Mbaʼérepa iporã jajapo la Biblia heʼíva?

NDAHAʼEVÉIMAPA ñane tiémpope g̃uarã umi mbaʼe la Biblia heʼíva sexo rehe? Ijetuʼuetereípa jajapo hag̃ua umíva? Ndaupeichaiete. Umi iñeʼẽrendúva la Bíbliape...

▪ ... naimembyreíri

▪ ... ndovái hesekuéra mbaʼasy vai

▪ ... ndohasaʼasýi ojopoi haguére iména térã hembirekógui

▪ ... naikonsiesiakyʼái

▪ ... nopensái ndovaleiha mbaʼeverã

Ñandejára Jehováa ningo ñande Apohare ha oipota javyʼa umi mbaʼe omeʼẽvare ñandéve. Isaías 48:17 heʼi umi mbaʼe haʼe ñanemboʼéva ñanepytyvõha opaite mbaʼépe. Upévare, umi ojapóva la Biblia heʼíva...

▪ ... ipyʼaguapy

▪ ... oguerohory chupe Ñandejára

▪ ... ojogueraha porãve iména térã hembireko ndive

▪ ... herakuã porã

▪ ... ojehayhu ha omombaʼe hekove

Ha oimérõ ndajaikoiñaína Ñandejára Ñeʼẽ heʼiháicha, ikatu piko ñakambia? Ohekýinepa ñandéve Ñandejára umi mbaʼe jajapovaʼekue yma?

Ñapensamína pe kongregasión oĩvaʼekuére síglo primérope. Heta umi oĩvaʼekue upépe hekovai, omoakaratĩ iména térã hembirekópe ha oĩvaʼekue avei oikóva kuimbaʼe kuimbaʼéndi, péro haʼekuéra okambia ha Ñandejára operdona chupekuéra (1 Corintios 6:9-11). Koʼág̃a avei ko yvy tuichakuére hetaiterei tapicha okambia oiko lája ha iñeʼẽrendu Ñandejárape. Haʼekuéra odesidi ojapo la Biblia heʼíva ha ndahekovaivéima. Ha ohechakuaa hikuái jahupytyha heta mbaʼe porã ñaneñeʼẽrendúramo la Biblia heʼívape, umíva apytépe oĩ Sara, pe mitãkuña ñañeʼẽ hague iñepyrũme.

“Tuichaiterei chembopyʼaguapy”

Sara ohechakuaa ndovyʼaiha oikóramo jepe iñarakãre. Haʼe omombeʼu: “Che konsiénsia nacheatõivéima. Upéicharõ jepe, atĩ ha akyhyje cheryeguasu térã ovárõ g̃uarã cherehe mbaʼasy vai. Akóinte chemanduʼa oĩha Ñandejára, ha aikuaa haʼe ombyasyetereiha ohechávo aiko lája. Añeñandu vaieterei apensávo chekyʼaha Ñandejára renondépe”.

Tiémpo rire, Sara oñembopyʼaguasu ha odesidi okambia. Oñemboja isy ha itúva rendápe, haʼéva testigos de Jehová, ha umi ansiánore oĩva kongregasiónpe. Sara heʼi: “Avyʼaiterei chetrata porã haguére hikuái, upéva tuichaiterei chembopyʼaguapy”.

Koʼág̃a, Sara mokõi imemby. Haʼe heʼi: “Chete voi amombeʼu che membykuérape umi mbaʼe ajapovaʼekue. Aipota oikuaa hikuái mbaʼépa oiko cherehe ndajapói rupi la Biblia heʼíva sexo rehe ha ohecha umi mbaʼe porã jahupytýva ñaneñeʼẽrendúramo Ñandejárape, umíva apytépe, ñanderekopotĩ, ñañeñandu porã ha javyʼa. Ahechakuaa Ñandejára omeʼẽha ñandéve iléi ndoipotáigui jahasa asy.”

Opavave ñasẽ porãta jajapóramo umi konsého Ñandejára omeʼẽva. La Biblia heʼi ‘Ñandejára léi oĩha hekoitépe ha ñanembopyʼarory, hesakã ha ñanderesapeʼa’. Heʼi avei ñaneñeʼẽrendúramo jahupytytaha heta mbaʼe porã (Salmo 19:8, 11).b

[Nóta]

[Komentário oĩva páhina 8-pe]

Umi ndojapóiva la Biblia heʼíva oporombohasa asy

[Komentário oĩva páhina 9-pe]

Umi iñeʼẽrendúva Ñandejára léipe ipyʼaguapy ha ojogueraha porãve iména térã hembirekóndi