JAIKUAAVE HAG̃UA

¿Mbaʼépa hína umi áloe oñeʼẽha la Biblia?

Umi áloe oñeñeʼẽha la Bíbliape ojeporúmi oñemohyakuã asy hag̃ua umi tupa ha ao (Salmo 45:8; Proverbios 7:17; El Cantar de los Cantares 4:14). Umi áloe ningo oñeguenohẽ peteĩ yvyramáta tuichávagui hérava pálo de áloe, ha itujúvo osẽ chugui rresína ha aséite hyakuã asýva. Upe yvyra upéi oñemyanguʼi ha oñevende en pólvo.

La Bíbliape, oñeñeʼẽvo umi óga kárpa ojapo vaʼekuére umi isrraelíta, heʼi haʼeha “ku áloe yvyráicha, Ñande Ruete oñotỹ vaʼekue” (Números 24:5, 6, ÑÑB). Oiméne heʼi upéicha ojoguágui pe áloe máta móldepe, ijyvatéva 30 métrorupi ha huʼã gotyo ipoʼive. Koʼág̃a ningo ndaiporivéima upeichagua yvyramáta Israélpe, péro peteĩ lívro heʼi “ndaikatuiha jaʼévo ko yvyramáta ha ótra plánta naikonosidoguasúiva [Israélpe] noñeñotỹi hague yma válle del Jordánpe”.

¿Mbaʼeichagua ofréndapa yma oñemeʼẽ vaʼerã Jerusalén témplope?

Ñandejára Léi heʼi umi sakrifísio iporãvéva ojegueraha vaʼerãha oñekuaveʼẽ hag̃ua Jehovápe pe témplope. Haʼe ndoguerohorýi vaʼekue ojesakrifikáramo chupe umi animál naisánoiva (Éxodo 23:19; Levítico 22:21-24). Filón, peteĩ eskritór hudío oiko vaʼekue síglo primérope, heʼi umi saserdóte orrevisapámi hague “ipy guive iñakã meve” umi animál ohecha hag̃ua isánopa ha “ndorekóipa mbaʼeve ivaíva”.

Peteĩ vivlísta hérava Ed Parish Sanders, heʼi oiméne hague “umi saserdóte orrevisapa raẽ umi animál oñevende vaʼerã pe témplope. Ha oimérire upéicha, katuete pe ovendéva umi animál omeʼẽne rakaʼe peteĩ komprovánte ohechaukáva upe animál isanoha”.

Áño 2011-pe, peteĩ grúpo de arkeólogo otopa peteĩ fícha térã komprovánte umichagua pe témplo ypýpe. Upe fícha hína peteĩ monéda joguaha ojejapóva ñaiʼũgui ha ojeʼe ojejapóne hague éntre síglo 1 a.C. ha áño 70 d.C. rupi. Ha ojehai hese mokõi palávra araméope ojetradusíva “ipotĩva Ñandejárape g̃uarã”. Ojeʼe umi oñangarekóva pe témplo rehe oñapytĩne hague upe fícha umi animál térã ótra kósa oñekuaveʼẽtavare Ñandejárape.