Oikóramo peteĩ desástre naturál
¿REHASÁMAPA nde avei koichagua situasiónre? Oimérõ upéicha ikatúta rentende umi mbaʼe oñandúva umi persóna ohasáva koʼã mbaʼére, por ehémplo oñemondýi, ojedesespera, ndoikuaái mbaʼépa ojapóta, ndogueroviaséi la oikóva ha avei ndaikatúi oke porã osoñamba rupi pe oiko vaʼekue. Hetaiterei persóna ohasáva koʼãichagua situasiónre oñeñandu yvýre, ha ikaneʼõiterei ndoikuaáigui mbaʼépa ojapóta ikatu hag̃uáicha ojerrekupera.
Oiméramo reperdepaite reguerekomíva guive peteĩ desástre naturál káusare, ikatu hína reñandu ndaikatumoʼãiha ndepuʼaka upe situasiónre. Ikatu avei eñepyrũ epensa ikuentaveha remano repytuʼu hag̃ua. Upéicharõ jepe, la Biblia ohechauka mbaʼérepa ndovaléi ñañentrega ijetuʼúramo jepe umi mbaʼe jahasáva, ha ohechauka añetehápe ikatuha jajerovia koʼẽrõitéma ikatutaha jaiko porãve.
LA BIBLIA NEPYTYVÕTA ANI HAG̃UA REÑENTREGA
Eclesiastés 7:8 heʼi: “Igústo ñañepyrũ jajapo álgo, péro ñatermina rire igustovéntema”. Oiméramo ndeafekta ramoite peteĩ desástre naturál, ha reñehaʼã hína rejerrekupera hag̃ua, ikatu repensa: “Ikuentave ningo añentregántema”. Péro nepasiénsia ha resegíramo reñehaʼã, katuete omehoráta ne situasión.
Ñandejára opromete ñandéve Isaías 65:19-pe: “Avave nahasẽmoʼãvéima ha ndaiporimoʼãvéima ojaheʼóva”. Ko promésa oñekumplíta Ñandejára Rréino ojapo vove ko yvýgui peteĩ paraíso (Salmo 37:11, 29). Arakaʼeve ndoikomoʼãvéi umi desástre naturál. Entéro umi mbaʼe vai jahasa ha ñañandu vaʼekue ñandeafektágui umi desástre naturál opáta pára siémpre. Ñandejára Todopoderóso opromete: “Avave naimanduʼamoʼãi umi mbaʼe oiko vaʼekuére yma, umíva ojeietétama pene korasõgui” (Isaías 65:17).
Epensamíntena, ñande Apohare heʼi: “Perekóta esperánsa ha peneraʼarõta heta mbaʼe porã”. Haʼe ningo opreparapaitéma entéro mbaʼe ikatu hag̃uáicha Irréino rupive jaiko pyʼaguapýpe (Jeremías 29:11). ¿Ikatúpa ko esperánsa nepytyvõ ani hag̃ua reñentrega? Teresa, oñemensionáma vaʼekue pe primer artíkulope heʼi: “Ñapensáramo umi mbaʼe iporãitéva ñaneraʼarõva amo gotyove Ñandejára Rréino poguýpe, ikatúta jaheja tapykuépe umi mbaʼe vai jahasa vaʼekue, ha avei ikatúta jagueropuʼaka umi mbaʼe oikóva koʼág̃a”.
¿Mbaʼépa ojapovéta Ñandejára Rréino amo gotyove? Tuichaiterei ningo nepytyvõta reaprendéramo hetave mbaʼe ko Rréinogui. Upéicha rejapóramo rehechakuaáta ndovaleiha reñentrega ndeafektáramo jepe peteĩ desástre naturál, ha avei koʼẽrõite ndoikomoʼãveimaha koʼã mbaʼe vaiete. Péro koʼág̃ama voi umi konsého oĩva la Bíbliape ikatu nepytyvõ regueropuʼaka hag̃ua koʼã situasión. Jahechamína unos kuánto ehémplo.