Ñande Jehová mbaʼe hína

1. ¿Mbaʼérepa jaʼekuaa Jehovápe operteneseha entéro mbaʼe? (Ehecha pe taʼanga oĩva iñepyrũme).

ENTÉRO mbaʼe opertenese Jehovápe. Imbaʼe hína “yvága kompletoite, pe yvága ijyvatevéva jepe, avei ko yvy ha entéro mbaʼe oĩva pype” (Deut. 10:14; Apoc. 4:11). Jehová ojapo vaʼekue yvyporakuérape, upévare enterovéva ñapertenese chupe (Sal. 100:3). Péro haʼe oiporavo peteĩ grúpo entéro persóna apytégui oikóva ko yvy ape ári ymaite guive, ha koʼãva imbaʼe hína.

2. Heʼiháicha la Biblia, ¿máva mávapa Jehová mbaʼe hína?

² Salmo 135 heʼi umi israelita ifiélva haʼeha Jehová propieda haʼe ohayhuetéva (Sal. 135:4). Oseas oprofetisa kuri umi ndahaʼéiva israelita oikotaha avei Jehová puévloramo (Os. 2:23). Ko profesía oñekumpli Jehová oñepyrũrõ guare oiporavo umi ndahaʼéivape israelita ogoverna hag̃ua Jesús ndive yvágape (Hech. 10:45; Rom. 9:23-26). Umi ojeporavóva espíritu sánto rupive haʼe hína “peteĩ tetã marangatu” ha “peteĩ puévlo Ñandejára mbaʼerã” (1 Ped. 2:9, 10). ¿Péro mbaʼépa ikatu jaʼe umi kristiáno koʼag̃aguáre ohaʼarõva oiko opa árare ko yvy ape ári? Jehová ohenói chupekuéra “che puévlo”, ha heʼi avei haʼe oiporavo hague chupekuéra (Is. 65:22).

3. a) ¿Máva mávapa oñemoag̃ui Ñandejárare koʼág̃arupi? b) ¿Mbaʼépa jahecháta ko artíkulope?

³ Umi “ovechakuéra mbovymi” orekóva esperánsa oiko hag̃ua pára siémpre yvágape, ombaʼapo umi “ambue ovechakuéra” ndive orekóva esperánsa oiko hag̃ua opa árare ko yvy ape ári. Mokõive grúpo haʼe “peteĩ ovecha aty” ha haʼekuéra omombaʼeguasu Jehovápe (Luc. 12:32; Juan 10:16). ¡Ajépa jahechaukase Jehovápe ñamombaʼetereiha ikatu haguére ñañemoag̃ui hese! Ko artíkulope jahecháta mbaʼéichapa ikatu jaagradese chupe ko priviléhio tuichaitévare.

ÑAÑEMEʼẼ JEHOVÁPE ÑANDE PYʼAITE GUIVE

4. a) ¿Mbaʼéichapa ikatu jaagradese Jehovápe opermiti haguére ñañemoag̃ui hese? b) ¿Mbaʼépa ojapo kuri Jesús?

⁴ Ñande jahechauka jaagradeseha Jehovápe ñañemeʼẽvo chupe ha jajevautisa. Péicha entéro ikatu ohecha ñande haʼemaha Jehová mbaʼe ha jajedesidimaha ñaneñeʼẽrendutaha chupe (Heb. 12:9). Jesús ojapo kuri peteĩ mbaʼe ojoguáva upévape ojevautisárõ guare. Haʼe operteneséramo jepe peteĩ tetã oñemeʼẽma vaʼekuépe Jehovápe, lomímonte oñepresenta ojapo hag̃ua Ñandejára rembipota. Haʼete heʼíva Itúape: “Avyʼaiterei ajapo haguére ne rembipota” (Sal. 40:7, 8).

5, 6. a) ¿Mbaʼépa heʼi kuri Jehová ojevautisárõ guare Jesús? b) ¿Mbaʼe ehémplopa ñanepytyvõ ñantende hag̃ua mbaʼéichapa oñeñandu Jehová ñañemeʼẽ jave chupe?

⁵ ¿Mbaʼéichapa oñeñandu Jehová ojevautisárõ guare Jesús? La Biblia heʼi: “Jesús ojevautisa rire, upepete osẽ pe ýgui, ha ¡péina!, pe yvága ojeavri, ha Juan ohecha mbaʼéichapa Ñandejára espíritu oguejy hiʼári peteĩ palómaicha. Ha ¡péina!, oñehendu avei peteĩ oñeʼẽva yvágagui ha heʼíva: ‘Kóva hína che Raʼy ahayhuetéva ha aguerohorýva’” (Mat. 3:16, 17). Jesús haʼéma vaʼekue voi Jehová mbaʼe. Péro katuete Jehová ovyʼaiterei kuri ohechárõ guare Itaʼýra oĩha desidído oipurúvo hekove oservi hag̃ua chupe añoite. Koʼág̃a avei Jehová ovyʼa ñañemeʼẽ jave chupe, ha katuete ñanevendesíta (Sal. 149:4).

⁶ Jehovápe opertenese entéro mbaʼe. ¿Mbaʼépa upéicharõ ikatu ñameʼẽ chupe? Epensamína peteĩ túa orekóvare peteĩ hardín oĩháme heta yvoty porã porã. Peteĩ díape itajyraʼi oipoʼo peteĩ yvoty ha omeʼẽ chupe. Pe yvoty ningo operteneséma voi chupe, upéicharõ jepe haʼe ovyʼaiterei la irregálore. Upe oikóva ohechauka itajýra ohayhuha chupe. Pe túape g̃uarã pe yvoty omeʼẽva chupe itajýra iporãve entéro umi ótro yvotýgui oĩva pe hardínpe. Péicha avei, Jehová ovyʼaiterei jadesidi jave jaipurutaha ñande rekove jaservi hag̃ua chupe (Éx. 34:14).

7. ¿Mbaʼéichapa Malaquías heʼíva ñanepytyvõ ñantende hag̃ua mbaʼépa Jehová opensa umi oservívare chupe ipyʼaite guive?

⁷ (Elee Malaquías 3:16). ¿Mbaʼérepa iñimportanteterei ñañemeʼẽ Jehovápe ha jajevautisa? Ñanase guive, ñande ñaperteneséma ñande Apohare Jehovápe. Haʼe ovyʼaiterei ñañemeʼẽ ha jaasepta haguére chupe ñane Governánteramo (Prov. 23:15). Jehová oikuaa umi oservívape chupe ipyʼaite guive, ha oanota herakuéra ilívrope.

8, 9. ¿Mbaʼépa Jehová ohaʼarõ umi oanotávagui héra ilívrope?

⁸ ¿Mbaʼépa jajapo vaʼerã jaipotáramo ñande réra opyta Jehová lívrope? Malaquías heʼi jakyhyje vaʼerãha ani hag̃ua ñambopochy Jehovápe, ha jajepyʼamongeta hérare. Jaadoráramo peteĩ kósa térã peteĩ persóna ndahaʼéiva Jehová, ñande réra ojevorráta ilívrogui (Éx. 32:33; Sal. 69:28).

⁹ Péro ñapromete haguére Jehovápe jajapotaha hembipota ha jajevautisa, ndeʼiséi ovalemaha. Koʼã mbaʼe ningo ñande una vénte jajapo, péro jaikuaaháicha ñande jaadora vaʼerã Jehovápe káda día. Upévare, jaikove aja entéro jahechauka vaʼerã ñaneñeʼẽrenduha chupe umi mbaʼe jajapóvape (1 Ped. 4:1, 2).

ÑAMBOYKÉKENA UMI DESÉO VAI

10. ¿Mbaʼéichapa ojehecha porã voi idiferenteha umi oservíva Jehovápe ha umi ndojapóiva upéva?

¹⁰ Pe artíkulo ohasa vaʼekuépe jahecha kuri Caín, Salomón ha umi israelita heʼínte hague oadoraha Jehovápe, péro añetehápe naiñeʼẽrendúi hikuái. Koʼã ehémplo ñanemboʼe ndahaʼeiha jaʼénte vaʼerã ñamombaʼeguasuha Jehovápe, síno jahayhu vaʼerã umi mbaʼe porã ha ñanembojeguaru vaʼerã umi mbaʼe vai (Rom. 12:9). Jehová heʼi ojekuaa porãitereitaha “idiferenteha peteĩ persóna ihústova ha peteĩ iñañáva, peteĩ oadoráva Ñandejárape ha peteĩ ndoadoráiva chupe” (Mal. 3:18).

11. ¿Mbaʼérepa ndahasýi vaʼerã umi héntepe ohechakuaa hag̃ua jaadoraha Jehovápe añoite?

¹¹ ¡Jaagradeseterei ningo Jehovápe ñandeporavo haguére jaservi hag̃ua chupe! Umi hénte ohechakuaa vaʼerã ñaĩha Jehová favórpe (Mat. 5:16; 1 Tim. 4:15). Upévare iporã ñañeporandu: “¿Hesakã porãpa umi ótrope ahayhuha Jehovápe che pyʼaite guive? ¿Natĩripa amombeʼu hag̃ua umi héntepe che haʼeha testígo de Jehová?”. Ñapensamína mbaʼeichaitépa ombyasýta Jehová ñatĩramo jaʼe hag̃ua ñande rapichápe ñande ñaperteneseha chupe (Sal. 119:46; elee Marcos 8:38).

12, 13. ¿Mbaʼérepa ijetuʼu jepi ojepilla porã hag̃ua oimépa algúno añetehápe haʼe testígo de Jehová?

¹² Ñambyasýramo jepe oĩ Testígo ojegiáva umi hénte ko mundopeguáre. Upéicha rupi, umichagua kristiáno naidiferenteguasúi umi ndoservírivagui Jehovápe (1 Cor. 2:12). “Ko mundopegua espíritu” omomýi umi héntepe omotenonde hag̃ua umi mbaʼe haʼekuéra oipotávante (Efes. 2:3). Por ehémplo, heta vésema oñemeʼẽ konsého ñañemonde lájare, péro oĩ ermáno nopenáiva umívare ha osegi oñemonde hekopeʼỹ. Haʼekuéra omonde umi ao ijahustádova ha ohechaukapáva umi mbaʼe ndojehechái vaʼerã. Hiʼarive ojapo upéva oho hag̃ua rreunionhápe jepe. Oĩ avei ijapytepekuéra umi oikytĩkáva iñakãrangue ha ojapokáva peinádo a la móda péro naiporãiva peteĩ kristiánope g̃uarã (1 Tim. 2:9, 10). Upévare hasýma japilla hag̃ua oimépa umichagua Testígo hína térãpa nahániri (Sant. 4:4).

¹³ Péro ndahaʼéi ningo koʼã mbaʼénte la ojejapóva. Por ehémplo, oiko jave fiésta kristianokuéra apytépe, oĩ oñepyrũva ojeroky térã oñekomporta peteĩ persóna ko mundopeguáicha. Oĩ katu ohupíva ifóto térã algún komentário umi rred sosiálpe ohechaukáva opensaha umi hénte ko mundopegua opensaháicha. Koʼã ermáno térã ermána ndopekáiramo jepe oñedisiplina hag̃uáicha kongregasiónpe, ikatu hína ogueraha vai umi kristiáno oñehaʼãvape idiferénte hag̃ua umi hénte ko mundopeguágui (elee 1 Pedro 2:11, 12).

14. ¿Mbaʼéichapa ikatu japrotehe pe amista porãite jarekóva Jehovándi?

¹⁴ Entéro mbaʼe oĩva ko múndope ojejapo ikatu hag̃uáicha jaheka “ñande rete rembipota vai, ñande resa oipotáva, ha jaiko jajechaukase umi mbaʼe jarekóvare” (1 Juan 2:16). Péro ñande Jehová mbaʼe ha ñanediferénte. Upévare ñamboyke “opa mbaʼe oñemoĩva Ñandejára rembipotáre ha ani hag̃ua jaipota umi mbaʼe ko mundopegua. Péicha ñaneakãguapýta, jaikóta hekópe ha ñamombaʼeguasúta Ñandejárape jaikóramo jepe ko múndope” (Tito 2:12). Opa mbaʼe jajapóvare ojekuaa vaʼerã ñande haʼeha Jehová mbaʼe, tahaʼe ñañeʼẽ, jakaru, ñañemonde térã ñambaʼapo lájare (elee 1 Corintios 10:31, 32).

“PEJOAYHUETEREI VAʼERÔ

15. ¿Mbaʼérepa jatrata porã ha jahayhu vaʼerã ñane ermanokuérape?

¹⁵ Jatrata lájare ñane ermanokuérape ojekuaáta ñamombaʼépa añete ñane amista Jehovándi. Haʼekuéra ningo Jehová mbaʼe hína, ñandéicha avei. Ñanemanduʼa meméramo upévare, siémpre jatrata porãta ha jahayhúta chupekuéra (1 Tes. 5:15). ¿Iñimportánte piko añete upéva? Jesús heʼi vaʼekue isegidorkuérape: “Péicha pejoayhúramo, enterove ohechakuaáta peẽ haʼeha che disípulo” (Juan 13:35).

16. ¿Mbaʼépa ñanemboʼe Jehovágui pe Léi oñeʼẽva umi tembiporúre?

¹⁶ Jahechamína peteĩ ehémplo ohechaukáva mbaʼéichapa jatrata vaʼerã ñane ermanokuérape. Jehová témplope ningo oĩ vaʼekue umi tembiporu ojepurúva Jehová adorasiónpe g̃uarã añoite. Pe Léi Mosáika oexplika porã mbaʼéichapa umi levita oipuru vaʼerã umíva, ha heʼi peteĩ persóna ndojapóiva oĩháicha upépe omano vaʼerãha (Núm. 1:50, 51). Koʼág̃a ñapensami: Jehovápe g̃uarã iñimportanteterei kuri mbaʼéichapa ojepuru ha oñeñangareko umi tembiporu oĩvare témplope. Upéicharõ, jaʼekuaa haʼe koʼýte hakateʼỹha umi isiérvo oñemeʼẽvare chupe ha ifiélva. Jehová ohechauka porã ñandéve ñanemombaʼetereiha heʼívo: “Oimeraẽ opokóva penderehe opoko hína che resaʼỹire” (Zac. 2:8).

17. ¿Mbaʼépa “Jehová osegi ohendu ha oñatende”?

¹⁷ Malaquías heʼi kuri Jehová osegiha “ohendu ha oñatende” mbaʼéichapa ojotrata isiervokuéra (Mal. 3:16). “Jehová oikuaa umi imbaʼévape” (2 Tim. 2:19). Haʼe oraha enkuénta entéro mbaʼe jaʼéva ha jajapóva (Heb. 4:13). Por ehémplo, Jehová ohecha ndajatrataporãi jave ñane ermanokuérape. Péro avei ohecha jarresivi porã jave chupekuéra, ñandepojera, ñaperdona ha ñanembaʼeporãrõ (Heb. 13:16; 1 Ped. 4:8, 9).

“JEHOVÁ NINGO NDAHESARAIMOʼÃI IPUÉVLOGUI”

18. ¿Mbaʼéichapa ikatu jaagradese Jehovápe ñandeporavo haguére isiervorã?

¹⁸ Katuete ningo jahechaukase Jehovápe javyʼaitereiha ñapertenese haguére chupe. Ñañemeʼẽrõ guare Jehovápe jadesidi kuri pe mbaʼe iporãvéva. Jaikóramo jepe “umi hénte aña ha mbaʼe vai apoha apytépe”, jaipota ohechakuaa hikuái ndajajapoiha “mbaʼeve ivaíva” ha jahesapeha “mbaʼerendýicha [...] ko múndope” (Filip. 2:15). Upévare jajedesidíma ndajajapomoʼãiha mbaʼeve ombojeguarúva Jehovápe (Sant. 4:7). Avei ñande jahayhu ha jarrespeta ñane ermanokuérape, pórke haʼekuéra ñandéicha avei Jehová mbaʼe hína (Rom. 12:10).

19. ¿Mbaʼéichapa Jehová ovendesíta umi opertenesévape chupe?

¹⁹ La Biblia opromete: “Jehová ningo ndahesaraimoʼãi ipuévlogui” (Sal. 94:14). Ko promésa katuete oñekumplíta. Jehová oĩta ñande ykére toiko la oikóva. Haʼe arakaʼeve ndahesaraimoʼãi ñandehegui, ñamanóramo jepe (Rom. 8:38, 39). “Jaikovéramo, jaiko ñamombaʼe hag̃ua Jehovápe, ha ñamanóramo, ñamano ñamombaʼe hag̃ua Jehovápe. Upéicharõ, jaikove térã ñamanóramo, ñande Jehová mbaʼe hína” (Rom. 14:8). Jaipotaitereíma Jehová omoingove jey umi iñamígo ifiélva omano vaʼekuépe (Mat. 22:32). Koʼág̃a voi ñande jarresivíma heta rregálo ñande Rúgui. Heʼiháicha la Biblia: “Ovyʼa umi hénte oadoráva Jehovápe, haʼekuéra hína pe puévlo Ñandejára oiporavo vaʼekue imbaʼerã” (Sal. 33:12).