¡Peñatendéke ani avave pendereity iñuhãme!

1. Heʼiháicha Colosenses 2:4, 8, ¿mbaʼéichapa Satanás oñehaʼã oreko ipoguýpe umi mbaʼe ñapensáva?

SATANÁS oipota jaheja Jehovápe. Upearã haʼe oñehaʼã okambia ñandehegui ñapensa lája, añetehápe haʼe orekose voi ipoguýpe umi ñane pensamiénto ñapensa hag̃ua haʼe oipotaháicha. Haʼe oipuru umi mbaʼe ñandegustáva ikatu hag̃uáicha ñanembotavy térã ñanekonvense jasegi hag̃ua chupe (elee Colosenses 2:4, 8).

2, 3. a) ¿Mbaʼérepa ñañatende porã vaʼerã pe konsého oĩvare Colosenses 2:8-pe? b) ¿Mbaʼépa jahecháta ko artíkulope?

² ¿Ikatu piko añete Satanás ñanembotavy? ¡Si, ikatu! Ñanemanduʼa vaʼerã Pablo ndoskrivíri hague pe konsého oĩva Colosenses 2:8-pe umi ndahaʼéivape g̃uarã kristiáno, síno umi unhídope voi (Col. 1:2, 5). Satanás ikatu kuri ombotavy koʼã kristiánope upe tiémpope, ha ñandéve koʼytevéntema ikatu ñanembotavy koʼág̃arupi (1 Cor. 10:12). ¿Mbaʼérepa? Pórke Satanáspe oñemombo ko yvy ape ári, ha oñehaʼãmbaite hína ombotavy Ñandejára siervokuéra ifiélvape (Apoc. 12:9, 12, 17). Hiʼarive jaiko peteĩ tiémpo ijetuʼuetereívape, pórke umi kuimbaʼe aña ha hovamokõiva “oho vai vaive” hína (2 Tim. 3:1, 13).

³ Ko artíkulope jahecháta mbaʼéichapa Satanás oipuru umi “vyrorei” ñanembotavy hag̃ua, ha péicha ñakambia ñapensa lája. Ñaanalisáta mbohapy “ñuhã” Satanás oipurúva (Efes. 6:11). Upe rire, pe artíkulo oúvape jahecháta mbaʼéichapa ikatu ñakambia ñapensa lája anivéma hag̃ua Satanás ñanembotavy. Péro ñepyrũrã jahecháta mbaʼéichapa Satanás ombotavy vaʼekue umi israelítape oike rire hikuái pe Tiérra Prometídape, ha mbaʼépa ñaaprende upévagui.

SATANÁS OÑEHAʼÃ OMOÑUHÃ UMI ISRAELÍTAPE OADORA HAG̃UA UMI TAʼANGA

4-6. Heʼiháicha Deuteronomio 11:10-15, ¿mbaʼe ipyahúvapa oaprende vaʼerã kuri umi israelita oike rire pe Tiérra Prometídape?

⁴ Satanás ningo iletradoiterei ha ombotavy vaʼekue umi israelítape oadora hag̃ua umi taʼanga. ¿Mbaʼéichapa ojapo upéva? Haʼe oikuaa umi israelita oikotevẽha hiʼupy, ha oaprovecha upéva ojapoka hag̃ua chupekuéra haʼe oipotáva. Haʼekuéra oikérõ guare pe Tiérra Prometídape oaprende vaʼerã peteĩ fórma pyahu oñemitỹ hag̃ua. Oĩ aja Egíptope, umi israelita oipuru vaʼekue y pe Rrío Nílogui orrega hag̃ua ikokue. Péro pe Tiérra Prometídape ndaipóri vaʼekue peteĩ rrío tuicháva ojerrega hag̃ua umi kokue, upévare oikotevẽ hikuái pe amáre ha pe ysapýre (elee Deuteronomio 11:10-15; Is. 18:4, 5). Upéicha rupi umi israelita oaprende vaʼerã peteĩ fórma pyahu ombaʼapo hag̃ua kokuépe. Ha upéva ijetuʼúta kuri chupekuéra, pórke la majoría umi oñemitỹkuaa vaʼekue omanombáma kuri pe desiértope.

⁵ Jehová omyesakã chupekuéra okambiamaha la isituasionkuéra. Péro upéi omeʼẽ chupekuéra peteĩ konsého haʼetévaicha naisentídoiva, pórke oñeñeʼẽ hína kokuére. Jehová heʼi: “Peñatendékena ani pene korasõ pendegueraha tape vaíre ha peadora umi ótro dióspe ha peñesũ henondépe” (Deut. 11:16, 17). ¿Mbaʼérepa Jehová oavisa umi israelítape ani hag̃ua oadora umi dios fálsope, heʼírõ guare idiferentetaha mbaʼéichapa oñemitỹta hikuái?

⁶ Jehová oikuaa vaʼekue umi israelita oaprendesetaha mbaʼéichapa oñemitỹ vaʼerã umi puévlo ndoservírivagui Ñandejárape. Añetehápe ningo umi ivesinokuéra ivakeanove vaʼekue upe mbaʼépe, upévare Ñandejára puévlo ikatu kuri oaprende chuguikuéra algúna kósa ideprovéchotava chupekuéra. Péro upéva ipeligróso kuri. Umi cananeo oadora vaʼekue Baálpe, ha pe oñemitỹ lája ohechauka vaʼekue ojeroviaha hese. Haʼekuéra opensa vaʼekue Baal haʼeha pe yvága jára ha pe omboúva ama, péro Jehová ndoipotái vaʼekue oñembotavy ipuévlope oguerovia hag̃ua koʼãichagua japu. Upéicharõ jepe, umi israelita heta vése odesidi oadora Baálpe (Núm. 25:3, 5; Juec. 2:13; 1 Rey. 18:18). ¿Mbaʼéichapa umi israelítagui oiko vaʼekue Satanás prisionéro? Jahechami.

MBOHAPY ÑUHÃ OIPURU VAʼEKUE SATANÁS OMBOTAVY HAG̃UA UMI ISRAELÍTAPE

7. ¿Mbaʼéichapa oñemoĩ a pruéva umi israelita jerovia oike rire hikuái pe Tiérra Prometídape?

⁷ Umi israelita oipota vaʼekue oky ojerrega hag̃ua umi kokue, ha añetehápe upe deséo ndaivaíri vaʼekue, péro Satanás oipuru upéva omoñuhã hag̃ua chupekuéra. Pe Tiérra Prometídape ningo saʼieterei oky vaʼekue abril paha guive septiembre peve. Upévare umi israelita odepende vaʼekue umi ama ou ñepyrũvare octúbrerupi, pórke upéichamante ikogakuéra osẽ porãta ha ikatúta oñemantene hikuái. Satanás ombotavy umi israelítape ogueroviakávo chupekuéra osegi vaʼerãha umi kostúmbre orekóva umi ivesinokuéra ndoservíriva Ñandejárape, ha péichamante ikatutaha osẽ porã ikogakuéra ha osegi oikove hikuái. Koʼã puévlo oĩva ijererekuéra oguerovia vaʼekue umi idioskuéra omboutaha ama ojapóramo añoite chupekuéra umi rríto rrelihióso. Umi israelita ndojeroviáiva Jehováre opensa vaʼekue osegi vaʼerãha koʼã kostúmbre, ani hag̃ua ou ipukueterei pe séka tiémpo, upévare oñepyrũ ojapo umi rríto rrelihióso pe dios fálso Baálpe g̃uarã.

8. ¿Mbaʼeichagua ñuhãpa oipuru avei Satanás? Emyesakã mbaʼéichapa oipuru.

⁸ Satanás oipuru avei umi deséo vai orekóva umi israelita omoñuhã hag̃ua chupekuéra. Umi nasión oĩva ijererekuéra ojapo vaʼekue umi mbaʼe tieʼỹ oporombojeguarúva oadora hag̃ua idioskuérape. Por ehémplo, umi témplope oĩ vaʼekue umi prostitúta ha prostitúto. Koʼã nasiónpe oñepermiti vaʼekue pe omosexualida ha opaichagua tekovai, ha koʼã mbaʼe normál vaʼekue chupekuéra g̃uarã (Deut. 23:17, 18; 1 Rey. 14:24). Koʼã nasión ndoadoráiva Ñandejárape oguerovia vaʼekue koʼãichagua rrituál omokyreʼỹha idioskuérape omboprodusi porã hag̃ua pe yvy. Heta israelítape ogusta vaʼekue umi rrituál itieʼỹva ojapóva umi nasión, ha oheja upéva omoñuhã chupekuéra ha oñepyrũ oservi umi dioskuérape. Añetehápe haʼekuéra oheja Satanás oity chupekuéra iñuhãme.

9. Heʼiháicha Oseas 2:16, 17, ¿mbaʼéichapa Satanás okonfundi umi israelítape ani hag̃ua oikuaa mávapa Jehová?

⁹ Satanás oipuru avei ótro ñuhã, okonfundi umi israelítape ani hag̃ua oikuaa mávapa Jehová. Proféta Jeremías tiémpope, Jehová heʼi vaʼekue umi proféta japu oipota hague pe puévlo hesarái héragui “Baal káusare” (Jer. 23:27). Amalisia Ñandejára puévlo ndoipuruvéi Jehová réra ha hekovia oipuru Baal réra, heʼiséva “Che jára” térã “Che patrón”. Upéicha rupi umi israelita ndohechakuaavéima mbaʼépepa idiferénte Ñandejára ha Baal, ha oñepyrũma ombojeheʼapa hikuái umi mbaʼe ojapóva oadora hag̃ua Jehovápe, ha umi rríto ojapóva oadora hag̃ua Baálpe (elee Oseas 2:16, 17 ha pe nóta).

UMI ÑUHÃ OIPURÚVA SATANÁS ÑANE TIÉMPOPE

10, 11. a) ¿Mbaʼeichagua ñuhãpa oipuru Satanás koʼág̃arupi? b) ¿Mbaʼéichapa Satanás okonfundi la héntepe?

¹⁰ Satanás oipuru avei koʼág̃arupi umi mbohapy ñuhã. Haʼe ombotavy ha oity umi héntepe iñuhãme oipurúvo umi deséo ndaivaíriva, omboligávo la héntepe hekovai hag̃ua ha okonfundívo chupekuéra ani hag̃ua oikuaa mávapa Jehová. Jahecha raẽna pe tercer ñuhã oipurúva Satanás.

¹¹ Satanás okonfundi la héntepe ani hag̃ua oikuaa mávapa Jehová. Omano rire Jesús apostolkuéra, umi heʼíva ijehe kristianoha oñepyrũ omboʼe heta japu (Hech. 20:29, 30; 2 Tes. 2:3). Koʼã apóstata oñepyrũ okonfundi umi héntepe ani hag̃ua oikuaa mávapa Ñandejára tee. Por ehémplo, haʼekuéra okopiárõ guare la Biblia ndoipuruvéi Ñandejára réra, ha omoĩ hekovia “Señór”, “ñande Ruvicha”, “Ñandejára”, térã ótro título. Upéicha rupi ijetuʼu vaʼekue umi oleévape g̃uarã la Biblia oikuaa hag̃ua Ñandejára Jehová réra, ha opilla hag̃ua haʼe idiferenteha umi ótro diósgui (1 Cor. 8:5). Haʼekuéra oipuru peteĩ títulonte oñeʼẽ hag̃ua Jehová ha Jesús rehe, upévare umi hénte ndaikatúi ohechakuaa Ñandejára ha Itaʼýra ndahaʼeiha la mísma persóna (Juan 17:3). Upéva káusare oñepyrũ vaʼekue ojeguerovia pe Trinida, la Biblia nomboʼéiramo jepe upéva. Upéicha rupi heta hénte oimoʼã ndaikatuiha voi jaikuaa Ñandejárape. ¡Ajépa ivaiete ko japu oñemboʼéva! (Hech. 17:27).

12. a) ¿Mbaʼépa umi rrelihión japu omboliga la héntepe ojapo hag̃ua? b) ¿Mbaʼépa oiko upéva káusare, heʼiháicha Romanos 1:28-31?

¹² Satanás oipuru umi deséo vai orekóva umi hénte. Umi israelita tiémpope, Satanás ojevale vaʼekue umi rrelihión japúre omboliga hag̃ua la héntepe hekovai hag̃ua. Ñane tiémpope upeichaite avei ojapo. Umi rrelihión fálsape oñepermiti oĩ umi hekovaíva ha oipota voi la hénte ohecha koʼã mbaʼe ku ndaivairirõguáicha. Upéicha rupi, heta heʼíva ijehe oserviha Ñandejárape, omboyke umi mandamiénto oĩva la Bíbliape heʼi porãva ñandéve ñanderekopotĩ vaʼerãha. ¿Mbaʼépa oiko umi rrelihión japu omboliga rupi la héntepe hekovai hag̃ua? Apóstol Pablo ombohovái upéva oskrivírõ guare ikárta umi rrománope (elee Romanos 1:28-31). Umi mbaʼe “ojejapoʼỹ vaʼerã” apytépe oĩ opaichagua tekovai, ha umívape oike avei pe omosexualida (Rom. 1:24-27, 32; Apoc. 2:20). ¡Ajépa iñimportantete ñakumpli umi mbaʼe omboʼéva la Biblia!

13. ¿Mbaʼeichagua ñuhãpa oipuru avei Satanás?

¹³ Satanás oipuru umi deséo ndaivaíriva. Ñande ningo ñaaprendese umi mbaʼe ñanepytyvõtava ñamantene hag̃ua ñane famíliape ha ñandejupe voi (1 Tim. 5:8). Koʼã mbaʼe ñaaprende jepi jahávo eskuélape, koléhiope ha jastudia porãvo. Péro ñañatende porã vaʼerã. Heta tetãme oñemboʼéramo jepe umi mbaʼe ideprovéchotava, oñemboʼe avei heta filosofía térã yvypóra arandu. Por ehémplo, oñemboʼe umi estudiántepe oduda hag̃ua Ñandejára oexistiha ha ani hag̃ua orrespeta la Biblia. Ojeʼe chupekuéra umi iñintelihénteva guive ogueroviaha pe evolusión rupive oñepyrũ hague la vída (Rom. 1:21-23). Koʼã mbaʼe ningo oñemoĩ Ñandejára arandu rehe (1 Cor. 1:19-21; 3:18-20).

14. ¿Mbaʼépa pe yvypóra arandu omokyreʼỹ la héntepe ojapo hag̃ua?

¹⁴ Yvypóra arandu ndorekói enkuénta umi mbaʼe Jehová omboʼéva, ha oñemoĩ voi katu umívare. Upéva nomokyreʼỹi avavépe osegi hag̃ua umi mbaʼe oúva Ñandejára espíritugui, síno pe “yvypóra rembipota vai” (Gál. 5:19-23). Umi oaprendéva yvypóra arandu oñepyrũ jepi ijorgullóso ha ijejapo, ha upéicha rupi ‘ijehénte ojepyʼapy’ (2 Tim. 3:2-4). Koʼã mbaʼe ningo idiferentete hína Ñandejára ojerurévagui isiervokuérape, pórke haʼe oipota ñanevuéno ha ñaneumílde (2 Sam. 22:28). Oĩ ermáno térã ermána oho vaʼekue universidápe ha upéi oñepyrũ vaʼekue opensa ko múndope oñepensaháicha, oasepta rangue Ñandejára heʼíva. Jahechamína peteĩ experiénsia ohechauka porãva upéva.

15, 16. ¿Mbaʼépa ñaaprende upe oiko vaʼekuégui peteĩ ermánare?

¹⁵ Peteĩ ermána oservíva de tiémpo kompléto mas de 15 áñoma, omombeʼu: “Che ningo ajevautisa rire heta vése alee ha ahendu kuri ipeligrosoha jaha universidápe, péro che napenái kuri umi konséhore. Che apensa vaʼekue umi konsého ndahaʼeiha chéve g̃uarã”. ¿Mbaʼe provlémapa haʼe ombohovái upéicha rupi? Haʼe orrekonose: “Aipuru hetaiterei tiémpo astudia hag̃ua ha heta añehaʼã osẽ porã hag̃ua chéve che estúdio, upévare nachetiempovéima añemboʼe hag̃ua Jehovápe yma ajapo haguéicha. Avei chekaneʼõitereígui ndavyʼavéima predikasiónpe, ha ndaikatuvéi ni ajeprepara porã rreunionrã. Upéinte ahechakuaa añemeʼẽmbaitéma hague umi che estudiokuérape, ha upéva káusare añemomombyry hague ahávo Jehovágui. Upépe apilla ahejáma vaʼerãha che estúdio, ha ajapo upéva”.

¹⁶ ¿Mbaʼéichapa umi estúdio oafekta pe ermána opensa lája? Haʼe heʼi: “Che ningo atĩeterei voi arrekonose hag̃ua pe edukasión arresivi vaʼekue universidápe chemboʼe hague amañaiterei hag̃ua che rapichakuéra deféktore, koʼýte umi orekóvare umi ermanokuéra. Avei añepyrũ cheexihenteterei ha ahaʼarõ ojapove hikuái pe ikatúvagui, ha ipahápe ajapartáma chuguikuéra. Hasypeterei ningo akambia anivéma hag̃ua apensa péicha. Upe oiko vaʼekue chemboʼe peteĩ mbaʼe iñimportánteva: Ipeligrosoiterei nañapenáiramo umi konsého omeʼẽvare ñande Ru yvagapegua iñorganisasión rupive. Añetehápe ni che ndajekuaái raʼe Jehová chekuaaháicha. ¡Hetaite akãrasýgui ajei vaʼerãmoʼã ahendúrire chupe!”.

17. a) ¿Mbaʼépa jajedesidi vaʼerã jajapo? b) ¿Mbaʼépa ohechaukáta ñandéve pe artíkulo oúva?

¹⁷ Aníkena jaheja arakaʼeve Satanás múndo ñandereity iñuhãme “yvypóra arandu” rupive ni umi “vyrorei” omboʼéva rupive. Jasegi vaʼerã ñañatende ani hag̃ua núnka Satanás ñanembotavy (1 Cor. 3:18; 2 Cor. 2:11). Aníkena arakaʼeve jaheja Satanás ñanekonfundi ha ñanderesarái mávapa Jehová ha mbaʼéichapa haʼe oipota jaservi chupe. Ñanderekopotĩkena Jehová oipotaháicha, ha ani ñapermiti Satanás ñandereity iñuhãme ha nañapenavéi Jehová konséhore. Péro, ¿mbaʼépa jajapo vaʼerã jahechakuaárõ ko múndo oafektáma hague ñapensa lája? Pe artíkulo oúva ohechaukáta mbaʼéichapa la Biblia ikatu ñanepytyvõ ñahundi hag̃ua umi pensamiénto ha kostúmbre “hapo pypukúva” jarekóva (2 Cor. 10:4, 5).