¿Mbaʼépa heʼíne Jesús?

¿Iporãpa rrelihión ojeheʼa polítikare? Heta oĩ oimoʼãva iporãha, heʼi voi ojapovaʼerãha upéicha oguenohẽ hag̃ua yvyporakuérape iprovlémagui. Ótro katu opensa iporãveha rrelihión ndojeheʼái polítikare. ¿Mbaʼépa nde repensa? ¿Ombaʼapovaʼerãpa hikuái oñondive?

JESUCRISTO rehe ojeʼe “ymaite guive haʼeha yvyporakuérape g̃uarã pe iñimportantevéva peteĩ rrelihiónpe”. ¿Mbaʼépa nde repensa Jesús heʼíne hag̃ua oñeporandúrõ chupe iporãpa rrelihión ojeheʼa polítikare? ¿Reikuaápa haʼe ombohováima hague upe porandu oĩrõ guare ko yvy ape ári? Umi mbaʼe ojapóvare haʼe ohechaukavaʼekue mbaʼépa opensa upévare. Pór ehémplo, ojapórõ guare pe Sermón del Monte heʼi heta mbaʼe ohechaukáva moõ pevépa hemimboʼekuéra oipytyvõvaʼerã ivesinokuérape. Ñahesaʼỹijomína umíva.

Oipytyvõvaʼerã hikuái hapichápe

Jesús omyesakã mbaʼéichapa hemimboʼekuéra ohechavaʼerã ko múndo, heʼírõ guare: “Peẽ ningo jukýicha ko yvy ape ári. Péro pe juky naheʼẽvéiramo, ¿mbaʼéicha piko ñamoheʼẽ jeýta? Ndovalevéima mbaʼeverã, ha oñemombótamante okápe oñepyrũmba hag̃ua hese. Peẽngo mbaʼerendýicha hína ko múndope. [...] Upéicha avei peẽ pehesapevaʼerã umi hénte renondépe, haʼekuéra ohecha hag̃ua umi mbaʼe porã pejapóva ha ombotuicha pende Ru oĩva yvágape” (Mateo 5:13-16, NM). ¿Mbaʼérepa Jesús ombojoja hemimboʼekuérape juky ha mbaʼerendýre?

Koʼápe Jesús ndeʼíri hemimboʼekuéragui oikovaʼerãha juky ha mbaʼerendy mbovymi tapichápe g̃uarãnte. Upéva rangue, ontendekase oikovaʼerãha chuguikuéra juky opavave yvypórape g̃uarã ha ohesapevaʼerãha enterove oikuaasévape Ñandejárape. Upeichaite, Jesús ndoipotaivaʼekue hemimboʼekuéra oñemomombyry hapichakuéragui.

¿Mbaʼéicha voi piko pe juky oipytyvõta ani hag̃ua umi hiʼupy oñembyai noñemoĩriramo pype? Térã ¿mbaʼéicha piko peteĩ lámpara ohesapéta noñemoĩriramo iñypytũhápe? Upévare, Jesús arakaʼeve ndeʼíri hemimboʼekuérape ova hag̃ua peteĩ lugár mombyryvehápe ko yvy ape ári ha oiko hag̃ua haʼekuerakueténte upépe. Haʼe nomokyreʼỹi avei chupekuéra oiko hag̃ua oñembotyhápe peteĩ lugár imurálla jerepávape. Pe juky ningo oñemoĩvaʼerã pe hiʼupýpe ani hag̃ua oñembyai ha peteĩ mbaʼerendy oñemoĩvaʼerã pytũhápe ohesape hag̃ua. Upéicha avei, umi kristiáno oikovaʼerã hapichakuéra apytépe ikatu hag̃uáicha oipytyvõ chupekuéra.

“Haʼekuéra ndojeheʼái ko múndore”

Umi mbaʼe Jesús heʼivaʼekue, hetápe omomýi oñeporandu hag̃ua iporãpa peteĩ kristiáno ojeheʼa polítikare. ¿Mbaʼérepa? Omano mboyvemi, Jesús oñemboʼe hemimboʼekuérare Ñandejárape: “Ndajeruréi ndéve renohẽ hag̃ua chupekuéra ko múndogui síno reñangareko hag̃ua hesekuéra oĩgui pe aña. Haʼekuéra ndojeheʼái ko múndore, ha che avei ndajeheʼái ko múndore” (Juan 17:15, 16, NM). Upéicharõ, ¿mbaʼéichapa umi kristiáno ikatu oipytyvõ hapichakuérape ha avei ohechauka ndojeheʼaiha ko múndore? Jaikuaa hag̃ua upéva, tekotevẽ ñambohovái raẽ koʼã mbohapy porandu:

• ¿Mbaʼépa Jesús heʼivaʼekue polítikare?

• ¿Mbaʼépa ojapovaʼerã umi kristiáno koʼag̃agua?

• ¿Mbaʼéichapa pe marandu porã oipytyvõ ñane vesinokuérape?

[Komentário oĩva páhina 4-pe]

Jesús ndoipotaivaʼekue hemimboʼekuéra oñemomombyry hapichakuéragui