantende hag̃ua mbaʼeichaitépa tuicha pe sakrifísio Jehová ojapovaʼekue. Oiméne ñanemanduʼa Jehová ojerure hague Abrahánpe osakrifika hag̃ua itaʼýra Isaac. Upéva ningo ijetuʼueterei Abrahánpe, haʼe ningo ohayhueterei itaʼýrape ha Jehová oikuaa porã upéva. Upévare voi heʼi Abrahánpe: “Eraha nde raʼy peteĩmi rehayhuetéva” (Gén. 22:2). Ha Abrahán ohayhúramo jepe Isaácpe, oikuaa iñimportanteveha ojapo Jehová rembipota. Upévare ojapo heʼihaichaite chupe. Péro amo ipahápe Jehová ndohejái Abrahánpe osakrifika itaʼýra. Omondo peteĩ ánhelpe ojoko hag̃ua chupe. Ha jaikuaa ningo Jehová ojapotaha upéva amo gotyove. Abrahán ojapovaʼekue opa mbaʼe ojeroviágui Jehováre. Haʼe ojerovia ojukáramo jepe Isaácpe, Jehová omoingove jeytaha chupe. Pablo heʼi voi Abrahán orresivi hague Isaácpe peteĩ oñemoingove jey vaʼekuéicha, upéva ningo haʼe heʼi ohechauka hag̃ua mbaʼépa oikóta (Heb. 11:19).
14 Ñapensamíntena mbaʼeichaitépa oiméne Abrahán osufrirakaʼe ojepreparárõ guare osakrifika hag̃ua itaʼýrape. Upéva ohechauka ñandéve michĩmi mbaʼéichapa Jehovápe hasy asýneraʼe osakrifikárõ guare ‘Itaʼýra ohayhuetéva’ (Mat. 3:17). Péro Jehová katuete ombyasyvéneraʼe pórke haʼe areterei oikovaʼekue itaʼýrandi yvágape. Jesús ningo vyʼápe oipytyvõvaʼekue Itúvape ojapórõ guare opa mbaʼe. Jehová ojokuái chupe oikuaauka hag̃ua hembipota, upévare oñehenói chupe “pe Ñeʼẽ” (Pro. 8:22, 30, 31; Juan 1:1). Mbaʼeichaitépa oiméne Jehová ohasa asýraʼe ohechávo ojejahéi Itaʼýrare, oñeñembohory hese ha ojejuka chupe peteĩ mbaʼe vai apoháicha. Aje piko tuichaite mbaʼe Jehová ojapóva ñandesalva hag̃ua! Mbaʼéichapa ikatu jahechauka jaagradesetereiha chupe upévare?
Mbaʼéichapa ikatu jahechauka jaagradesetereiha chupekuéra ñandesalva haguére?
15. a) Mbaʼéichapa Jesús omohuʼã isakrifísio? b) Mbaʼépa ojehupyty upéva rupive?
15 Jesús omohuʼã isakrifísio oñemoingove jeýrõ guare chupe ha oho yvágape. Ha og̃uahẽvo Itúva rendápe omeʼẽ chupe isakrifísio repykue. Mbaʼépa ojehupyty upévare? Upe sakrifísio rupive oñeperdona ñandéve ñande pekádo, primero umi ungídope ha upéi opavave yvypórape. Upéicha rupi ikatu oiko Ñandejára amígoramo umi oñembyasýva hembiapo vai haguére ha oikóva Jesús remimboʼéramo (1 Juan 2:2). Mbaʼépa jajapovaʼerã upéicharõ?
16. Mbaʼe ehémplopa ohechauka jaagradesevaʼerãha Jehovápe osakrifika haguére Itaʼýra ñanderehehápe?
16 Ñapensami jeýna pe ehémplo ñamoĩvaʼekuére ñepyrũrã. Ñamoĩ chupe pe doktór oikuaamaha mbaʼéichapa omongueráta pe mbaʼasy vai orekóva ipasientekuéra. Oho umíva rendápe ha heʼi chupekuéra katuete okuerataha osegíramo hekoitépe pe tratamiénto omeʼẽtava chupekuéra. Péro mbaʼépa oiko? Enterovénte ndosegiséi upe tratamiénto oimoʼãgui hasytaha ojapo hag̃ua. Ndépa mbaʼe rejapóne? Remboykétapa avei upe tratamiénto reikuaa porãramo jepe nemonguerataha? Neremboykeichéne ajépa! Reagradesetereíta katu upe doktórpe ha resegíta upe tratamiénto haʼe heʼihaichaite ndéve. Ha katuete eréta avei nde rapichakuérape osegi hag̃ua upe tratamiénto. Upeichaite avei ñande jahechaukase Jehovápe ñanekorasõite guive jaagradeseha chupe osakrifika haguére Itaʼýra ñanderehehápe (jaleemína Romanos 6:17, 18).
17. Mbaʼéichapa ikatu jahechauka jaagradeseha Jehovápe ojapovaʼekuére ñanderehehápe?
17 Jaagradeséramo Jehová ha Itaʼýrape ñandesalva haguére pekádo ha ñemanógui, ojekuaáta ñande rekovére (1 Juan 5:3). Ñañehaʼãta ningo anítei jajapo ivaíva. Ndovaléi avei ñanderovamokõi ha ñemihápe jajapo umi mbaʼe jaikuaa porãva Jehovápe ndogustaiha. Jajapóramo ivaíva ningo jahechaukatañaína nañamombaʼeiha Jehová ojapovaʼekue ñanderehehápe. Iporãvéta ningo ñañehaʼãramo ñanderekopotĩ Jehová renondépe ha upéicha jahechauka jaagradeseha Chupe ojapovaʼekuére (2 Ped. 3:14). Ñamombeʼúkena ñande rapichakuérape koʼẽrõitéma ñanesãsotaha pekádo ha ñemano poguýgui. Upéicha haʼekuéra avei oñemoag̃uíta Jehováre ha ikatúta oikove opa ára g̃uarã (1 Tim. 4:16). Jehová ha Jesús omerese jaiporupaite ñane tiémpo ha opa mbaʼe jarekóva ñamombaʼeguasu hag̃ua chupekuéra (Mar. 12:28-30). Ñandéve ningo hiʼãitereíma ñasẽ pekádo poguýgui ha jaiko opa árare Jehová oipota haguéicha. Koʼã mbaʼe ningo jahupytýta Jehová osakrifika rupi Itaʼýra ñanderehehápe (Rom. 8:21).
[Nóta]
a Ojeʼe ningo pe gripe española ojagarra hague hetaitereípe péro naentéroipe ojuka hague. Ha pe mbaʼasy hérava ébola katu ndahetáipe ojagarra péro ojukapalénto umi ojagarrávape guive.
Embohovaimína koʼã porandu
• Mbaʼérepa ñaikotevẽ peteĩ ñandesalvavaʼerã?
• Mbaʼépa jajapovaʼerã Jesús ojesakrifika haguére ñanderehehápe?
• Mbaʼéichapa reñeñandu repensávo Jehová ojapovaʼekuére?
• Mbaʼéichapa ikatu jahechauka jaagradesetereiha Jehovápe ojapovaʼekuére ñanderehehápe?
[Nóta oĩva taʼanga ndive páhina 27]
Pe saserdóte guasu ningo Día de Expiación jave orrepresenta pe Mesíaspe
[Nóta oĩva taʼanga ndive páhina 28]
Abrahán osakrifikamoʼã rupi itaʼýrape ohechauka ñandéve tuichaiterei mbaʼeha Jehová ojapovaʼekue osakrifikávo Itaʼýrape