Mbaʼérepa noñehundíri la Biblia

La Biblia noñehundíri ha péicha rupi ñande ikatu jalee koʼág̃a. Ha jaiporavo porãramo pe traduksión jaipurútava, ikatu ñaime segúro jaleeha hína pe mensáhe ojeskrivi haguéicha umi orihinálpe.a La Biblia og̃uahẽ ñandéve ojeskrivíramo jepe umi materiál oñembyai reívape, ha oĩramo jepe ohundise vaʼekue térã okambiaséva pe mensáhe oĩva pype. Ha sapyʼánte ni ndajagueroviaséi voi mbaʼéichapa oiko vaʼekue upéva. Péro, ¿mbaʼére mbaʼeve ni avave nokonsegíri ohundi la Biblia? ¿Mbaʼérepa ko lívro idiferénte oimeraẽ ótrogui?

Apóstol Pablo oskrivi vaʼekue: “Opa mbaʼe oĩva Ñandejára Ñeʼẽme ojehai ijespíritu rupive” (2 Timoteo 3:16). Ha heta ostudiáva la Biblia ohechakuaa siertoha upéva. Oguerovia hikuái la Biblia og̃uahẽha ñandéve haʼe rupi Ñandejára Ñeʼẽ ha haʼe voi oprotehe rupi ani hag̃ua oñehundi. Pe primer artíkulope ñañeʼẽ kuri peteĩ karai héravare Faizal, haʼe kon el tiémpo odesidi ostudia la Biblia ohecha hag̃ua añetehápepa ko lívro ou Ñandejáragui. Umi mbaʼe oaprendéva osorprendeterei chupe. Haʼe ohechakuaa noĩriha la Bíbliape heta mbaʼe omboʼéva umi heʼíva ijehe kristianoha. Ha opokoiterei hese oaprendévo mbaʼépa Ñandejára oipota ko yvýpe g̃uarã.

Haʼe heʼi: “Koʼág̃a aiméma segúro pe Biblia arekóva haʼeha peteĩ rregálo oúva Ñandejáragui. Haʼe ningo ipoderosoiterei ha ojapo voi ko univérso, ¿mbaʼére piko upéicharõ ndaikatumoʼãi omeʼẽ ñandéve peteĩ lívro ha oprotehe og̃uahẽ hag̃ua ñandéve? Jaʼéramo ndaikatuiha, haʼete ku jaʼéva haʼe ndorekoiha podér upearã, ha haʼe hína pe Todopoderóso. ¿Ha máva piko che haʼe hag̃ua Ñandejára ndorekoiha podér upearã?” (Isaías 40:8).