Jajapo pe iporãva ha ñambojaʼo pe jaguerekóva ñande rapicha ndive
1 Dorcas ‘heta hembiapo porã ha oporoporiahuverekógui omeʼẽvaʼekue pe oguerekóvagui hapichápe’ (Hech. 9:36, 39). Ipojerágui ojekuaahápe ojehayhu ha Ñandejára Jehová ohayhu avei chupe. Hebreos 13:16 heʼi: “Ani penderesarái pejapo hag̃ua pe iporãva ha pembojaʼo hag̃ua umi mbaʼe peguerekóva pende rapichakuéra ndive. Ñandejára oguerohory umichagua sakrifísio”. Mbaʼéichapa ikatu ñande jajapo koʼág̃a pe iporãva ha ñambojaʼo pe jaguerekóva ñande rapicha ndive?
2 Ikatu jajapo iporãva ñande rapichakuérare ñambojaʼóramo hendivekuéra ‘umi mbaʼe porãita’ jaguerekóva (Pro. 3:9). Ñameʼẽgui ñane kontrivusión predikasión mundiálpe g̃uarã ikatu ojejapo opárupi heta Salón del Reino, Salón de Asambleas ha sukursalkuéra. Ñande pojera rupi ikatu millónespe oñemboʼe Ñandejára Ñeʼẽgui, ha ikatu oñembyaty hikuái tapichakuéra ndive oñemombarete hag̃ua espiritualménte.
3 Ñambopyʼaguapy ñande rapichakuérape. Ojehu vove umi mbaʼe ivaietereíva, Jehová siervokuéra ipyaʼe ‘ojapo hag̃ua iporãva’ iñermanokuérare, ha umi ndahaʼéiva iñermáno rehe avei (Gál. 6:10). Fránciape, okapu rire peteĩ fávrika oñembaʼapohápe prodúkto kímikore, peteĩ paréha oikóva upe fávrika ykére heʼi: “Ore ermáno ou pyaʼe porã orepytyvõ hag̃ua. Omopotĩmbaite hikuái pe sarambi opytavaʼekue ha oipytyvõ avei umi ore rogaykereguápe omopotĩ hag̃ua hogakuéra. Haʼekuéra ohecharamoiterei umi henteita oúva orepytyvõ hag̃ua”. Peteĩ ermána heʼi avei: “Umi ansianokuéra oupa orepytyvõ hag̃ua. Ou orembopyʼaguapy. Ha upéva roikotevẽve upe jave, roikotevẽramo jepe avei orepytyvõva materialménte”.
4 Ikatu jajapo heta mbaʼe porã ñande rapicháre. Péro jajaposéramo pe iporãvéva hesekuéra, ñaipytyvõvaʼerã oikuaa hag̃ua umi mbaʼe porãita ñanemboʼéva Ñandejára Ñeʼẽ, omeʼẽva avei ñandéve pe ‘esperánsa jaiko hag̃ua opa ára g̃uarã’, heʼihaguéicha Jehová voi (Tito 1:1, 2). Pe marandu oguerekóva Ñandejára Ñeʼẽ añetehápe ombopyʼaguapy umi ojaheʼóvape, ohechágui umi mbaʼe vai oikóva opárupi, ha oñandúgui pe pekádo oĩva ipype (Mat. 5:4). Jajapókena pe iporãva ha ñambojaʼo ñande rapicha ndive pe jaguerekóva, ikatúma guive jajapo upéva hesekuéra (Pro. 3:27).