Mbaʼérepa ojehayhuetereivaʼekue Dórcaspe?

AJÉPA ñañeñandu porã oĩramo ñanderayhúva. Ndépa mbaʼe ere?a... La Biblia ningo oñeʼẽ Dorcas rehe, peteĩ kuña opavave ohayhúva.

Haʼe ningo Jesús remimboʼevaʼekue ha oiko Jópepe, peteĩ táva oĩva már Mediterráneo rembeʼýpe ha opytáva 56 kilómetro Jerusaléngui.

Mbaʼérepa nde ere ojehayhueterei hague Dórcaspe?... La Biblia heʼi imbaʼeporãiterei ha oipytyvõ hague oikotevẽvape. Haʼe ojapómi vaʼekue ao neporãva umi viúdape g̃uarã, umi kuñakarai omanovaʼekue chugui iména. Avei osegi Jesús ehémplo ha oñeʼẽ opavavépe Ñandejára Jehováre.

Ndépa reikuaa mbaʼépa ojehuvaʼekue Dórcaspe?... Peteĩ jey ou hasyete ha omano. Iñamigokuéra ombyasyeterei la oikóva, upémarõ ohenoika apóstol Pédrope, oĩva 16 kilómetro upégui, ha heʼika chupe pyaʼemínte ou hag̃ua. Og̃uahẽvo pe apóstol, ojupi Dorcas oĩháme, ha umi kuña hesay hováre ohechauka chupe umi ao ojapovaʼekue chupekuéra Dorcas.

Upémarõ Pedro ojerure enterovévape osẽ hag̃ua upe kotýgui. Haʼe ha umi apóstol ojapomavaʼekue heta milágro, péro neʼĩrava omoingove jey peteĩ omanóvape. Ndépa mbaʼe ere ojapo hague Pedro?...

Haʼe oñesũ pe omanóva ykére ha oñemboʼe Jehovápe. Upéi heʼi Dórcaspe opuʼã hag̃ua, ha haʼe ojapo upéicha. Pedro ombohasa chupe ipo oñemboʼy hag̃ua, ha ohenói umi viúdape ha umi ótrope ohecha hag̃ua Dórcaspe. Mbaʼeichaitépa oiméne ovyʼajoa hikuái, ajépa?...

Mbaʼépa ikatu ñaaprende ko kásogui? Reipytyvõramo nde rapichakuérape, nderayhúta avei hikuái. Péro iñimportantevéva, Ñandejára nderayhu ha imanduʼáta nderehe. Ndahesaraichéne umi mbaʼe porã rejapóvagui ha ikatúta voi reiko opa ára g̃uarã peteĩ lugár neporãmba jepévape.